Россия Европа кенгаши Парламент ассамблеясига аъзоликда чиқарилиши кутилмоқда
Европа кенгаши Парламент ассамблеяси (ЕКПА) аъзолари сешанба куни Россияни ташкилотдан чиқарилишини бир овоздан ёқлаб чиқдилар. Бунга оид якуний қарор 17 март куни Европа кенгаши Вазирлар қўмитаси томонидан қабул қилинади.
Айни пайтда ЕКПА аъзолари Днестрбўйини Россия истило этган ҳудуд ўлароқ тан олишган ҳамда ҳаво ҳудуди мудофааси учун Украинага ҳарбий воситалар етказиб беришга чақиришган.
Байден Украинага 13,6 млрд долларлик ёрдам кўрсатишга оид қонунни имзолади
АҚШ президенти Жо Байден Украинага 13,6 миллиард доллар миқдорида ҳарбий, гуманитар ва иқтисодий ёрдам кўрсатиш тўғрисидаги қонунни имзолади.
Қўшма Штатлар президентига кўра, Оқ уй “тарихий ёрдам”га оид мазкур қонун лойиҳаси орқали Америка халқига “демократлар ва республикачилар чиндан ҳам бирикиши ва бирликда нимадир қила олиши мумкинлигини англатувчи кучли мужда” йўлламоқчи.
Байден Россиянинг Украинага тажовузи барча америкаликларни бирлаштирганини қўшимча қилган. “Конгрессдаги икки партия бир ёқадан бош чиқармоқда, умуман, бутун эрксевар дунё Россияга ошиғич ва қатъий жавоб бериш учун жипслашди”, деган АҚШ президенти.
Маблағлар Украина Қуролли кучларини дастаклашга йўналтирилади, бир қисми эса фуқароларга, жумладан, тахминан 1,5 миллион нафар қочқинга гуманитар ёрдам бериш учун сарфланиши белгиланган.
Зеленский Украинада Россия ташвиқотини ёйишни тақиқлашга оид қонунни имзолади
Украина президенти Владимир Зеленский Россия пропагандасини тарқатишни тақиқлаш тўғрисидаги қонунга қўл қўйди.
Қонун Россиянинг Украинага қарши Россия ҳарбий тажовузини оқлаш ёки рад этишни, мазкур тажовузга алоқадор шахсларни мақташ ёки оқлашни ман қилади.
Ҳужжатга мувофиқ, бундан буён Украинада россиялик ҳарбийлар ёки россияпараст бўлинмалар аъзоларини “кўнгиллилар” ва “мулойим одамлар” деб аташ, Украинада 2014 йилдан бери давом этиб келаётган жанговар ҳаракатларни эса “фуқаролар уруш” ёки “ички зиддият” ўлароқ талқин қилиш мумкин эмас.
БМТ қўмитаси Украинада 700 чоғли тинч аҳоли вакили ўлдирилгани ҳужжатлаштирилганини очиқлади
БМТнинг Инсон ҳуқуқлари бўйича қўмитаси Россиянинг Украина ҳудудига бостириб кириши натижасида жорий йилнинг 24 февралидан 14 мартигача тинч аҳоли вакилларидан 691 нафари ҳалок бўлганини ҳужжатлаштирди.
Қайд этилишича, қурбонларнинг 48 нафарини вояга етмаган болалар ташкил этади.
Россия босқини натижасида Украинада ҳарбий бўлмаганлардан 1 минг 143 киши яраланган, улардан 62 нафари болалардир. БМТ қўмитаси қурбонларга оид ҳақиқий рақамлар бундан анча юқори бўлиши мумкинлигини эҳтимолдан соқит қилган эмас.