Зеленский: "Улар барча шаҳарларимизни Мариуполга айлантиришни қасд қилганлар"
Украина президенти Владимир Зеленский 22 июндаги видеомурожаатида Европа Иттифоқи жанглардан толиққан мамлакатга аъзолик мақомини бериш кутилаётганини олқишлар экан, Россия қўшинлари Украинанинг иккинчи йирик шаҳри – Харьковни ҳамда Донбасснинг шарқий қисмини ўққа тутганини айтди.
Зеленскийга кўра, у “Украинанинг номзод бўлиши масаласи ижобий якун топиши учун” эрталабдан Европа давлатлари раҳбарлари билан сўзлашган, музокаралар давом этиши кутилмоқда.
“Мулоқотларни эртага ҳам давом эттираман, зеро давлатимизга мумкин қадар ёрдам беришимиз керак. Эртага кечқурун Европа муҳим қарор қабул қилади”, деди президент.
“Донбассга авиация ва артиллериядан кенг кўламли зарбалар берилмоқда. Босқинчиларнинг ушбу йўналишдаги мақсадлари ўзгармаган – улар бутун Донбассни ер билан яксон қилишмоқчи. Лисичанск, Славянск, Краматорск – улар барча шаҳарларимизни Мариуполга айлантиришни қасд қилганлар. Яъни, буткул вайрон қилишмоқчи... Шу боис ҳам биз Украинага қурол етказиб беришни тезлаштиришга қистаяпмиз. Бу иблис лашкарини тўхтатиш ва уни Украина тупроғидан улоқтириб ташлаш учун зудлик билан жанг майдонида кучларни тенглаштиришимиз лозим. Юртимизни озод этишимиз ва тезроқ ғалабага эришишимиз зарур. Мумкин қадар тез. Бу бизнинг миллий ғоямиздир, уни рўёбга чиқариш учун тинимсиз ишлашимиз шарт”.
Бугун, 23 июнь куни Брюсселдаги саммитда Украина ЕИга аъзо бўлишдек узун йўлда расман илк одимини қўяди. Кўп жиҳатдан рамзий тусда бўлса-да, бу ҳозирги оғир шароитда миллат руҳини кўтаришга ёрдам беради.
Украина "Азовсталь" асирларини алмаштиришга ҳаракат қилмоқда
Украина разведкаси бошлиғи “Азовсталь” заводида таслим бўлган ҳарбий асирларни алмашиш жараёни ҳақида сўзлаб берди.
“Яқин орада биринчи алмашув бўлади, асирларнинг каттагина қисми озод қилинади. Бу алмашув бир неча босқичда амалга оширилади”, деди Бош разведка бошқармаси раҳбари Кирилл Буданов. У командирлар таркибини алмашиш жуда қийин бўлишини қўшимча қилди.
Будановга кўра, разведка Мариуполда асирга олинган деярли барча украин ҳарбийларининг тақдиридан яхши хабардор. Асирларнинг асосий қисми Донецк яқинидаги Еленёвка шаҳрида сақланмоқда, тергов ҳаракатларини ўтказиш учун уларни вақти-вақти билан у ердан олиб чиқишади.
Буюк Британия Россияга қарши санкцияларни кенгайтирди
Янги санкциялар сирасида мамлакатга нақд фунт стерлинг олиб киришни тақиқлаш, шунингдек Россиядан “қора рўйхат”даги маҳсулотлар экспорт қилиниши билан боғлиқ техник ёрдам, молиявий ва брокерлик хизматларини ман этиш каби бандлар бор.
“Экспортчиларга хабарнома” деб сарлавҳа қўйилган янги чекловлар рўйхати Россияга қуйидаги маҳсулотлар экспорт қилинишини тақиқлайди:
ички қатағонларни амалга оширишда қўлланадиган товарлар ва технологиялар;
кимёвий ва биологик қурол ишлаб чиқариш учун компонентлар ва технологиялар;
денгизда юк ташиш ва денгиз технологиялари;
нефтни қайта ишлаш саноати учун зарур технология ва жиҳозлар;
Россиянинг муҳим иқтисодий тармоқлари учун зарур қўшимча технологиялар ва компонентлар.
Россияга авиация ёқилғиси экспорт қилиш, шунингдек Россиядан темир ва пўлат импорт қилиш тақиқлангани алоҳида қайд этилган.
ЕИ саммити очилди. Унда Украинага Евроиттифоқ аъзолигига номзод мақоми берилиши кутилмоқда
Брюсселда ЕИнинг икки кунлик саммити иш бошлади, унда, Евроиттифоқ давлатлари лидерлари Украина билан Молдовага ЕИ аъзолигига номзод мақомини бериш тўғрисида қарор қабул қилиши кутилмоқда. Аввалроқ Еврокомиссия шунақа тавсия берган эди.
“Тарихий воқеалар юз бермоқда”, деди саммит олдидан Еврокомиссия раҳбари Урсула фон дер Ляйен. У Россия агрессиясидан сўнг нафақат Украина, балки ундан олдин Молдова ҳамда Грузия ҳам ЕИга аъзо бўлиш учун ариза беришганини урғулади.