Зеленский: Россиянинг душманлик ҳаракати кучайиши мумкин
Украина президенти Владимир Зеленский 19 июнь оқшомидаги чиқишида, Россия Украинага қарши ҳужумларини кучайтиришини тахмин қилаётгани, Киев эса Европа Иттифоқининг Украинага номзод давлат мақомини бериш бўйича шу ҳафтадаги қарорини кутаётганини айтди:
“Шубҳасиз, бу ҳафта Россиянинг душманлик ҳаракати кучайиши мумкин. Ва бу ҳаркатлар нафақат Украинага, балки бошқа Европа давлатларига ҳам қарши қаратилган. Биз тайёрланяпмиз. Биз тайёрмиз".
Европа Комиссияси 17 июнь куни, урушдан вайрон бўлган Украинани қўллаб, уни Европа Иттифоқига қўшилишга бир қадам яқинлаштирди.
Бу Россия босқинидан келтириб чиқарган энг драматик геосиёсий ўзгаришдир. Украина Европа Иттифоқига қўшилиш учун февраль ойида Россия қўшинлари босқини бошланганидан 4 кун ўтиб ариза берган.
Уруш бошида пойтахт Киевни қўлга кирита олмаган Россия армияси бор эътиборини Донбасс назоратини тўлиқ қўлга олишга қаратди. Минтақанинг бир қисми босқингача Россия томонидан қўллаб-қувватланган айирмачилар назоратида эди.
Россия Украинанинг ҳаво десант гуруҳини йўқ қилганини иддао қилмоқда
Якшанба куни Россия ўзининг узоқ масофага учувчи ракеталари Украина қўшинларининг қўмондонлик пунктини йўқ қилгани, натижада 50 дан ортиқ генерал ва офицер ҳалок бўлганини даъво қилди.
"Соат 12:30да Днепропетровскнинг Широкая қишлоғи яқинидаги Украина қўшинларининг қўмондонлик пункти "Калибр" юқори аниқликдаги узоқ масофали денгиз ракеталари билан нишонга олинди. Айни дамда вилоятда Александрия оператив-стратегик гуруҳининг ишчи йиғилиши бўлиб ўтмоқда. Ҳужумлар натижасида Украина қуролли кучларининг 50 дан ортиқ генераллари жумладан Николаев ва Запороже томон ҳаракат қилаётган Каховка гуруҳи, ҳаво-десант қўшинлари ва бўлинмалари қўмондонлари йўқ қилинди”деди Конашенков.
Уруш шароитида Россия томони берган бу маълумотларни мустақил манбалардан тезкор текшириш имконсиз. Украина томони ҳам Северодонецкдаги вазиятни қийин, аммо назорат остида ушлаш мумкин демоқда.
Украина Миллий ахборот агентлигига кўра, Ички ишлар вазирининг маслаҳатчиси Денис Монастирский, Украинанинг шарқий ҳудуди, айниқса Северодонецк йўналишида вазият оғир, аммо назорат остида деб баҳолаган.
Северодонецк назорати учун жанглар
Украина расмийлари Суми вилоятидаги ўққа тутилган Середина Буда шаҳридан олинган кадрларни эълон қилди. Рейтерс ахборот агентлиги видеонинг ҳақиқийлигини мустақил манбалар орқали тасдиқлай олмаган.
Украина полициясига кўра, отишма оқибатида камида ўнта турар-жой биноси зарар кўрган. Украинанинг Суми вилояти мамлакатнинг шимоли-шарқида жойлашган.
Россия томонидан қўллаб-қувватланаётган сепаратчи Донецк шаҳрининг Куйбишевский туманида ҳам кучли отишмалар бўлди, турар-жой майдони вайрон бўлди.
Украина Донецк ва Луганск халқ республикаларидан иборат икки минтақага ҳужум уюштирганини мунтазам равишда рад этади. Минтақанинг катта қисми 2014 йилда айирмачилар томонидан эгалланган.
Россия Украинага бостириб кириш арафасида бу икки минтақани мустақил давлат сифатида тан олган эди. Северодонецкни тўлиқ назоратга олиш учун жанглар бир неча ҳафтадан буён давом этмоқда. Бу - Донбасс минтақаси тақдирини ҳал қилувчи жанг эканини барча томонлар бирдек эътироф этмоқда.
Жанглар, сўнгги кеча-кундузда:
Россия қўшинлари Северодонецкдаги аҳоли пунктларига ҳужумни давом эттирмоқда ва Харковни ҳам нишонга олмоқда.
Россия ҳарбийлари Запорожьедаги темир рудасига ишов бериладиган заводни эгаллаб олди. Вилоят ҳарбий маъмурияти раҳбари Александр Старухга кўра, аслида заводни ўтган ҳафта эгаллашган, аммо эндигина маълум бўлмоқда. Старух, агар заводда сувни насос билан тортиб олиш тўхтаб қолса, ерости сувларига темир рудаси аралашиб, зарарланиши мумкинлигидан огоҳлантирди.
Шунингдек, Россия қўшинлари Запорожьега қўшимча ҳарбий ташлаётгани ва Мелитополга яқинлашаётгани айтилмоқда. Мелитополь икки тарафдан қўшин қуршовида қолаётган шаҳарга айланмоқда. Мелитопол мэри Иван Федоровга кўра, Украина қўшинлари ҳам Запорожье томонидан Мелитополга яқинлашмоқда.