Россия армиясидан озод қилинган Изюмда яна бир оммавий қабр топилди
Маҳаллий полиция расмийси 440 дан ортиқ жасад топилганини тасдиқлади. Қурбонларнинг отишма ва ҳаво ҳужумлари натижасида ўлгани, орасида болалар ҳам борлиги айтилмоқда.
Зеленский бу оммавий қабрни Бучадан топилган оммавий қабрларга қиёслади. Бунинг учун жавобгарликни Россия зиммасига юклади.
Россия томони бу борада ҳануз баёнот бергани йўқ. Аммо, февралда бошлаган босқин давомида, Россия ўз армияси томонидан тинч аҳолига ҳужум ёки уларнинг ўлдирилишини тан олмай келаётир.
Ўтган дам олиш кунларида минглаб рус аскарлари катта миқдордаги ўқ-дорилар ва қурол-яроғини ташлаб, Изюмдан чиқиб кетди.
“Бизда қабрлар тасвирланган видео бор. Бу ҳақда бизга ҳеч ким айтмади, лекин биз видеони топдик. Мобил алоқа ўчмасидан аввал маҳаллий аҳоли вакиллари билан гаплашдик.
- Мен шу ерликман. Краматорскда туғилганман, узоқ вақт Славянскда яшадим ва 2010 йилдан бери Киевда яшаб келаман. Мен бу ерда қолган одамларни танийман, улар бизга ёрдам беришди. Биз улардан одамлар кўмилган жой қаердалигини сўрадик.
Бизда видео бор. Гарчи видеоёзувда “17 киши” деб ёзилган бўлса ҳам, бу ерда тахминан 20-25 киши кўмилганини ҳисобладик. Эртага жасадлар эксгумация қилинганда, уларнинг сонига аниқлик киритамиз. Изюм туманининг Камянка, Довҳенке каби кўплаб жойларида жанглардан шунга ўхшаш асоратлар қолган. Биз ҳали у ердаги жасадларни текшира олганимизча йўқ.
Воқеа жойида икки кундан бери ишлаяпмиз. Ёмғир сабабли, баъзи жойларга етиб бора олмадик. Қолаверса, бизда миналардан тозалаш ускуналари етарли эмас. Ҳозир улардан бошқа жойларни тозалашда фойдаланилмоқда”, деди Олег Котенко, Украина расмийси.
Озодлик уруш шароитида ушбу маълумотларни оператив текшириш имконига эга эмас.
Украина: Изюм оккупациясида одамлар қийноққа солинган
Украина инсон ҳуқуқлари бўйича вакили Дмитрий Лубинец Изюм оккупацияси вақтида Россия ҳарбийлари одамларни қийноққа солгани айтилган ертўладан видео ёйинлади.
Видеода Лубинец тор ерости хонасида кўринади. Тош тўшалган ерда линолеум парчалари кўринади. Мулозим айтишича, линолеум тошда қон доғлари қолмаслиги учун керак бўлган.
Ўртадаги стол тутқунларни сўроқ қилган рус ҳарбийси учун қўйилган бўлса эҳтимол.
Лубинец тутқунлардан қийноққа солиш йўли билан Россия ҳарбийларига зарур маълумотлар олинган, украин ҳукумати бу ерда сўроқ берган одамлардан хабардор, демоқда.
Мулозим халқаро ҳамжамиятни Россия Женева конвенциясини бузаётганига эътибор беришга чақирди ва Украина террорчи давлат билан урушишга мажбур бўлаётганини урғулади.
Уруш бўлаётгани сабабли Озодлик ҳатто расмий давлат органларининг маълумотларини ҳам тезкор текшириш имконига эга эмас.
Путин ва Си Цзинпиннинг Самарқаддаги учрашуви
Россия президенти Владимир Путин Хитой раҳбари Си Цзинпиннинг Украинадаги вазият борасида хавотирларини тушунишини айтди. Путин шу билан бирга Хитой раҳбарини можаро бўйича “мувозанатли” позицияси учун мақтади.
Икки давлат раҳбарлари пайшанба куни Самарқанд шаҳрида бўлиб ўтаётган Шанхай ҳамкорлик ташкилоти (ШҲТ) саммитида учрашди. Бу икки етакчининг Украинадаги уруш бошланганидан кейинги илк юзма-юз учрашуви бўлди.
Учрашувда Хитой раҳбари “қадрдон дўстини” яна кўрганидан мамнунлигини билдирган. Путин АҚШнинг бир қутбли дунёни яратишга уринишлар муваффақиятсизликка учрашини айтган. Хитой президенти шу пайтгача омма олдидаги чиқишларида Украинани тилга олмаган.
Хитой давлат телерадиокомпаниясига кўра, Хитой Россияга ўзининг асосий манфаатлари билан боғлиқ масалаларда астойдил ёрдам беришга тайёр.
Цзинпин ва Путин охирги марта, 24 февралдаги босқиндан бир неча ҳафта олдин шахсан учрашган ҳамда Ғарбга қарши бирга туришга ва ҳамкорлик қилишга келишиб олган эди.
АҚШ президенти Жо Байден Украина учун 600 млн долларлик янги ҳарбий ёрдам пакетини тасдиқлади
Reuters агентлигига кўра, ҳарбий ёрдам HIMARS ракета тизимлари, тунда кўриш жиҳозлари, миналардан тозалаш машиналари, артиллерия снарядлари ва бошқа қурол-аслаҳаларни ўз ичига олади.
Шунингдек, янги пакет доирасида америкалик мутахассислар украин ҳарбийларини тайёрлаш билан шуғулланади. АҚШ 24 февралдан бери Украинага жами қарийб 15 млрд долларлик ҳарбий ёрдам кўрсатди.
Европа Комиссияси раҳбари Урсула фон дер Ляен эса, Рейтерга берган интервьюсида Украинани қўллаб-қувватлаш қимматга тушади, аммо эркинлик “бебаҳо”, дея таъкидлади.
Киевда туриб сўзлаган фон дер Ляен хоним блок Украинани қувватлашда қатъиятли бўлиши кераклигини яна бир бор таъкидлади. ЕИ аъзо давлатлари ўртасида Россияни босқинчилиги учун қандай жазолаш борасида келишмовчиликлар пайдо бўла бошлади.
Европада ривожланаётган энэргетика инқирозининг Киевни қўллаб-қувватлашга таъсири ҳақида сўралганда, фон дер Ляен Украина ёнида туриш “қимматга тушади, аммо бизнинг эркинлигимиз, халқаро тинчлик тартиби ва демократия бебаҳо”, дея жавоб берди:
"Ҳа, бу жуда қимматга тушишини яхши тушунамиз. Аммо бизнинг эркинлигимиз, халқаро тинчлик тартиби ва демократия бебаҳодир. Қўшимча қилиб шуни айтмоқчиманки, автократия эмас, демократия ғалаба қозонади. Мен Украина ва Европа, демократик давлатлар ғалаба қозонишига қатъий аминман”.
Европа Иттифоқи бу йил Украинани қўллаб-қувватлаш учун ўз тарихида биринчи марта Европа тинчлик жамғармаси орқали Украинага ҳарбий ёрдамни молиялаштирди.
“Украина ўз мудофааси учун зарурий барча ҳарбий имкониятларга эга бўлиши ҳар доимгидан ҳам муҳим”, деди фон дер Ляен.