Линклар

Шошилинч хабар
13 август 2022, Тошкент вақти: 05:40

Халқаро хабарлар

Машҳур “Судоку" бошқотирмасининг “отаси” Маки Кадзи вафот этди

Nikoli нашриёти асосчиларидан бири Маки Кадзи.

Nikoli нашриётининг собиқ раҳбари, “Судоку" бошқотирмасини ўйлаб топган Маки Кадзи Японияда 69 ёшида саратон касаллигидан вафот этди.

Маки Кадзи Саппоро шаҳрида 1951 йилда туғилган. У мактабни битиргач, университетга ўқишга кирди. Аммо кейинроқ университетни ташлаб, босмахонада ишлай бошлади. 1980 йилда у дўстлари билан Puzzle Communication Nikoli нашриётига асос солди.

Nikoli нашриёти рақамлардан иборат “Судоку” бошқотирмаларини ўйлаб топгани ортидан шуҳрат қозонган.

1980 йиллар бошларида Nikoli ўз журналида Америка журналларидан биридан олинган бошқотирмани рақамлар воситасида мукаммаллаштириб чоп этганидан сўнг Японияда оммавийлашиб кетган.

Кейинроқ Nikoli нашриёти “Судоку”ларини Британия журналлари чоп эта бошлаган. Шундан сўнг бу бошқотирма дунёга машҳур бўлди.

“Судоку”нинг “бобокалони” сифатида XVII асрда “Лотинча квадрат” бошқотирмасини ўйлаб топган Швейцария математиги Леонард Эйлер тан олинган.

Кун янгиликлари

Уруш бошидан бери россияликлар Грузиядан 4 мингдан зиёд квартира сотиб олишган

Тбилиси манзараси

Украинада уруш бошланганидан бери Россия фуқаролари Грузиядан, асосан пойтахт Тбилиси ва Батуми шаҳридан 4 мингдан ортиқ квартира сотиб олишган. Улардан 3 минг 200 таси июль ойида харид қилинган. Бу ҳақда Михаил Саакашвилининг “Яхлит миллий ҳаракат” партияси маълум қилди.

Июль ойида Грузияга келган россияликлар сони рекорд даражага етган — Россиядан 150 минг киши келган. Январь ойидан бери эса Грузияга узоқ ёки қисқа муддатга келган россияликлар сони 350 минг нафарга етган.

Партия маълумотига кўра, ўтган ойлар мобайнида россияликлардан 16 минг 480 нафари Грузияда яшаш учун рухсатнома олган, бу ерда гап, афтидан, кўчмас мулк сотиб олганларнинг яқинлари ҳақида бормоқда. Грузия қонунчилигига мувофиқ, кўчмас мулк сотиб олиш мулк эгасига мамлакатда яшаш ва ишлаш ҳуқуқини беради.

Аввалроқ Transparency International Georgia ташкилоти ўз ҳисоботида сўнгги ярим йил мобайнида Россиядан Грузияга 700 миллион доллардан кўпроқ кириб келгани ҳақида маълум қилган эди. Бу 2021 йили бутун йил давомида Россиядан келган пулдан ҳам кўпроқ.

Иддаоларга кўра, пул ўтказмалари кўплаб россияликларнинг Грузияга кўчиб ўтаётгани билан бевосита боғлиқ. Бу вақт оралиғида Россия фуқаролари Грузияда 6 минг 400 дан зиёд ширкатни рўйхатдан ўтказганлар.

Мухолифатдаги “Яхлит миллий ҳаракат” партияси “Грузия орзуси” ҳукмрон партиясидан “россияликларнинг шубҳали даражада кўп оқиб келишига қарши” чора кўришни талаб қилиб келмоқда, бироқ бу чақириқ ҳали бирор амалий натижа бергани йўқ. Мухолифатчилар таклифлари орасида Россия фуқароларига квартира сотиб олишни тақиқлаш, уларга нисбатан виза тартибини жорий қилиш ҳамда чегарадан ўтишда россияликларга Грузия ва Украинанинг ҳудудий яхлитлигини тан олишни кўзда тутувчи анкеталарни мажбурий равишда тўлдиртириш кабилар бор.

