Линклар

Шошилинч хабар
29 ноябр 2021, Тошкент вақти: 16:32

Беларусь-Польша чегарасидаги бўҳрон: Тошкент Беларусга транзит парвозларни чеклади


Яқин Шарқ, Жанубий Осиё ва Африкадан келган минглаб ноқонуний муҳожирлар Беларусь орқали ЕИ ҳудудига ўтишга уринмоқда.

Ўзбекистон ўнлаб мамлакатдан транзит йўловчилар учун Беларусь орқали парвоз қилишни чеклади. Бу ҳақда душанба куни Европа Иттифоқи ташқи сиёсат маҳкамаси раҳбари Жозеп Боррель маълум қилди.

The Diplomat нашрининг ёзишича, бундан мақсад Беларусь раҳбари Александр Лукашенконинг чегарадан ноқонуний муҳожирларни сиқиб чиқариш орқали Польша ва Европа Иттифоқининг бошқа давлатларини беқарорлаштиришга қаратилган саъй-ҳаракатларига тўсқинлик қилишдир.

Сўнгги ойда Яқин Шарқ, Жанубий Осиё ва Африкадан келган минглаб ноқонуний муҳожирлар Беларусь орқали ЕИ ҳудудига ўтишга уринмоқда.

Ўтган ҳафтада икки минг нафарга яқин мигрант Беларусь‑Польша чегарасидаги «Брузги – Кузница» назорат-ўтиш масканига (НЎМ) борди. Кейинроқ улар масканни ўраб олиб, ўзларини ЕИ ҳудудига ўтказиб юборишни талаб қилишди.

Польша полициясига кўра, беларуслик чегарачилар мигрантларни гўё Кузницадаги НЎМдан автобусларда Германияга элтиб қўйишга қарор қилинганига ишонтириб, уларни бошлаб келган.

Боррель “Twitter”да Ўзбекистон «одам савдосининг ушбу янги йўналишини ёпиш йўлида тезкор чора кўргани» учун миннатдорлик билдирди.

Боррель ўз баёнотини эълон қилишидан бир кун олдин Душанбе шаҳрида Ўзбекистон Ташқи ишлар вазири Абдулазиз Комилов билан учрашган эди. Тожикистон пойтахтида ЕИ ва Марказий Осиё дипломатлари йиғилиши бўлиб ўтди.

Исми ошкор қилинмаган ЕИ дипломатининг сўзларига кўра, Тошкент жорий қилган чекловлар Афғонистон, Ироқ, Ливан, Ливия, Сурия ва Ямандан йўлга отланган айрим транзит йўловчиларга татбиқ қилинади.

Боррель ва Комилов ушбу масала бўйича ҳамкорлик қилишни 16 ноябрь куни Брюсселда ҳам муҳокама қилган.

Душанбедаги анжуманда Қозоғистон, Қирғизистон, Тожикистон, Туркманистон ва Ўзбекистон расмийлари қатнашди. Дипломатлар ЕИ билан қатор минтақавий муаммолар бўйича ҳамкорлик ташаббусларини, жумладан, жорий йилнинг ёзида АҚШ бошчилигидаги Ғарб ҳарбий кучлари Афғонистондан олиб чиқиб кетилганидан кейин мамлакатга гуманитар ёрдам кўрсатиш масаласини муҳокама қилган.

XS
SM
MD
LG