Буюк Британия Россия делегациясига визани рад қилди
Буюк Британия ЕХҲТ Парламент ассамблеясининг июль ойида бўладиган сессиясида иштирок этиши учун Россия делегациясига виза беришни рад этди.
Бу ҳақда Россия Федерациялар кенгаши халқаро муносабатлар қўмитаси раисининг муовини Владимир Жабаровга таянган ҳолда “Интерфакс” хабар қилди. Унинг айтишича, барча делегатлар Британиянинг санкция қўлланган шахслар рўйхатига киришади. Шу муносабат билан улар ассамблея раҳбарияти ва Россия ТИВдан Британияга кириш визасини бериш масаласини ўрганишни сўрашмоқда.
“Биз Буюк Британия ҳукуматидан “Россиянинг ЕХҲТ ПА делегацияси аъзоларига, улар мамлакатимизга қандай мақсадда келишларидан қатъий назар виза бера олмайиз”, деган мазмунда ярамас бир жавоб олдик”, деди Жабаров.
Эслатиб ўтамиз, ЕХҲТ Парламент ассамблеясининг 29-сессияси 2022 йил 2-6 июль кунлари Бирмингем шаҳрида бўлиб ўтади. Жабаровга кўра, сессияда Россия делегациясини аъзоликдан чиқариш масаласи қўйилиши мумкин.
Россиядаги нефт базасига зарба берилди
Ростов вилоятидаги Новошахтинск нефтни қайта ишлаш заводида ёнғин чиқди, дея маълум қилди Россия ФВВнинг ҳудудий бошқармаси.
Айтилишича, ёнғин эрталаб 9 ларда бошланган ва бир соат ичида локаллаштирилган. Ёнғин майдони 50 кв.метрни ташкил қилади, бироқ унинг тарқалиш хавфи йўқ. Қурбонлар ва жабрланганлар ҳақида маълум қилинмаган.
ФВВ ёнғин сабабларини очиқлаган эмас, аммо “Сота” телеграм-канали заводга дрон зарбасидан сўнг ўт кетганини хабар қилмоқда.
Новошахтинск заводи Украина чегарасидан 10 километр нарида жойлашган.
Портлашдан бир неча сония олдин Новошахтинск нефтни қайта ишлаш заводи узра видеотасвирга олинган учувчисиз учиш аппарати, катта эҳтимол билан, PD-2 русумли дрон бўлиши мумкин. Украинанинг Kalush Orchestra гуруҳи ғолиб чиққан “Евронигоҳ-2022” танлови кубоги сотувидан тушган маблағ худди шунақа дрон харид қилишга ажратилган эди.
Украинадаги ҳарбий жиноятларни текшириш учун АҚШда махсус гуруҳ ташкил этилмоқда
АҚШда Украинадаги ҳарбий жиноятларни тергов қилиш учун махсус гуруҳ тузилади. Бу ҳақда 21 июнь куни АҚШ адлия вазири ва бош прокурори Меррик Гарленд Киевга қилган сафари чоғида маълум қилди.
Махсус гуруҳга АҚШ Адлия вазирлиги ходими Эли Розенбаум бошчилик қилади, у Қўшма Штатларда “миллатчилар овчиси” ўлароқ танилган.
“Ҳарбий жиноятчиларнинг яшириниб оладиган жойи йўқ”, деган Гарленд “Россиянинг адолатсиз ва асоссиз хуружи”га дучор бўлган украиналикларга қўллов билдирар экан.
Махсус гуруҳ таркибига инсон ҳуқуқлари бузилиши ва ҳарбий жиноятларга оид ишларни тергов қилиш билан шуғулланган америкалик етакчи мутахассислар киритилади. Бундан ташқари, АҚШ Украинага коррупция ва пул ювишга қарши кураш бўйича эксперт йўллайди. Америкалик бошқа икки мутахассис эса Европа ва Яқин Шарқда иш олиб боришади. Улар маҳаллий расмийларга Россиянинг санкцияларни айланиб ўтиш уринишларига қарши курашда, шунингдек, санкция рўйхатига кирган россиялик олигархлар активларини қидириб, ҳибсга олишда ёрдам беришлари керак.
Украина бош прокурори Ирина Венедиктова бу ёрдамни “жуда муҳим” деб айтган. “Биз ўта кучли душманлар қаршисида эканимизни ҳаммамиз яхши тушунамиз”, деган Венедиктова.
Украинадаги урушда АҚШнинг яна бир фуқароси ҳалок бўлди
Украина ҳудудидаги урушда америкалик Стивен Забельски ҳалок бўлди. Бу ҳақда The Washington Post хабар қилди.
Нашр қайдича, Украина Қуролли кучлари сафида жанг қилаётган 52 ёшли Забельски 15 май куни Запорожье вилоятининг Дорожнянка қишлоғида жон берган. Rolling Stone маълумотига кўра, АҚШ армияси фахрийси минага дуч келган.
АҚШ Давлат департаменти The Washington Post нашрига Забельски ўлганини тасдиқлаган ва унинг оиласи билан алоқада эканини билдирган. Муассаса бошқа тафсилотларни очиқлаган эмас.
Забельски Украинадаги урушда ҳалок бўлган америкаликларнинг йўқ деганда иккинчисидир. Апрель ойи охирида у ерда собиқ денгиз пиёдаси Уилл Жозеф Кэнсел ҳалок бўлгани ҳақида хабар тарқалган.
Бундан ташқари, АҚШ расмийларига кўра, Украина ҳудудидаги жанговар ҳаракатлар чоғида камида уч нафар америкалик бедарак йўқолган. Улардан икки нафари — Александр Дрюке ва Энди Хьюн 15 июнь куни Харьков яқинидаги жангларда асир олинган. “Интерфакс” агентлиги америкаликлар Донецкдаги тергов ҳибсхонасида сақланаётгани ҳақида хабар қилган.
Кремль сўзчиси Дмитрий Песковга кўра, Москва америкаликларнинг “ДХР”да ўлим жазосига ҳукм қилинмаслигига кафолат беролмайди. Россия расмийлари АҚШнинг бу фуқаролари Украина Қуролли кучлари сафида бўлмаганини иддао қилишиб, уларга нисбатан ҳарбий асирлар тўғрисидаги Женева конвенцияси қўлланилмаслигини айтишмоқда.