Ўзбекистон интеллектуал мулк ҳуқуқий муҳофазаси ва ҳимояси ҳолати бўйича АҚШ Савдо вакиллигининг 301-махсус ҳисоботида кузатувдаги давлатлар рўйхатидан чиқарилган. Бу ҳақда маълум қилган Адлия вазирлиги Интеллектуал мулк департаменти қайдича, мазкур “қора рўйхат”га 2000 йилда киритилган Ўзбекистон 24 йилдан буён “кузатувдаги давлатлар рўйхати”да қолаётган эди.

“Муайян давлатнинг “кузатувдаги давлатлар рўйхати”га киритилиши унда интеллектуал мулкни ҳимоя қилиш бўйича жиддий муаммолар мавжуд эканлигини кўрсатади ҳамда бевосита хорижий корхоналар томонидан инвестициявий фаолиятни амалга оширишда алоҳида эътибор қаратилади”, дейилган Интеллектуал мулк департаменти хабарномасида.

Департамент вакиллари эътирофича, “қора рўйхат”дан чиқишга охирги беш йилда интеллектуал мулк объектларини рўйхатдан ўтказиш тартибларини соддалаштириш, халқаро шартномаларга аъзо бўлиш ва ташқи алоқаларни ривожлантириш ҳамда ЖСТнинг интеллектуал мулк ҳуқуқлари савдо аспектлари тўғрисидаги битими (TRIPS) талабларини миллий қонунчиликка имплементация қилиш йўналишида амалга оширилган тизимли ишлар ва бошқа ҳаракатлар натижасида эришилган.

Ўзбекистон интеллектуал мулк бўйича “қора рўйхат”дан чиқиши ортидан мазкур рўйхатда Марказий Осиё мамлакатларидан фақат Туркманистонгина қолган.

Марказий Осиё давлатлари ўз миллий манфаатларини ҳисобга олмаган ҳолда танлов қилиш бўйича ташқи кучлар босимини ўз гарданида ҳис қилишда давом этишмоқда. Бу ҳақда Ўзбекистон президенти ҳузуридаги Хавфсизлик кенгаши котиби Виктор Махмудов Россиянинг Санкт-Петербург шаҳрида ўтаётган халқаро анжуманда билдирган.

“Ўзбекистон Марказий Осиё минтақасини ташқи сиёсатдаги энг устувор йўналиш сифатида кўряпти ҳамда бу минтақада тинчлик, хавфсизлик ва ўзаро ишончни қарор топтириш бўйича фаол саъй-ҳаракатларни амалга оширмоқда. Кўп афсуслар бўлсинки, бугунги кунда Марказий Осий давлатлари минтақа мамлакатларини ўз миллий манфаатларини ҳисобга олмаган ҳолда танлов қилиш қаршисида қолдиришга уринаётган ташқи кучлар босимини ўз гарданида ҳис қилишда давом этмоқда”, дея иқтибос келтирган Россиянинг ТАСС агентлиги Виктор Махмудов сўзларидан.

Ўзбекистон Хавфсизлик кенгаши котиби мазкур баёнотни Буюк Британия Ташқи ишлар вазири Дэвид Кэмероннинг Ўзбекистон дохил Марказий Осиё давлатлари бўйлаб дипломатик сафари ортиданоқ берган. Жорий ҳафтада Ўзбекистонга ташрифи олдидан Бишкекда бўлган Кэмерон Озодлик радиоси қирғиз хизматига берган интервьюсида президент Садир Жапаров билан Қирғизистонда матбуот эркинлигига оид вазият ёмонлашгани ҳамда Россиянинг Украинага “ноқонуний бостириб кириши” ҳақида гаплашганини айтган эди.

Хабарларга кўра, Санкт-Петербургдаги анжуман кун тартибидан террорчиликка қарши кураш муаммоларидан ташқари ахборот хавфсизлиги, миллий ўзига хослик ва анъанавий қадриятларни сақлаб қолиш каби масалалар муҳокамаси ҳам ўрин олган.

Жорий йилнинг биринчи чорагида Ўзбекистонга хорижий ўлкалардан 2,5 миллиард доллар миқдорида пул ўтказмалари келиб тушган, бу ўтган йилнинг шу даврига нисбатан 8,6 фоизга кўпдир. Бу ҳақда Марказий банк раиси Мамаризо Нурмуратов 25 апрель куни Тошкентда ўтказилган матбуот анжуманида билдирган.

