Словакия бош вазири Роберт Фицо журналист Ян Куцьякнинг ўлдирилиши ортидан бошланган сиёсий инқироз оқибатида истеъфога чиқишини маълум қилди.
“Бугун мен президентига истеъфога чиқиш тўғрисидаги аризамни топширдим. Президент истеъфони қабул қилса, эртагаёқ ўрнимни бўшатишга тайёрман”, деди Фицо.
27 ёшли журналист Ян Куцьяк 25 февраль куни ўз уйида дугонаси Мартина Куснирова билан бирга номаълум шахслар томонидан ўлдириб кетилган эди. Словакия сиёсатчиларининг итальян мафияси билан алоқаларини ўрганаётган журналистнинг ўлдирилиши мамлакатда 1989 йилдан бери биринчи марта энг йирик аксилҳукумат намойишларига сабаб бўлди.
Еврпа Иттифоқининг хавфсизлик бўйича комиссари Юлиан Кинг 14 март куни Европа парламентида бу борада қилган чиқишида:
- Бу ёш журналистнинг ўлдирилиши Европа устуни бўлган ғоялар: қадриятларимиз, сўз эркинлиги ҳуқуқи, мураккаб саволларни бериш ҳуқуқи, адолатга бўлган ҳуқуққа нисбатан қилинган ҳужумдир,-деб айтди.
Бундан аввал 1 март куни Словакия бош вазири ёрдамчиси Мария Трошкова, Хавфсизлик кенгаши котиби Вилиам Ясань ва Маданият вазири Марек Мадьярич истеъфо берган. Икки кун аввал ички ишлар вазири Роберт Калинак ҳам ўз лавозимини тарк этди.