Ўзбекистонда электромобилларни ўз номига олиб кирмоқчи бўлганлар ҳамда расмий дилер бўлмаган хусусий тадбиркорлар учун навбатдаги талаб жорий этилди.

Kun.uz нашрининг UzTest матбуот хизматидан олинган маълумотга таянган ҳолда ёзишича, энди мувофиқлик сертификати олиш жараёнида машинани электромагнит мослашувчанлиги бўйича ҳам текширувдан ўтказиш лозим бўлади.

Расмийлар бу чорани “бир транспорт воситаси бошқа автомобилга зиён етказишининг олдини олиш” мақсади билан асослаган.

Мамлакатдаги расмий дилерлар электромагнит мослашувчанлиги бўйича текширувдан ўтиб келган. Бундан кейин расмий дилер бўлмаган автосалонлар учун ҳам бу тартиб қўлланади.

Текширув нархи бензинда юрадиган машиналар учун 9 миллион 88 минг сўмни, электромобиллар учун эса 6 миллион 300 минг сўмни ташкил этади. Бу тариф 7 тагача ўриндиққа эга бўлган енгил машиналарга амал қилади. Транспорт воситаларининг тоифасига қараб нарх яна ўзгаради.

Таҳлилчилар янги жорий қилинган талабни электромобиллар импорти учун навбатдаги сунъий тўсиқ ўлароқ баҳолашмоқда.

Бу талаб мамлакатни электромобиллаштириш ва энергосамарадорликни ошириш йўлидаги ислоҳотларга зид экани ҳам айтиляпти.

Шу билан бирга, ҳукумат электромобиллар импорти учун бож жорий этиши мумкинлиги ҳақида хавотирлар ҳам пайдо бўлган.

Наманган вилояти Поп туманида 9-синф ўқувчиси пахта юкланган тиркамадан йиқилиши оқибатида ҳалок бўлди.

Болалар омбудсмани Daryo.uz нашрига ҳолат ўрганилаётганини маълум қилган.

Аниқланишича, 3 ноябрь куни 2003 йилда туғилган А.А. (эркак) трактор ва унга уланган тиркамани зовур бўйидан ўтувчи ички йўлда бошқариб кетаётганда, тракторга уланган боғловчи тортқич узилиб кетиши оқибатида тиркама зовурга йиқилган. 2009 йилда туғилган Т.П. (ўғил бола) жароҳат натижасида вафот этган.

Бош прокуратура матбуот котиби Ҳаёт Шамсутдиновга кўра, ҳолат юзасидан вилоят ИИБ томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Тергов ҳаракатлари олиб борилмоқда.

Ўзбекистонда ҳар йили пахта терими мавсумида йўл ҳаракати қоидаларига риоя қилмаслик ёки техник ноқисликлар туфайли авариялар содир бўлади.

Озодлик аввалги йилларда ҳам “Пахта қурбонлари” туркумида инсоний талафотларга олиб келган ҳодисалар ҳақида хабар қилган.

Тошкент вилояти Чирчиқ шаҳри ҳокими ўринбосари 1 миллион доллар олган вақтида ушланди, дея маълумот тарқатди ДХХ матбуот хизмати.

Қайд этилишича, ҳоким муовини кластер шаклидаги савдо мажмуаси ташкил этиш учун 40 миллион доллар инвестиция киритиш шарти билан, ҳокимлик захирасидаги 20 гектар ер майдонини кимошди савдосида ютиб бериш ва 49 йил муддатга ерга эгалик қилиш ҳуқуқини расмийлаштиришда кўмаклашиш эвазига 2 миллион доллар талаб қилган.

У бўнак сифатида 1 миллион долларни ҳайдовчиси орқали олган вақтида ушланган.

Хизмат мавқеидан фойдаланиб, жуда кўп миқдорда пора олган ҳоким ўринбосарига нисбатан Жиноят кодексининг 210-моддаси 3-қисми “а” банди билан жиноят иши қўзғатилган ва унга нисбатан қамоқ эҳтиёт чораси қўлланган.

