Ўзбекистон Doing Business 2020 (“Бизнес юритиш-2020”) рейтингида ўтган йилга нисбатан етти поғона юқорилади.
Янги рейтингда Ўзбекистон 190 мамлакат ичида 69-ўринни эгаллаган. Ўтган йилги рейтингда мамлакат 76-ўринни эгаллаганди.
Бу йилги рейтингда ҳам Ўзбекистон “Қурилишга рухсат олиш” (132-ўрин) ва “Халқаро савдо” (152-ўрин) кўрсаткичлари бўйича бошқа мамлакатлардан анча орқада қолаётганини кўриш мумкин.
Жаҳон банки ва Халқаро молия корпорацияси томонидан ҳар йили эълон қилинадиган рейтингда бу йил 1-ўринни Янги Зеландия, 2-ўринни Сингапур, 3-ўринни эса Ҳонконг эгаллаган.
Марказий Осиё мамлакатлари орасида рейтинг бўйича Қозоғистон энг яхши кўрсаткичларга (25-ўрин) эга. Қирғизистон бу йилги рейтингда 10 поғона қуйилаб (80-ўрин), Ўзбекистондан ҳам пастроқ кўрсаткичга эга бўлган. Тожикистонда эса бу йил 20 поғона юқорилаганига қарамай, ҳамон 106-ўринда қолмоқда.
Ўзбекистон ҳукумати 2017 йили Doing business рейтингида мамлакат позициясини ҳар йили 10 поғонага яхшилаб, 2021 йилгача 40-ўринга кўтарилиш кўзда тутилган қарор қабул қилганди. Йиллик ўсиш суръатлари назарда тутилса, икки йилдан сўнг бу маррага етиш бироз маҳолдай кўринмоқда.