Линклар

Шошилинч хабар
31 октябр 2020, Тошкент вақти: 21:49

Халқаро хабарлар

Қозоғистонда мухолифат намойишларда қатнашган юздан ошиқ шахс қўлга олинди (ВИДЕО)

Фаоллар қўлга олинмоқда, 6 июнь, 2020, Олмаота

Қозоғистон полицияси 6 июнь куни мамлакатнинг бир неча шаҳарларида 100 дан ошиқ фаолни қўлга олди.

Мамлакатнинг тижорий пойтахти бўлмиш Олмаотада ўнлаб одам қўлга олингани хабар қилинди.

Пойтахт Нур-Султонда ҳам бир неча фаол қўлга олинди.

6 июнь куни икки мухолиф партия демократик ислоҳотларни талаб қилиб норозилик акциясини ўтказишни режалаштирган эди.

Қозоғистонда яқинда намойишлар тўғрисидан янги қонун кучга кирган эди. Унга биноан мамлакат аҳолиси тинч намойишларга эркин чиқа олиши мумкин.

Инсон ҳуқуқлари ташкилотлари Қозоғистонда 2019 йил президент алмашган бўлса-да, инсон ҳуқуқларига бўлган ҳурмат ўзгармаганини айтиб келади.

Коронавирус пандемияси туфайли нефть ва газ нархларининг тушиб кетгани Қозоғистон иқтисодига кескин зарба бўлди. Расмий маълумотларга кўра, икки ойга чўзилган карантин давомида 4 миллиондан ошиқ қозоғистонлик ишсиз қолди.

Кун янгиликлари

Жеймс Бонд роли билан танилган Шон Коннери 90 ёшида вафот этди

Агент Жеймс Бонд ролининг биринчи ижрочиси бўлган британиялик актёр Шон Коннери 90 ёшида вафот этди.

Шон Коннери ўзбек томошабинига Британия разведкаси агенти Жеймс Бонд ролининг биринчи ижрочиси сифатида таниш.

Коннери ярим асрлик фаолияти давомида у ўнлаб фильмларда ва телесериалларда суратга тушган.

У "Оскар", "Олтин глобус" ва BAFTA (Британия кино ва телевизион санъат академиясининг мукофоти) лауреати бўлган.

Шон Коннери актёрлик фаолиятини 2003 йилда якунлаганди. Сўнгги йилларда у Багама оролларида рафиқаси билан яшаб келаётганди.

Грузияда парламент сайловлари бўлиб ўтмоқда

Грузияда сайлов жараёни ислоҳ қилинганидан кейинги илк парламент сайловлари бўлиб ўтмоқда.

Июнь ойида киритилган ўзгаришларга биноан, аввалгидек 77 эмас, балки 120 ўрин партия рўйхатлари асосида тўлдирилади. Шунингдек, аввалгидек 73 эмас, балки 30 нафар индивидуал номзод бир мандатли туманлар вакили сифатида сайланади.

Бугунги сайловда 66 партиянинг 490 номзоди беллашмоқда.

Мамлакат сайлов қонунчилиги бир сиёсий гуруҳ ҳокимиятни консолидация қилишига барҳам бериш мақсадида ўзгартирилган эди.

Бугунга қадар миллиардер Бидзина Иванишвилининг «Грузин орзуси» партияси ҳукмронлик қилиб келади.

Партия 2012 йилги сайловда мухолиф «Бирлашган миллий ҳаракат» партияси устидан ғалаба қозонганидан кейин ҳукмронлик қилиб келаётган эди.

Аммо 2019 йилда норозилик акциялари фонида партиянинг айрим депутатлари уни тарк этди ва натижада партия позицияси сустлашди.

Европа Комиссияси бошпана қонунчилигини бузган Венгрияни жавобгарликка тортади

Европа Комиссияси ЕИнинг бошпана бериш тўғрисидаги қонунларини бузган Венгрияга қарши чора кўради.

30 октябрь куни Еврокомиссия бу ҳақда Венгрияга расмий мактуб йўллади. Унда коронавирус пандемиясига жавобан Будапешт жорий қилган янги тартиблар «Европа Иттифоқи бошпана қонунчилигини нотўғри татбиқ қилишга» тенг келиши айтилади.

Будапешт жорий қилган янги тартибга биноан Европа Иттифоқига аъзо бўлмаган давлатлар фуқаролари аввал Европа Иттифоқи ташқарисидаги Венгрия элчихонасида бошпана сўраши ва мамлакатга кириш учун махсус рухсатнома олиши керак.

Венгрияга Комиссияга жавоб бериш учун икки ой муддат берилди.

2015 йилда Европада муҳожир бўҳрони бошланганидан бери Венгрия бош вазири Виктор Орбан ўзининг иммиграцияга қарши сиёсати туфайли бир неча бор Брюссель билан тўқнашди.

2019 йил июль ойида Венгрия бошпана бериш тўғрисидаги аризаларни қўллаб-қувватлаганларни жиноий жавобгарликка торта бошлагани учун Комиссия мамлакатни судга берган эди.

Лукашенко ички ишлар вазирини алмаштириб, намойишчиларни огоҳлантирди

Беларус президенти Александр Лукашенко хавфсизлик хизматлари етакчилари билан учрашиб, намойишчиларни огоҳлантирди.

Авторитар президент унинг истеъфосини талаб қилиб ўтказилаётган норозилик акциялари фонида Ички ишлар вазирлигининг юқори лавозимли амалдорларини алмаштирди ҳамда қўшни мамлакатлар билан чегараларни қисман ёпди.

30 октябрь куни Лукашенко Михаил Грибни пойтахт Минск полицияси етакчиси, Иван Кубраковни эса ички ишлар вазири этиб тайинлади.

