Зеленский: Дунё Россиянинг ядро қуролини қўллаши эҳтимолига тайёр туриши керак
Дунё Россиянинг Украинада ядро қуролидан фойдаланиши эҳтимолига тайёр бўлиши керак, деди Украина президенти Владимир Зеленский CNN телеканалига берган интервьюсида.
Бу ҳақда у CNN мухбирининг Марказий разведка бошқармаси раҳбари Уильям Бернснинг Россия Украинага бостириб кириши чоғида тактик ядро қуролидан фойдаланиши мумкинлиги ҳақидаги сўзларидан хавотирдами ёки йўқми, деган саволига жавоб бераётиб таъкидлади.
“Нафақат мен, балки бутун дунё, барча давлатлар хавотирда бўлиши керак. Бу аниқ маълумот бўлмаслиги мумкин, лекин ҳақиқат бўлиб чиқиши ҳам мумкин”, — деди Зеленский.
Эслатиб ўтамиз, аввалроқ Марказий разведка бошқармаси бошлиғи Уильям Бернс Россиянинг Украинада тактик ядро қуролини қўллаши хавфи ҳақида гапирганди.
Унинг фикрича, агар Россия президенти Владимир Путин Украинага қарши урушда ғалаба умидлари чиппакка чиқса, бу содир бўлиши мумкин.
Кличко: Киев ўққа тутилди
Киев мери Виталий Кличко 16 апрель куни эрталаб Украина пойтахти ўққа тутилганини айтди.
"Дўстлар! Эрталаб Киев ўққа тутилди. Шаҳар четидаги Дарница туманида портлашлар содир бўлди. Ҳозир воқеа жойида қутқарувчилар ва шифокорлар ишламоқда. Қурбонлар ҳақида маълумотлар аниқланмоқда", - деб ёзди Кличко ўзининг Телеграм каналида.
У киевликларни шаҳарга қайтмасликка ва хавфсизроқ жойларда қолишга чақирди.
Аввалроқ маҳаллий аҳоли Киев туманларидан бирида портлаш юз бергани ҳақида хабар берган эди.
Львовда ҳам портлашлар рўй бергани ҳақида хабарлар бор, бироқ бу ҳали тасдиқланмаган.
БМТ: Қамалдаги шаҳарларда тинч аҳоли очликдан нобуд бўлиши мумкин
БМТнинг Жаҳон озиқ-овқат дастури Россия ҳарбийларини Украинанинг қамалдаги шаҳарларига кириш имкониятини таъминлашга чақирди.
БМТ қамалдаги шаҳарларида уруш туфайли тинч аҳоли очликдан нобуд бўлиши мумкинлигини таъкидлади.
Жаҳон озиқ-овқат дастури маълумотларига кўра, уруш бошланганидан бери 1, 4 миллионга яқин украиналик озиқ-овқат ёрдамини олган. Дастур ходимлари, шунингдек, инсонпарварлик ёрдами юкланган Украина карвонлари Мариуполь қамалда қолгани учун ерга етиб бора олмаётганини айтишмоқда.
Расмийларга кўра, шаҳарда 100 мингдан ортиқ одам қолган қолиши мумкин.
Зеленский: Уруш бошланганидан бери 2500-3000гача украин аскари ҳалок бўлди
Россиянинг Украинага кенг кўламли босқини бошланганидан бери 2500 дан 3000 гача украиналик аскарлар ҳалок бўлди.
Бу ҳақда Украина президенти Владимир Зеленский Американинг CNN телеканалига берган интервюсида айтиб ўтди.
Унга кўра, яна 10 мингга яқин аскар турли даражада яраланган. Зеленский шунингдек, Украина ҳукумати ҳудудларининг бир қисми ишғол остида бўлгани, жасадлар вайроналар остида қолган бўлиши мумкинлиги сабабли босқин бошланганидан бери тинч аҳоли орасидан қанча одам ҳалок бўлганини ҳозирча аниқ ҳисоблаб бера олмаслигини айтди.
“Тинч аҳоли ҳақида гапириш жуда қийин, чунки мамлакатимиз жанубида аҳоли пунктлари ва шаҳарлари тўсиб қўйилган – шарқда Херсон, Бердянск, Мариупол, бу тарафда эса Волноваха жойлашган ҳудуд – биз шунчаки билмаймиз. Тўсиб қўйилган ўша зонада қанча одам ҳалок бўлганини”, — деди Зеленский.