МБ раисига кўра, пул ўтказмаларининг катта қисми, аниқроғи 84 фоизи Россия ва Қозоғистондан келган. Айни пайтда Нурмуратов Россияда ишлаётган мигрантдан Ўзбекистонга келаётган пул ўтказмалари оқими камайиб бораётганини қайд этган.

Россиядан келаётган пул 68 фоизгача қисқарганини очиқлаган мулозим бу орада узоқ хориж ўлкаларидан келаётган пул ўтказмалари ҳажми ошганига эътибор қаратган.

Ўзбекистонда расмийлар ижтимоий тармоқлардаги норозилик ифодаси устидан назоратни кучайтиришган. Бу ҳақда Amnesty International халқаро инсон ҳуқуқлари ташкилотининг куни кеча ёйинланган йиллик ҳисоботида айтилган.

“Тармоқда танқидий материаллар жойлаштиргани учун, иддао этилишича, сохта ва сиёсий сабабларга кўра камида 10 нафар блогер судланди”, дейилган ҳисоботда.

“Жаҳондаги инсон ҳуқуқлари билан боғлиқ вазият” деб номланган ҳисоботнинг Ўзбекистонга оид қисмида ўтган йили қорақалпоғистонлик фаоллар устидан ўтказилган суд ва Нукус воқеаларида уларга нисбатан ҳуқуқ-тартиботчилар томонидан ҳаддан зиёд куч қўлланилганига алоҳида боб ажратилган.

Ҳуқуқбонлар Қорақалпоғистондаги норозилик аёвсиз бостирилганидан кейин хавфсизлик кучларининг фақат уч нафар ходимигина жавобгарликка тортилганини қайд этишган.

“Қорақалпоғистондаги қийноқ айбловлари дохил зўравонлик ҳолатларини ўрганиш учун 2022 йил июлида тузилган парламент комиссияси йил охирига келиб ҳам ўз хулосалари тўғрисидаги ҳисоботни ёйинламади”, деб таъкидланган ҳисоботда.

Ўзбекистон конституциясига Қорақалпоғистон суверенитетига оид моддани олиб ташлашни ҳам ўз ичига олган тузатишлар киритиш лойиҳаси туфайли 2022 йил 1 июлида Нукусда норозилик чиқишлари бошланган эди. Эртаси куни Қорақалпоғистон пойтахтига етиб борган президент Мирзиёев, агар қорақалпоқ халқи норози бўлса, Конституциядаги республика мухториятига доир моддаларни алмаштирмасликка ваъда берган. Орадан бир неча кун ўтгач, Ўзбекистон парламенти Конституциянинг янги лойиҳасида Қорақалпоғистон суверенитетига оид моддани сақлаб қолиш ҳақида қарор қабул қилган.

Расмий маълумотларга кўра, Қорақалпоғистондаги тартибсизликлар чоғида камида 18 киши қурбон бўлган. Норозилик чиқишлари пайтида 38 нафар ҳуқуқ-тартиботчи дохил 243 киши тан жароҳати олгани, норозилардан 516 нафари қўлга олингани айтилган. Тартибсизликлардаги асосий айбдор деб кўрилган Даулетмурат Тажимуратов 16 йилга қамалган.

Ҳисоботда келтирилишича, Ўзбекистон қамоқхоналарида жиноятчиликда гумонланган шахсларга нисбатан қийноқлар ҳали ҳам кенг кўламда қўлланмоқда, бу ишни амалга оширган масъуллар эса жазосиз қоляпти.

"Халқаро Амнистия" ташкилоти ҳисоботида Ўзбекистондаги гендер зўравонлиги, жинсий озчиликлар ҳуқуқлари, меҳнаткашлар ҳуқуқлари, атроф-муҳитнинг соғломлиги бўйича ҳақ-ҳуқуқлар ва бошқа муаммоларга ҳам тўхталинган.