Ўша куни хавфсизлик хизматлари етакчилари билан учрашган Лукашенко:

«Агар кимда-ким хавфсизлик ходимига қўлини теккизса, мен аллақачон генералларимизга айтганимдек, у одам ўша жойни ҳеч бўлмаганда қўлидан айрилиб тарк этиши керак. Мен буни ҳамма-ҳамма қатъиятли эканлигимизни тушуниши учун айтаман. Бизда бошқа илож қолмади. Ортга чекиниш учун имконимиз йўқ ва бундай қилмаймиз ҳам», - деди.

Беларусда норозилик акциялари шу йил 9 августидан бери – Лукашенко президент сайлови ғолиби деб эълон қилиниши ортидан бошланиб кетган.

Мухолифат расмийлар томонидан эълон қилинган сайлов натижаларини тан олмай, уларни сохталаштирилган деб ҳисоблаб, Лукашенко истеъфосини, сиёсий маҳбуслар озод қилинишини ҳамда янги сайлов ўтказилишини талаб қилиб келмоқда.

Бугунга қадар 10 мингдан ошиқ намойиш қатнашчиси ҳибсга олинди, юзлаб одам қийноққа тутилди.

Челябинскдаги Covid-19 беморлари даволанадиган касалхонада кислород баллонлари портлаб, ёнғин рўй берди

Россиянинг Челябинск шаҳридаги коронавирус беморлари даволанадиган касалхонада шанба куни эрталаб портлаш рўй берди.

Хабарларга кўра, 2-сонли шаҳар касалхонаси поликлиникасининг кислород кабинасида кислородли баллонлар портлаган.

Портлаш ортидан ёнғин ҳам юз берган ва касалхонанинг икки қаватини қоплаган. Халок бўлганлар ёки жабрланганлар йўқ демоқда шифохона раҳбарияти.

Челябинск вилояти губернатори Алексей Текслер шанба куни шаҳар клиникасида содир бўлган ёнғиндан кейин шаҳар даражасида фавқулодда вазият эълон қилган.

“Бундай вазиятда мен фавқулодда режимни эълон қиламан”, – деган Текслер.

Россия ҳуқуқ-тартибот идоралари Челябинскдаги портлаш ва ёнғин юзасидан жиноят иши очган.

Шу ой бошида Ўзбекистоннинг Гулистон шаҳридаги Ковид марказдан ҳам кислород балонлар портлаган.

Портлашдан бир киши ҳалок бўлган, марказ жойлашган "Алпомиш" спорт мажмуаси ҳамда ён атрофдаги биноларга шикаст етганди.

Туркиядаги зилзила қурбонлари сони 25 кишига етди

Туркияда содир бўлган зилзила оқибатида ҳалок бўлганлар сони 25 нафарга, жароҳат олганлар эса 800 кишига етди.

Бу ҳақда Туркия Фавқулодда ҳолатлар ва табиий офатлар бўйича агентлиги маълум қилди.

30 октябр куни Туркия ғарбида 6,6 магнитудали рўй берганди. Зилзила эпимаркази Измир вилоятининг Сеферлихисар шаҳри атрофида бўлган.

Ерости силкинишлари Греция ороллари яқинида ҳам қайд этилган бўлиб, сейсмологлар унинг магнитудасини 6,9 га баҳолаган.

Измир вилояти ҳокимлигига кўра, зилзила оқибатида камида 20 та бино вайрон бўлган.

Шунингдек, Грециянинг Самос оролида зилзила оқибатида 2 киши ҳалок бўлган ва 20 киши жароҳат олган.

Ўзбекистон Ташқи ишлар вазирлиги Туркияда юз берган зилзилада ҳалок бўлган ва жароҳат олганлар орасида ўзбекистонликлар йўқлигини айтмоқда.

Туркия: Измирда 6,6 балли зилзила рўй берди

Измирда зилзила оқибатида қулаган бинолардан бири, 2020 йил 30 октябри.

Туркия ғарбида 30 октябрь куни маҳаллий вақт билан соат 14.51 да 6,6 балли зилзила содир бўлган. Онадўли агентлиги хабарига кўра, бинолар қулагани айтилган ҳудудга қутқарувчилар йўлланган.

Туркия ҳукумати ҳузуридаги Фавқулодда вазиятлар оқибатлари олдини олиш ва бартараф этиш бошқармаси маълумотига мувофиқ, зилзила маркази Эгей денгизининг Измир вилояти Сеферҳисар тумани соҳилига яқин ҳудудида бўлган. Зилзила ўчоғи 16,5 километр чуқурликда бўлгани айтилмоқда.

Маълумотларга кўра, ер силкиниши 15 сонияга яқин давом этган ва мамлакат ғарбидаги (Эгей денгизи бўйлари) кўплаб вилоятларда сезилган.

Туркия Ички ишлар вазирлиги ер қимирлаши оқибатида Измирнинг Бўрнўва ва Байрақли мавзеларида олти турар-жой биноси вайрон бўлгани ҳақида билдирди. Қутқарувчилар Байрақлида қулаган бино вайроналари орасидан 4 кишини қутқаришга муваффақ бўлганлар.

Сўнгги маълумотларга кўра, зилзила оқибатида 6 киши нобуд бўлган, 120 киши тан жароҳати олган.

Туркия президенти Ражаб Тоййиб Эрдўғон Измирдаги зилзила оқибатида жабр кўрган ватандошларга ҳамдардлик билдирди.

Эмомали Раҳмон бешинчи бор Тожикистон президенти лавозимига киришди

Эмомали Раҳмон.

Тожикистонни қарийб 28 йилдан бери бошқариб келаётган Эмомали Раҳмон 30 октябрь куни қасамёд қилиб, расмий равишда бешинчи марта мамлакат президенти лавозимига киришди. Озодликнинг тожик хизмати хабарига кўра, қасамёдга келтириш маросими жума куни пойтахт Душанбедаги “Кўҳи Сомон” қароргоҳида ўтказилган.

