Тўпга тутилган Харьковда якшанба куни 5 киши нобуд бўлди, 20 киши яраланди
Украинанинг рус тилида сўзлашувчи аҳоли кўп яшайдиган шаҳри бўлмиш Харьков тўпга тутилиши натижасида 17 апрель куни беш киши ҳалок бўлди, 20 киши тан жароҳати олди. Бу ҳақда Харьков вилояти раҳбари Олег Синегубов маълум қилди.
Мулозимга кўра, шаҳар марказидаги Салтовка тураржой мавзеси нишонга олингани ортидан кўп қаватли уйлар ва фуқаровий инфратузилмага шикаст етган.
Россиялик ҳарбийлар олдин бир неча бор Украинада фақат ҳарбий объектларга зарба берилаётганини иддао қилишган.
Аввалроқ Харьковда 17 апрель куни соат 15:00 гача россияликларнинг зарбалари туфайли 5 киши нобуд бўлиб, 13 киши яралангани маълум қилинган эди. Якшанба насронийлар кўп истиқомат қиладиган мамлакатларда бўлгани каби Украинада ҳам ҳордиқ ва ибодат куни бўлиб ҳисобланади.
Бородянкада қидирув бошланганидан бери вайронлардан остидан 41 жасад чиқариб олинди
Киев вилоятининг Бородянка қишлоғида қидирув-қутқарув амалиёти бошланганидан буён қулаган деворлар остидан 41 кишининг жасади олиб чиқилган. Бу ҳақда Украина фавқулодда вазиятлар бўйича давлат хизмати маълумот тарқатди.
Хизмат қайдича, 16 апрель куни Россия ҳарбийлари зарбаларига нишон бўлган иккита кўп қаватли уй вайроналари остидан яна бир жасад чиқариб олинган.
Бородянкада кўп қаватли уйлар вайроналари остида ҳалок бўлганларни қидириш ишлари 6 апрель куни бошланган эди. Қутқарувчиларга кўра, ўтган вақт мобайнида улар еттита уйдан бештасини кўздан кечиришни тамомлашга муваффақ бўлганлар.
Харьковда совет саркардаси Георгий Жуков ҳайкали олиб ташланди
Украинанинг Харьков шаҳрида 17 апрель куни маршал Жуков ҳайкали олиб ташланди. Бу ҳақда “Суспільне” нашри хабар қилди. Немишлянск туман маъмурияти раҳбари журналистларга ҳайкал ҳарбийлар томонидан демонтаж қилинганини айтган.
Айни пайтда ҳайкални олиб ташлаш қарори кимга тегишли бўлгани номаълумлигича қолмоқда. Узоқ вақтдан бери Жуков ҳайкалининг олиб ташланишига қаршилик қилиб келган Харьков шаҳар кенгаши матбуот хизмати ҳали бу борада бирор изоҳ берганича йўқ.
Ҳайкалнинг олиб ташланиши учун масъулиятни “Азов” полкининг Kraken бўлинмаси ўз зиммасига олган. Ҳайкал қўпорилганидан кейин унинг тагсупасида “Слава Украина” (“Украинага шон-шарафлар”) ёзуви ҳамда миллий герб тасвири пайдо бўлган.
Харьковдаги Жуков ҳайкали илк бор 2019 йили россияпараст партия қурултойига қарши ўтказилган норозилик акцияси чоғида қулатилган эди. Лекин ўшанда шаҳар расмийлари бюстни қайта ўрнига тиклаб қўйишган.
Мариуполдаги украин ҳарбийлари таслим бўлишдан бош тортди
Бу ҳақда ABC телеканалига интервьюда Украина бош вазири Денис Шмигаль маълум қилди. 17 апрель куни Россия томони Мариуполда қолаётган украин ҳарбийларига таслим бўлишни таклиф қилган эди. Россия мудофаа вазирлиги маълумотларига кўра, "Азовсталь" корхонаси ҳудудида тақрибан 2,5 минг украин аскарлари қолмоқда. Шмигалнинг сўзларига кўра, шаҳарнинг айрим қисмлари ҳануз украинлар назоратида.
Айни пайтда президент Владимир Зеленский Мариуполдаги украиналик ҳарбийларнинг ўлдирилиши Россия билан музокараларга нуқта қўйишини айтди. Унга кўра, украиналик ҳарбий хизматчилар қамалда, уларда сув ва дори-дармон тугаган, лекин улар жанг қилмоқда.
Украина ҳарбий қўмондонлиги Мариуполь томон ҳаракатланиш ва шаҳарни қамалдан чиқариш учун бошқа вилоятлардан «Азов» бўлинмаларини Украина шарқига жойлаштиришни бошлаганини билдирди.
