| Москвадаги украиналикларни текшириш бошланди
ОВД-Инфо инсон ҳуқуқлари лойиҳаси Россия ҳуқуқ-тартибот идоралари Москвада яшовчи Украина ватандошларини текшираётгани ҳақида хабар берди.
Бир-бирини танимайдиган украиналиклар билан суҳбатлашган лойиҳа муаллифлари “Ички ишлар вазирлиги ва ФСБ юқоридан рухсат олгани”, “хавфсизлик кучларининг ходимлари эса украиналиклар билан нима қилиш кераклигини ўзлари тушунмаётгани” тўғрисида хулоса чиқарган.
Италия Украинага Мариуполдаги театрни қайта тиклаш ишида кўмаклашмоқчи
Италия Россия ҳарбийлари томонидан берилган ҳаво зарбалари оқибатида вайрон бўлган Мариуполь театрини қайта тиклаш ишида Украинага ёрдам беришга тайёр. Бу ҳақда Италия маданият вазири Дарио Франческини Твиттердаги ўз саҳифаси орқали маълум қилди.
“Вазирлар маҳкамаси бинони қисқа вақт ичида тиклаш учун Украинага ресурс ва маблағ ажратиш тўғрисидаги таклифимни маъқуллади. Барча мамлакатларнинг театрлари бутун инсониятга тегишлидир”, деб ёзди Франческини.
Германия канцлери россияликларни таҳқирлашдан тийилишга чақирди
Германия канцлери Олаф Шольц Украинадан келган қочқинларга ёрдам бераётган кўнгиллиларга ташаккур изҳор этди.
Айни пайтда Шольц Россиядан бўлганларни таҳқирлаш ва калтаклашга йўл қўйиб бўлмаслигини урғулади.
“Чунки бу уруш Путиннинг уруши. Бунинг учун фақат Путингина жавобгардир”, деб ёзди Германия канцлери Твиттердаги ўз саҳифасида.
Европа космик агентлиги “Роскосмос” билан ҳамкорликни тўхтатди
Европа космик агентлиги (ЕКА) Марс сайёраси юзаси тадқиқига оид ExoMars миссияси бўйича Россиянинг “Роскосмос” давлат корпорацияси билан ҳамкорликни тўхтатди.
Агентлик сайтида маълум қилинишича, ЕКА Европа Иттифоқи томонидан “Россияга қарши киритилган санкцияларини тўлалигича қўллаб-қувватлайди. Ташкилот бошқарув кенгаши Украинадаги уруш туфайли юзага келган вазиятни баҳолаб, бир овоздан ExoMars дастури доирасида бундан буён “Роскосмос” билан ҳамкорлик қилиш имконсиз, деган қарорга келган.