Украинанинг бир неча ҳудудида жанглар қақшатқич тус олмоқда
Украина мудофаа вазири ўринбосари Анна Маляр 20 июндаги чиқишида стратегик аҳамиятга эга Северодонецк шаҳрида “ҳал қилувчи” жанглар бўлаётганини, шаҳардан олинган видеотасвирларда эса украин кучлари учун муҳим ҳудуд бўлмиш “Азот” кимё заводи атрофидаги бинолар жиддий шикастлангани акс этганини айтди.
Малярга кўра, россияпараст кучлар 26 июнгача Луганск вилояти маъмурий чегараларига чиқишга интилиб ўз ҳужумларини кучайтирмоқда, аммо Украина армияси ўз ҳудудини сақлаб қолиш учун мумкин бўлган барча ишни қилаётир.
Украина қуролли кучлари Бош штаби матбуот котиби Александр Шпатун Россия армияси сўнгги суткада Украина шимоли ва шимоли-шарқига бир қатор авиазарбалар йўллагани ва бомбалар ташлаганини билдирди.
Унинг айтишича, Россия Қора денгизга қанотли ракеталар билан қуролланган бешта ҳарбий кемани чиқарган бўлиб, исталган пайтда Украинадаги нишонларга зарба бериши мумкин.
Associated Press ёзишича, Россия ҳарбийлари Одесса вилояти жанубидаги Арциз аэродромига ракета зарбалари йўллаб иккита Bayraktar дронини ҳамда дронларни бошқариш марказини йўқ қилишганини иддао қилганлар.
ОАВ хабарларига кўра, Украина томонидан Луганск вилоятига раҳар этиб тайинланган Сергей Гайдай Россия кучлари мазкур ҳудудда муаян муваффақиятларга эришганини, ҳозирда эса шимолий ҳудудларга жўнатиш учун оғир қуроллар, жумладан танкларни жамлашаётганини тан олган.
Аннексия қилинган Қрим раҳбари Сергей Аксёнов Украинани Қора денгиздаги нефть бурғулаш платформаларини ўққа тутишда айблади.
Аксёновга кўра, зарба берилган учта минорада 109 нафар ишчи бўлгани сабабли қурбонлар сони анчагина. Айрим қурбонлар ҳануз бедарак йўқолган деб ҳисобланяпти. Украина томони ушбу айбловларга жавоб берганича йўқ.
Россия Хавфсизлик кенгаши котиби Николай Патрушев Литва аҳолисига таҳдид қилди
Патрушев Шимоли-ғарбий округда вазият “Ғарбнинг мислсиз сиёсий, ахборот ва иқтисодий босими” туфайли шаклланишини айтди.
“Бунинг энг ёрқин мисоли – Литванинг Ғарб мамлакатлари қутқуси билан, халқаро транзит ҳуқуқи меъёрларига зид равишда катта маҳсулотлар гуруҳини ўз ҳудуди орқали Калининград вилоятига ўтказмай қўйганидир. Ушбу мисол Ғарбнинг нафақат оғзаки, балки ёзма баёнотларига ҳам ишониб бўлмаслигини кўрсатади. Бироқ Россия бунақа ёғийларча ҳаракатга албатта жавоб қайтаради. Зарур чора-тадбирлар ишлаб чиқилмоқа ва тез орада қабул қилинади.
Уларнинг оқибатлари Литва аҳолисига жиддий салбий таъсир ўтказади”, дея қўшимча қилди Патрушев.
Россия байроғи остидаги кемалар Украина донини Сурияга экспорт қилган
Reuters’нинг xабар беришича, бу ҳақда пайшанба куни Махаr компанияси маълум қилди.
Суратлардан Россия байроғи остидаги иккита юк ташувчи кема май ойида Россия назоратидаги Қрим портида тўхтаб тургани ҳамда кемаларга ғалла ортилгани кўриш мумкин, дейилади компания хабарида.
Бир неча кун ўтгач, Махаr айнан ўша кемаларнинг Сурия денгиз ҳудудида люклари очиқ ҳолда тургани ва донни олиб кетишга тайёр қатор юк машиналар кўринган суратлар тўпламини эълон қилди. Сурия ва Россия ўзаро ишончли иттифоқчи.
Компаниянинг билдиришича, июнь ойида олинган яна бир суратда Севастополда дон ортилган бошқа кема ҳам акс этган.
Украина Россияни босиб олинган ҳудудлардан ғалла ўғирлашда айбламоқда. Глобал буғдой экспортининг қарийб 29 фоизини ташкил қиладиган Россия ва Украина ўртасидаги уруш дунё бўйлаб озиқ-овқат тақчиллиги хавфини юзага келтирмоқда.
Украина жаҳоннинг энг йирик дон экспортчиларидан бири бўлиб, Ғарб давлатлари Россияни Украинанинг Қора денгиз портларини ёпиш орқали глобал очарчилик хавфини келтириб чиқаришда айбламоқда.
8 июнь куни Украина қишлоқ хўжалиги ишлаб чиқарувчилари уюшмаси раҳбарининг ўринбосари UAC Rossiya босиб олинган ҳудудлардан 600 минг тоннага яқин ғалла ўғирлаб кетганини ва унинг бир қисмини экспорт қилганини хабар қилди.
Россия Украинадаги ҳаракатларини "махсус ҳарбий операция" деб атаб келади ва мақсади қўшнисини қуролсизлантириш ва "денацификация" қилиш эканини даъво қилмоқда. Ғарб ва Украина буни асоссиз тажовуз учун баҳона, деб атайди.
Туркияда Украинадан ғалла олиб чиқиб кетилиши бўйича музокаралар бўлиб ўтиши кутилмоқда
Россия президентининг матбуот котиби Дмитрий Песков Украинадан ғалла олиб чиқиб кетиш мавзусида Туркия билан музокара ўтказилиши мумкинлигини тасдиқлади. Мулозимга кўра, жараёнда Мудофаа вазирлиги вакиллари иштирок этишади ва Путин музокараларда қатнашмайди.
Истанбулда музокаралар ўтказилиши ҳақида аввалроқ Milliyet нашри Туркия президенти маъмуриятидаги манбалардан олинган маълумотга таянган ҳолда хабар тарқатганди. Хабарга мувофиқ, Россия, Украина, Туркия ва БМТ вакиллари иштирокидаги музокаралар кейинги ҳафтада бўлиб ўтиши кутилмоқда. БМТ матбуот хизмати музокаралар айнан қайси санада бўлиб ўтишига аниқлик киритган эмас.
Айтилишича, Туркия БМТ билан биргаликда ғалла олиб чиқиб кетилиши бўйича янги режа таклиф қилган – аввалги режа Украина томонига маъқул келмаган, чунки унда портларга кириш йўлларини минадан тозалаш кўзда тутилганди, бу эса мамлакатнинг мудофаа салоҳиятини пасайтирган ва Одессага йўл очган бўларди. Янги режага кўра Туркия дон ортилган кемаларни миналаштирилган ҳудудлардан айланиб ўтган ҳолда олиб чиқиб кетишни ваъда қилмоқда.