Ҳисобот муаллифлари инсон ҳуқуқлари бузилиши билан боғлиқ вазият Ўзбекистондан ташқари Россия, Беларусь, Озарбайжон, Грузия, Қозоғистон, Тожикистон, Қирғизистон ва Туркманистон каби постсовет ўлкаларида ҳам тобора ёмонлашиб бораётганига эътибор қаратишган. Булар қийноқ ва ғайриинсоний муносабат, сўз ва матбуот эркинлигини чеклаш, жинсий зўравонликка кўз юмиш, жинсий тенгликка йўл бермаслик, сиёсий ҳуқуқларни чегаралаб қўйиш, мустақил партиялар тузишга рухсат бермаслик, фуқароларнинг тинч йўл билан йиғилишига қаршилик қилиш ва намойишларни тақиқлаш, хориждаги танқидчиларни ватанга зўрлаб қайтариш ёки уларни ҳамкор ҳукуматлар ёрдамида қамоққа олиш, чет элдан грант ёки маош олганларни хорижий агент ёки вакил деб тамғалаш, диндорларга нисбатан босим ва тазйиқ, халқаро қонунларни бузиш, асоссиз ва адолатсиз судлов, болалар ҳуқуқларни оёқости қилиш, мигрантларни қабул қилмаслик ёки камситиш, аҳоли саломатлиги ва атроф-муҳит соғломлигига бефарқлик кабиларда акс этган.

Ҳуқуқбонларга кўра, 2023 йилга келиб дунёдаги демократия даражаси 1980-йиллардаги ҳолатга қайтган. Ҳисоботда айниқса Украина ва Ғазо секторида инсон ҳуқуқларига риоя қилиниши билан боғлиқ вазият ўта аянчли экани урғуланган.

Ўтган ҳафта якунида “Замонавий аёллар” клуби томонидан Тошкент шаҳрида ўтказилган Atlas Party миллий либослар тарғибот тадбири иштирокчиларини ҳақорат қилган шахсга нисбатан 15 суткалик маъмурий қамоқ жазоси тайинланди. Бу ҳақда Ўзбекистон Ички ишлар вазирлиги матбуот хизмати маълумот тарқатди.

ИИВ қайдича, ижтимоий тармоқларда тарқалган видеоролик орқали Atlas Party қатнашчиларини обрўсизлантиришга уринган мазкур шахс устидан тадбирда иштирок этган бир неча аёл ички ишлар органларига шикоят аризаси билан мурожаат қилган.

Видеода аёлларни ҳақорат қилган эркак устидан ИИОга мурожаат қилинганини Озодликнинг 24 апрель куни ёйинланган “Озодназар” кўрсатувида мазкур тадбир иштирокчилардан бири бўлган Диёра Абдужабборова ҳам эътироф этган эди. Абдужабборова Atlas Party иштирокчилари ва уларнинг кийимлари ҳақида ҳақоратли сўзлар айтган кишининг Дилмурод Маллаев исмли шахс эканига эътибор қаратган. ИИВ хабарномасида ҳам таҳқирли видеороликдаги шахс “1988 йилда Сирдарё вилоятида туғилган фуқаро М.Д.” экани аниқлангани урғуланган.

Маллаевнинг видеочиқиши ижтимоий тармоқларнинг ўзбек сегментида ҳам кенг муҳокамаларга сабаб бўлган.

Аёллар шикояти ортидан 23 апрель куни “фуқаро М.Д. Шайхонтоҳур тумани ИИО ФМБга таклиф этилган”.

“У ўзининг шахсий диний қарашларидан келиб чиққан ҳолда атлас тарғиботини олиб борган аёлларга нисбатан ҳақоратли сўзлар ишлатганлиги таъкидлаб ўтди”, дейилган ИИВ хабарномасида.

Аввалроқ ижтимоий тармоқларда Дилмурод Маллаевнинг Atlas Party иштирокчилари бўлган аёллардан узр сўраб чиққани акс этган видеоси тарқалган, бироқ у шу билангина қутулиб кетган эмас.

“Ушбу ҳуқуқбузарлик ҳолати тегишли тартибда Шайхонтоҳур туман суди томонидан кўриб чиқилиб, фуқаро Ўзбекистон Республикаси Маъмурий жавобгарлик тўғрисидаги кодекснинг 183-моддаси («Майда безорилик») асосида М.Д. га нисбатан 15 сутка муддатга маъмурий қамоқ жазоси тайинланди”, дейилган Ички ишлар вазирлиги хабарномасида.