Маросимда сўзлаган нутқида Эмомали Раҳмон яқин етти йил ичида Тожикистон тўлалигича энергетика мустақиллигига эришиши, транзит мамлакатга айланиб, коммуникацион боши берк кўчадан чиқишини билдирган. Унга кўра, бошқа бир стратегик вазифа мамлакатнинг озиқ-овқат хавфсизлигини таъминлаш бўлиб қолмоқда.

Қасамёдга келтириш маросимидан сўнг Душанбеда парад ўтказилган ва унда, маълумотларга кўра, етти мингдан зиёд ҳарбий иштирок этган.

Тожикистон Марказий сайлов комиссияси 11 октябрь куни бўлиб ўтган президент сайловида Эмомали Раҳмон учун сайловчиларнинг 90 фоиздан кўпроғи овоз берганини эълон қилган. Айни пайтда Ғарб мамлакатлари Э. Раҳмон ҳукмронлиги даврида Тожикистондаги бирор сайлов демократик, шаффоф ва халқаро стандартларга мос равишда ўтмаганини айтиб келишади. Сўнгги президент сайловида ҳам Эмомали Раҳмонга ҳақиқий рақиб бўла оладиган номзодлар қатнашган эмас.

Нотр-Дам черковида уч одамни ўлдирган ҳужумчининг шахси аниқланди

Полиция Нотр-Дам черкови олдида.

Франциянинг Ницца шаҳрида 29 октябрь куни пичоқ билан қуролланиб, Нотр-Дам черковида ва ибодатхона олдида ўткинчиларга ҳужум қилган одамнинг шахси аниқланди.

Полициянинг билдиришича, у келиб чиқиши Тунисдан бўлган 21 ёшли Брахим Ауисауи экани аниқланди.

AFP агентлигининг полицияга алоқадор бўлган манбалари Брахим Ауисауи сентябрь ойида Тунисдан қайиқда Италиянинг Лампедуза оролига ўтганини айтганлар.

Қўлга олинган шахснинг олдида паспорти бўлмаган, бироқ ундан Италия Қизил Ҳочи томонидан шу номга берилган бошқа ҳужжатлар топилган.

Лампедуза Европага ноқонуний йўллар билан қочиб келаётган қочқинларни қабул қилувчи асосий марказ ҳисобланади.

Тhe Guardian газетасининг Италия тергов органларига таяниб хабар беришича, Брахим Ауисауи Лампедузадаги карантиндан сўнг 9 октябрда Бари шаҳрига жўнатилган.

Бу ерда унга Италияни тарк этиши ва Тунисга қайтиши шартлиги тўғрисида ҳужжат топширилган. Ауисауи ҳужжатни олгач Францияга қочиб ўтган, лекин бу ерда расман бошпана сўрамаган. Ауисауи қандайдир ташкилотларга алоқадор экани ҳозирча аниқланмаган.

Озарбайжон Арманистонга ҳалок бўлган 29 арман аскарининг жасадини топширди

Арманистонлик кўнгилли аскар машқ жараёнида.

Озарбайжон 29 октябрь куни Арманистонга Тоғли Қорабоғдаги жанглар пайтида ҳалок бўлган 29 арман аскарининг жасадини топширди.

Арманистон мудофаа вазирлиги матбуот котиби Шушан Степанян жасадлар Россия воситачилигида ўтказилган сўзлашувлар ортидан қайтарилганини, жасадларни қайтариш жараёнида ЕХҲТ раисининг расмий вакили ва Халқаро Қизил Ҳоч иштирок этганини билдирди.

Степанян Арманистон “Озарбайжонга озарбайжон аскарлари жасадларини қайтариш ваъадасида собит экани”ни таъкидлади. Бундан ташқари Арманистон “жангоҳларда қолиб кетган жасадларни олиб чиқиш, ҳарбий асирлар ҳақида маълумот алмашиш ва келажакда уларни ўзаро алмаштириш бўйича ҳамкорликка тайёр” эканини ҳам маълум қилди.

Озарбайжон президенти Илҳом Алиевнинг расмий вакили Ҳикмет Гаджиев эса хорижлик журналистларга арман ҳарбийлари жасадини қайтариш Боку ташаббуси экани ва бу ташаббус Россия воситачилигида амалга оширилганини айтди.

Халқаро ҳамжамият Озарбайжон ҳудуди ўлароқ тан оладиган Тоғли Қорабоғ 1994 йилдан бери Арманистон дастаклаб келаётган этник арманлар назорати остида. Мазкур ҳудуддаги жанглар 27 сентябрда бошланган эди.

Беларус Латвия, Литва, Украина ва Польша билан чегарасини ёпди

Беларус-Латвия чегарасида йиғилиб қолган йўловчилар.

Беларус ҳукумати ҳеч қандай огоҳлантиришларсиз Латвия, Литва, Украина ва Польша билан чегараларини ёпиб, бу мамлакатлардан Беларусга киришга чеклов ўрнатди. Беларус Чегара қўмитаси бу ҳолатни коронавирус пандемияси билан боғлади. Аммо бир кун олдин президент Александр Лукашенко Беларус армияси Латвия, Литва, Украина ва Польша “агрессиясига муносиб жавоб қайтаришга тайёр” эканини айтган эди.

Озодлик радиоси беларус хизматининг хабар беришича, чегараларда автотиқинлар юзага келган. Қўшни давлатлардаги беларуслар ўз уйларига қайта олмаётганидан шикоят қилишмоқда. Чегарадан фақат дипломатик ва юк ташувчи автомашиналарни ўтказишмоқда.

Хорижга кетаётган беларусларни чегара хизмати тез кунларда ватанларига қайта олмасликлари тўғрисида огоҳлантирмоқда. Айни пайтда Минск аэропорти одатдаги режимда ишламоқда.

Пайшанба куни Александр Лукашенко АҚШ давлат котиби Майк Помпео билан телефон орқали қилган мулоқоти ҳақида журналистларга маълумот берган эди.