ДХХ матбуот хизмати 5 ноябрь куни Сирдарё вилояти Ховос тумани ҳокими ўринбосари коррупцияга алоқадор жиноятлар ортидан 7 йилга озодликдан маҳрум этилгани ҳақида ҳам маълумот тарқатган.

Биринчи ноябрь куни эса маҳаллий матбуот Андижон вилояти ҳокимининг собиқ ўринбосари – вилоят инвестициялар, саноат ва савдо бошқармаси бошлиғи Ботиржон Ҳамроев қамоққа олингани ҳақида хабар берганди.

Бюджет маблағини талон-торож қилиш, мансаб ваколатини суиистеъмол қилишга доир жиноят иши доирасида терговга жалб этилган мулозимнинг уйидан 3 миллион доллар топилгани айтилган.

Ҳоким муовинлари коррупциявий жиноятларда айблангани ҳақида хабарлар тарқалиши манзарасида ижтимоий тармоқларда “фақат кичик балиқлар эмас, наҳанглар ҳам қўлга олиниши керак” деган фикр илгари сурилмоқда.

Фарғона вилоятидаги жиноят ишлари бўйича Қўштепа тумани суди 4 ноябрь куни Ўзбекистон Республикаси Жиноят кодексининг 154-модда 1-қисми (Ёлланиш), 223-модда 2-қисми а-банди, б-банди билан (Қонунга хилоф равишда чет элга чиқиш ёки Ўзбекистон Республикасига кириш) айбланган Алишер Холиқовни 5 йилга озодликдан маҳрум қилиш ҳақида ҳукм чиқарди. Бу ҳақда Ўзбекистон Олий суди маълумот тарқатди.

1-1512-2402/213-сонли жиноят иши материалларини ўрганган Озодликнинг мобиль мухбирига кўра, Ўзбекистоннинг 51 ёшли ватандоши Россиянинг Украинага қарши урушида иштирок этган. У Россия Мудофаа вазирлиги билан шартнома асосида ҳарбий ҳаракатларда иштирок этган ва дрон орқали ташланган снаряд портлаши оқибатида жароҳат олган.

Иш материалларига мувофиқ, Алишер Холиқов ўтган йилнинг 26 майида “Дўстлик” божхона маскани орқали Қирғизистонга чиқиб, у ердан Ўш–Санкт-Петербург рейсида Россияга учиб кетган ва кейинчалик ҳарбий ҳаракатларга сафарбар қилинган.

Суд ҳукмида айтилишича, Холиқов 2023 йилнинг 24 ноябрида Россия Федерацияси Мудофаа вазирлиги билан бир йил муддатга ҳарбий хизматни ўташ бўйича шартнома имзолаган ва Украинадаги жанговар ҳаракатларга сафарбар қилинган.

У Россия армиясидаги 80 нафар шахс билан бирга Россия–Финляндия чегараси яқинидаги “Каминка” ҳарбий қисмидаги ҳарбий ҳаракатларда иштирок этган. У Россия армиясидаги жанговар ҳаракатлари эвазига 500 минг рубль (64,6 миллион сўм) миқдорида рағбатлантириш олгани аниқланган.

“Икки ой давомида Холиқов “Каминка” қисмида жанговар тайёргарликдан ўтиб, ўқотар қурол ва ўқ-дорилар билан ишлашни ўрганган. Кейин, 24 январь куни у Белгород вилоятининг Майский қишлоғидаги ҳарбий полигонга ўтказилган ва у ерда ўқишни давом эттирган”, дейилган айблов хулосасида.

Суд ҳукмида баён этилишича, унга Белгородда ҳарбий форма, гувоҳнома, жетон ва Калашников автомати берилган. У ерда уч кун давомида Холиқов бошқалар билан биргаликда ўқ отишни машқ қилган ва турли ҳарбий машқларни бажарган.

Мазкур ҳодисани ёритган Gazeta.uz нашрига кўра, Алишер Холиқов Россия Мудофаа вазирлигининг буйруғи билан Ўзбекистоннинг биометрик паспортига эга бўлмаган яна 79 нафар шахс билан биргаликда Ўзбекистон қонунчилигини бузиб, ҳарбий хизматчилар кузатувида Украина чегарасини ноқонуний кесиб ўтган. Ўзини Украинадан мустақил деб эълон қилиб олган Луганск халқ республикаси ҳудудидаги жангларда Алишер Холиқов дрондан туширилган снаряд портлаши оқибатида бошининг чап чакка қисмидан, чап қўли, чап елкаси ва ўнг оёғидан жароҳат олган. Яраланган Холиқов март ойида Москвадаги шифохонада ҳушига келган.

