Россия суди қўлга олинган 24 нафар украин денгизчисидан 12 нафарини икки ой қамоқда сақлашга ҳукм қилди. Қолган 12 нафар денгизчига нисбатан суд жараёни 28 ноябрда ўтказилиши белгиланган.
27 ноябрда Симферол суди томонидан чиқарилган мазкур ҳукм Кремль халқаро ҳамжамиятнинг денгизчиларни ва кемаларни ҳибсдан озод қилиш чақириғини эътиборга олмаганини англатади.
Бу воқеани шарҳлар экан, Владимир Путиннинг матбуот котиби Дмитрий Песков матбуотга:
-Вазият ҳеч қандай тинчликпарварлар аралашувини талаб қилмайди. Иккки кун олдин бизнинг чегарачиларимиз Россия Федерацияси чегарасини бузганларни тинчитиб қўйганининг ўзи тинчликпарварлик бўлди,-деб билдирди.
25 ноябрь куни Украинанинг учта ҳарбий кемаси Керчь бўғозида 12 миллик ҳудуддан чиқиб кетиши билан Россия ҳарбийлари томонидан ўққа тутилган эди. 12 миллик ҳудудни Қрим ярим оролини аннексия қилганидан буён Россия ўзиники дея ҳисоблайди.
Мазкур воқеа ортидан Украинада 28 ноябрдан бошлаб 30 кун муддатга ҳарбий ҳолат жорий этилди. Халқаро ҳамжамият Россиядан вазиятни кескинлаштирмасликни ва қўлга олинган денгизчилар ҳамда кемаларни озод қилишни талаб этмоқда.