Ўшанда Александр Лукашенко: “Мен Помпеони огоҳлантирдим: Польша, Литва, балки Украина томонидан ҳам таҳдид бўлса, биз муносиб жавоб қайтарамиз”,-деб айтган.

Лукашенко шу куниёқ чегараларни мустаҳкамлаш тўғрисида буйруқ берган.

Ниццадаги ҳужумда камида уч киши ҳалок бўлди, ҳужумчи қўлга олинди

Ницца, Франция, 2020 йил 29 октябри.

Франциянинг Ницца шаҳрида 29 октябрь куни пичоқ билан қуролланган номаълум шахс Нотр-Дам черковида ва ибодатхона олдида ўткинчиларга ҳужум қилган. Франция нашрларининг ёзишича, ҳодиса чоғида уч киши ўлган. Reuters хабарига кўра, улардан бирининг боши танасидан жудо қилинган. Яна бир неча одам тан жароҳати олган.

RFI нашри қурбонлардан икки нафари (бир аёл ва бир эркак) черков ичида, яна бири ибодатхона ташқарисида ўлдирилганини ёзган.

Ҳужумчи полиция томонидан қўлга олинган. Унинг шахси ва жиноятга ундаган сабаби ҳақида ҳали маълумот берилганича йўқ.

Шаҳар мэри ҳодисани “террор хуружи” деб атаган. Жиноят тафсилотлари аксилтеррор прокуратураси томонидан ўрганилмоқда.

Бу орада Le Figaro нашри полицияда ишлайдиган ўз манбаларидан олинган маълумотларга таянган ҳолда, Ниццадаги ҳужумдан икки соат ўтгач, Авиньон шаҳрида бир эркак пичоқ билан полициячиларга ҳужум қилмоқчи бўлгани ҳақида хабар қилди. Маълумотларга кўра, ҳужумчи полиция ходимлари томонидан отиб ўлдирилган.

Ниццадаги ҳужум Париж яқинида ўқитувчи Самюэл Пати ўлдирилганидан икки ҳафта ўтиб содир бўлди.

Покистон Қирғизистондаги барча тиббиёт университетларини қора рўйхатга киритди

Қирғизистонда таълим олаётган ҳиндистонлик ва покистонлик талабалар.

Покистон Тиббиёт кенгаши Қирғизистондаги тиббиёт олий ўқув юртларининг барчасини қора рўйхатга киритди.

Қирғизистон Таълим ва фан вазирлигининг билдиришича, бу ҳақда ҳукуматга Покистоннинг Бишкекдаги элчихонаси маълум қилди.

Расмий билдирувда таъкидланишича, Қирғизистондаги тиббиёт ўқув юртларини битирган покистонлик талабаларнинг 90 фоизи Покистон Тиббиёт кенгашининг имтиҳонидан ўтмай қолган. Натижада уларга берилган Қирғизистон дипломлари тан олинмаган.

Қирғизистон Таълим ва фан вазирлиги 28 октябрда бу масалани университетлар ректорлари билан муҳокама қилган. Йиғилишда деярли барча олий ўқув юртлари халқаро аккредитациядан ўтмагани маълум бўлган.

Расмий маълумотларга қараганда, Қирғизистонда 8700 покистонлик ва 9 мингдан кўпроқ ҳиндистонлик талаба Бишкекдаги Халқаро университетнинг тиббиёт олий мактабида, Ўш давлат университетида, Қирғиз-Рус университетида ва Иса Ахунбоев номидаги давлат тиббиёт академиясида таълим олади.

Туркманистонда коронавирус билан боғлиқ вазият мураккаблашмоқда

Ашхабодда автобусда кетаётган одамлар.

Туркманистонда коронавируснинг тарқалиши ортидан вазият оғирлашиб бораётгани хабар қилинди. 1 ноябрдан мамлакатда карантин чекловлари кучайтирилиши мумкинлиги тўғрисидаги хабарлар ҳам вазиятни мураккаблаштирмоқда.

Мустақил оммавий ахборот воситаларининг Туркманистонда COVID-19 ва у билан боғлиқ касаллликлар кўпайиб бораётгани тўғрисидаги хабарларига қарамай, расмий Ашхабод “мамлакатда коронавирус мутлақо йўқ” деган баёнотни беришда давом этмоқда.

Хабарларда айтилишича, туркман ҳукумати коронавирус тарқалишининг олдини олиш мақсадида карантин чораларини ҳаддан ташқари кучайтириш масаласини ўрганмоқда.

Дашўгуз вилоятидаги аёллар қамоқхонасида камида 500 маҳкумга коронавирус ташҳиси қўйилгани ҳам хабар қилинмоқда.

Озодлик радиоси туркман хизматининг мухбирлари пойтахт Ашхабодда ҳам коронавирусга чалинганлар сони кўпайиб кетганини билдирди. Уларга кўра, сўнгги икки ҳафта ичида беморлар сони кескин кўпайган.

Озодлик радиоси туркман хизматининг мухбирилари ишончли манбаларга таянган ҳолда ҳукумат карантин чораларини ҳаддан ташқари кучайтириш ниятида эканини хабар қилганлар. Жумладан, мамлакат ичидаги авиақатновлар тўхтатилади, ҳудудлараро автомобил ҳаракатлари чекланади. Ашхабодга бошқа ҳудудлардан келганларни киритмаслик масаласи ҳам кўриб чиқилмоқда.

Бундан ташқари тўй, марака ва оммавий тарзда жаноза ўқиш ҳам тақиқланиши айтилмоқда.

Туркманистон ҳукумати аввалроқ 15 октябргача жорий этилган карантин чекловлари 15 ноябргача узайтирилганини билдирганди.

Туркия президенти Франциянинг Charlie Hebdo журналига қарши даъво аризаси ёзди

Туркия президенти Ражаб Тоййиб Эрдўғон.