Назарбоев йил бошидан бери илк бор оммавий тадбирда иштирок этди

Қозоғистоннинг собиқ президенти Нурсултон Назарбоев

Қозоғистон пойтахти Нур-Султон шаҳрида 12 август куни Марказий Осиёдаги энг катта ибодатгоҳлардан бири экани иддао қилинаётган масжид очилди. Уни собиқ президент Нурсултон Назарбоев очиб берди. Бу Назарбоевнинг йил бошидан бери Қозоғистонда ўтказилган оммавий тадбирда илк бор кўринишидир.

Informburo.kz сайтининг ёзишича, 10 гектар майдонни эгаллаган масжиднинг гумбази баландлиги 83,2 метрни, диаметри эса 62 метрни ташкил этади. Унинг чор тарафида баландлиги 130 метр келадиган миноралар бор.

Масжиднинг тамал тоши 2019 йилнинг март ойида – Назарбоев истеъфога кетишидан бир кун олдин қўйилган.

Собиқ президент жума кунги чиқишида унинг “айрим фуқаролар ва сармоядорлар ҳисобидан” қурилган “фундаментал масжид” эканини урғулаган. Назарбоевга кўра, мажмуа учун давлат маблағлари сарфланган эмас.

Масжиднинг очилиш маросимида Назарбоевга яқин бўлган айрим собиқ амалдорлар, шу жумладан, Қозоғистоннинг собиқ бош вазири Асқар Мамин, президент ҳузуридаги инсон ҳуқуқлари бўйича комиссиянинг собиқ раҳбари Қуаниш Султанов, Жамбил ва Олмаота вилоятларининг собиқ ҳокимлари иштирок этишган.

Россия Федерал хавфсизлик хизмати олти нафар қрим татарини қўлга олди

Қрим татарларининг уйларида ўтказилган тинтувлардан бири (архив сурати)

Аннексия қилинган Қрим яриморолининг Жанкўй туманида Россия Федерал хавфсизлик хизмати (ФСБ) олти нафар қрим татарини тутиб кетди. Уларга Россияда фаолияти тақиқланган “Ҳизбут-Таҳрир” ташкилоти фаолиятида иштирок этганлик айблови қўйилган.

Жиноят иш қўзғатишга оид қарорда «ташкилот иштирокчилари конспиратив учрашувларга боришиб, Россияга қарши фаолиятни амалга оширишган»и ҳамда маҳаллий аҳоли вакилларини “Ҳизбут-Таҳрир”га мойиллаштиришга уринишгани айтилган.

“ОВД-Инфо” ҳуқуқбонлик лойиҳаси маълумотига кўра, бу ерда гап Энвер Крош, Мурат Мустафаев, Сеитий Аббозов, Эдем Бекиров, Ринат Алиев ҳамда журналист Вилен Темерьянов ҳақида бормоқда. Бу одамларнинг ҳамда яқинларининг уйларида тинтувлар ўтказилган. Шундан сўнг қўлга олинганлар Симферополдаги ФСТ бошқармасига олиб кетилган. 12 август куни суд уларга нисбатан эҳтиёт чорасини тайин қилиши кутилмоқда.

“Грати” нашри Симферополга кетишда ФСБ ходимлари Энвер Крошдан мобиль телефонини ўчириб қўйишни талаб қилиб., уни калтаклашгани ҳақида хабар қилган.

Қрим яримороли 2014 йили Россия томонидан аннексия қилинганидан кейин қрим татари миллатига мансуб юзлаб одам “Ҳизбут-Таҳрир” ташкилоти фаолиятида иштирок этганликда айбланиб, жиноий таъқибга учраган. Улар орасида ўнлаб одам узоқ муддатга қамалган, қолганлари судни кутишмоқда.

