В. Зеленский: Озод этилган шаҳарларда қийноқхоналар топилмоқда!
Харков вилояти Изюм шаҳрида топилган оммавий қабристонда эксгумация ишлари давом эттирилмоқда. Махсус идоралар экспертиза ишларини олиб бормоқда ва кунига 50га яқин мурдаларни қазиб олишмоқда.
У ерда дафн этилган одамларга нисбатан қийноқ қўлланганига оид янги далиллар топилди. Президент Владимир Зеленский ўзининг ҳар кунлик видеочиқишида Украина қўшинлари озод қилаётган турли шаҳар ва қишлоқларда ўндан ортиқ қийноқ камералари топилганини маълум қилди.
- Босқинчилар қочиб кетаётиб, қийноқ асбобларини ҳам ташлаб кетмоқдалар. Ҳатто Казачья Лопандаги оддий темир йўл станциясида қийноқлар хонасини, электр токи уриши учун қийноққа солиш асбобларини топдик. Бу шунчаки вокзал! Қийноқлар ишғол қилинган барча ҳудудларда қўлланилган. Мана бу нацистлар қилаётган иш. Мана бу рашистлар қилаётган ишлар. Улар бу қилмишлари учун жанг майдонида ва судлар залларида жавоб беришади. Биз бу қийноқларни ва вахшийликларни қилган ҳар бир шахсни кимлигини аниқлайми, - деди Зеленский.
АҚШ Давлат котиби Энтони Блинкен Изюмда оммавий қабрлар топилганидан кейин Украинага ёрдамни кучайтириш зарурлигини айтди.
Рада депутати Изюмда ўлиб кетган оила ҳақида сўзлади
Украина расмийлари Изюм шаҳри яқинидаги ўрмонда 440 нафар жасад топганини маълум қилди. Уларнинг айтишича, ҳалок бўлганларнинг аксарияти тинч аҳоли вакиллари бўлиб, уруш жиноятларини бир неча ойдан бери ҳудудни босиб олган рус босқинчилари содир этгани исбот далларни тақдим этган. Харков ҳарбий маъмурияти раҳбари Олег Синегубов зўравон ўлим белгилари Изюмда эксгумация қилинган жасадларнинг 99 фоизида аниқланганини билдирди.
Олий Раданинг Инсон ҳуқуқлари бўйича комиссари Дмитрий Лубинец Изюмдаги оммавий қабрлар орасидан топилган Столпаковлар оиласининг қабрларини кўрсатди. Улар 9 март куни ўлдирилгани аниқланган. Снаряд келиб урилганда Лена ва Дима Столпаковлар, уларнинг икки қизи, Ленанинг ота-онаси, синглиси ва бувиси кўп қаватли уйнинг ертўласида бўлган. Бу оила аъзоларининг барчасини қулаб тушган уй босиб қолган.
Тинимсиз бомбардимонлар туфайли қутқарувчилар жасадларни уй қулаб тушганидан бир ҳафталарча ўтиб чиқариб олган ва дафн этган.
Галкин Россияда "хорижий агент" деб эълон қилинди
Украинадаги урушга қарши чиққан россиялик пародист ва телебошловчи Максим Галкин ўз мамлакатида чет эл агенти сифатида фаолият юритувчи шахслар реестрига киритилди. Галкин Россиядан ташқарида фаолиятини давом эттирмоқда.
Феврал ойи охирида Россиянинг Украинага бостириб кириши бошланганидан кейин у Исроилда қолмоқда, ўз консертларида урушни кескин танқид қилди. Санъаткор бу йил Латвия, Полша ва Австралияда ҳам консерт берди.
Ижтимоий тармоқларида Галкин, хусусан, Бучадаги қирғинларга изоҳ бериб, урушни оқлаб бўлмаслигини айтди.
Шундан сўнг, ҳажвчи Россия телевидениеси эфирдан маҳрум бўлди. Оммавий ахборот воситаларида ҳажвчининг урушга қарши баёнотлари бунга сабаб бўлгани, урушнинг дастлабки кунларидаёқ у реклама шартномаларидан маҳрум бўлганини таъкидлади.
Август ойи охирида Галкиннинг рафиқаси Алла Пугачева Россияга қайтгани маълум бўлди. У уруш ҳақида оммавий баёнотлар бермади, лекин ижтимоий тармоқларда адоват сепаётганларни танқид қилди.
3 сентабр куни қўшиқчи СССРнинг биринчи президенти Михаил Горбачёвнинг дафн маросимида пайдо бўлди.
Путин Самарқанддаги саммитда энергетика инқирози ҳақида нималар деди?
Россия президенти Владимир Путин Россиянинг Европадаги энергетика инқирозига алоқаси борлигини инкор этди. Москва раҳбари агар Европа Иттифоқи кўпроқ газ истаса, “Шимолий оқим 2” қувури очилишига тўсқинлик қилувчи санкцияларни бекор қилиши кераклигини айтди.
Ўзбекистонда Шанхай Ҳамкорлик Ташкилоти саммити якунланганидан сўнг журналистлар билан суҳбатда Путин энергетика инқирозида Ғарбни айблади ва Россия энергия бўйича ўз мажбуриятларини бажаришини таъкидлади.
“Хулоса шуки, агар хоҳиш бўлса, бу сиз учун жуда қийин бўлмаса, йилига 55 миллиард куб метр газ оқиши мумкин бўлган “Шимолий оқим 2” бўйича санкцияларни бекор қилинг, шунчаки тугмани босинг ва ҳаммаси жойида бўлади”.
“Шимолий оқим 1”га деярли параллел равишда Болтиқ денгизи тубидан ўтувчи “Шимолий оқим 2” бир йил аввал ётқизилган, бироқ Германия 24 февраль куни Россия Украинага ўз қўшинларини киритишига бир неча кун қолганида уни давом эттирмасликка қарор қилган.
Европада газ нархлари йил бошидан бери икки бараварга ошди. Бу Россиядан газ қисқариши фонида кузатиляпти.
Европа Россияни Ғарбнинг Украинадаги “махсус ҳарбий операцияси” учун Москвага қўйган санкцияларига жавоб тариқасида энергия таъминотидан қурол сифатида фойдаланаётганликда айблайди. Россия иддаосича, Ғарб иқтисодий уруш бошлаган ва санкциялар “Шимолий оқим 1” қувури фаолиятига тўсқинлик қилган.
Россия бир қанча давлатларга, жумладан Болгария ва Полшага газ етказиб беришни тўхтатди, чунки улар шартнома валютасида эмас, балки рублда тўлашдан бош тортганлар
Россиянинг газ гиганти Газпром ҳам шу ой бошида Европанинг асосий таъминот йўналиши бўлган "Шимолий оқим 1" қувури ёпилишини билдирди, бу газнинг улгуржи нархининг ошишига олиб келди.