Шу йилнинг 4 июлида Санкт-Петербург — Тошкент рейсида Ўзбекистонга қайтиб келган Алишер Холиқов судда ўз айбига тўлиқ иқрор эканини билдирган.

Холиқов Россия томонида туриб Украинада жанг қилган ўзбекистонликларнинг биринчиси эмас. Озодлик сентябрь ойида Тошкентда суд “Вагнер” хусусий ҳарбий ширкатида хизмат қилган 48 ёшли ўзбекистонлик Б. З. нинг 4 йилга озодлигини чеклаш ҳақида ҳукм чиқаргани ҳақида хабар қилган.

Шунингдек, июль ойи ўрталарида Қорақалпоғистоннинг Амударё туман суди Россия армиясида хизмат қилиш учун шартнома имзолаган, бироқ жанговар тайёргарликни тамомлагач, ҳарбий лагердан қочиб, Ўзбекистонга қайтган фуқаронинг озодлигини 3 йилга чеклаш тўғрисида ҳукм чиқаргани ҳақида хабар қилинганди.

Ундан аввал эса “Вагнер” ХҲШ сафида ярим йил мобайнида Украинада жанг қилган Шавкат Йўлдошевга нисбатан Оҳангарон туман суди томонидан 2 йилу 6 ой муддатга ахлоқ тузатиш ишлари жазоси тайинлангани очиқланган эди.

Ўзбекистон Хитой билан атом энергиясидан тинч мақсадларда фойдаланиш соҳасида ҳамкорлик қилади.

Gazeta.uz нашри хабарига кўра, 4 ноябрь куни Атом энергияси агентлиги директори Азим Аҳмадхўжаев Шанхайдаги ЭКСПО кўргазмаси доирасида China National Nuclear Corporation Overseas ширкати бош директори Веи Фуки билан учрашган.

Музокара якунида Хитойнинг АЭС қуриш тажрибасини ўзлаштириш, Ўзбекистонда Хитойнинг кичик модулли реакторларини (КМР) қўллашни ўрганиш ва потенциал лойиҳаларни амалга ошириш бўйича келишувга эришилган.

Пекин ва Тошкент, шунингдек, уран рудасини қазиб олиш, қайта ишлаш, шунингдек, ишлаб чиқаришни кенгайтириш соҳасидаги ҳамкорлик ва юқори қўшилган қийматли тайёр маҳсулотларни экспорт қилиш ҳамда кейинчалик АЭСларда ёқилғидан фойдаланиш масалаларини муҳокама қилган.

“Ўзатом”га кўра, Хитой томони ядро технологияларининг барча йўналишларида икки томонлама муносабатларни ривожлантиришдан манфаатдор эканини билдирган.

Маълумот ўрнида, Ўзбекистон жорий йил июнь ойида “Росатом” давлат корпорацияси билан кичик қувватли АЭС қурилишига доир ҳужжатни имзолаган. 330 МВт қувватга эга станция (ҳар бири 55 МВт қувватга эга олтита реактор) Жиззах вилоятида (Тузкон кўли) барпо этилади.

Расмий Тошкент Россия ширкати бош пудратчилигидаги КҚАЭС қурилишида хорижий компанияларни ҳам жалб этиш режасини маълум қилган.

“Ўзатом” делегацияси раҳбарияти жорий йил август ойида лойиҳада иштирок этиш истагини билдирган, яъни турбина ускуналари, генераторлар ва қуруқ градирнялар (АЭС ускуналарини совитувчи қурилма) етказиб беришни режалаштирган Хитой компаниялари вакиллари билан учрашганди.