Россияда “Ҳизбут-Таҳрир” фаолияти 2003 йилдан буён тақиқланган. Украина ва Европадаги кўплаб мамлакатларда ташкилот фаолияти ман қилинган эмас. Ҳаракат аъзоларининг террор хуружларини тайёрлаш ёки амалга оширишда иштирок этгани бирор марта ҳам қайд қилинган эмас.

Шольц: Украинадаги уруш учун шахсан Путин жавобгар

Германия канцлери Олаф Шольц (ўртада)

Германия канцлери Олаф Шольц 11 август куни Берлинда ўтказилган матбуот анжуманида Украинадаги уруш учун шахсан Россия президенти Владимир Путин масъул эканини билдирди.

Россия томонидан амалга оширилган муҳтамал ҳарбий жиноятларни қоралаган Шольц, dpa агентлиги хабарига кўра, “Путин судга тортилиши керакми?” деган саволга жавоб берган эмас.

Германия канцлери фикрича, Украинада ҳарбий ҳаракатлар бошлангани учун жавобгарлик оддий россияликларнинг эмас, балки мамлакат раҳбариятининг зиммасидадир. Бу ҳақда у Россия фуқароларига виза беришни тўхтатишга оид саволга жавоб бериш асносида сўзлаган.

“Агар санкциялар айбсиз бўлганлар дохил барчага қарши қаратилган бўлганида, бу уларнинг самарадорлигини сусайтирган бўларди”, деган Шольц.

Сиёсатчи виза беришни бутунлай тўхтатишни тасаввур қилиши қийинлигини айтган. “Бу Путиннинг урушидир”, дея қўшимча қилган у.

Шольцнинг айтишича, Европа Иттифоқи Россияга санкция босимини давом эттирмоқчи, Германия эса Украинага ҳарбий ва молиявий ёрдам кўрсатишда давом этади.

“Биз ўзимизни бу уруш Европа ва бизнинг мамлакатимиз дохил бутун дунёга таъсир кўрсатишига ҳозирладик”, деган Германия канцлери.

Аввалроқ Германия Ташқи ишлар вазирлиги санкцияларнинг галдаги пакети доирасида ЕИ Россия фуқароларига виза беришни бекор қилиш таклифини муҳокама қилиши ҳақида маълум қилган.

Қозоғистонда танк ҳайкалига Z ҳарфини ёзиб кетган фуқаро ҳибсга олинди

Иллюстратив сурат

Қозоғистоннинг Қарағанда вилояти Сарань шаҳрида суд танк ҳайкалига Z белгисини ёзиб қўйган маҳаллий фуқарони етти суткага ҳибсга олиш ҳақида қарор чиқарди.

Озодликнинг қозоқ хизмати хабарига кўра, шахси очиқланмаётган саранлик киши майда безориликда айбланган. Суд матбуот хизмати қайдича, 54 ёшли эркак ўзига қўйилган айбловни тан олиб, қилган ишидан афсусда эканини айтган.

Z ҳарфи Россия томонидан Украинага уюштирилган босқиннинг норасмий рамзи бўлиб ҳисобланади. Бу белгидан урушни дастаклаш учун ўтказилган акцияларда кўп бора фойдаланилган. Z ҳарфи Россиянинг Украина ҳудудига бостириб кирганига қарши чиққанларнинг хонадонлари эшикларига чизиб кетилган.

Қозоғистонда Z белгиси Украинадаги жанговар ҳаракатларни дастаклаш рамзи сифатида расман тақиқланган эмас. Бироқ бу белги ёпиштирилган автомобиль эгалари транспорт воситалари эксплуатацияси қоидаларини бузганлик моддаси бўйича жаримага тортилган.

