Линклар

Шошилинч хабар
25 октябр 2021, Тошкент вақти: 00:00

OzodDayjest: Prezidentlikka nomzod “citi”larga ruju qo‘yilayotganini tanqid qildi


Prezidentlikka nomzod Bahrom Abduhalimov

Prezidentlikka nomzodlar ko‘l va daraxtlar himoyasiga chiqishdi. Taniqli yozuvchi Ulug‘bek Hamdam o‘zbek jamiyatidagi toqatsizlik haqida mulohazalari bilan o‘rtoqlashdi. Xonanda Munisa Rizayevaning kunlik daromadiga oid raqam ijtimoiy tarmoqlarda qizg‘in muhokamalarga sabab bo‘ldi. Joriy hafta o‘zbek matbuoti shu kabi voqealar haqida xabar berdi.

__________________________________________________________

Prezidentlikka nomzodlar ekologik muammolar e’tiborsiz qolayotganidan bahs etishmoqda

“Adolat” partiyasi raisi, prezidentlikka nomzod Bahrom Abduhalimov O‘zbekistonda suv havzalarini ko‘paytirish o‘rniga ularni yo‘q qilishga harakat qilinayotganini tanqid qildi (“Jamiyat” gazetasi, 23 - sentabr).

“Ancha yillar avval poytaxtdagi O‘zbekiston davlat konservatoriyasi binosi o‘rnida katta ko‘l bo‘lardi, hozir undan asar yo‘q. Yaqinda Milliy bog‘dagi ko‘l ham tag-tugi bilan yo‘q qilinib, o‘rniga allaqanday “siti” qaqqaytirib qo‘yildi. G‘afur G‘ulom nomidagi istirohat bog‘i ham shunday rejalar changalida turibdi”, degan B. Abduhalimov.

Partiya raisi muhtasham “siti”larga ruju qo‘yilib, hayot va sog‘liq uchun foydali manbalardan voz kechilayotganini afsuslanarli holat deb atagan. B. Abduhalimov aholi Orol dengizining qurishi azobini haligacha tortayotganiga ham e’tibor qaratgan.

“Mamlakatimizda dengiz yo‘qligi bois O‘zbekiston yod tanqisligiga uchragan hududlar ro‘yxatida turadi, aholining katta qismi turli daraja va ko‘rinishlardagi endokrin kasalliklar bilan yuribdi”, degan u.

Prezidentlikka boshqa bir nomzod, O‘zbekiston ekologik partiyasi raisi Narzullo Oblomurodov esa “Oila va tabiat” gazetasining 23 - sentabr sonida daraxtkesarlarni keskin tanqid qilgan. U daraxtlarni himoya qilishning butunlay yangi mexanizmini joriy etish, jumladan, daraxt kesuvchilarga ham, bunga ruxsat berganlarga ham yanada og‘irroq jazo choralarini belgilashni lozimligini ta’kidlagan.

Ulug‘bek Hamdam: Zari va zo‘ri borning gapi inobatga olinyapti

Taniqli yozuvchi Ulug‘bek Hamdam jamiyatda o‘zgacharoq fikrga toqat yo‘qligi haqida gapirdi (www.kun.uz, 21 - sentabr).

“Hozir ko‘pchilik sohalarda faqat o‘zidan yuqoridagi rahbarga yoqsagina kichik xodim ishlashi mumkin bo‘lib qolgan. U o‘zgacharoq fikrlay boshlasa, katta rahbar darrov ishdan oladi yoki kelgusi yil shartnoma tuzmaydi. Bu nima degani? O‘rmonda yashamayotgan edik, chamasi... Fikrlar qarama-qarshiligi bo‘lmasa, jamiyatda qachon rivojlanish bo‘ladi?..” deya savol qo‘ygan adib.

U ayni paytda ziyolilar fikri e’tiborga olinmayotganini ham afsus bilan qayd etgan.

“Bugun ziyoli, ya’ni oydin inson so‘zining qadri yo‘q. Hatto rivojlanishning eng optimal yo‘lini aytsangiz ham hech kim sizga quloq solmaydi. “Og‘zi qiyshiq bo‘lsa ham boyning bolasi gapirsin”, deydi xalqimiz. Shafqatsiz haqiqat yashirin shu yerda. Bugun kimning qo‘lida zar va zo‘r bo‘lsa, ana o‘shalar gapiryapti, gaplari eshitilyapti. Lekin ular chinakam olim, ziyoli bo‘lmagani uchun bildirgan fikrlarini hayotning o‘zi inkor qilib tashlayapti. Mana, muammo qayerda!” degan Ulug‘bek Hamdam.

Yozuvchi islohotni ta’limdan boshlash kerakligi, ammo bu jabhada ham ahvol yaxshi emasligini ta’kidlagan.

“Jamiyatni qo‘yaturing, hatto o‘z sohasida uch-besh shogirdidan boshqa hech kim tanimaydigan kadrlar rektor, prorektor, dekan, kafedra mudiri bo‘lib ishlashadi. Ular faqat va faqat rahbariga xo‘p degani, xo‘p deyishi uchun o‘sha erda o‘tiribdi. Yo‘qsa, ta’limni rasvo qilayotganlarning aksari ana shunday “labbaychi”lardir! Ta’limni biznes makoniga aylantirib yuborishgan ular. Nega xolis tekshiruvlar yo‘q? Nega har bir sohani juda kuchli mutaxassislaridan iborat komissiyalar tekshirib haqiqiy bahosini bermaydi? Choralar ko‘rmaydi? Jamiyatni tozalamaydi?..” degan U. Hamdam.

Karra jadvalini bilmaydigan xonanda Munisa Rizayeva kuniga 8000 dollargacha topadi

Xonanda Munisa Rizayeva to‘ydagi chiqishlari orqali kuniga 8000 dollargacha ishlab topadi. Bu haqda xonandaning o‘zi muxlislari bilan “Instagram” orqali jonli muloqot davomida ma’lum qilgan. U kuniga 5 tadan 8 tagacha to‘y marosimiga boradi va har bir tashrifi uchun 1000 dollar oladi.

“Munisa Rizayeva o‘zbekistonlik o‘qituvchi va shifokorlar yillab ishlab ham topa olmaydigan pulni bir kunda topadi”, deya izoh berdi ijtimoiy tarmoq foydalanuvchilari.

35 yoshga to‘layotgan va hali oila qurmagan xonanda eng ko‘p muhokama etiladigan estrada yulduzlari sirasiga kiradi. Yaqindagi “Sevimli” telekanali orqali efirga uzatilgan “Kutilmaganda” ko‘rsatuvida Munisa Rizayevaning karra jadvalini bilmasligi ma’lum bo‘lgan edi. Xonanda “Yetti karra olti necha bo‘ladi?” degan savolga javob “O‘ttiz ikki” deb javob bergan edi.

Sentabr oyi boshida xonanda ijtimoiy tarmoqdagi sahifalari orqali “Tashkent City” majmuasidan sotib olgan qimmatbaho uyini ko‘z-ko‘z qildi. Avvalroq xonanda singlisiga 130 ming dollarli Porsche avtomobilini sovg‘a qilgani muhokamalarga sabab bo‘lgandi. Virtual olamda ancha faol bo‘lgan xonanda birgina Instagram tarmog‘ida 5 million obunachiga ega.

XS
SM
MD
LG