Ангела Меркель Россия ва Украина ўртасида воситачи бўлишга тайёр эканини айтди
Германия собиқ канцлери Ангела Меркель Россия ва Украина ўртасида тинчлик ўрнатишда воситачи бўлишга тайёр эканини айтди.
RND нашрига берган интервюсида сиёсатчи келажакда ўзи учун бундай ролни "инкар этмаслигини" , аммо ҳозирча бу мавзу бўйича муҳокамалар йўқлигини айтди.
Меркелнинг айтишича, 2021 йил декабрида федерал канцлер лавозимини тарк этишдан олдин у урушнинг олдини олишга ҳаракат қилган, аммо муваффақиятга эришмаган.
Собиқ канцлерга кўра, Владимир Путин Норманд форматидаги саммитларга тайёр эмас эди (“Норманд тўртлиги” 2014-йилда тузилган Украина шарқидаги можарони ҳал қилиш бўйича гуруҳ бўлиб, унинг таркибига Россия, Украина, Германия ва Франция раҳбарлари кирган).
Шунингдек, канцлер Украинада уруш бошлаш учун Кремль унинг кетишини кутаётганига ишонмаслигини айтди.
Июнь ойи бошида Ангела Меркель "Der Spiegel" нашрига берган интервьюсида Украинадаги уруш ҳақида гапирган ва, хусусан, урушнинг олди олинмаганида ўзини айбдор деб ҳисобламаслигини таъкидлаган.
"Дипломатия фақат муваффақиятсиз бўлгани учун хато эмас", - деган Меркель. "Шундай экан, нега буни хато деб айтишим кераклигини тушунмаяпман ва кечирим сўрамайман".
Ангела Меркелнинг федерал канцлер сифатидаги вориси Олаф Шолц Россия босқинини кескин қоралади ва Украинага қурол-яроғ етказиб берилишини маъқуллади. Апрел ойида Германия Украинага танклар ва оғир қуроллар етказиб беришга тайёрлигини маълум қилган эди. Бироқ, июнь ойининг ўрталарига келиб, қурол етказиш бошланмади, бунинг учун Шолц ҳам мамлакат ичида ҳам ташқарисидан танқид қилинди.
17 июнь куни DPA нашрига берган интервюсида Шолц қуроллар, жумладан, бир нечта ракета отиш мосламалари ва ракетага қарши тизимлар етказиб берилишини ва “ўз вақтида етиб боришини”, бироқ бу украиналик ҳарбийлар тегишли тайёргарликдан ўтгандан сўнг амалга ошишини маълум қилди. Канцлер кечикишларни Германия биринчи навбатда урушдан олдин мавжуд бўлган таъминот мажбуриятларини бажариши кераклиги билан изоҳлади.
Украинада уруш бошланганидан бери 323 бола ҳалок бўлди - Бош прокуратура
Украинада уруш бошланганидан буён 323 нафар бола ҳалок бўлди, 583 нафардан ортиғи яраланди, дея хабар беради Украина Бош прокуратураси.
Болаларнинг аксарияти Донецк, Хаьков, Киев, Чернигов, Луганск, Херсон, Николаев, Запорожье ва Суми вилоятларида жабрланган.
Бу маълумотлар якуний эмас, Украинада жанговар ҳаракатлар давом этаётган кўплаб минтақаларда ва босиб олинган ҳудудларда ўлим холатларини ҳисоблаш имконсиз.
Бош прокуратурага кўра, бомба ҳужумлари оқибатида 2028 дан ортиқ таълим муассасаси зарар кўрган, улардан 209 таси бутунлай вайрон бўлган.
Reuters: Пентагон Оқ уйнинг Украинага MQ-1C Grey Eagle дронларини бериш режасини тўхтатди
Жо Байден маъмуриятининг Украинага учувчисиз бошқариладиган тўртта йирик ҳужумчи учоқларни сотиш режаси унинг мураккаб кузатув ускуналари душман қўлига тушиши эхтимоли сабаб, тўхтатиб қўйилди.
Бу ҳақда Reuters агентлиги Пентагондаги камида уч манбага таяниб хабар берди.
Пентагоннинг Мудофаа технологиялари хавфсизлиги бошқармаси Оқ уй томонидан тасдиқланган режани рад этди, деб билдирган манбалар.
АҚШнинг Hellfire ракеталари билан қуролланиши мумкин бўлган тўртта MQ-1C Grey Eagle дронларини сотиш режаси ҳақида Reuters шу ой бошида хабар берган эди.
Дронларни экспорт қилиш режаси, кейинчлик эътирозларга сабаб бўлган. Радар ва кузатув ускуналари Россия қўлига тушиб қолса, Америка Қўшма Штатлари хавфсизлигига хавф туғдириши мумкинлиги борасида, хавотир билдирилган.
ISW: Украин қўшинлари Изюм яқинида қарши ҳужумга ўтди
Америка урушни ўрганиш институти (ISW) уруш жабҳасидаги 17 июнги холат бўйича хулосасини эълон қилди. Мутахассисларнинг асосий хулосалари бундай:
- Украин кучлари рус ҳарбийларини Словянскка ҳужумдан чалғитиш учун Изюм яқинида қарши ҳужумга ўтди.
- Рус қўшинлари Северодонецк ва унинг жануби-шарқий ҳудудларида муваффақиятсиз ҳужумларини давом эттирди.
- Россия кучлари Бахмут ҳудудида Лисичанск билан алоқа линияларини ҳам шимолдан ҳам жанубдан кесишга уринди.
- Россия қўшинлари фронт чизиғи бўйлаб мудофаа позицияларини эгаллаш учун Запорожье вилоятида куч тўпламоқда.
- Украина манбаларининг хабар беришича, Путин Россия ҳаво-десант кучлари қўмондони генерал-полковник Андрей Сердюковни россиялик десантчилар орасида катта йўқотишлар сабаб лавозимидан озод қилган. Аммо, ISW бу даъволарни мустақил равишда тасдиқлай олмайди.