Ўзбекистон АҚШ билан Жаҳон савдо ташкилотига (ЖСТ) аъзо бўлиш бўйича икки томонлама музокараларни якунлади. Бу ҳақда Президентнинг ЖСТ масалалари бўйича махсус вакили Азизбек Урунов LinkedIn платформасидаги саҳифаси орқали маълум қилди.

“14 ойлик фаол музокаралар ўз мантиқий манзилига етди! Бу осон бўлмаган йўл, мураккаб, аммо мазмунли музокаралар, умр бўйи эсда қоладиган тажриба бўлди” , деб ёзди у.

Томонлар бозорга кириш тўғрисидаги баённомани имзолашга тайёргарлик кўраётгани айтилмоқда.

Ҳозирга қадар Ўзбекистон бир қатор давлатлар билан ЖСТга аъзо бўлиш бўйича музокараларни якунлади. Қўшма Штатлар бу борада 21-давлат бўлди.

Ўзбекистон ЖСТга аъзо бўлиши бўйича музокараларни қарийб 15 йиллик танаффусдан сўнг 2020 йил июль ойида қайта бошлаган. Расмий Тошкент аъзолик жараёнини имкон қадар тезроқ якунлаш ниятида эканини билдирган. Жумладан, жорий йил 5 июнь куни ЖСТ бош директори Нгози Оконжо-Ивеалани қабул қилган президент Шавкат Мирзиёев Ўзбекистоннинг тез фурсатда мазкур халқаро тузилмага аъзо бўлиш истагини урғулаган.

2023 йил август ойида мамлакат қонунчилигини ЖСТ келишувларига уйғунлаштиришга қаратилган фармон қабул қилинган.

Ўзбекистон ЖСТ билан ташкилотнинг бутун тарихи давомида энг узоқ музокара олиб борган давлатдир. Бу йил музокаралар бошланганига 30 йил тўлди.

ЖСТ аъзо давлатлар ўртасидаги савдо қоидалари билан шуғулланувчи ягона глобал халқаро ташкилот бўлиб ҳисобланади.

Ушбу тузилмага аъзолик рақобатбардошлик ва савдо ҳажмини оширишга кўмаклашади.

Ўзбекистон бокс федерацияси Умар Кремлёв раҳбарлигидаги Халқаро бокс ассоциациясини (IBA) тарк этиб, World Boxing халқаро бокс ташкилоти аъзолигига қабул қилинди.

Ташкилот матбуот хизмати маълумотига кўра, 3 ноябрь куни АҚШнинг Колорадо штатида Жаҳон бокс федерациясининг йил якунларига бағишланган конгрессида Ўзбекистон, Қозоғистон, Гватемала ва Лаос тузилмага аъзо бўлгани эълон қилинган. Шу тариқа ташкилотга аъзо миллий федерациялар сони 55 тага етган.

Ўзбекистон бокс федерацияси бу маълумотни ҳали расман тасдиқлагани йўқ.

Маълумот ўрнида, Париж-2024 Олимпиадасидан олдин Халқаро олимпия қўмитаси (ХОҚ) IBA’га аъзо бўлган миллий федерациялар спортчиларига 2028 йилги ёзги Олимпиада ўйинларида иштирок этишни тақиқлаганди.

ХОҚ қарори Ўзбекистон бокс федерациясини қийин танлов қаршисида қолдиргани ва пировардида Тошкент World Boxing аъзолигини танлагани айтилмоқда.

ХОҚ ва IBA ўртасидаги зиддият бир неча йилдан буён давом этяпти. Аввалроқ ХОҚ халқаро спорт федерацияларига Россия ва Беларусь спортчиларини халқаро мусобақалардан четлатишни тавсия қилган эди. IBA бу тавсияга амал қилмаган ҳолда Тошкентда 2023 йил май ойида ўтган бокс бўйича жаҳон чемпионатида бу икки давлат спортчиларини ўз миллий байроқлари остида қатнашишига рухсат берган. Бунинг ортидан Тошкентдаги мусобақалар 19 та давлат томонидан бойкот қилинган.