Ўзбекистон ва Тожикистон юк автотранспорти ҳайдовчиларига икки мамлакат ҳудудидан расмий рахсатномасиз транзит ўтиш ҳуқуқини берувчи ҳужжатга қўл қўйган.

Озодликнинг тожик хизмати хабарига кўра, халқаро автомобиль алоқалари тўғрисидаги битимга тиркалган тегишли баённома жорий йилнинг 18 апрель куни Ўзбекистон президенти Шавкат Мирзиёевнинг Душанбега ташрифи чоғида имзоланган. Ҳужжатга оид тафсилотлар 23 апрель куни Тожикистон транспорт вазирилиги томонидан ёйинланган.

Вазирлик маълумотига кўра, 2018 йилдан шу кунгача мамлакатлар ўртасида, жумладан улар ҳудуди бўйлаб транзит орқали йўловчиларни мунтазам ва номунтазам ташиш ҳамда юк ташишни амалга оширишда рухсатнома керак бўлган”. Тез орада бунга ҳожат қолмаслиги кутилмоқда. Транспорт вазирлиги вакиллари янги тартиб давлат ичидаги зарур процедуралардан ўтилганидан, шу жумладан икки мамлакат томонидан баённома ратификация қилинганидан кейин кучга киришини маълум қилишган.

Вазирлик “бу ҳолат юк етказиб бериш вақтини сезиларли даражада қисқартириш ҳамда юк бузилиши ёки унга шикаст етиши эҳтимолини камайтиришга имкон яратиши”га умид қилмоқда.

Аввалроқ тожикистонлик ҳайдовчилари сўнгги пайтларда халқаро юк ташиш учун рухсатнома олиш ўзлари учун ҳақиқий муаммога айланганидан шикоят қилишган.

Жорий йил январь ойи охирида юк машина ҳайдовчилари Тожикистон-Ўзбекистон чегарасидаги “Фотеҳобод-Ойбек” назорат-ўтказиш масканидан ўтишда қийинчиликларга дуч келаётганларини билдиришган. Ўшанда улар Тожикистондан Ўзбекистонга ўтишни кутиб соатлаб кутаётганлари, шу сабабли НЎП олдида турнақатор навбатлар пайдо бўлгани ҳақида маълум қилишган. Уларга кўра, муаммо Тожикистон Транспорт вазирлиги томонидан юк машиналарига чегарадан ўтиш учун берилажак рухсатнома танқислиги туфайли юзага келган.

Февраль ойига келиб Тожикистон транспорт вазири Азим Иброҳим Душанбедаги матбуот анжуманида бу муаммодан хабари борлигини билдирган. “Бу рухсатномаларни биз босмаймиз. Бланкалар бизга қўшни мамлакатдан келади ва биз уларни кутишга мажбурмиз”, деган у.

Юк машиналари ҳайдовчилари Тожикистондан Ўзбекистонга 13 та назорат-ўтказиш маскани орқали ўта олишлари мумкин. Булар орасида “Фотеҳобод-Ойбек” НЎМ Тожикистон билан Ўзбекистон ўртасидаги асосий ўтказиш масканларидан бири бўлиб ҳисобланади.

Бу орада юк ташиш рухсатномалари учун тўланадиган ҳақнинг ошиши ва рухсатнома бланкаларининг танқислиги ҳайдовчилар бош оғриғига айланган. Аввалроқ бу масала бир неча бор оммавий ахборот воситаларида кўтарилган ва расмийлар бу муаммони ҳал қилишга ваъда беришган.

Тожикистон Транспорт вазирлиги маълумотига кўра, ўтган йили юк машиналари ҳайдовчиларига 80 минг чоғли рухсатнома берилган ва бунинг учун улардан камида 8 миллион доллар пул йиғилган.

Жорий йилнинг январь-март ойларида Ўзбекистон хорижга 2 миллиард 664 миллион 300 минг долларлик олтин экспорт қилган.

Президент ҳузуридаги Статистика агентлигининг ҳисоботида қайд этилишича, бу кўрсаткич ўтган йилнинг биринчи чорагига нисбатан 10,5 фоизга кўпдир. 2023 йилнинг бу даврида мамлакат чет элга 2 миллиард 410 миллион 300 минг долларлик олтин сотган эди.