Туркия президенти Ражаб Тоййиб Эрдўғон ўзига нисбатан карикатура эълон қилган Charlie Hebdo журналига нисбатан даъво аризаси ёзди.

Эрдўғоннинг адвокатларига кўра, журналда эълон қилинган карикатура “фикр эркинлигига ҳеч қандай равишда алоқаси бўлмаган” ва жиноий қонунчилик асосида жазоланадиган тухматдир.

Айни пайтда прокуратура “президентни ҳақорат қилиш” моддаси бўйича тергов бошлагани ҳам айтилди.

Charlie Hebdo чоршанба куни ўз бош саҳифасида Эрдўғонга бағишланган карикатурани эълон қилганди. Карикатурада Эрдўғон бир қўлида ичимлик ушлаб, иккинчи қўли билан ҳижобли аёлнинг этагини кўтараётган ҳолда тасвирланган. Карикатура остига эса “Эрдўғон шахсий ҳаётда жуда ўйноқи”, деб тагхат ёзилган.

Charlie Hebdo журналидаги карикатура Париж яқинида ўқитувчи Самюэль Пати сўйиб кетилгани ортидан Франция-Туркия муносабатлари ёмонлашган бир паллада чоп этилди.

НАТОнинг икки аъзоси ўртасидаги муносабатларга Франциянинг радикал исломга қарши кескин позицияда тургани важидан путур етган.

Франция 17 октябрь куни ўқитувчи Сэмюэль Панининг сўз эркинлиги мавзусидаги машғулотда Муҳаммад пайғамбар карикатурасидан фойдалангани учун боши танасидан жудо этилганидан ларзага келганди.

23 октябрь куни даставвал Charlie Hebdo сатирик журналида пайдо бўлган карикатуралар Франциядаги ҳукумат биноларида проекцияланди, бу эса ислом оламида норозиликларга сабаб бўлди. Франция “бизнинг карикатуралардан воз кечмайди”, деди Макрон.

Мусулмон ва араб ўлкаларида Макрон томонидан карикатуралар дастакланганига жавобан Францияда ишлаб чиқарилган товарларни сотиб олмаслик чақириқлари кучайган.

Беларус элчиси “нолегитим президент” билан ишлашдан бош тортди

Владимир Астапенконинг 23 августда берган биринчи истеъфоси қабул қилинмаган эди.

Беларуснинг Аргентина ва Лотин Америкасидаги бошқа давлатлардаги элчиси Владимир Астапенко президент Александр Лукашенко легитимликка эга бўлмагани ортидан у билан ишлашдан бош тортиб, иккинчи марта истеъфо тўғрисида ариза ёзди.

Tut.by нашрининг ёзишича, Владимир Астапенко биринчи марта Лукашенко президент сифатида ими-жимида қасамёдга келтирилган 23 августда истеъфо берган эди. Аммо унинг истеъфо тўғрисидаги аризасига жавоб бўлмагач, у аризани чақиртириб олган ва эндиликда “иш берувчини қонунчиликни бузганликда” айблаб қайта ариза ёзган.

"Давлат раҳбари халқаро даражада легитимликка эга бўлмагани менга ҳам дипломат, ҳам ватанпарвар сифатида элчилик вазифасини виждонан бажаришимга тўсқинлик қилмоқда. Чунки мен беларус халқи иродасини эътироф этиш ҳуқуқи мавжуд бўлмаган одамнинг қўл остида ишламоқдаман”,-деб билдирган элчи.

Владимир Астапенко профессионал дипломат ҳисобланади. У ўз меҳнат фаолиятини Беларус ССР ташқи ишлар вазирлигининг учинчи котиби лавозимидан бошлаган. У ташқи ишлар вазири, қатор давлатларда элчи бўлиб ишлаган.

У 2018 йилдан бери Беларуснинг Аргентина, Чили, Парагвай ва Перудаги элчиси.

Аввалроқ Беларуснинг Испания, Латвия ва Словакиядаги қатор дипломатлари ҳам ўз гражданлик позициялари туфайли истеъфо берган эдилар.

Беларус полицияси норозиларга қарши ўқотар қурол қўллаши мумкин

26 октябрдан Беларусдаги қатор йирик саноат корхоналарида иш ташлаш бошланди.

Беларус ички ишлар вазири Юрий Караев 28 октябрда президент Александр Лукашенкога қарши намойишларга чиқаётган “саботажчи ва террорчилар”га нисбатан ўқотар қурол ишлатишилиши мумкинлигини билдирди.

Аввалроқ Лукашенко мухолифат намойишларини ва 26 декабрдан бошланиб кетган умуммиллий иш ташлашни “уюшган жиноий гуруҳлар ҳаракати” сифатида баҳолаган эди.

Ўз чиқишида Лукашенко намойишлар ва иш ташлашларни назарда тутган ҳолда “мамлакат террор таҳдидига дучор бўлаётгани”ни таъкидлади.

Европа Иттифоқи Беларус ички ишлар вазири Юрий Караевни намойишларни зўравонлик билан бостиришдаги иштироки учун санкциялар жорий этилган амалдорлар рўйхатига киритган эди.

Караев 28 октябрдаги билдирувида “ўқ отар қурол тинч намойишчиларга” нисбатан ишлатилмаслигини, лекин “саботаж ва террор қилмоқчи бўлганларни полиция ҳар қандай йўллар билан тўхтатиб қолиши зарурлиги”ни айтди.

Лукашенко мухолифатнинг 25 октябргача истеъфо бериш талабини бажармагани ортидан 26 октябрдан Беларусдаги қатор йирик саноат корхоналарида иш ташлаш бошланди.

Беларусни 1994 йилдан бери бошқариб келаётган Александр Лукашенкога қарши намойишлар 9 августда ўтган президентлик сайлови ортидан бошланиб кетган. Мазкур сайловда Лукашенко ғолиб бўлгани эълон қилинган эди.

