Украина армияси озод этилган ҳудудларда россиялик ўқитувчиларни қўлга олди
Украин қўшинларининг қарши ҳужуми чоғида ушланган россиялик ўқитувчилар Жиноят кодексининг уруш қонунлари ва одатларини бузиш ҳақидаги 428-моддасига асосан суд қилинади, деди бош вазир ўринбосари Ирина Верешчук.
Купянскда ўқитувчилар қўлга олингани тўғрисида 10 сентябрь куни “24-канал” разведкадаги ўз манбасига таяниб хабар тарқатган эди. Манба рус ҳарбийлари шаҳардан чекинар экан, ўқитувчиларни унутганини айтган.
“Улар бизнинг давлатимизга қарши жиноят содир этишди. Украина ҳудудига келиб, бу ерда ноқонуний фаолият олиб боришга розилик берган Россия фуқароларини кўп марталаб огоҳлантирганмиз. Жазо чорасини суд белгилайди. Аммо уларга ҳеч ким ҳарбий асир деб қарамайди, чунки улар комбатантлар эмас, ҳарбий асир бўлмаганларни айирбошлаш Женева конвенциясида назарда тутилмаган”, дея таъкидлади Верешчук.
Ўқитувчилар 8 йилдан 12 йилгача муддатга озодликдан маҳрум этилиши мумкин. Қўлга олинган россиялик ўқитувчилар сони ва уларнинг исм-фамилиялари очиқланмаган.
Россия маориф вазири Кравцов босиб олинган ҳудудларда дарс берган россиялик ўқитувчилар “ҳозирда Россия ҳарбийлари назоратидаги ҳудудларда” эканини айтди.
Оккупация маъмуриятининг исми сир тутилган вакили эса “Интерфакс” агентлигига “Купянскда Россия дастури бўйича дарс бергани учун жавобгарликка тортиш мумкин бўлган россиялик ўқитувчилар бўлмаган”ини билдирган.
БМТ: Украинада 5827 нафар тинч аҳоли нобуд бўлди
БМТ Инсон ҳуқуқлари бўйича олий комиссари маълумотига кўра, Россия бостириб кирган 24 февраль санасидан бери Украинада 5 827 нафар тинч фуқаро ўлган, яна 8 421 киши яраланган.
Ташкилот аниқлаштиришича, ўлганлардан 2 270 нафари эркаклар, 1 559 нафари аёллар, 153 нафари – қиз ва 187 нафари ўғил болалардир. Шунингдек, 35 нафар бола ва 1 632 катта ёшли киши жасадларининг жинси аниқланмаган.
Аксар марҳумлар катта майдонга зарба берадиган оғир қуроллар қўлланиши оқибатида ҳалок бўлганлар. БМТ ўлганлар ва жабрланганларнинг ҳақиқий сони анча кўплигини урғуламоқда.
Экспертлар айнан қанча одам жабрланганини аниқ айта олишмайди, чунки ҳарбий ҳаракатлар бўлаётган ҳудудлардаги қурбонлар сонини билиш ҳозирча имконсиз. Бундан ташқари, ҳали тасдиқланмаган маълумотлар ҳам бор.
Британия ҳарбий разведкаси: Россия ҳарбий салоҳияти заифлашмоқда
Украина ҚК мамлакат шарқида қарши ҳужумни давом эттирмоқда. Ҳарбийлар Купянск, Святогорск ва Изюм шаҳарларини озод қилишди, шунингдек бир қанча жойларда Россия-Украина чегарасига чиқишди.
Буюк Британия Мудофаа вазирлиги маълумотига кўра, қарши ҳужум давомида Харьков вилоятидан чекинган Россия қўшинларининг бир қисми Россия армиясининг энг нуфузли бўлинмаларидан бири – Ғарбий ҳарбий округнинг 1-гвардия танк армиясига мансуб бўлган.
Россияга қуролли ҳужум бўлган тақдирда айнан шу армия Москвани мудофаа қилиши ва НАТО билан уруш чиққан тақдирда қарши ҳужумга ўтиши керак бўлур эди.
Украинада эса 1-гвардия танк армияси урушнинг дастлабки босқичларида жуда оғир талафот кўрди. Украина қарши ҳужумга ўтган пайтда бўлинма ўз жанговар қобилиятини тўлиқ тиклай олмаган эди.
Ҳарбий экспертлар фикрича, буларнинг бари НАТОга қарши кураш учун мўлжалланган қўшин жиддий заифлашганини кўрсатади. Британия разведкаси бой берилган ҳарбий салоҳиятини тиклаш учун россияга йиллар керак бўлади, деб ҳисобламоқда.
Россия чегараси яқинидаги украин қишлоғи миналардан тозаланди
12 сентябрь куни украин миналардан тозалаш бўлинмаси Харьков шимолида Россия билан чегарадош ҳудуддаги қишлоқни портловчи моддалардан тозалаш ишлари бошланганини маълум қилди. Қишлоқни аввалроқ Украина қўшинлари қайта қўлга киритган.
Reuters агентлиги қўлга киритган видеоларда бўлинма қўлбола ёғоч таёқ ёрдамида пиёдаларга қарши мина эканлиги айтилаётган портловчи моддаларни топиб, тозалаётгани акс этган.
Полициянинг миналардан тозалаш бўлими бошлиғи Костиннинг айтишича, унинг қўлида ишлайдиган мутахассислар Россия чегарасидан етти километр узоқликдаги Уди қишлоғини пиёдаларга қарши миналардан тозалаган:
«Россия позициялари яқинида жойлашган кўплаб тузоқларини тозаладик. Ф-1 гранаталари бор экан. Шунингдек, биз кўплаб ПФМ (совет даврида ишлаб чиқилган пиёдаларга қарши миналар)ни топдик. Уларни жойида йўқ қилдик. Бу ҳудудда, мана шу қишлоқда биз бешдан ўнтагача (рус) позициясини топдик. Бу анча катта қишлоқ. Эшитишимизча, у ерда 1200 га яқин одам яшаган. Менимча, қишлоқни бутунлай тозалаш учун бир ойгача вақт кетади».
Reuters видео олинган сана ва ҳудудни мустақил равишда тасдиқлай олмаган.
Удидан қайтган аскарлар у ер ҳануз хавфсиз эмаслигини айтишди. Уларнинг сўзларига кўра, қишлоқда рус қўшинларидан қолган миналар, гранаталар ва қурол-яроғ кўп бўлиб, қишлоқ кўчаларида қаровсиз қолган жониворлар юрибди.
Украинанинг Харьков вилоятидаги ютуқлари Москва учун жиддий мағлубият бўлди. Йўқотишлар ортидан Россия Украина шарқида ўз кучларини таъминлаш учун фойдаланиб келган муҳим логистика марказларидан маҳрум бўлди.
Украина бир неча кун ичида 6 минг квадрат километрдан ортиқ ҳудудни қайтариб олганини айтмоқда. Шундай бўлса-да, Россия ҳануз мамлакатнинг бешдан бир қисмини эгаллаб турибди.