Аввалроқ World Gold Council (Жаҳон олтин кенгаши) жорий йилнинг февралида 12 тонна олтин сотган Ўзбекистон дунёда энг кўп олтин экспорт қилган мамлакатга айланганини эълон қилган эди.

Марказий банк маълумотига мувофиқ, 2024 йил 1 апрель ҳолатига кўра Ўзбекистоннинг олтин-валюта захиралари 34 миллиард 190 миллион 300 минг долларни ташкил этган.

Статистика агентлиги ҳисоботига кўра, биринчи чоракда Ўзбекистоннинг ташқи савдо айланмаси 15,82 млрд долларга етган. Бунинг 6,38 млрд доллари экспорт (бу маблағнинг 41,7 фоизи хорижга олтин сотишдан тушган - таҳр.), 9,43 млрд доллари эса импорт ҳиссасига тўғри келади.

Ўзбекистонда 2024 йилнинг март ойида газ қазиб олиш 3,89 миллиард куб метргача камайган. Бунга “Газета.uz” нашри Статистика агентлиги ҳисоботини ўрганиб чиқиш ортидан эътибор қаратган.

Ҳисоботга мувофиқ, жорий йилнинг илк чорагида газ ишлаб чиқариш ҳажми 11,6 миллиард куб метрни ташкил этган, бу ўтган йилнинг шу даврига нисбатан 5,9 фоизга ёки 724,8 миллион куб метрга камдир.

Биринчи чоракда нефть қазиб олиш ҳам 60,6 минг тоннагача камайган. Бу ўтган йил мартига нисбатан 11,1 фоизга ёки 7600 тоннага кам. Айни пайтда ишлаб чиқаришда етти ойдан буён кузатилаётган пасайиш (августдан февралгача) ўтган ойга келиб тўхтагани қайд этилган. Шу тариқа, жорий йилнинг январь-март ойларида ишлаб чиқариш 179,1 минг тоннани ташкил этган - ўз навбатида бу 2023 йилнинг шу даврига нисбатан 8,4 фоизга кам.

Шунингдек, агентлик ҳисоботидан келиб чиқилса, март ойида Ўзбекистонда 119,5 минг тонна автомобиль бензини ишлаб чиқарилган, бу ўтган йил мартига нисбатан 1,6 фоизга ёки 1900 тоннага кам. 2023 йил март ойида мамлакатда 121,4 минг тонна бензин ишлаб чиқарилган эди.

Умуман олганда, жорий йилнинг март ойида ўтган йилнинг шу даврига солиштирганда фақатгина кўмир қазиб олиш бўйича кўрсаткичлар ошиб (+0,9 фоиз), 309 минг тоннани ташкил этган. Бироқ бу ерда ҳам чораклик кўрсаткичда 2 фоизлик қисқариш кузатилган.

Озодлик март ойи бошида “Путиннинг бир қўлидан иккинчи қўлига. "Газли" омбори Фозиловга ўтди” деб номланган суриштирувни эълон қилган эди.

Суриштирувда Ўзбекистон энергетикасининг де-факто қиролига айланган Бахтиёр Фозилов эндиликда мамлакат газ-транспорт тизимининг "юраги" саналган "Газли" газ омборини ҳам қўлга олгани айтилади.

“Украинадаги уруш ортидан юзага келган янги геосиëсий реалликда Россия газ қувурлари ўтувчи Қозоғистон ва Ўзбекистон билан "Газ иттифоқи" деб аталган махфий келишув имзолади, Ўзбекистонга 2.8 миллиард куб метр газ импорт қилиш иддаоси билан бу қувурларни реверс режимида ишга туширди.

Ўзбекистон ҳукумати ҳозиргача 2023 йил 7 октябрь - Путиннинг туғилган кунида тантана билан старт берилган бу келишув ортидан қанча газ, қанча нархда импорт қилинганига оид бирор маълумотни очиқламаган”, дейилганди Озодлик суриштирувида.

Буюк Британия ташқи ишлар вазири Дэвид Кэмерон 23 апрель куни Ўзбекистон пойтахтига етиб келган.