Қирғизистон: Алмазбек Атамбаев очлик акциясини тўхтатди

Алмазбек Атамбаев (2019 йил июнида олинган сурат).

Қирғизистоннинг собиқ президенти Алмазбек Атамбаев очлик акциясини тўхтатди. Бу ҳақда Озодликнинг қирғиз хизматига унинг адвокати Замир Жоошев маълум қилди.

Адвокатга кўра, унинг мижози Жазони ўташ давлат хизмати қўйилган талабларни бажаргани учун акцияни бас қилган.

Атамбаев муолажага муҳтож. Шунинг учун у ўзини 1-сонли тергов ҳибсхонасидан ҳеч бўлмаганда 47-колонияга ўтказишни талаб қилган. Бугун, 28 октябрь куни Атамбаев очликни тўхтатди”, деган З. Жоошев.

Алмазбек Атамбаев 2019 йилнинг август ойида буён Миллий хавфсизлик давлат қўмитаси тергов ҳибсхонасида тутиб турилганди. Икки кун муқаддам у 1-сонли тергов ҳибсхонасига кўчирилган. У мазкур ҳибсхонада сақлаш шароити ёмонлиги сабабли очлик эълон қилганди.

2020 йилнинг июнь ойида Бишкек туман суди жиноят олами лидерларидан бири Азиз Батукаевнинг муддатидан олдин ноқонуний озод қилинганига оид иш доирасида Атамбаевни мол-мулкини мусодара қилиш билан 11 йилу 2 ойга озодликда маҳрум қилганди. Бундан ташқари, собиқ президент давлат унвонлари ва мукофотларидан ҳам маҳрум этилган. Август ойида Бишкек шаҳар суди бу ҳукмни ўз кучида қолдирган.

Алмазбек Атамбаев шу йил 6 октябрга ўтар кечаси халқ ғалаёни ортидан бошқа маҳбуслар билан биргаликда ҳибсхонадан чиқишга муваффақ бўлганди. 10 октябрда у Бишкекда оммавий тартибсизликлар уюштирганликка оид иш доирасида яна қўлга олинган ва ҳибс этилган.

Рамзан Қодиров фарзандига Муҳаммад исмини қўйганларга 100 минг рублдан ваъда қилмоқда

Чеченистон раҳбари Рамзан Қодиров (ў) ахборот ва матбуот вазири Аҳмед Дудаев (ч) билан.

Чеченистон расмийлари республикада туғилган чақалоқларга мусулмонлар пайғамбари Муҳаммад, унинг аҳли оиласи ва яқин саҳобалари исмини қўйган оилаларга 100 минг рублдан пул берилишини ваъда қилишди. Бунга оид баёнот Чеченистон ахборот ва матбуот вазири Аҳмед Дудаев томонидан очиқланди.

Дудаев ўз мурожаатида мукофот пулини олиш учун ота-оналар қўйиши лозим бўлган исмларни санаб ўтган ва акция мусулмонлар Муҳаммад пайғамбар мавлидини нишонлайдиган 29 октябрь куни бир сутка мобайнида давом этишини қайд этган.

Вазир “мисли кўрилмаган” деб атаган акция республика раҳбари Рамзан Қодиров ташаббусига кўра эълон қилинган, уни амалга ошириш учун пуллар эса унинг отаси Аҳмад Қодиров номидаги жамоатчилик жамғармасидан ажратилади.

Аввалроқ Рамзан Қодиров Муҳаммад пайғамбарга нисбатан берилган карикатуралар чоп этилишини дастаклагани учун Франция президенти Эммануэль Макронни “мусулмонларни террор хуружлари содир этишга зимдан гижгижлаётган”ликда айблаганди.

Чоршанба куни Қодировнинг бу баёнотига Россия президентининг матбуот котиби Дмитрий Песков изоҳ берган. Чеченистон раҳбарининг исмини атамаган Песков: “Субъект раҳбарлари ташқи сиёсат билан шуғуллана олмайди, уни шакллантира олмайди ва белгилай олмайди ва бу борада ҳеч қанақа қарор қабул қилмайди, чунки қонунчиликда бу бўйича мамлакат президенти етакчилик қилиши кўзда тутилган”, дея таъкидлаган.

Бунга жавобан Рамзан Қодиров Макрон ҳақида сиёсатчи сифатида эмас, бир мусулмон сифатида ўз фикрини изҳор қилганини билдирган. Айни пайтда Чеченистон раҳбари мамлакат ташқи сиёсати қандай шакллантирилиши ва ким томонидан бошқарилишини “жуда яхши билиши” ва “фарқлаши”ни ва “шахсан унга бу борада ҳеч нарсани тушунтириб ўтиришнинг ҳожати йўқ”лигини қўшимча қилган.

АЭХА Эрон томонидан центрифуга йиғиш заводи қурилаётганини тасдиқлади

Натанздаги уранни бойитиш заводини қўриқлаётган эронлик ҳарбий.

БМТнинг Атом энергияси бўйича халқаро агентлиги АЭХА Эрон Натанздаги ўз ядровий иншооти яқинида уранни бойитиш учун центрифугалар йиғиш бўйича ерости заводи қурилишини бошлаганини билдирди.

Агентлик бош директори Рафаэль Гросси 28 октябрь куни: “Мазкур объект, афтидан, июль ойида портлаган иншоотнинг ўрнини босиши керак”, дея қайд этди. Теҳрон ўша портлашни саботаж мақсадида уюштирилган ҳужум, деб атаганди.

Улар [қурилишни] бошлашди, бироқ ҳали тамомлаганларича йўқ. Бу узоқ давом этадиган жараён”, деди Гросси.

28 октябрь куни агентлик қурилиш ишлари олиб борилаётганидан далолат берувчи сунъий йўлдошдан олинган тасвирларни ёйинлади. Гросси Эрон кам тўйинтирилган уран захираларини яратиш билан ҳам шуғулланаётганини айтди, бироқ, унга кўра, бу ядровий қурол ишлаб чиқариш учун етарли эмас.

