Украинага ҳужум: Сбербанк доллар жўнатмаларини тўхтатди. Уруш хроникаси

март 07, 2022

Россиянинг Украинага босқинининг тўртинчи ҳафтаси бошланди.
16 март куни Мариуполь шаҳрида юзлаб одам яширинган Драма театри бомбаланди. Украина ҳукумати рус ҳарбийлари ўғирлаб кетган Мелитополь мэрини озодликка чиқаришга муваффақ бўлди.
Владимир Зеленский видеоалоқа орқали АҚШ Конгрессининг иккала палатаси олдида нутқ сўзлаб, уларни Украинага ҳарбий ёрдамни оширишда давом этишга чақирди ва тез орада катта миқдорда қурол-яроғ олишга эришди.
БМТ Халқаро суди Россиядан Украинадаги урушни дарҳол тўхтатишни талаб қилди. Россия 26 йил аъзо бўлиб келган Европа Кенгашидан четлатилди.
Путин Украинадаги “амалиёт” муваффақиятли олиб борилаётгани ва Россия жамиятини урушга қарши чиқаётган “миллат хоинлари”дан тозалаш кераклиги ҳақида гапирди.
Британия Мудофаа вазирлиги Россия жанглардаги талафотлари ўрнини тўлдириш учун янги кучларга тобора муҳтож бўлаётганини маълум қилди. Вазирликка кўра, эндиликда Россия қаттиқ ҳимояланаётган Украина армиясига қарши ҳужум амалиётларини олиб боришда қийналиши турган гап.
Украина ҳудудига бостириб кирган кундан бери Россиянинг етти мингдан зиёд ҳарбий хизматчиси ҳалок бўлди. Бу 20 йил давомида Ироқ ва Афғонистондаги жангларда ўлдирилган америкалик аскарларнинг умумий сонидан кўп, деб ёзади The New York Times АҚШ разведкаси маълумотларига таянган ҳолда.
Россия аҳолисининг қарийб тўртдан уч қисми Украина билан урушни қўллаб-қувватлайди ва бундан ғурур, қувонч, ҳурмат, ишонч ва умид каби ижобий ҳисларни туяди. Россиядаги мустақил социологлар гуруҳи томонидан февраль ойи охирлари ва мартнинг ўрталарида ўтказилган икки сўровнома натижалари шуни кўрсатмоқда.

| Мустақил социологлар: Россияликларнинг 71 фоизи Украина билан урушдан фахрланади

Россия аҳолисининг деярли тўртдан уч қисми Украина билан урушни қўллаб-қувватлайди.

Бунга россиялик мустақил социологлар гуруҳи томонидан феврал ойининг охиридан март ойининг ўрталарига қадар бир ярим ҳафталик интервал билан ўтказган иккита сўров маълумотлари далолат беради. Сўров натижалари Озодликнинг рус хизмати таҳририятига келиб тушди.

Тадқиқот муаллифларининг таъкидлашича, 35 ёшдан ошган руслар кўпроқ ғурур, ҳурмат ва умид туйғуларини билдиришган. 18 ёшгача бўлган респондентлар хафагарчилик ва умидсизликка кўпроқ мойил бўлган. Ҳар беш россияликдан иккитаси урушдан ташвиш билдирган ва бу ҳис-туйғулар кўпинча ёш россияликларда мавжудлиги қайд этилган. Ўрта ёшдаги россияликлар (25 дан 44 гача) ҳарбий операциядан кўпроқ хавотир ва қўрқув ҳиссини билдиришган. 55 ёшдан ошганларнинг ярмидан кўпи Украина билан урушни қўллаб-қувватлаган.

Айни пайтда, Россияда шакарга бўлган навбатлар кузатилмоқда.

| Қозонда урушга қарши чиққан фаоллар уйлари тинтув қилинмоқда

Эрталаб Қозон шаҳрида одамларни "оммавий тартибсизликларга чақириш, ёллаш ёки бошқа йўл билан жалб қилиш" иши билан боғлиқ фаоллар ва журналистларнинг уйларида тинтувлар ўтказилмоқда. Маълумки, хавфсизлик кучлари тинтувлари камида тўққизта манзил бўйича амалга оширилмоқда.

| Путин "миллий сотқинлар" ҳақида гапирди

Россия президенти Владимир Путин Ғарб турмуш тарзига амал қилганларни “миллий сотқинлар” деб атади. Россия раҳбарининг сўзларига кўра, “Ғарб” ана шундай шахсларга таяниб, "мамлакатга зарар етказишга ҳаракат қилмоқда".

Чет элда шунчаки пул сарфлайдиган россияликларга у эътирози йўқлигини айтди.

| Қозоғистон "Дождь" журналистини чиқариб юборди

1 март куни Россияда блокланган “Дождь” телеканалининг Қозоғистонга кетган офис менежери ва қозоқ меҳмонхонасида истиқомат қилган яна саккиз нафар россиялик мамлакатдан бадарға қилинди. Бу ҳақда “Дождь” кўрсатуви бошловчиси Анна Монгайт ўзининг телеграм-каналида маълум қилди. Қозоғистондан чиқариб юборилган ходимнинг исми тилга олинмаган.

""Номақбул" деб топилибди. Улар Россияга депортация қилинди. У учун бу фожеа, аммо ҳаёти учун хавфли эмас. Баъзилар учун бу фожиали оқибатларга айланиши мумкин", деб ёзади Монгайт.

Давомини ўқинг