Украинага ҳужум: Сбербанк доллар жўнатмаларини тўхтатди. Уруш хроникаси

март 07, 2022

Россиянинг Украинага босқинининг тўртинчи ҳафтаси бошланди.
16 март куни Мариуполь шаҳрида юзлаб одам яширинган Драма театри бомбаланди. Украина ҳукумати рус ҳарбийлари ўғирлаб кетган Мелитополь мэрини озодликка чиқаришга муваффақ бўлди.
Владимир Зеленский видеоалоқа орқали АҚШ Конгрессининг иккала палатаси олдида нутқ сўзлаб, уларни Украинага ҳарбий ёрдамни оширишда давом этишга чақирди ва тез орада катта миқдорда қурол-яроғ олишга эришди.
БМТ Халқаро суди Россиядан Украинадаги урушни дарҳол тўхтатишни талаб қилди. Россия 26 йил аъзо бўлиб келган Европа Кенгашидан четлатилди.
Путин Украинадаги “амалиёт” муваффақиятли олиб борилаётгани ва Россия жамиятини урушга қарши чиқаётган “миллат хоинлари”дан тозалаш кераклиги ҳақида гапирди.
Британия Мудофаа вазирлиги Россия жанглардаги талафотлари ўрнини тўлдириш учун янги кучларга тобора муҳтож бўлаётганини маълум қилди. Вазирликка кўра, эндиликда Россия қаттиқ ҳимояланаётган Украина армиясига қарши ҳужум амалиётларини олиб боришда қийналиши турган гап.
Украина ҳудудига бостириб кирган кундан бери Россиянинг етти мингдан зиёд ҳарбий хизматчиси ҳалок бўлди. Бу 20 йил давомида Ироқ ва Афғонистондаги жангларда ўлдирилган америкалик аскарларнинг умумий сонидан кўп, деб ёзади The New York Times АҚШ разведкаси маълумотларига таянган ҳолда.
Россия аҳолисининг қарийб тўртдан уч қисми Украина билан урушни қўллаб-қувватлайди ва бундан ғурур, қувонч, ҳурмат, ишонч ва умид каби ижобий ҳисларни туяди. Россиядаги мустақил социологлар гуруҳи томонидан февраль ойи охирлари ва мартнинг ўрталарида ўтказилган икки сўровнома натижалари шуни кўрсатмоқда.

Россия Мудофаа вазирлиги Украинага муддатли ҳарбий хизматга чақирилганлар йўлланганини тан олди

Россия Мудофаа вазирлиги кутилмаганда Украинага муддатли ҳарбий хизматга чақирилган аскарларни юборганини тан олди. Мазкур аскарлардан айримлари асир олинган.

Вазирлик вакили “афсуски, бундай аскарларнинг амалиётда қатнашаётганига оид бир неча факт аниқланган”ини билдирган.

Муддатли ҳарбий хизматга чақирилганларнинг яқинлари бу ҳақда урушнинг илк кунидан бери айтиб келаётгандилар, бироқ расмийлар, шу жумладан президент Путин буни қатъиян рад этиб келаётган эди.

АҚШ Конгресси қуйи палатаси Украинага миллиардлаб долларлик ёрдам пакетини маъқуллади

АҚШ Конгрессининг Намояндалар палатаси Украинага 13,6 миллиард долларлик ошиғич ёрдам режасини маъқуллади.

Бу маблағдан 6,5 миллиард доллари Украинага ҳарбий кўмак кўрсатиш учун Пентагонга, қолгани эса гуманитар ва иқтисодий ёрдамга ажратилган.

Мазкур қонун лойиҳаси яқин кунларда Сенатда муҳокамадан ўтиши кутилмоқда.

Amazon Россияга товар етказиб беришни тўхтатди

АҚШнинг энг йирик ширкатларидан бири бўлмиш Amazon Россия ва Беларусга товар йўллашни тўхтатган. Бу ҳақда ширкат ўз сайти орқали маълумот тарқатган.

Amazon Web Services булут сервиси ҳам Россия ва Беларусдан янги фойдаланувчиларни рўйхатга олишдан бош тортган. Бундан ташқари россиялик фойдаланувчилар бундан буён Amazon Prime Video стриминг хизматидан ҳам фойдалана олмайдилар.

Йел университети маълумотига кўра, Россия Украина ҳудудига бостириб кирган 24 февралдан бери 300 дан зиёд хорижий ширкат Россиядаги фаолиятини тўхтатиши ёки чеклашини эълон қилган. Улар орасида OBI халқаро дўконлар тармоғи, косметика маҳсулотларини ишлаб чиқарувчи Estee Lauder Companies ширкати, McDonald's, Starbucks, Coca-Cola, Zara, Pull&Bear, Massimo Dutti, Bershka, Marks & Spencer, Mango, H&M брендлари ва бошқалар бор.

ЕИ россиялик сенаторлар ва айрим мансабдорларга қарши қўшимча санкциялар жорий қилди

Россиянинг Украинага бостириб кириши муносабати билан Брюсселда 9 март куни ЕИнинг Россия ва Беларусга қарши қўшимча санкциялари маъқулланди.

ЕИ кенгаши хабарномасида санкциялар “россиялик олигархлар ва мансабдорлар ҳамда уларнинг оила аъзоларига қарши” киритилиши айтилган. Кейинроқ Еврокомиссия раҳбари Урсула фон дер Ляйен санкциялар 160 нафар (14 нафар тадбиркор ва Федерация кенгашининг 146 нафар аъзоси) россияликка қарши қаратилганини билдирган. Шу тариқа ЕИнинг қора рўйхатидаги россиялик жисмоний шахслар сони 862 нафарга, ташкилотлар сони эса 53 тага етган.

Санкция рўйхатига янги қўшилганлар орасида россиялик сенаторлардан ташқари VK (ВКонтакте) раҳбари Владимир Кириенко, “Аэрофлот” раҳбари Михаил Полубояринов, “Роснано” раҳбари Сергей Куликов, “Ростелеком” президенти Михаил Осеевский ва бошқа амалдорлар бор.

Давомини ўқинг