Пентагон: Россия Украинага бостириб киришда чегара олдига йиғилган кучларининг 95 фоизини ишга солди
Россия Украинага ҳужумда шу кунгача икки давлат чегарасида босқиндан аввал йиғилган ҳарбий куч ва воситаларнинг 95 фоизини ишга солган. Бу ҳақда АҚШ Мудофаа вазирлигининг юқори лавозимли мулозими 6 март куни бўлиб ўтган брифингда билдирган.
Унга кўра, ўтган кеча-кундузда Пентагон Россия қўшинларида сезиларли ҳаракатланишни сезган эмас. Киев яқинидаги 64 километрли колонна ҳали ҳам аввалги жойида турибди (бошқа кузатувчилар мазкур “уруш карвони”нинг лойга ботиб қолгани ёки бутун ёқилғисини сарфлаб бўлганини тахмин қилишмоқда).
Пентагон вакилига кўра, Россия ҳарбий-космик кучлари ҳали ҳам Украина ҳаво ҳудудини ўз назорати остига ололмаган. Украина жанговар учоқлари ва вертолётлари ҳали ҳам парвозларни амалга оширяпти, ҳавога қарши мудофаа тизими ишлаяпти. Айни пайтда ҳар икки томон ҳам жангларда учоқлари, вертолётлари ва ҳавога қарши мудофаа тизими воситаларида айрилганлар.
Айни пайтда мулозим АҚШ Мудофаа вазирлиги Россия томонидан Украинада кассетали бомбалардан фойдаланилганига оид ҳодисаларни тасдиқлай олмаслигини билдирган.
Рим папаси Россия билан Украина ўртасида музокараларни қайта бошлашга чақирди
Рим папаси Франциск якшанба куни Ватиканда диндорларга қилган мурожаати чоғида Россиянинг Украинага бостириб кириши масаласига тўхталган.
“Украинада қон ва кўз ёши дарё бўлиб оқмоқда. Бу шунчаки ҳарбий амалиёт эмас, бу ўлим, вайронагарчилик ва қашшоқлик келтирувчи урушдир”, деган у.
Папа Франциск ўз сўзида Россия билан Украина ўртасидаги музокараларни қайта тиклашга чақирган.
“Бу сўлғин ўлкада ҳар соатда гуманитар дастакка зарурат ортиб бормоқда. Уруш ақлсизликдир. Илтимос, тўхтанг”, деган у.
Аввалроқ Рус православ черкови раҳбари патриарх Кирилл якшанба кунги маърузасида Украинадаги уруш одамлар Донбассда гей-парадлар бўлишини истамагани учун кетаётганини билдирган эди.
Россияда урушга қарши норозилик акциясига чиққан қарийб 5 минг одам қўлга олинди
Россиянинг 69 та шаҳрида 6 март куни Россиянинг Украинага бостириб киришига қарши норозилик акциялари бўлиб ўтди. Мазкур акциялар чоғида, “ОВД-Инфо” лойиҳасининг сўнгги маълумотига кўра, камида 4949 киши (жумладан Москвада 2360 нафардан зиёд, Санкт-Петербургда эса қарийб 1250 нафар одам) қўлга олинган.
Шу тариқа Россиянинг энг янги тарихида норозилик намойишига чиққан одамларни тутиб кетиш бўйича рекорд янгиланди. Ҳатто Россия тарихида энг оммавий акция ҳисобланган 2021 йил 23 январидаги Навальнийнинг тутиб кетилиши муносабати билан ўтказилган норозилик чиқишида ҳам бу қадар кўп одам ушланмаган эди.
Россияда урушга қарши акциялар россиялик ҳарбийлар Украинага бостириб кирган илк кундан, яъни 24 февралдан бери ўтказиб келинмоқда. Расмийлар рухсат бермаганига қарамай, якшанба куни энг оммавий акция ўтказилган.
Netflix видеосервиси Россияда ўз ишини тўхтатди
Netflix видеосервиси Россиядаги фаолиятини тўхтатишга қарор қилгани ҳақида 6 март куни ширкат вакили маълум қилди.
Ўтган ҳафта Netflix Россиянинг Украинага бостириб киришига норозилик ўлароқ Россиядан контент сотиб олишни вақтинча тўхтатган эди.
“Вазиятни эътиборга олган ҳолда, биз Россияда хизмат кўрсатишни тўхтатишга қарор қилдик”, деган ширкат вакили.
Аввалроқ Netflix Россиядаги қонунчилик талабларига қарамай, ўз сервисига давлат телеканалларини қўшишни режаламаётганини билдирган эди.
Netflix дунёнинг турли мамлакатларида ишлаб чиқарилган минглаб фильм ва сериалларни обуна орқали фойдаланувчиларга тақдим этувчи энг йирик сервислардан бири бўлиб ҳисобланади.