Жорий йилнинг 17 июнь куни “Тахиатош иссиқлик электр станцияси”да 280 МВт қувватдаги иккинчи буғ-газ қурилмаси ишга туширилди.
“Иссиқлик электр станциялари” АЖ матбуот хизмати иддаосига кўра, ушбу буғ-газ қурилмасининг ишга туширилиши Қорақалпоғистон Республикаси ва Хоразм вилоятининг электр энергиясига бўлган эҳтиёжини таъминлашга хизмат қилади.
Қайд этилишича, мазкур инвестицион лойиҳа Ўзбекистон президенти томонидан 2017 йил 11 сентябрида имзоланган “Тахиатош ИЭСда 230 – 280 МВт қувватга эга иккита буғ-газ қурилмаларини қуриш” инвестиция лойиҳасини амалга оширишга оид қўшимча чора-тадбирлар тўғрисида”ги қарорга мувофиқ амалга ошириляпти
“Иссиқлик электр станциялари” АЖ лойиҳа замонавий илғор технологиялар асосида Жанубий Кореянинг Hyundai Engineering ва Hyundai Engineering & Construction компаниялари консорциуми билан ҳамкорликда амалга оширилаётганини қўшимча қилган.
“Тахиатош иссиқлик электр станцияси”да 280 МВт қувватга эга бўлган биринчи буғ-газ қурилмаси шу йил 3 апрелида ишга туширилганди.
Ўтган йил июлида мазкур ИЭСда авария юз бериши оқибатида Хоразм вилояти ва Қорақалпоғистон Республикасининг бир неча туманлари электр энергиясиз қолганди.