2021 йилнинг декабригача AIBA номи билан фаолият юритган Халқаро бокс ассоциациясига 2020 йилдан бери россиялик Умар Кремлёв раҳбарлик қилиб келмоқда. У бу лавозимда ўзбекистонлик Ғофур Раҳимов ўрнини эгаллаган. Ташкилотни қўлига олган россиялик бизнесмен “Газпром” ёрдамида 20 миллион долларга яқин қарзлардан қутулиш ва икки баробар кўп маблағ жалб қилишга ваъда берган эди.

ХОҚ IBA’ни тан олишдан бош тортгани ортидан унинг ўрнини World Boxing эгаллаши кутилмоқда. Мазкур ташкилот IBA расмий мусобақаларига бойкот эълон қилган давлатлар томонидан 2023 йилнинг баҳорида тузилган.

2025 йил 1 январидан эътиборан Ўзбекистонда тадбиркорлар фаолиятини текшириш “Хавфни таҳлил қилиш” электрон тизими доирасида ишбилармонлик субъектларини 3 та тоифага ажратган ҳолда ўтказилади. Бу ҳақда 4 ноябрь куни президент Шавкат Мирзиёев раислигида ташкил қилинган тадбиркорларнинг ҳуқуқий ҳимоясини кучайтиришга оид таклифлар тақдимотида айтилган.

Қайд этилишича, эндиликда тадбиркорлар фаолиятини назорат қилишга ваколатли органлар ва уларнинг назорат соҳалари рўйхати тасдиқланади. Ушбу рўйхатда йўқ масалалар бўйича текширув ўтказиш ман этилади.

Тадбиркорлар фаолиятига доир барча текширувлар “Ягона давлат назорати” ахборот тизими орқали хабардор этиш тартибида амалга оширилади.

Янги йилдан бошлаб битта ҳуқуқбузарлик учун битта жавобгарлик чорасини белгилаш ҳам назарда тутилмоқда. Жумладан, тадбиркорлик фаолиятини якка тартибдаги тадбиркор сифатида рўйхатдан ўтмасдан амалга оширганлик учун молиявий жарима бекор қилинмоқда.

Шунингдек, рақамли маркировкалаш қоидалари ҳамда фискал белгиларни акс эттириш тартибини бузиш, ходимлар сонини яшириш учун маъмурий жавобгарлик ҳам қонунчиликдан чиқариб ташланади.

Президент матбуот хизматига кўра, янги чоралар Мирзиёевнинг жорий йил 20 август куни тадбиркорлар билан очиқ мулоқотида билдирилган таклифлар асосида ишлаб чиқилган.

Қорақалпоғистон Республикаси, Хоразм ва Наманган вилоятларида кўмир таъминотида талон-торожликлар фош этилди, дея маълум қилди Бош прокуратура ҳузуридаги Иқтисодий жиноятларга қарши курашиш департаменти.

Департаментнинг Наманган бошқармаси ва ДХХ ходимлари ҳамкорлигида ўтказилган терговга қадар текширувда “Кўмир таъминот” МЧЖнинг Наманган шаҳри кўмир омбори масъуллари ушланган. Улар куз-қиш мавсумида имтиёзли нархларда аҳолига етказиб бериш учун ажратилган умумий баҳоси 4,1 миллиард сўмлик 13,3 минг тонна кўмирни бошқа шахсларга сотиб юборгани айтилмоқда.

Хоразмда “Кўмир таъминот” МЧЖнинг Боғот тумани кўмир омбори ходимлари умумий баҳоси 85,5 млн сўмлик 276 тонна кўмирни омбордан яширинча олиб чиққани аниқланган. Шунингдек, ушбу омборда 345,8 тонна кўмир камомади қайд этилган.

Қорақалпоғистон Республикасида ўтказилган текширувда эса номи ошкор этилмаган МЧЖ масъуллари Тахтакўпир ва Шуманай туманларидаги ижтимоий соҳа объектларини иссиқлик энергияси билан узлуксиз таъминлаш мақсадида кўмир хариди учун бюджетдан ажратилган 340,8 миллион сўмни ўзлаштиргани аниқланган.

БП департаментига кўра, мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Учинчи ноябрга ўтар кечаси Тошкент шаҳри ҳавосида заҳарли заррачалар миқдори 780 мкг/м3 даражагача ошган.