Эстония шенген визаси бўлган россияликлар учун чегарасини ёпмоқчи

Расмий Таллин шенген визасини олган россияликларга ўз чегараларини ёпиш ҳақида қарор қабул қилган.

Эстония ташқи ишлар вазири Урмас Рейнсалунинг 11 август куни билдиришича, айни пайтда бу борада “айрим истиснолар кўзда тутилган”.

“Бир ҳафтадан кейин Эстония томонидан берилган шенген визаларига нисбатан санкциялар қўлланилади. Бу визалар ҳақиқий бўлиб қолишини англатади, бироқ виза олганларга Эстонияга киришда санкциялар жорий қилинади, яъни уларга Эстонияга кириш тақиқланади”, деган вазир.

Аввалроқ Латвия Россияни террорчиликни дастакловчи давлат ўлароқ тан олиб, ЕИни россияликларга виза беришни бас қилишга чақирган.

АЭХА раҳбари Запорожье АЭСига шахсан бормоқчи

Запорожье атом электр станцияси

Атом энергияси бўйича халқаро агентлик бош директори Рафаэль Гросси Запорожье атом электр станциясига бориши керак бўлган экспертлар миссиясига етакчилик қилишни истайди.

“Мен БМТ Хавфсизлик кенгашини яқин келажакда АЭХАнинг мазкур объектга ташрифига шахсан раҳбарлик қилиш ниятим борлиги ҳақида ҳам хабардор қилмоқчиман”, деган Гросси эҳтимолий ядровий фалокат хавфини камайтириш учун агентлик вакилларининг Запорожье АЭСида бўлиши ҳар қачонгидан ҳам муҳим эканини урғулаган.

Халқаро агентлик раҳбари Запорожье атом электр станциясига ташрифдан сўнг БМТ Хавфсизлик кенгашининг АЭСдаги вазиятга оид мажлисида иштирок этиб, объект атрофидаги ҳолат ҳақида гапириб беришни режалаган.

Запорожье АЭСи жорий йилнинг март ойида Россия қўшинлари томонидан эгаллаб олинган, ўшандан буён объект россияликлар назорати остида бўлиб турибди. Айрим нашрларнинг ёзишича, Россия армияси АЭС ҳудудига артиллерияни жойлаштириб, объектдан “ядровий қалқон” ўлароқ фойдаланган ҳолда Украина назорати остидаги ҳудудларни ўққа тутмоқда.

Россияда ўз жонига қасд қилган болалар сони қарийб 40 фоизга ошди

Ўтган йили Россияда ўзини ўзи ўлдирган болалар сони ундан аввалги йилга қиёсан тақрибан қирқ фоизга кўпайган – 2021 йилда бу мамлакатда 753 нафар бола ўз жонига қасд қилган, 2020 йилда бу кўрсаткич 548 нафарга тенг эди.

Мазкур рақамлар Россия президенти ҳузуридаги бола ҳуқуқлари бўйича омбудсмен аппарати маслаҳатчиси Роман Чуприков томонидан “давра суҳбати” чоғида эълон қилинган.

Москвадаги Психиатрия илмий-тадқиқот институти суицидология бўлими илмий ходими Каринэ Кешчян эса, ўз навбатида, охирига етмай қолган худкушлик уринишлари сони бундан анча кўплигини қайд этган. Унга кўра, суицидал уринишни амалга оширган жуда кўплаб бола мутахассислар диққат марказига тушмасдан, касалхонадан чиқиб кетяпти, чунки ота-оналар консультациялардан бош тортишмоқда.

2020 йил охирида Ёшлар муҳитини ўрганиш ва интернетда мониторинг қилиш маркази Рунетдан фойдаланувчи ўсмирларнинг 600 мингдан зиёди ўзини ўзи ўлдириш мавзуси бўйича тармоқдан маълумот қидиришини очиқлаган эди.