ЎзА хабарига кўра, ҳозирда Кэмерон Ўзбекистон Ташқи ишлар вазирлиги биносида ўзбекистонлик ҳамкасби Бахтиёр Саидов билан музокара ўтказмоқда.

“Учрашувда минтақавий хавфсизлик, таълим, иқлим ўзгариши, икки томонлама савдо ҳамда бизнес алоқаларини ривожлантириш масалалари муҳокама этилмоқда”, дейилган хабарда.

Британия ТИВ раҳбари Ўзбекистонга Марказий Осиё минтақасининг беш давлати ва Мўғулистонга сафари доирасида ташриф буюрган. Ташрифдан мақсад иқтисодий тараққиёт ва таълим соҳаларидаги ҳамкорликни кенгайтириш ҳамда минтақа давлатлари мустақиллигини мустаҳкамлаш юзасидан музокара ўтказиш экани айтилган.

Ўзбекистонга ташрифдан аввал Британия бош дипломати 22 апрель куни Душанбе ва Бишкекда бўлиб, Тожикистон президенти Эмомали Раҳмон ва Қирғизистон президенти Садир Жапаров билан учрашган. Кэмероннинг айни пайтда қисқа муддатли меҳнат таътилида бўлган Ўзбекистон президенти билан учрашиш-учрашмаслиги ҳақида ҳозирча расмий маълумот йўқ.

Бу Британия ташқи ишлар вазирининг сўнгги 27 йил ичида Тошкентга илк сафаридир. Кэмерондан аввал Ўзбекистонга 1997 йил февралида ўша пайтда Британия ТИВ раҳбари бўлган Малкольм Рифкинд ташриф буюрган эди.

Ўзбекистоннинг тоғолди ва тоғли ҳудудларида 25-28 апрель кунлари кутилаётган кучли ёғин-сочин тўққизта вилоят ҳудудида сел-сув тошқини ҳодисаларининг юзага келишига сабаб бўлиши мумкин. Бу ҳақда Гидрометеорология хизмати агентлиги раҳбари Шерзод Ҳабибуллаев Facebook тармоғидаги ўз саҳифаси орқали маълум қилди.

Мулозимга кўра, сел ҳодисалари, жумладан Қашқадарё вилоятининг Яккабоғ, Деҳқонобод, Чироқчи, Китоб, Шаҳрисабз, Қамаши, Ғузор туманларида, Сурхондарё вилоятининг Сариосиё, Узун, Олтинсой, Денов, Бойсун, Шеробод, Шўрчи, Қумқўрғон, Музробот туманларида, Самарқанд вилоятининг Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой, Иштихон туманларида, Навоий вилоятининг Хатирчи, Навбаҳор, Нурота, Конимех, Кармана туманларида, Жиззах вилоятининг Зомин, Бахмал, Ғаллаорол, Шароф Рашидов, Фориш, Янгиобод туманларида, Тошкент вилоятининг Оҳангарон, Бўстонлиқ, Паркент, Пискент, Ўртачирчиқ, Юқоричирчиқ туманлари ва Ангрен, Олмалиқ шаҳарларида, Наманган вилоятининг Поп, Косонсой, Чортоқ, Чуст, Наманган, Янгиқўрғон туманларида, Фарғона вилоятининг Сўх, Шоҳимардон, Фарғона, Бешариқ туманларида, Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманлари ҳамда Хонобод шаҳрида кузатилиши эҳтимоли бор.

Хабарномада тоғолди ва тоғли ҳудудларда истиқомат қилувчи аҳолидан ҳамда бу ҳудудларда ҳаракатланувчи ҳайдовчилардан тошқин эҳтимолига қарши эҳтиёткорлик чораларини кўриш сўралган.

Аввалроқ Ўзбекистоннинг бир неча вилоятида сел-тошқин ҳодисалари кузатилгани хабар қилинган. Шунингдек, сўнгги кунларда Ўзбекистонга қўшни бўлган Қозоғистон, Қирғизистон ва Тожикистонда ёғин-сочин ва қор эриши натижасида сел ва тошқинлар рўй бергани маълум. Бу мамлакатлар ичида тошқин туфайли энг кўп талафот Қозоғистонда берилган.

