Bloomberg: ЕИга аъзолик муаян шартлар эвазига тавсия қилинди
Bloomberg нашрининг жараёндан хабардор манбаларига таяниб хабар қилишича, Европа комиссияси, муайян шартларни бажариш мажбуриятини юклаган ҳолда Украина билан Молдовага ЕИ аъзолигига номзод мақомини беришни тавсия қилган.
“Ижроия ҳокимияти Украина ва Молдовага ЕИ аъзолигига номзод мамлакат мақомини беришни тавсия этмоқчи. Бу бир рамзий қадам ва узоққа чўзиладиган Евроиттифоқ таркибига кириш жараёнининг бир қисмидир”, деб ёзади агентлик.
Айни пайтда, Германияда чиқадиган Die Welt нашрининг хабар қилишича, Европа лидерлари “ёпиқ эшиклар ортида” Украина президенти Владимир Зеленскийни Россия президенти Владимир Путин билан музокара олиб боришга ундаган.
Зеленскийга кўра, учрашувларда Украинанинг мудофаа қудратини бирликда кучайтириш, мамлакатнинг Европага қўшилиши ва Россияга қарши янги санкцияларни қўллаш каби бир қанча масалаларни кўриб чиқилган.
"Мен Италиядан принципиал сиёсий қўллаб-қувватлаши, макромолиявий ва мудофаа ёрдами учун миннатдорман. Ҳозир биз тарихан энг яхши муносабатларга эгамиз. Ишончим комилки, биз халқимиз учун кўп нарсаларни қила оламиз. Руминиядан ҳам мудофаа ёрдами ва ғалла транзитига кўмаклашгани учун миннатдорман. Биз Руминия ҳудуди орқали экспорт салоҳиятини оширишга келишиб олдик.Франция қўшимча Цезарь артиллерия тизимларини тақдим этади. Бу бизнинг мудофаамиз учун жуда муҳим. Бугун президент Макрон очиқ айтганидек, Европанинг Украинани қўллаб-қувватлаши шундай бўлиши керакки, биз биргаликда умумий қадриятларни ҳимоя қилаётганимизни, Европани ҳимоя қилаётганимизни ҳақиқатан ҳам ҳис қилишимиз керак. Германия мамлакатимизни ҳаво ҳужумидан мудофаа тизимлари билан таъминлашини ва бундан кейин ҳам қўллаб-қувватлашини билдирди”, деди Зеленский.
Учрашувдан сўнг Макрон, Украина Европа оиласининг бир қисми экани ва тўрт давлат етакчилари Украинага, ЕИ аъзолигига номзод мақоми берилишини қўллаб-қувватлашини айтди.
Шунингдек, Макрон давом этаётган можаро, бир кун якунланиши ва охир-оқибат, музокара қилиш заруратини бўлишини қўшимча қилди.
Музокаралар шароити ва форматини Украина белгилайди, Германия ва Франция ҳеч қачон Украина ортидан музокара олиб бормайди, деди Макрон.
ОАВ: “Ёпиқ эшиклар ортида” Зеленскийни Путин билан музокарага ундашди
Пайшанба куни Франция, Германия, Италия ва Руминия етакчилари Киевга борди. Франция президенти Эммануел Макрон, Германия канцлери Олаф Шолц, Италия бош вазири Марио Драги ва Руминия президенти Клаус Ёханнис Украина президенти Владимир Зеленский билан учрашди.
Учрашувлардан сўнг Украинага ЕИ аъзолигига номзод мақоми берилишини қўллаб-қувватлашини эълон қилишди.
Айни пайтда, бу учрашувлардан сўнг Франция президенти Макроннинг, Украина президенти Владимир Зеленский билан қўл сиқишиб тушган сурати жамоатчилик диққатини тортди.
Чунки, шу ой бошида Макроннинг, Украинага бостириб киришига қарамай, Россияни “камситмаслик” керак деган сўзлари Зеленскийнинг норозлигига сабаб бўлганди.