Мирзиёев шахмат олимпиадаси ғолибларини тақдирлашга оид фармонни имзолади

Ўзбекистон президенти Шавкат Мирзиёев 10 август куни Ҳиндистоннинг Ченнай шаҳрида бўлиб ўтган Бутунжаҳон шахмат олимпиадасида ғолибликни қўлга киритиб, чемпионга айланган ўзбек шахматчилари, уларнинг мураббийлари ҳамда олимпиаданинг бошқа иштирокчиларини мукофотлаш тўғрисидаги фармонга имзо чекди.

Фармонга мувофиқ, миллий терма жамоа аъзолари Нодирбек Абдусатторов, Жаҳонгир Воҳидов, Шамсиддин Воҳидов, Жавоҳир Синдаров ва Нодирбек Ёқуббоев “Ўзбекистон ифтихори” унвони билан, терма жамоа мураббийлари Владимир Егин ва Иван Соколов “Ўзбекистон Республикасида хизмат кўрсатган спорт устози” унвони билан, миллий терма жамоа аъзолари Мафтуна Бобомуродова, Маржона Маликова, Умида Омонова, Афруза Ҳамдамова ва Нилуфар Ёқуббоевалар эса “Келажак бунёдкори” медали билан тақдирланади.

Мирзиёев чоршанба куни Тошкент архитектура қурилиш институти талаба ва ўқитувчилари билан мулоқот чоғида шахмат олимпиадаси чемпионларига автомобиль совға қилишга қарор қилганини билдирган.

“Шахматчиларимиз кечқурун уйига 400 миллионлик машина миниб борса, ота-онаси: “Болам, ҳеч нарса қилмасанг ҳам шахмат ўйна”, деб айтади”, деган жумладан Ш. Мирзиёев.

ЕИ ва Британия Россиядан кўмир сотиб олишни тўхтатди

Европа Иттифоқида жорий йил 10 августидан Россия кўмири импорти учун тўлиқ тақиқ кучга кирди.

ЕИда мазкур чора юзасидан Россиянинг Украинага бостириб киришига жавобан киритилган санкцияларнинг бешинчи пакети доирасида апрель ойи бошида келишувга эришилган. Чоршанба куни Буюк Британия ҳам Россия кўмиридан воз кечди.

Еврокомиссия ҳисоб-китобига кўра, эмбарго Россиянинг хорижга экспорт қилинаётган бутун кўмирининг чорак қисмига (йилига 8 миллиард евро) дахлдор бўлади.

ЕИ Россиядан сотиб олиб келинган кўмир ўрнини Шимолий Америка, Австралия, Колумбия, ЖАР ва Қозоғистондан келадиган кўмир билан тўлдирмоқчи.

Eurostat маълумотига кўра, Қозоғистон шу йил январидан май ойигача ЕИга 1,5 миллион тонна кўмир етказиб берган, бу 2021 йилда етказиб берилган кўмир миқдоридан икки баробар кўпдир.

Европа Иттифоқи Россиядан кўмир олиш тақиқланишини эълон қилганидан кейин Москва ўз экспортини бошқа мамлакатларга, хусусан, Ҳиндистон ва Туркияга йўналтирган. Айни пайтда Россия бу мамлакатларга 50 фоизлик чегирма билан сотишга мажбур бўляпти.

CNN: Россиялик ҳарбийлар Эронда дронлардан фойдаланиш бўйича ўқитилмоқда

Эронда ишлаб чиқарилган Shahed-129 дрони

Россияликлар бир неча ҳафтадан бери эронликлар ишлаб чиқарган дронлар эксплуатацияси бўйича Эронда ўқитиляпти. Бу ҳақда CNN телеканали разведка маълумотларидан хабардор америкалик мулозим сўзларига таянган ҳолда хабар қилди.

Мулозимга кўра, бу Москванинг Эрондан дрон сотиб олишга тайёр эканидан далолат берувчи яна бир сигналдир.

