Линклар

Шошилинч хабар
02 декабр 2021, Тошкент вақти: 09:20

Belarus-Polsha chegarasidagi bo‘hron: Toshkent Belarusga tranzit parvozlarni chekladi


Yaqin Sharq, Janubiy Osiyo va Afrikadan kelgan minglab noqonuniy muhojirlar Belarus orqali YeI hududiga o‘tishga urinmoqda.

O‘zbekiston o‘nlab mamlakatdan tranzit yo‘lovchilar uchun Belarus orqali parvoz qilishni chekladi. Bu haqda dushanba kuni Yevropa Ittifoqi tashqi siyosat mahkamasi rahbari Jozep Borrel ma’lum qildi.

The Diplomat nashrining yozishicha, bundan maqsad Belarus rahbari Aleksandr Lukashenkoning chegaradan noqonuniy muhojirlarni siqib chiqarish orqali Polsha va Yevropa Ittifoqining boshqa davlatlarini beqarorlashtirishga qaratilgan sa’y-harakatlariga to‘sqinlik qilishdir.

So‘nggi oyda Yaqin Sharq, Janubiy Osiyo va Afrikadan kelgan minglab noqonuniy muhojirlar Belarus orqali YeI hududiga o‘tishga urinmoqda.

O‘tgan haftada ikki ming nafarga yaqin migrant Belarus‑Polsha chegarasidagi «Bruzgi – Kuznitsa» nazorat-o‘tish maskaniga (NO‘M) bordi. Keyinroq ular maskanni o‘rab olib, o‘zlarini YeI hududiga o‘tkazib yuborishni talab qilishdi.

Polsha politsiyasiga ko‘ra, belaruslik chegarachilar migrantlarni go‘yo Kuznitsadagi NO‘Mdan avtobuslarda Germaniyaga eltib qo‘yishga qaror qilinganiga ishontirib, ularni boshlab kelgan.

Borrel “Twitter”da O‘zbekiston «odam savdosining ushbu yangi yo‘nalishini yopish yo‘lida tezkor chora ko‘rgani» uchun minnatdorlik bildirdi.

Borrel o‘z bayonotini e’lon qilishidan bir kun oldin Dushanbe shahrida O‘zbekiston Tashqi ishlar vaziri Abdulaziz Komilov bilan uchrashgan edi. Tojikiston poytaxtida YeI va Markaziy Osiyo diplomatlari yig‘ilishi bo‘lib o‘tdi.

Ismi oshkor qilinmagan YeI diplomatining so‘zlariga ko‘ra, Toshkent joriy qilgan cheklovlar Afg‘oniston, Iroq, Livan, Liviya, Suriya va Yamandan yo‘lga otlangan ayrim tranzit yo‘lovchilarga tatbiq qilinadi.

Borrel va Komilov ushbu masala bo‘yicha hamkorlik qilishni 16 - noyabr kuni Bryusselda ham muhokama qilgan.

Dushanbedagi anjumanda Qozog‘iston, Qirg‘iziston, Tojikiston, Turkmaniston va O‘zbekiston rasmiylari qatnashdi. Diplomatlar YeI bilan qator mintaqaviy muammolar bo‘yicha hamkorlik tashabbuslarini, jumladan, joriy yilning yozida AQSh boshchiligidagi G‘arb harbiy kuchlari Afg‘onistondan olib chiqib ketilganidan keyin mamlakatga gumanitar yordam ko‘rsatish masalasini muhokama qilgan.

XS
SM
MD
LG