Украина расмийларига кўра, Киев суди россиялик диссидент журналист Аркадий Бабченкони ўлдириш фитнасига бош-қош бўлган Борис Германни қамоққа олган. Герман Бабченкони ўлдириш учун 40 минг доллар ваъда қилгани айтилмоқда.
Украина хавфсизлик хизмати (СБУ) Бабченконинг ўлимини саҳналаштириш йўли билан уни ўлдириш режасини барбод қилганини билдирди.
СБУ Бабченконинг ўлимини 29 май куни саҳналаштирди. Шу тариқа у Россия хуфия хизматлари ташкил қилгани айтилаётган қотилликнинг олдини олди.
“Қотиллик рўй бергани” ҳақида хабар тарқалгандан сўнг Бабченко Герман ўзини ўлдириш учун пул тўлаганини эълон қилди.
Бош прокурор Юрий Луценко Украинанинг “Интер” телеканалига берган интервьюсида Герман Бабченкони ўлдириш учун Алексей Цимбалюкни ёллаганини айтди. Хабарларга кўра, Цимбалюк Украина шарқидаги жангларда қатнашган.
Бош прокурор олдинроқ Бабченкони ўлдирмоқчи бўлган киши терговчилар билан ҳамкорлик қила бошлагани ва унга жиноят ишида гувоҳ сифатида муносабатда бўлинишини айтган эди.
− Герман Цимбалюк билан боғланиб, унинг олдига Бабченкони ўлдириш вазифасини қўйган, − деди Луценко “Интер”га. – Шундан сўнг Цимбалюк СБУга мурожаат қилиб, қотиллик ташкилотчиси Германни фош қилиш учун саҳналаштириш ўйинида қатнашишга рози бўлди. СБУнинг бир қанча ходимларни амалиётни ўтказишга ёрдам берди.
Луценконинг айтишича, Герман Цимбалюк билан бир неча марта учрашган ва бир сафар унга журналистни ўлдириш учун умумий тўловнинг ярми – 20 минг доллар берган ва колган пулни Бабченко ўлдирилгандан сўнг беришни ваъда қилган.
Луценко, Бабченко билан боғлиқ амалиётдан кимларнинг хабари бўлган, деган саволга, “Украина ҳуқуқ-тартибот идораларида кўпи билан 10 киши бундан хабардор эди”, деб жавоб берди.
Герман Бабченкони ўлдириш фикри бўлмагании айтиб, Украина контрразведка хизмати билан ҳамкорлик қилмоқда.
Адвокати Евгений Солодко Герман “Шмайссер” қурол-яроқ ишлаб чиқарувчи Украина-Германия корхонаси директори эканини айтди. Унинг фикрича, “Шмайссер” Украинада давлатга қарашли бўлмаган ягона қурол-яроғ ишлаб чиқарувчи корхона ҳисобланади. Германнинг ўзи эса Донбасс минтақасида Россияга орқа қилувчи бўлгинчиларга қарши курашда Украина ҳарбий кучларини жон-дили билан қўллаб-қувватлаган. Германнинг қурол-яроғ ишлаб чиқарувчи фирмаси Украина Мудофаа вазирлиги билан узоқ ва қалин бизнес муносабатларига эга.