Июль ойида CNN Россия делегацияси Shahed-191 ва Shahed -129 дронлари билан танишиш мақсадида Эронга боргани ҳақида хабар қилган. Ўшанда АҚШ президентининг миллий хавфсизлик бўйича маслаҳатчиси Жек Салливан Эрон Россияга Украидаги ҳарбий ҳаракатларда фойдаланиш учун юзлаб дрон сотиб олишга ҳозир экани ҳақида билдирган эди.

Дронлар Украинадаги урушда муҳим роль ўйнаяпти. Украина Туркияда ишлаб чиқарилган Bayraktar ҳамда АҚШда ишлаб чиқарилган дронлардан муваффақият билан фойдаланмоқда, Россия эса ўзида ишлаб чиқарилган дронларни ишга соляпти. Ҳозирча АҚШ Украинага Gray Eagle русумли кучли дронларни бермаяпти – Вашингтон бу ҳаракат Москва томонидан уруш эскалациясига қаратилган қадам ўлароқ қабул қилинишидан чўчимоқда.

Россия захирадаги аскарларнинг бир қисмини Украина чегарасига жўнатмоқда

Санкт-Петербург шаҳри ва Ленинград вилоятида яшовчи захирадаги аскарларнинг бир қисми 9 август куни мажбурий равишда Украина чегараси яқинидаги ҳудудга “ҳарбий йиғин” учун олиб кетилди. Бу ҳақда “Вёрстка” нашри ҳуқуқ ҳимоячилари ва захирадаги аскарларга таянган ҳолда хабар берди.

“Бизга техникани таъмирлаш билан шуғулланишимизни айтишди”,- деди военкоматдан чақирув қоғози олганлардан бири.

Ҳуқуқ фаолларига кўра, уларга захирадаги аскарлардан ўнлаб шикоятлар келиб тушган. Қайд этилишича, улар военкоматларга чақиртирилган ва қандайдир ҳужжатларга имзо чекишга мажбурланган. Шундан сўнг уларни Украина билан чегарадош Белгород вилоятига олиб кетишмоқда. Военкоматларда захирадаги аскарлар тиббий кўрикдан ва хизматга яроқлилик тоифасини тасдиқлаш жараёнидан ўтказилмаяпти.

Нашрнинг манбаларга таяниб ёзишича, “ҳарбий йиғин”лар 60 кунгача давом этади. Унда иштирок этишни истамаганларни “қўлини қайриб олиб кетишмоқда”.

“Паспортлар ва ҳарбий билетларни олиб қўйиб, захирадагиларни ҳарбий қисмларга, кейин эса Белгород вилоятига жўнатишмоқда. Бизга айтишларича, улар техникани таъмирлаш ва снарядларни юклаш билан шуғулланади. Йиғинга чақирилганларнинг ёшлари 26, 30, 40 да ва улар ўзларининг қандай мақомда эканини ҳам билмайдилар”,-демоқда ҳуқуқ фаоллари.

Россиянинг “Ҳарбий мажбурият ва ҳарбий хизмат” тўғрисидаги қонунига асосан захирадаги аскарлар ҳарбий йиғинларда иштирок этишдан бош тортиш ҳуқуқига эга. Бу ҳолда уларга нисбатан жиноий ёки маъмурий жазо чоралари қўлланиши назарда тутилмаган.

Россия аннексия қилган Қримдаги ҳарбий аэродромда портлашлар бўлди

Портлаш содир бўлган ҳудуд.

Россия томонидан аннексия қилинган Қримнинг Новофедоровка қишлоғи яқинидаги ҳарбий аэродромда портлашлар юз берди ва бир киши ҳалок бўлди. Бу ҳақда Қримнинг Москва томонидан тайинланган раҳбари Сергей Аксёнов 9 август куни ўз Telegram каналида ёзди.

Қрим Соғлиқни сақлаш расмийлари портлашлар оқибатида беш киши, жумладан, бир бола яраланганини билдирди.