Эрон Ядро энергияси ташкилоти раҳбари Али Акбар Солиҳий ўтган ой давлат телевидениеси орқали қилган чиқишида вайрон қилинган ерусти заводининг ўрни “Натанз яқинидаги тоғларнинг қоқ бағрида жойлашган” бошқа завод билан тўлдирилишини билдирган.

Гросси Теҳрон АЭХА инспекторларини қурилиш ҳақида огоҳлантирганини айтди. Унга кўра, инспекторларнинг Эрон ядровий иншоотларига киро олиш ҳуқуқи 2015 йилда Эрон ва қудратли давлатлар ўртасида тузилган битим барбод бўлганидан кейин ҳам сақланиб қолмоқда. Мазкур битимда ядровий дастур чекланиши эвазига Эронга нисбатан киритилган санкцияларнинг олиб ташланиши кўзда тутилганди.

Эрон ўз ядровий дастурининг тинч мақсадларга йўналганига ишонтиришга уриниб келади.

2018 йили АҚШ ядровий шартномадан бир томонлама чиқиб кетган ва санкцияларни кучайтира бошлаган. Бу қадамни Вашингтон мазкур шартномага Эроннинг ракета дастури бўйича ҳамда Яқин Шарқда террористик деб топилган гуруҳларни дастаклашдан воз кечиш бўйича мажбуриятлари киритилишига ҳаракат қилиб қўйгани айтилган.

Боку ва Ереван Тоғли Қорабоғдаги тўқнашув ҳудудида кўплаб одам қурбон бўлганини айтмоқда

Сўнгги кунларда тан олинмаган Тоғли Қорабоғдаги тўқнашув ҳудудида 70 га яқин тинч аҳоли вакили нобуд бўлган, 300 дан зиёд одам яраланган. Бу ҳақда Озарбайжон Бош прокуратураси маълум қилди. Бу маълумотлар тўғрилигини текширишнинг имкони йўқ.

Ўз навбатида, Арманистон ҳам ҳарбийлар ва тинч аҳоли вакиллари орасида йўқотишлар бўлганини билдирмоқда.

Боку Ереванни бир неча жойни, хусусан, Тертер ва Барди шаҳарларини оғир тўплардан ўққа тутганликда айблаб чиқди. Озарбайжон Мудофаа вазирлиги маълумотларига кўра, у ерларда ёш болалар дохил 19 киши нобуд бўлган, яна 60 нафар тинч аҳоли вакили жароҳат олган.

Ереван эса Қорабоғ “Смерч” реактив тизимидан ўққа тутилгани, Шушида камида бир одам ҳалок бўлиб, икки киши яраланганини очиқлаган. Арманистон армияси қуролли тўқнашувлар бошланганидан бери ўтган бир ой давомида жангларда мингдан зиёд ҳарбийсини йўқотганини билдирган.

Тоғли Қорабоғда қуролли тўқнашув сентябрь ойи охирида кучайган. Арманистон ва Озарбайжон бир-бирларини можаро эскалациясида айблаганлар. Вақти-вақти билан томонлар сулҳ ҳақида ўзаро келишган бўлсалар-да, тез орада сулҳ шартлари бузилганини маълум қилишган.

АҚШ: Филадельфияда афроамерикалик ўлдирилиши ортидан норозилик акциялари давом этмоқда

Филадельфиядаги норозилик чиқишлари, 2020 йил 27 октябри.

АҚШнинг Филадельфия шаҳрида полициячилар томонидан афроамерикалик Уолтер Уоллес ўлдирилиши ортидан бошланган норозилик чиқишлари чоғида 90 дан зиёд одам қўлга олинган.

Мазкур ҳодиса 26 октябрь куни содир бўлган эди. Полициячилар қуролли одам тўғрисидаги чақириқ бўйича келишган. Иддаоларга кўра, 27 ёшли Уоллес қўлида пичоқ билан полициячиларга яқинлаша бошлаган. Полициячилардан бири унга қарата ўт очган. Афроамерикалик олинган жароҳат туфайли жон берган.

Уоллес оиласининг адвокати мақтулнинг руҳий соғлиғида муаммолар бўлган. Унинг яқинлари полиция бундан хабардор этилганини айтмоқдалар.

Уоллес ўлимидан кўп ўтмай норозилик чиқишлари бошланган. Норозиларнинг айримлари ўзларини жуда агрессив тутган. Улар дўконларни талаб, полицияга тош ва бошқа оғир ашёларни отишган. 27 октябрь оқшомида мингга яқин одам йирик савдо тармоқлари дўконларига босқин уюштиришган.

Филадельфияда норозилик чиқишлари бошланганидан бери 30 нафар полициячи тан жароҳати олган. Шаҳарга АҚШ Миллий гвардияси кучлари олиб келинган.

Шу йил май ойи охирларида АҚШда Black Lives Matter – “Қора танлиларнинг ҳаёти ҳам муҳим” шиори остида оммавий норозилик акциялари бошланган. Бунга афроамерикалик Жорж Флойднинг полициячилар томонидан қўлга олинганидан кейин жон бергани сабаб бўлган. У қўлга олинганидан кейин полициячилардан бири томонидан бўғиб қўйилган, пировардида касалхонада вафот этган. Афроамерикалик сохта пул ишлатганликда гумонланган эди.

Флойд ўлимидан кейин бўлиб ўтган норозилик чиқишларининг кўпи тинч ўтган, аммо айримлари полиция билан тўқнашувга айланиб кетган, акциялар чоғида талончилик ва вандализм ҳолатлари кузатилган. Бу чиқишлар пайтида, норозилар фикрича, ирқчилик ва қулдорларни тамсил этувчи бир неча ҳайкал қулатилган.

