Донецкда ҳар “бир қарич ер учун” жанг бўляпти
Украина президенти Владимир Зеленский якшанба куни Северодонецкдаги вазиятни “оғир” деб баҳолади ва жанглар шаҳарнинг “ҳар бир қарич” ери учун давом этаётганини айтди.
Россия кучлари шаҳарнинг катта қисмини эгаллаб олди, бироқ Украина аскарлари юзлаб тинч аҳоли бошпана топган саноат ҳудуди ва кимё заводини назорат қилишда давом этмоқда.
Зеленскийнинг айтишича, Россия Северодонецкка яқин - Лисичанск, Бахмут ва Словянск каби кичик шаҳарларга ҳам ҳамла қилмоқда.
"Россия армияси Донбасга захира кучларини жойлаштирмоқчи. Лекин улар ҳозир қандай захирага ҳам эга бўлиши мумкин? Афтидан улар ҳаминқадар ҳарбий тайёргарликдан ўтган чақирилувчиларни ва яширин сафарбарлик йўли билан ёлланганларни жангга ташлашга ҳаракат қилишади. Россия генераллари бор эътиборини сон жиҳатидан устунликка эга бўлишга қаратган. Бу фақат битта нарсани англатади: Россия июнь ойига келиб йўқотган 40 000 аскари янада ортиши мумкин. Ўтган ўн йиллар давомида ҳеч бир урушда Россия бунчалик кўп йўқотишга учрамаган", деди Зеленский.
Северодонецк Луганск вилоятидаги Украина қўлидаги сўнгги шаҳар бўлиб, унинг бой берилиши Украина учун муҳим стратегик йўқотиш бўлади.
Русларнинг ғалабаси Владимир Путиннинг “махсус ҳарбий операция” ниқоби остидаги мақсадларидан бирига янада яқинлаштиради.
«Вазият бирдан ўзгариши мумкин»
Украина Қуролли кучлари Бош штаби, бу минтақадаги украин аскарлари ўз позицияларини бой бермаслик учун сўнгги имконлари билан таянаётганини айтмоқда.
Бундай аскарлар орасида, март ойида қўлига қурол олган кўнгилли Васил ҳам бор.
Урушдан олдин темир йўл ишчиси ва боғбон бўлган 44 ёшли Василнинг айтишича, фронтдаги вазиятни олдиндан башорат қилиб бўлмайди.
“Тўғрисини айтсам, буни тасвирлаб ҳам беролмайман. Вазият дақиқадан дақиқага ўзгармоқда. Ҳозир тинч, портлашлар фақат узоқдан эшитилмоқда. Аммо вазият бирдан ўзгариши мумкин. Баъзан бизга турли томондан ўт очишади. Бу жабҳа чизиғи"дейди Украина армияси кўнгиллиси, Васил.
Васил ва бошқа ҳарбий хизматчилар окопда туриб жанг қиларкан, фронт чизиғидан бир неча километр узоқликдаги устахонада ҳарбий техника таъмирланмоқда.
Бу устахона мухандислари танк двигателларини таъмирлашдан тортиб, ҳарбий транспорт воситаларининг шиналарини алмаштиришгача бўлган янги ишларга мослашди.
Бу каби устахоналарда украиналик усталар Совет Иттифоқи даврида ишлаб чиқарилган пулемётларни ҳам тузатишга уринмоқда.
Россия ҳам, Украина ҳам сўнгги ҳафталарда ўз ресурсларининг катта қисмини шарқий Донбасс минтақасини назорат қилиш учун курашга ташлаган бўлса-да, Украинанинг Одесса ва Николаевдаги Қора денгиз қирғоқлари тақдири мамлакатнинг иқтисодий келажагини таъминлаш учун ҳал қилувчи аҳамиятга эга.
“Жароҳатланганлар орасида харковлик 12 ёшли қиз ҳам бор”
Жумладан, Украинанинг Тернопил вилояти губернатори 12 июнь, якшанба куни Чортков шаҳридаги ракета ҳужуми оқибатларини акс эттирувчи суратларни эълон қилди.
Владимир Трушнинг Facebook’даги расмий саҳифасига жойланган суратларда шанба кунги ҳужум оқибатида вайрон бўлган бинолар, ойналари синган машиналар тасвирланган. Расмлардаги манзил сунъий йўлдош тасвирлар билан мос келади.
Трушнинг айтишича, шанба куни Украина вақти билан соат 18:46 да Тернопилдан 75 километр жанубда жойлашган шаҳарга тўртта ракета келиб тушган, натижада ҳарбий иншоот қисман вайрон қилинган ва 23 киши жароҳатланган.
“Жароҳатланганлар орасида харковлик 12 ёшли қиз ҳам бор”, — деди Труш Фэйсбук саҳифаисдаги суратлар тагидаги қолдирган изоҳда.
Якшанба куни маҳаллий расмийларнинг маълум қилишича, рус қўшинлари дарё бўйлаб Северодонецкни Лисичанск билан боғлайдиган кўприкни портлатиб, тинч аҳолини эвакуация қилиш йўлини вайрон қилган.
Украина қуролли кучлари, сўнгги кунларда Донбасс минтқасидаги жангларда Россия армиясининг қўли баланд келаётганини эътироф этиб келмоқда.
Россия Донбассда қурол-яроғ омборларини портлатди
Россия Мудофаа вазирлиги матбуот котиби Игор Конашенков, 13 июнь куни бу минтақада АҚШ ва Европа Иттифоқи Украинага қуролли кучларига юборган, қурол-яроғ ва ҳарбий техника омбори рус қўшинлари томонидан портлатилгани ҳақида баёнот берди.
"Донецк халқ республикаси ҳудудидаги Удачний темир йўл станциясида жойлашган - АҚШ ва Европа давлатлари томонидан Украина миллатчиларига етказилган катта қурол-яроғ омбори нишонни ҳаводан аниқ урадиган ракеталар билан вайрон қилинди. Бундан ташқари, Луганск республикасидаги Федоровка минтақасида чет эллик ёлланма аскарлар тақсимот пункти, Харков областидаги Прогресс аҳоли пункти, Луганскдаги Волчиаровка минтақаларида ракета отувчи тузилмалар билан қуролланган иккита батарея йўқ қилинди”деди Россия Мудофаа вазирлиги матбуот котиби Игор Конашенков.
Россия Мудофаа вазирлиги, якшанба куни ҳам Украинанинг ғарбий Тернопил вилоятида айнан Ғарб давлатлари юборган қуроллар омбори қанотли ракеталар билан нишонга олингани ҳақида баёнот берган.
Россия кучлари, шунингдек, Украина шарқидаги Донецк ва Харков яқинида, Украинанинг иккита СУ-25 қирувчи самолётини уриб туширганини ҳам айтмоқда.
Конашенковга кўра, жами 201 та Украина самолёти ва 130 та вертолёт, 1188 та учувчисиз учиш аппарати, 338 та зенит-ракета тизими, 3514 та танк ва бошқа зирҳли жанговар техникалар, 508 та ракета тизими, 1870 та дала артиллерияси ва миномётлар, шунингдек, махсус бўлинмалар операция давомида йўқ қилинган.
Озодлик уруш шароитида Россия томони берган бу маълумотларни мустақил манбалардан тезкор тасдиқлаш имконига эга эмас. Аммо Украина қуролли кучлари бош штаби ҳам якшанба куни Россия кучлари Харков йўналишида украина ҳарбий позицияларни ўққа тутаётганини хабар қилган.