Россия Мудофаа вазирлигининг маълум қилишича, аэродромдаги портлашларга авиация ўқ-дориларининг детонацияси сабаб бўлган. Вазирлик детонацияга нима туртки берганини айтмади.

Аввалроқ ижтимоий тармоқларда аэродромдаги портлашлар акс этгани айтилаётган видеолар тарқалган эди. Дастлабки маълумотларга қараганда, аэродромнинг камида иккита жойида портлаш бўлган.

Россия Мудофаа вазирлиги ҳарбий аэродромга четдан ҳужум бўлмаганини тасдиқлади ва жабрланганлар йўқ эканини билдирди.

Украина Мудофаа вазирлиги ҳам портлашлар сабаблари тўғрисида маълумотга эга эмаслигини таъкидлади. Айни пайтда Украина томони мазкур ҳодисадан Россия пропаганда мақсадларида фойдаланиши мумкин, деб ҳисобламоқда.

Россия Украина таркибидаги Қрим мухториятини 2014 йилда босиб олган эди. Жорий йилнинг 24 февралида эса Россия Украинага уруш очди.

Жо Байден Финляндия ва Швециянинг НАТОга аъзо бўлишини тасдиқлади

АҚШ президенти Жо Байден вице президент Камала Харрис (чапда), Швеция элчиси Карин Олофсдоттер ва Финдандия элчиси Микко Хаутала билан ратификация қилинган ҳужжатни имзоламоқда.

АҚШ президенти Жо Байден 9 август куни Финляндия ва Швециянинг НАТОга аъзо бўлиши юзасидан Вашингтон ратификация қилган ҳужжатни имзолади.

AFPнинг хабар беришича, Байден ўз нутқида Шимолий Европа мамлакатлари НАТО доирасида ўзаро мудофаа ҳамкорлиги бўйича “муқаддас мажбурият”ни зиммасига олувчи “кучли, ишончли ва қудратли янги иттифоқчилар бўлиши”га умид билдирди.

Байденнинг айтишича, Владимир Путин раҳбарлигидаги Россия Украинага бостириб кириш орқали “тинчлик ва Европа хавфсизлигини барбод қилди”. “Путин бизни бўлиб ташлайман деб ишонган эди. Бунинг ўрнига у ўзи истамаган натижага эришди”,-деди АҚШ президенти.

АҚШ Сенати 4 август куни Финляндия ва Швецияни НАТОга қабул қилиш учун овоз берди. АҚШ бу икки мамлакатни ташкилотга қабул қилиш учун розилик билдирган ўттиз давлатнинг йигирма учинчиси бўлди.

Финляндия ва Швециянинг НАТОга аъзо бўлиши учун ташкилотга аъзо барча давлатлар миллий даражада тегишли ҳужжатларни қабул қилиши лозим.

Қирғизистон-Ўзбекистон чегарасидаги “Дўстлик” назорат ўтказиш пункти вақтинча ёпилди

"Дўстлик" чегара пункти.

Андижон ва Ўш ўртасидаги “Дўстлик” назорат ўтказиш пункти янги терминалга кўчиб ўтаётгани муносабати билан 10 август куни Ўзбекистон вақти билан соат 8 дан 12 гача, Қирғизистон вақти билан соат 9 дан 13 гача ёпилади. Бу ҳақда Қирғизистон Чегара хизмати маълум қилди.

“Дўстлик” пункти Ўш вилоятининг Қорасув тумани ҳудудида жойлашган. Мазкур пунктдан кунига камида 10-15 минг киши ўтиши айтилади.

Икки давлат ўртасида 15 та назорат-ўтказиш пункти мавжуд. Аммо уларнинг барчасини 2010 йилда Ўзбекистон бир томонлама равишда ёпиб қўйган эди. Назорат ўтказиш пунктлари фақат 2017 йилга келиб қайта очила бошлаган.

Давомини ўқинг

XS
SM
MD
LG