Россия: рус қўшинлари Украинанинг 8 та ўқ отиш позициясига зарба берди
Россия Мудофаа вазирлиги матбуот котиби Игор Конашенковга кўра, сўнгги кеча-кундузда Россия кучлари, Украинанинг шахсий таркиб ва ҳарбий техникаси жамланган 11 ҳудудга ҳамда Украина артиллериясининг 8 та ўқ отиш позициясига зарба берган.
У сешанба куни рус қуролли кучлари Северодонецк шаҳрига ҳужум пайтида Украинадаги бир қанча ҳарбий объектлар, жумладан ўқ-дорилар омборига зарба берганини маълум қилган.
"Чернигов вилоятидаги Прилукий яқинидан учирилган юқори аниқликдаги узоқ масофали ракеталар Украинанинг артиллерия қуроллари ва ўқ-дориларини йўқ қилди. Бундан ташқари, юқори аниқликдаги ракеталар Украинанинг шахсий таркиб ва ҳарбий техникаси жамланган 11 ҳудудга ҳамда Украина артиллериясининг саккизта ўқ отиш позициясига зарба берди. Булар Донетск Халқ Республикасидаги Бахмут ва Переeздное, Луганск Халқ Республикасидаги Лисичанск ва Харковнинг жанубий чеккаси, Луганск Халқ Республикасининг Хирск яқинидаги иккита ўқ-дорилар омбори ва учта “Град” ракета комплекслари жойлашган ҳудудлардир”, деди Конашенков.
Озодлик уруш шароитида бу маълумотларни мустақил манбалардан тезкор тасдиқлаш имконига эга эмас.
Украина Қуролли Кучлари Бош штаби, Россия ҳарбийлари Северодонецк йўналишида ҳужумни кучайтирганини тасдиқлаган. Буни Украина ОАВлари хабар қилмоқда.
Херсон расмийси: Она боласини гавдаси билан тўсиб қолди, ўзи ўлди
Херсон вилояти кенгаши раисининг маслаҳатчиси Наталья Попова, Россия армиясининг янги ракета зарбалари оқибатлари ҳақида қуйидагиларни сўзлаб берди:
“Ракеталар Белгороддан йўлланяпти. Сўнгги суткада бир киши ҳалок бўлди, беш киши яраланди. Жумладан, уч ойлик чақалоқнинг елка суяклари парчаланиб кетибди. Онаси уни гавдаси билан тўсиб қутқариб қолган, аммо ўзи ўлган. Харьков шаҳрига душман “ер устидан келиши” эҳтимоли йўқ, аммо артиллерия ва ракета зарбалари хавфи сақланиб қолмоқда. Шунга қарамай, уруш бошланганидан сўнг ғарбий вилоятларга ва чет давлатларга чиқиб кетган харьковликлар уйларига қайта бошлашган. Кимдир пули тугаб, бошқаси уйини қўмсам, қайтиб келяпти. Ҳар куни тахминан 2 минг киши қайтмоқда. Уйлари ярим вайронага айланган бўлса ҳам қайтишни афзал кўришяпти. Бундан ташқари, Россия армияси босиб олган ҳудудлардан кўчирилганларни ҳам шаҳарга ва яқин қишлоқларга жойлаштириб, озиқ-овқат ва бошқа зарур нарсалар билан таъминлаяпти”.
Зеленский: Донбасда фронт чизиғини ушлаб туришимиз жуда муҳим
Украина президенти Владимир Зеленский сешанба куни Украина, Европадаги ҳамкорларнинг замонавий ракетага қарши тизимларга муҳтожлигини яна таъкидлади. Украинада ҳозир шундай қуроллар етишмаётир.
Президентга кўра, Украина қўшинлари шарқдаги Северодонецк шаҳрида ҳам, Харков вилоятида ҳам рус қўшинларига қарши жангларда оғриқли йўқотишларга дуч келмоқда:
"Бу бизнинг еримиз. Донбасдаги чизиқни ушлаб туришимиз жуда муҳим. Душман у ерда қанча кўп йўқотишларга дучор бўлса, тажовузни давом эттириш учун шунчалик камроқ кучга эга бўлади. Шунинг учун ҳам Донбас йўналиши келаётган ҳафатада кимнинг ҳукмрон бўлишида ҳал қилувчи аҳамиятга эга. Рус армияси ўз мавқеини мустаҳкамлашга уринаётган Харков вилоятида ҳам оғриқли йўқотишларга дуч келдик. Бу йўналишда ҳаракатлар давом этмоқда. Биз Харков ва минтақа учун тўлиқ хавфсизликка эришиш учун ҳали ҳам жанг қилишимиз, қаттиқ қаршилик кўрсатишимиз керак. Биз жанубдаги босқинчиларга босим ўтказишда давом этамиз".
Макрон Молдовага борди
Франция президенти Эммануел Макрон сешанба куни Руминиянинг Константа шаҳри яқинидаги авиабазада НАТО тезкор кучларининг француз ва белгиялик аскарлари билан бирга овқатланди.
Макрон 15 июнь чоршанба куни Молдовага борди, президент Майя Санду билан учрашди.
Аввалроқ Макрон ўз самолёти олдида туриб, француз халқини якшанба 19 июнь куни бўлиб ўтадиган қонунчилик сайловларининг иккинчи босқичида, ўз партиясига овоз беришга чақирган.