АҚШнинг БМТдаги доимий вакили Никки Хейли 17 сентябрь куни БМТ Хавфсизлик кенгаши Шимолий Корея ядровий дастурини музлатишга қаратилган барча чора-тадбирларни ишга солиб бўлганини айтди.
Хейли, шундан келиб чиққан ҳолда, Оқ Уй Шимолий Корея ядровий дастури муаммосини бартараф этиш мақсадида Пентагонга мурожаат қилиши мумкинлигини таъкидлади.
Хейлига кўра, Вашингтон “барча бошқа имкониятларни” ишга солиш, жумладан, “ҳарбий куч қўллаш вариантлари”ни ҳам ўрганмоқда.
Аввалроқ АҚШ президентининг миллий хавфсизлик бўйича маслаҳатчиси Герберт Макмастер Пхеньян АҚШга таҳдид солиш даражасига яқинлашиб қолганини "Fox News Sunday" телеканалига берган интервьюсида айтган эди.
Макмастерга кўра, бу таҳдиднинг олдини олиш учун Пхеньянга қарши санкцияларни кучайтириш, дипломатия ва керак бўлса “ҳарбий куч” вариантларини қўллаш лозим.
Япония ва АҚШга қарши ядровий ракеталар синовларини ўтказаётган Шимолий Корея раҳбари Ким Чен Ин ўз давлати Қўшма Штатлар каби ядровий қудратга эришиш учун ҳаракат қилаётганини билдирган.