QAir платформаси хавфли даражада юқори ифлосланиш cабаб аҳолига кўчага ниқобсиз чиқмасликни тавсия қилган.

Kun.uz нашрининг ёзишича, ифлосланишнинг асосий сабаби бўлмиш PM2,5 заррачаси ЖССТ тасдиқлаган меъёрдан 93,2 баробардан ортиб кетган.

Халқаро IQAir кўрсаткичлари Ўзбекистон пойтахтида ҳаво сифати “ўта ёмон” бўлганини қайд этган.

Шаҳардаги 32 та станция ҳавода заҳарли заррачалар меъёрдан бир неча баробар ошганини кўрсатган.

Ҳаво сифати ифлосланиш ҳолати ва манбаси ҳақида на Экология вазирлиги, на “Ўзгидромет” хизмати маълумот берган.

Ўзбекистон пойтахти куз-қиш мавсумида дунё шаҳарлари орасида ҳавонинг ифлосланиш даражаси бўйича бир неча марта биринчи ўринда қайд этилган.

Жаҳон банки ҳисоботига қараганда, Тошкентда PM2,5 майда заррали чанглар таъсири оқибатида йилига ўртача 3042 киши бевақт вафот этади.

Ўзбекистон Либерал-демократик партияси Сирдарё вилояти Боёвут тумани ҳокими Дилфуза Уралованинг пахта терими режасини бажармаган фермерларни ҳақорат қилгани ҳақидаги хабарга муносабат билдирди.

“Сўнгги пайтларда ижтимоий тармоқларда ҳудудларда айрим мансабдор шахслар томонидан тадбиркорлар, хусусан, фермерларнинг фаолиятига аралашуви, уларга зўравонлик ишлатилиши ва мол-мулкларини тасарруф қилишга тўсқинлик қилиш ҳолатлари учрамоқда”, дейилган баёнотда.

Таъкидланишича, либерал-демократик партия бу каби ҳолатларнинг такрорланаётганидан хавотирда.

“Инсон шаъни ва қадр-қиммати дахлсизлиги, ҳеч нарса уларни камситиш учун асос бўлиши мумкин эмаслиги”ни урғулаган ЎзЛиДеП Бош прокуратурани ҳудудларда фермерлар фаолиятига ноқонуний аралашув, уларга зўравонлик қилиш, мол-мулкини эркин тасарруф этишга тўсқинлик қилиш ҳолатлари юзасидан қатъий назорат ўрнатишга чақирган.

Kun.uz нашри 1 ноябрь куни Боёвут тумани ҳокими Дилфуза Ураловага тегишли экани айтилган аудиоёзувни эълон қилган.

Аудиоёзувдан англашилишича, йиғилиш жараёнида Уралова тумандаги “Абдумандат ота фарзандлари” фермер хўжалиги раисини “падарингга лаънат, эшак” дея ҳақорат қилган. Бунга жавобан фермер ҳокимдан ҳурматини сақлашни сўраган. Уралова эса ҳақоратга ҳам қониқмай ИИБга фермерни қамашни буюрган.

Сирдарё вилояти ҳокимлиги Дилфуза Ураловага нисбатан тегишли тартибда интизомий жазо чораларини кўриш учун вилоят раҳбарига тақдимнома киритилганини маълум қилган.

Ўзбекистон Рус тили бўйича халқаро ташкилотни таъсис этиш тўғрисидаги шартномага қўшилди. Бунга доир қонун мамлакат президенти Шавкат Мирзиёев томонидан имзоланган.

Рус тили бўйича халқаро ташкилотни тузиш таклифи 2022 йил октябрь ойида Остонада ўтказилган МДҲ давлатлари раҳбарлари саммитида Қозоғистон президенти Қасим-Жомарт Тоқаев томонидан билдирилганди. Мазкур таклифга асосан 2023 йил 13 октябрь куни МДҲ давлатлари раҳбарларининг Бишкек саммитида ташкилотни тузиш ҳақида шартнома имзоланган.

МДҲ ҳомийлигидаги ташкилот рус тилида сифатли таълимни қўллаб-қувватлаш, “Рус тили ва адабиёти” ҳамда “Рус тили чет тили сифатида” йўналишлари бўйича педагог ва илмий кадрлар тайёрлашга кўмаклашиши айтилган.