АҚШ сенаторлари Хитой уйғурларни геноцид қилаётгани тўғрисидаги резолюцияни қабул қилмоқда

Хитойдаги мусулмонларни "қайта тарбиялаш" учун барпо этилган лагерлардан бири.

Ҳар икки партия вакилларидан иборат бўлган сенаторлар гуруҳи Хитой Шинжон-Уйғур мухториятида уйғурларни геноцид қилаётгани тўғрисидаги резолюция лойиҳасини ишлаб чиқиб, Сенатга тақдим этди.

“Мазкур резолюциянинг қабул қилиниши Хитойни 1948 йилда қабул қилинган Бирлашган Миллатлар Ташкилотининг Геноцидни олдини олиш ва уни амалга оширганларни жазога тортиш тўғрисидаги Конвенцияси доирасида жавобгарликка тортишга туртки бўлади”,-деб билдирди сенатор Жефф Меркли.

Сенатор Хитойда уйғурлар ва бошқа мусулмон миллатларнинг таъқиб қилиниши, қамоққа олиниши, қийноққа солиниши ва қайта тарбиялаш лагерларида мажбуран сақланаётгани “ҳақиқий геноцид” эканини урғулади.

Сенат мазкур резолюцияни бир неча ҳафта ичида қабул олиши кутилмоқда. Чунки сенат кейиги ҳафтада ўтадиган АҚШ президентлик сайлови ўтгунича таътилга чиққан.

АҚШ ва қатор ғарб давлатлари Хитойда 1 миллиондан ортиқ мусулмон 2017 йилдан бери экстремизмга қарши кураш баҳонасида “сиёсий қайта тарбиялаш лагерлари”да сақланаётганини танқид қилиб келади.

Аммо Хитой бу лагерлар “экстремист ва террорчиларни қайта тарбиялаш” мақсадида ташкил этилганини билдирган.

Франция мусулмон ўлкаларида саёҳат қилаётган фуқароларини огоҳлантирди

Покистондаги норозилик намойишида Франция президенти Макрон суратлари ёқилди.

Франция қатор мусулмон ўлкаларида яшаётган ёки саёҳат қилаётган фуқароларини хавфсизлик масаласида огоҳлантирди.

27 октябрь куниТашқи ишлар вазирлиги Индонезия, Бангладеш, Ироқ ва Мавританиядаги французларни Муҳаммад пайғамбарга қарши эълон қилинган карикатураларга нисбатан норозилик намойишлари ўтказилаётган ҳудудлардан олис бўлишга ва ҳар қандай оммавий чиқишлардан эҳтиёт бўлишга чақирди.

Франциянинг Туркиядаги элчихонаси ҳам мана шундай огоҳлантирувни эълон қилди.

27 октябрь куни Бангладешда ўн минглаб норози Франция президенти Эммануэль Макрон портретларини ва “Макрон-тинчлик душмани” деб ёзилган плакатларни кўтариб намойишга чиқди. Эрон Ташқи ишлар вазирлигига эса 27 октябрда Француз элчиси чақиртирилди.

Туркия президенти Ражаб Тоййиб Эрдўғон ўз ватандошларини Францияда ишлаб чиқарилган товарларни бойкот қилишга чақирди.

Франция 17 октябрь куни ўқитувчи Сэмюэль Панининг сўз эркинлиги мавзусидаги машғулотда Муҳаммад пайғамбар карикатурасидан фойдалангани учун боши танасидан жудо этилганидан ларзага келганди.

23 октябрь куни даставвал Charlie Hebdo сатирик журналида пайдо бўлган карикатуралар Франциядаги ҳукумат биноларида проекцияланди, бу эса ислом оламида норозиликларга сабаб бўлди. Франция “бизнинг карикатуралардан воз кечмайди”, деди Макрон.

Мусулмон ва араб ўлкаларида Макрон томонидан карикатуралар дастакланганига жавобан Францияда ишлаб чиқарилган товарларни сотиб олмаслик чақириқлари кучайган.

Қатар ва Қувайт супермаркетларида Франция молларини бойкот қилиш давом этмоқда, француз молларидан воз кечиш чақириқлари Урдун ва бошқа мамлакатларда ҳам янграяпти.

Келиб чиқиши беларус бўлган америкалик сиёсий технолог Беларус қамоқхонасидан озод қилинди

Беларусда Шкляровга нисбатан тергов тўхтатилган эмас.

Келиб чиқиши беларус бўлган америкалик сиёсий технолог Виталий Шкляров 27 октябрь куни қамоқдан озод этилди ва Беларусни тарк этди. Бундан бир неча кун олдин АҚШ давлат котиби Майк Помпео Беларус президенти Александр Лукашенко билан телефон орқали қилган мулоқотида Виталий Шкляровни озод қилишни талаб этганди.

Шкляровнинг адвокати Антон Гашинский Озод Европа-Озодлик радиосига ўз ҳимоясидаги одам Беларусни тарк этганини тасдиқлади. Адвокатга кўра, Шкляровга нисбатан тергов тўхтатилган эмас.

АҚШнинг собиқ президенти Барак Обама ва сенатор Берни Сандерсларнинг ширкатларида ишлаган Шкляров Беларусда 9 августда ўтган президентлик сайловларига икки ҳафтадан озроқ вақт қолганида - 29 июлда қамоққа олинган эди.

Шкляров Беларусга ота-онасини кўргани келганини айтган, бироқ ҳуқуқ-тартибот тузилмалари уни блогер Сергей Тихановскийни президентликка номзод сифатида рўйхатдан ўтказишга кўмаклашганликда айбламоқда.

Сергей Тихановский сайлов арафасида қамоққа олинган. Унинг ўрнига хотини Светлана Тихановская ўз номзодини президентликка кўрсатди ва сайловда Лукашенконинг асосий рақиби бўлди. Айни пайтда Тихановская Беларус мухолифати лидерига айланган.

Давомини ўқинг

XS
SM
MD
LG