Тошкент шаҳрининг Юнусобод туманидаги 257-мактаб ўқитувчиси Н. Н. мактаб фонди учун ўқувчилардан пул йиққани учун ишдан бўшатилган. Бу ҳақда Тошкент шаҳар мактабгача ва мактаб таълими бошқармаси матбуот хизмати маълумот тарқатди.

Аввалроқ маҳаллий нашрлар пойтахтдаги 257-мактабда ота-оналардан мажбурий равишда 25 минг сўмдан пул йиғилаётгани ҳақида хабар қилишган. Бу маълумот Тошкент шаҳар ММТБ ишчи гуруҳи томонидан ўрганилган.

Бошқарма қайдича, ҳолат тасдиқлангани ортидан мактаб маъмурияти “ноқонуний хатти-ҳаракатни содир этган” ўқитувчи Н. Н. билан тузилган шартномани бекор қилган.

Ўзбекистон президенти Шавкат Мирзиёев 22 апрелдан қисқа муддатли меҳнат таътилига чиққан.

Бу ҳақда маълумот тарқатган президент матбуот хизмати мазкур таътил неча кун давом этишига аниқлик киритган эмас.

Мирзиёев таътилдан аввал Тожикистонга давлат ташрифини амалга оширган. Аввалроқ Озодлик 18-19 апрель кунлари Тожикистонга сафар чоғида Ўзбекистон президенти тожикистонлик ҳамкасби Эмомали Раҳмон билан тор доирада ва кенгайтирилган таркибда музокаралар ўтказгани, сўнгра икки давлат ўртасидаги Иттифоқчилик муносабатлари тўғрисидаги шартномани имзолагани, Тожикистон Парламенти қуйи палатаси раиси Маҳмадтоир Зокирзода ва бош вазир Қоҳир Расулзода билан учрашгани, Душанбедаги Ўзбекистон элчихонасининг янги биноси очилишида ҳамда бошқа тадбирларда иштирок этгани ҳақида хабар қилган эди.

Мирзиёев сўнгги марта ўтган йилнинг 4 декабридан қисқа муддатли меҳнат таътилига чиққани эълон қилинган. Ўша пайтдаги таътил президентнинг рафиқаси Зироат Мирзиёеванинг туғилган кунига тўғри келган эди.

Ўзбекистонни 2016 йилдан буён президент ўлароқ бошқариб келаётган Шавкат Мирзиёев илк бор 2019 йил августида меҳнат таътили олгани очиқланган. Бу Мирзиёевнинг 13 йиллик бош вазирлик ҳамда 3 йиллик президентлиги давридаги расман биринчи меҳнат таътили бўлган эди.

“Ўзбекистон Республикаси Президенти фаолиятининг асосий кафолатлари тўғрисида”ги Қонуннинг 4-моддасига биноан, Президентга муддати 36 иш кунидан иборат йиллик ҳақ тўланадиган таътил берилади.

Ўзбекистон Конституциясида президент таътилда бўлганида унинг вазифасини ким бажариши масаласига аниқлик киритилган эмас.

Янги таҳрирдаги Конституциянинг 112-моддасида “Ўзбекистон Республикасининг амалдаги Президенти ўз вазифаларини бажара олмайдиган ҳолатларда унинг вазифа ва ваколатлари вақтинча Ўзбекистон Республикаси Олий Мажлиси Сенати Раисининг зиммасига юклатилиши” қайд этилган.

Тожикистон пойтахти Душанбе шаҳрида 19 апрель куни Ўзбекистон элчихонаси янги биносининг тантанали очилиш маросими бўлиб ўтган. Ўзбекистон президенти матбуот хизмати маълумотига кўра, бинонинг очилиш тадбири Шавкат Мирзиёевнинг Тожикистонга давлат ташрифи доирасида ўтказилган.

Маросимда Мирзиёев мезбон президент Эмомали Раҳмон билан биргаликда рамзий тасмани кесган, шундан сўнг давлат раҳбарлари элчихона биносида дипломатлар учун яратилган шароитлар билан танишганлар. Маросим якунида икки президент элчихона Фахрий меҳмонлар китобига ўз тилакларини ёзиб қолдиришган.