Таҳлилчиларга кўра, рус тилини жаҳон миқёсида кенг тарғиб-ташвиқ этиш Россия президенти Владимир Путин олиб бораётган империячилик сиёсатининг таркибий қисмига айланган. Янги ташкилот ҳам Кремлнинг ушбу сиёсатига хизмат қилиши борасида хавотирлар мавжуд.

Рус тили бўйича халқаро ташкилот таъсис этиш тўғрисидаги шартномани ҳозирга қадар Россия, Беларусь, Қирғизистон, Қозоғистон, Тожикистон, Туркманистон ва Озарбойжон ратификация қилган.

Ушбу битимни ратификация қилишга доир қонун ҳужжати Ўзбекистонда фавқулодда тезкорлик билан қабул қилинди. Олий Мажлис Қонунчилик палатаси ушбу ҳужжатни 2024 йил 18 октябрида қабул қилган бўлса, Сенат 24 октябрь куни маъқуллаган. Мамлакат президенти эса 31 октябрь куни унга имзо чеккан.

Маълумот ўрнида, жорий йил 8 октябрь куни Москвада бўлиб ўтган МДҲ давлат раҳбарлари учрашувида Путин МДҲнинг барча давлатлари Халқаро рус тили ташкилотини ташкил этиш тўғрисидаги шартномани тез орада ратификация қилишини кутаётганини айтганди.

Бир пайтлар Тошкент шаҳрининг рамзларидан бўлган “Чорсу” меҳмонхонаси бузилиб, ўрнида 29 қаватли янги меҳмонхона қурилади.

Gazeta.uz нашри хабарига кўра, Тошкентда 2 ноябрь куни Чорсу майдонини реконструкция қилиш лойиҳаси тақдим этилган.

Германиянинг Tchoban Voss Architekten компанияси ишлаб чиққан 170 млн долларлик лойиҳа доирасида Чорсу майдонида янги меҳмонхона, бизнес-марказ ва тураржой бинолари барпо этилади.

Қурилиш ишларини 2025 йилда бошлаб, 2029 йилда якунлаш режалаштирилган.

Қайд этилишича, ўзбекистонлик ва хорижий сармоядорлар консорциуми томонидан амалга ошириладиган лойиҳа якунида Тошкент шаҳри фондига қарийб 113 минг квадрат метр тураржой ва тижорат кўчмас мулклари қўшилади.

“Чорсу” меҳмонхонаси 1982 йилда меъмор Владимир Спивак лойиҳаси бўйича қурилган ва дастлаб “Москва” деб номланган эди. Иншоот салкам чорак асрдан бери қаровсиз ҳолда ётибди.

Озодлик 2020 йилда “Чорсу” меҳмонхонаси қароргоҳи БААда бўлган Ittihad International Investment LLC инвестициявий ширкатига 16 миллиард 900 миллион 1 сўмга сотилгани ҳақида хабар қилганди.

Аукцион шартига кўра, “Чорсу”ни сотиб олган сармоядор 2 йил мобайнида ҳукумат кафолатларисиз камида 25 млн АҚШ долларга тенг эквивалентда инвестиция киритиши, уч юлдузли меҳмонхона хизматини ташкил этиши ҳамда 150 та янги иш ўрни яратиши лозим эди.

Бунга қадар меҳмонхона корейс ва турк сармоядорларига ҳам сотилгани маълум.

Хабарларга кўра, жорий йил октябрь ойида техник экспертиза мутахассислари бино темир-бетон конструкциялари жиддий деформацияга учраган ва иншоотни реконструкция қилиш мумкин эмас дея хулоса берган.

Сурхондарё вилояти Денов тумани Буюк келажак МФЙ ҳудудидаги 16 қаватли тураржойда яшовчи қиз юқори қаватдан тушиб кетиб ҳалок бўлди, дея хабар қилди ўтган ҳафта якунида “Севимли” телеканалининг “Замон” информацион дастури.

Ўн етти ёшли қиз 6-қаватдан қулаб, воқеа жойида ҳалок бўлгани маълум қилингани ҳолда, ўлимга доир бошқа тафсилотлар очиқланмаган.