Германияда чиқадиган Die Welt нашрининг хабар қилишича, Европа лидерлари “ёпиқ эшиклар ортида” Украина президенти Владимир Зеленскийни Россия президенти Владимир Путин билан музокара олиб боришга ундаган.
Зеленскийга кўра, учрашувларда Украинанинг мудофаа қудратини бирликда кучайтириш, мамлакатнинг Европага қўшилиши ва Россияга қарши янги санкцияларни қўллаш каби бир қанча масалаларни кўриб чиқилган.
Донецкни тарк этишни истамаётган аҳоли
Украин ҳарбийлари жанглар давом этаётган ҳудудлардаги одамларга гуманитар ёрдам етказмоқда.
Донецкнинг жанглар бораётган ҳудудларда айрим одамлар, уй-жойларини тарк этишни истамаётир.
Жумладан, 16 июнь куни Украина полицияси бир неча ҳафтадан бери жанглар давом этаётган Донецк қишлоқларидаги аёллар ва болаларга ёрдам тарқатди.
Красногоровкада ёрдам тарқатаётган зобитнинг айтишича, ёрдамга муҳтож болалар кўп.
"Биз ҳозир Маринкадамиз. Бу фронт чизиғи. бу ердан кетишни хоҳловчиларни эвакуация қилмяпмиз. Кўпчилик кетишни истамаяпти. Чунки улар ўз уйларини ташлаб кетишни исташмайди. Биз уларни гуманитар ёрдам, дори-дармон, озиқ-овқат билан таъминлаймиз. Маринкада нималар бўляпти? Шаҳарда 17000 аҳоли яшаган. Ҳозир бизда 700 га яқин одам ертўлаларда, вайрон бўлган мактаблар, касалхона остида яшамоқда", дейди Украина полиция ходими.
Полиция пайшанба куни бир гуруҳ аҳолини, сал тинчроқ - Покровск ва Днепрга эвакуация қилишга уринди.
Аммо, кўпчилик юртини ташлаб кетишни истамайди, кетишни истаган ҳар бир инсонга ёрдам беряпмиз, деди полиция ходими.
Май ойида Киев чеккасидан сиқиб чиқарилгандан сўнг, Россия қўшинлари бор эътиборини тўлиқ Донбас, жумладан шарқий саноат минтақаси бўлмиш Северодонецкни эгаллашга қаратди.
Северодонецкда шиддатли жанглар давом этмоқда
Украина Қуролли кучлари Бош штаби маълумотига кўра, Россия бу ҳудудга қўшимча артиллерия қуролларини йўллаяпти. Ҳозирда томонлар шаҳар устидан тўлиқ назоратни олиш учун жанг қилмоқда.
Америка Урушни ўрганиш институтининг (ISW) қайд этишича, Россия қўшинлари Северодонецк шаҳрига ҳамда атрофдаги аҳоли масканларига – то Лисичанскка қадар – ерусти зарбалари беришда давом этмоқда.
Бундан ташқари, Россия кучлари Славянскдан шимоли-ғарбдаги ҳудудларга ҳужум амалиёти ўтказишга уринди, бироқ ҳаракатлари зое кетди. Бу орада Украина Изюм шаҳридан ғарбга томон қарши ҳужум ҳозирлик кўришни қайтадан бошлади.
Россиянинг Курск вилояти губернатори Роман Старовойт Гордеевка қишлоғи украин армияси тарафидан миномётлардан ўққа тутилганини даъво қилди. Ҳеч ким жабрланмаган, биноларга жиддий шикаст етмаган. Айрим уйларда дераза ойналари тўкилган, холос.
“Душманнинг ўт очиш нуқтасига дарҳол қарши зарба берилди”, дея қўшимча қилди у.
БМТ маълумотига кўра, уруш бошланганидан бери Украинада 4481 нафар тинч аҳоли нобуд бўлган, камида 5565 киши яраланган. Қурбонларнинг 1739 нафари эркак, 1159 нафари аёл, 119 нафари қиз бола ва 125 нафари ўғил боладир.