Ўзбекистон президенти 18-19 апрель кунлари давлат ташрифи билан Тожикистонда бўлиши ҳақида Озодлик аввалроқ хабар қилган эди.

Ташриф чоғида Шавкат Мирзиёев билан Эмомали Раҳмон 18 апрель куни тор доирада ва кенгайтирилган таркибда музокаралар ўтказишган, сўнгра икки давлат ўртасида Иттифоқчилик муносабатлари тўғрисидаги шартномани имзолашган.

19 апрель куни Ўзбекистон президенти Тожикистон Парламенти қуйи палатаси раиси Маҳмадтоир Зокирзода ва бош вазир Қоҳир Расулзода билан учрашган.

Шу куни Мирзиёев яна тожикистонлик ҳамкасби ҳамроҳлигида Ўзбекистон саноат маҳсулотлари кўргазмаси билан танишган.

Шу билан Мирзиёевнинг Тожикистонга давлат ташрифи ўз якунига етган ва Ўзбекистон президенти Тошкентга қайтган.

Жорий йилнинг 18 апрель оқшоми ва 19 апрель тонгида Ўзбекистон ҳудудида икки зилзила ҳис этилди. Бу ҳақда Ўзбекистон Фавқулодда вазиятлар вазирлигининг Сейсмопрогностик мониторинг республика маркази маълумот тарқатди.

Марказ қайдича, биринчи зилзила пайшанба куни Тошкент вақти билан 20:15 да содир бўлиб, эпимаркази Қирғизистонда бўлган 5,2 магнитудали бу зилзила таъсири Ўзбекистоннинг Фарғона, Наманган, Андижон ва Сирдарё (2 баллдан) вилоятлари ҳудудида ҳам сезилган.

Иккинчи ер қимирлаши эса жума куни соат 05:15 да бевосита Қашқадарё вилоятининг Миришкор туманида юз бериб, 3 магнитудали бу зилзила эпимаркази жануби-ғарбий йўналиш бўйича Тошкент шаҳридан 448 километр узоқликда бўлган.

Сейсмопрогностик мониторинг республика маркази 18 апрель куни Тошкент вақти билан соат 16:42 да ҳам эпимаркази Афғонистонда бўлган 3,9 магнитудали зилзила рўй бергани ҳақида маълум қилган, бироқ бу зилзиланинг Ўзбекистон ҳудудида таъсири сезилиб-сезилмаганига аниқлик киритган эмас.

Қирғизистоннинг Жалолобод вилоятига қарашли Новкен туманида яна бир ерости йўли топилган. Бу ҳақда Қирғизистон Ички ишлар вазирлиги матбуот хизмати маълумот тарқатди.

Вазирлик хабарномасида ўтган ҳафта ўтказилган тезкор-қидирув тадбирлари чоғида муайян маблағ эвазига одамлар ва товарларни чегара яқинидаги қувурдан ўтказиш билан шуғулланган 39 ёшли новкенлик К. Х. ушлангани айтилган.

“Қўлга олинган шахсдан ашёвий далил ўлароқ тунда кўриш дурбини ва белги қўйилган пуллар мусодара этилди. Шунингдек, чегарадан ноқонуний равишда ўтказилган товарлар сақланаётган ер ҳам топилди”, дейилган ИИВ хабарномасида.

Вазирлик тергов доирасида новкенлик гумонланувчининг уйида тинтув ўтказилгани, тинтув чоғида ичида психотроп моддалар дохил 41 турдаги дори воситалари бўлган 87 та қути топилганини қўшимча қилган.

Дастлабки ҳисоб-китобларга кўра, топилган товарлар қиймати 30 минг АҚШ долларига тенг. Мусодара этилган дори воситалари бўйича тегишли экспертизалар тайинланган.

Ўтган ойда Ўзбекистон Давлат хавфсизлик хизмати Андижон вилояти Хонобод шаҳри билан Қирғизистоннинг Жалолобод вилояти Сузоқ тумани Бекобод қишлоғи кесишган жойда икки яширин ерости йўли аниқлангани ҳақида маълумот тарқатган эди.

Ўзбек-қирғиз чегарасида контрабанда маҳсулотлари ўтказиб турилгани айтилган яширин бир неча туннел топилгани ҳақида Озодлик 2022 йилда ҳам хабар қилган.