Путин ўқиган университет номидан Украинадаги урушга оид иккита мурожаатнома тарқалди
Россия президенти Владимир Путин ўқиган Санкт-Петербург университетидан куни кеча иккита мурожаатнома тарқатилди. Улардан бирида Украинадаги урушга қарши мулоҳазалар баён этилган бўлса, иккинчисида Россиянинг Украинадаги “махсус амалиёти”га қўллов билдирилган.
Урушга қарши мурожаатнома остига талабалар, битирувчилар ва ўқитувчилардан иборат 2 мингдан зиёд одам имзо чеккан. Уларнинг исмлари хавфсизлик нуқтаи назаридан очиқланган эмас.
Мурожаатномада “ҳарбий тажовуз Улуғ Ватан урушининг аччиқ тажрибасини тотган Россия Федерацияси фуқаролари маданияти ва қадриятларига зид” экани урғуланган.
Бунинг ортидан Украинадаги жанговар ҳаракатларни дастакловчи иккинчи мурожаатнома тарқатилган. 700 дан зиёд киши имзолаган бу мурожаатномада Путинга мурожаат қилиниб, унга “самимий қўллов” билдирилган.
Coca-Cola ва PepsiCo Россиядаги фаолиятини қисман тўхтатади
АҚШнинг Coca-Cola ва PepsiCo ширкатлари россиялик ҳарбийларнинг Украинага бостириб кириши муносабати билан Россиядаги ўз фаолиятини қисман тўхтатиши ҳақида эълон қилишди.
PepsiCo баёнотида ширкат Россияда Pepsi, 7Up ва Mirinda ичимликларини сотишни тўхтатиши, шунингдек реклама кампанияларининг барчасини бекор қилиш айтилган. Айни пайтда ширкат сут маҳсулотлари ва болалар озиқлари етказиб беришни тўхтатмайди.
The Coca-Cola Company баёнотида эса ширкат воқеаларни кузатишда давом этиши ва келажакдаги қарорларни шундан келиб чиққан ҳолда қабул қилиши билдирилган.
“Қалбларимиз Украинадаги фожеали воқеаларнинг ақл бовар қилмас оқибатларини бошдан кечираётган кишилар билан бирга”, дейилган ширкат баёнотида.
Аввалроқ Novus ва Varus каби йирик супермаркетлар тармоқлари Россия ҳудудида ўз фаолиятини давом эттираётган Coca-Cola ширкатининг барча маҳсулотини савдодан олиб ташлашганини эълон қилишган эди. Novus баёнотида Coca-Cola, Rich, Schweppes, Sprite, Burn, BonAqua, Fanta ва бошқа маҳсулотларни сотиб олиш Россиянинг Украинага бостириб киришини қораламаётган ширкатни дастаклаш экани айтилган.
Зеленский АҚШ ва Британиянинг Россия нефти импортидан воз кечиш қарорини олқишлади
Украина президенти Владимир Зеленский 8 март куни ватандошларига янги мурожаат билан чиқди.
Ўз мурожаатида Зеленский АҚШ ва Буюк Британиянинг Россия нефти импортидан воз кечиш қарорини олқишлади, Украина учун Британия билан биргаликда ҳозирланаётган “Маршалл плани” ҳақида ва юзлаб тинч аҳоли вакилининг Сумидан Полтавага муваффақият билан эвакуация қилингани хусусида сўзлади.
“Урушни тугатиш ва музокаралар столига ўтириш керак, бироқ бу музокаралар эскирмаган амбицияларга таянган эмас, балки ҳалол, инсонлар манфаатини кўзловчи бўлиши лозим”, деган Зеленский.
МБ Россия банкларига фуқароларга нақд валюта сотишни тақиқлаб қўйди
Россия Марказий банки Ғарб мамлакатлари Украинага бостириб кирилиши муносабати билан Россияга қарши киритилган санкциялар шароитида нақд валюта билан муомаланинг янги тартиб-қоидаларини жорий қилди. Унга кўра, банкларга фуқароларга нақд валюта сотиш тақиқланади, валюта ҳисобрақамларидан 10 минг доллардан кўп пул ечиб олиш ман қилинади, қолган маблағлар эса пул ечиб олинаётган кундаги курс бўйича рублда берилади.
Россия банки томонидан “вақтинча чора” деб аталган бу тартиб-қоидалар, иддаоларга кўра, ярим йил – 9 мартдан 9 сентябргача амалда бўлади.
Марказий банк хабарномасида мижозларнинг валюта ҳисобрақамларидаги барча маблағлар сақланиши, бироқ ечиб олинадиган сумма 10 минг доллар билан чекланиши айтилган. Айни пайтда банк ҳисобрақамидаги пул бошқа валютада бўлган тақдирда ҳам мижозга барибир доллар берилиши урғуланган. “Вақтинча тартиб амалда бўлган пайтда банклар фуқароларга нақд валюта сотмайди”, дейилган хабарномада. Нақд валютани исталган пайтда ва исталган миқдорда рублга алмаштириб олиш мумкин.
АҚШ 8 март куни Россияга қарши янги санкциялар жорий этган, жумладан бу мамлакатдан нефть импорт қилиш тақиқланган. Шу куннинг ўзида бир қатор корпорациялар Россиядаги фаолиятини тўхтатишини эълон қилган.