Маҳалла раисига кўра, марҳума оиланинг тўнғич фарзанди бўлган, мактабда ҳам аъло баҳоларга ўқиган. Қизнинг оиласида муқаддам жанжал-тўполон кузатилмаган.

Воқеа юзасидан дастлабки суриштирув олиб борилаётгани айтилмоқда.

Сўнгги йилларда кўп қаватли уйдан тушиб кетиш оқибатида ўнлаб ўлим ҳолати қайд этилган.

Жорий йил 4 август куни Тошкент шаҳри Сергели туманида истиқомат қилувчи 15 ёшли Х.С. 5-қават деразасидан эҳтиётсизлик оқибатида тушиб кетиб вафот этган.

2023 йил 18 ноябрь куни Тошкент шаҳри Юнусобод туманида 32 ёшли эркак тураржой биносининг 15-қаватидан сакраб вафот этган. Бош прокуратурага кўра, эркак 2020 йилдан буён руҳий касалликлар шифохонасида шизофрения ташхиси билан рўйхатда турган.

2023 йил 12 июнь куни Қорақалпоғистон Республикаси Нукус шаҳрида 27 ёшли аёл оиласи билан яшаган уйи 4-қаватидан қулаб вафот этган.

2022 йил 9 июнь куни Самарқанд шаҳри “Қорасув” масканидаги 81-уйда ҳам ана шундай бахтсиз ҳодиса рўй берган. Қаровсиз қолдирилган 1,5 яшар қизча 10-қаватдан тушиб кетиб воқеа жойида нобуд бўлган.

Ўзбекистонда 27 октябрь куни бўлиб ўтган депутатлар сайлови натижасида ҳуқуқ ва ваколатлари сезиларли даражада кучайган янги вакиллик органлари тизими ҳам шаклланди. Бу мулоҳаза 1 ноябрь куни Ўзбекистон президенти Шавкат Мирзиёев томонидан Навоий вилоятини ижтимоий-иқтисодий ривожлантириш вазифалари юзасидан ўтказилган йиғилишда айтилди.

Президент матбуот котиби Шерзод Асадов қайдича, йиғилишда Мирзиёев Ўзбекистон халқига “сайловларда юксак сиёсий маданият ва фаоллик кўрсатиб, фуқаролик бурчини масъулият билан адо этгани учун самимий миннатдорлик” билдирган ҳамда депутатликка сайланганларни табриклаган.

“Биз барча бўғиндаги депутатларимиз тимсолида зиммасидаги масъулиятни чуқур англайдиган, Янги Ўзбекистонни барпо этиш, халқимизнинг эркин ва фаровон ҳаётини таъминлаш йўлида ўзини аямасдан тинимсиз ҳаракат қиладиган, бор билим ва тажрибасини Ватан равнақи учун сафарбар этадиган фидойи инсонларни тасаввур қиламиз”, деган Ўзбекистон президенти.

Мирзиёевга кўра, Ўзбекистон халқи депутатларнинг янги ғоя ва ташаббусига “катта умид ва ишонч билан қарамоқда”.

“Эл-юртимиз янги парламент ва маҳаллий кенгашлар аъзоларидан кўп нарсани кутмоқда”, деган Шавкат Мирзиёев.

Ўзбекистон президенти аввалроқ парламент сайловида "кучли рақобат" бўлишини башорат қилган бўлса-да, якшанба куни бўлиб ўтган сайловда сўнгги 15 йил давомида кўрилгани каби бир хил ҳукуматпараст сиёсий фракциялар қатнашди, ҳатто рўйхатга олиниши ҳам мунтазам равишда рад этиб келинаётган мухолифатчи сиёсий партиялар эса сайловда иштирок эта олгани йўқ.

Таҳлилчилар “чўнтак партиялар кураши” деб таъриф берган парламент сайлови натижаларига кўра, МСК қайдича, ЎзЛиДеП 64 та, “Миллий тикланиш” 29 та, “Адолат” 21 та, ХДП 20 та, Экопартия эса 16 та депутатлик ўрнига эга бўлган.