Марказий Осиёда инсон ҳуқуқлари ассоциацияси президент Макрондан Ўзбекистон раҳбарига жиддий талаблар қўйишни сўради.
Ассоциация раҳбари Надежда Отаева эълон қилган мурожаатда Мирзиёев бошқарувининг дастлабки икки йилида 29 фаол қамоқдан озод қилингани, халқаро инсон ҳуқуқлари ташкилотлари миссиялари мамлакатга қўйила бошлагани, ҳукумат вакилларининг тузумдаги қонунбузарликларни танқид қила бошлагани олқишланган.Айни пайтда, мурожаатда, қийноқлар ва коррупцияга алоқадорликда айбланган амалдорлар устидан маҳкама жараёнларининг ёпиқ ўтказилаётгани, қамоқдан чиққан виждон тутқунларининг бирор нафари реабилитация қилинмагани ва товон пули ололмагани, собиқ Миллий хавфсизлик хизмати раҳбари Рустам Иноятовнинг ҳануз ҳукуматга энг яқин мулозим сифатида қолаётгани, парламент ва суд тизими ҳануз ижро ҳокимиятига қарамлиги, хорижга кетишга мажбур бўлган сиёсий муҳожирлар фуқаролик ҳуқуқидан маҳрум қилингани қораланган.
Ташкилот фаоллари 9 октябрь куни Франция ва Ўзбекистон президентлари учрашуви муносабати билан пикет уюштиришини билдирган ва айни пайтда, Франция раҳбарининг ўз ҳамкасбини реал ва изчил ислоҳотлар ўтказишга чақиришига умид билдирган.
Шавкат Мирзиёев хорижий инвесторлар билан тўғридан-тўғри мулоқот қилмоқчи.
Парижда Франциянинг йирик ширкатлари раҳбарлари билан учрашган Мирзиёев улар билан тўғридан-тўғри ишлаш, уларнинг таклиф ва талабларини уларнинг ўзларидан билиш асосида ҳамкорлик қилиш ниятини билдирди.
Президент матбуот хизматининг хабар қилишича, 8 октябрь куни Мирзиёев Франциянинг йирик компаниялари - “Тоталь”, “Тоталь Эрен”, “Орано”, “Талес Аления Спейс”, Европа тикланиш ва тараққиёт банки, Франция тараққиёт агентлиги каби Европа ва жаҳон бозорида етакчи компаниялар ва молиявий тузилмалар раҳбарлари билан учрашган.
Учрашувда президент ўз ҳузурида Хорижий инвестициялар бўйича кенгаш тузиш тўғрисида қарор қабул қилгани, унинг вазифаси инвесторлар фикрини инобатга олган ҳолда, Ўзбекистон инвестиция муҳитини изчил яхшилаб бориш бўйича таклифлар ишлаб чиқишдан иборат эканини таъкидлаган.
Президент Мирзиёев BBC Ўзбек хизматига Ўзбекистонда ишлаши учун рухсат беришини айтди.
8 октябрь куни Париждаги ЮНЕСКО биносида BBC ўзбек хизмати мухбири Ибрат Сафо президент Мирзиёевга: "BBCга қачон рухсат бўлади, Ўзбекистонга рухсат бўладими?" деб сўради.
Бунга жавобан Мирзиёев "Албатта бўлади, келинглар", деб жавоб берди.
Бош офиси Лондонда жойлашган BBC жаҳон хизматининг ўзбек шўъбаси 2017 йилнинг 5 июлида “бир муддат танаффусдан сўнг¸ Ўзбекистондаги фаолиятини қайта бошлаш арафасида” эканини эълон қилганди.
Шу муносабат билан BBC ўзбек хизмати Тошкентда очиш режаланаëтган мухбирлик бюросига ишга олинадиган журналистлар учун танлов ҳам эълон қилди.
Шундан буён Британия медиа корпорациясининг Ўзбекистон ичкарисида ўз фаолиятини қайта бошлашига оид бошқа тафсилотлар¸ хусусан¸ мухбирлик бюросининг қачон очилиши номаълум қолмоқда.
2005 йил Андижон воқеалари ортидан қатор халқаро ташкилотлар ва халқаро ахборот воситалари, шу жумладан, Озодлик радиосининг Ўзбекистондаги мухбирлик бюроси фаолияти ҳам ҳукумат қарори билан тўхтатиб қўйилган эди.
Матбуот хизмати президент Мирзиёевнинг Францияга расмий ташрифи илк кунига оид видео эълон қилди.