Линклар

Шошилинч хабар
17 июн 2021, Тошкент вақти: 06:48

Ўзбекистон хабарлари

Бензин нархи 1 февралдан оширилиши кутилмоқда

1 литр Аи-80 бензини 110 сўмгача қимматлаши мумкин.

Жорий йилнинг 1 февралидан нефт маҳсулотлари учун акциз солиғи оширилади. “2021 йил учун Ўзбекистон Республикаси давлат бюджети тўғрисида”ги қонун қабул қилингани муносабати билан айрим қонунларга ўзгартишлар кирититлган.

Мазкур ўзгартишларга мувофиқ 1 февралдан акциз солиғи 1 тонна Аи-80 бензинига 240 минг сўм, 1 тонна Аи-92, Аи-93 ва Аи-95 бензига 275 минг сўм, 1 тонна дизел ёнилғисига 240 минг сўм қилиб белгиланган.

2021 йилнинг 1 январида Аи-80 бензинига 200 минг сўм, Аи-92, Аи-93 ва Аи-95 бензига 250 минг сўм, дизел ёнилғисига 200 минг сўм акциз солиғи белгиланган эди. Шундан келиб чиқилса, нефть маҳсулотлари акцизи 25-40 минг сўмга оширилган.

Маҳаллий матбуотнинг ҳисоб-китобича, акциз солиқлари оширилиши ортидан 1 литр Аи-80 бензини 110 сўмгача, бензиннинг қолган турлари 1-2 фоизга қимматлаши мумкин.

Кун янгиликлари

ОТМларга ҳужжат қабул қилиш жараёни 3 кундан сўнг бошланади

Ўтган йили аксар ОТМларда қабул имтиҳонлари карантин талабларидан келиб чиққан ҳолда очиқ майдонларда ўтказилганди

Ўзбекистондаги олий таълим муассасаларида янги ўқув йили учун онлайн тарзда ҳужжат қабул қилиш 20 июндан бошланади. Бу ҳақда президент Шавкат Мирзиёев раислигида 16 июнь куни олий таълим тизимидаги устувор вазифаларга бағишланиб ўтказилган видеоселектор йиғилишида айтилган.

Олий ва ўрта махсус таълим вазирлиги маълумотига кўра, икки ҳафта муддатда қўшимча давлат гранти асосида (имтиёзли) қабул параметрлари тасдиқланади.

Видеоселектор йиғилишида бу йил ОТМларга қабул сони ўтган йилга нисбатан 13 фоизга оширилиб, 181 минг нафарга етказилиши айтилган. Қайд этилишича, 2021/2022 ўқув йили учун 1,5 миллион нафардан зиёд абитуриент ОТМга кириш учун ҳужжат топшириши кутиляпти. Шу боис президент ушбу жараённи карантин ва хавфсизлик талабларини таъминлаган ҳолда, юқори савияда ўтказиш бўйича топшириқлар берган.

Таъкидланишича, бу йил илк маротаба 9 та нодавлат ОТМда 22 йўналиш бўйича талабаларни ўқитиш учун 500 та давлат гранти ажратилади.

Йиғилишда бугунги кунда талабалар учун қўшимча 149 мингта турар жойга эҳтиёж мавжуд урғуланиб, ётоқхоналарни тадбиркорлар билан хусусий шериклик асосида ташкил этиш учун олий таълим муассасаси ҳудудидан ёки унга яқин жойдан аукцион орқали ер ажратилиши белгиланган.

Президент аҳолининг жисмоний тайёргарлик даражасини баҳолашга буйруқ берди

Президентнинг “Аҳолининг жисмоний тайёргарлик даражасини баҳолаш тизимини жорий этишнинг ташкилий чора-тадбирлари тўғрисида”ги қарорига асосан 2021 йил 1 августдан бошлаб аҳолининг жисмоний тайёргарлик даражасини баҳолаш тизими жорий этилади.

Қарорда таъкидланишича, мана шу мақсадда ҳар йили бир марта 11 та ёш тоифаси бўйича спорт синовлари ўтказилади. Мусобақаларда иштирок этганларга эгаллаган ўрни ва даражасига қараб спорт разрядлари ҳамда унвонлари берилади.

Бундан ташқари, спорт синовларининг махсус талабларини муваффақиятли бажарганларга бир йил давомида сафарбарлик чақируви резервидаги ҳарбий хизмат тўловининг 50 фоизини тўлаш ва муддатли ҳарбий хизматга юборишда устунлик берилади.

Мусобақаларда I – ўринни эгаллаганлар “Темурбеклар мактаби”га синовларсиз кира олади ва кўп тармоқли тиббиёт муассасасида бепул кўрикдан ўтказилади.

Жомбойдаги мактаб таъмирига болалар жалб этилишига президент кўрсатмаси сабаб бўлгани расман айтилди

Иллюстратив сурат.

Самарқанд вилояти Халқ таълими бошқармаси ахборот хизмати Жомбой туманидаги 28-мактаб ўқувчиларининг таъмирлаш ишларига жалб қилинганлиги тўғрисида ижтимоий тармоқларда тарқалган суратларга изоҳ берди.

Бошқарманинг билдиришича, ўқувчилар ота-оналарининг рухсати билан таъмирлаш ишларига жалб қилинган. Бундан ташқари Самарқанд вилояти Халқ таълими бошқармаси ахборот хизмати мазкур тадбир президентнинг топшириқларини бажариш асосида амалга оширилганини ҳам иддао қилган.

Қуйида Самарқанд вилояти Халқ таълими бошқармаси ахборот хизмати расмий билдирувини тўлиғича эътиборингизга ҳавола этамиз.

“Президентимизнинг 2021 йил 15-16 апрель кунлари Самарқанд вилоятига ташрифи давомида вилоят фаоллари билан ўтказилган учрашувда ёшларни мактаб давриданоқ касб-ҳунарга ўқитиш, деҳқончилик сирларини ўргатиш бўйича “Самарқанд тажрибаси”ни амалга ошириш бўйича топшириқлар берган эди. Ушбу топшириқлар ижросини таъминлаш мақсадида вилоятдаги айрим мактабларда ўқувчиларни полиз экинлари етиштириш, боғдорчилик, шунингдек, бошқа касб-ҳунарларга ўргатиш тажриба-синовлари амалга оширилмоқда.

Дарҳақиқат, бундай тадбирлар ўқувчиларни меҳнатга ўргатиш, меҳнати орқасидан даромад топиш, оиласига моддий манфаат келтириш ҳамда тадбиркорлик кўникмаларига эга бўлишида имконият яратади.

Айни кунларда интернет ва ижтимоий тармоқларда Жомбой тумани 28-умумтаълим мактаби ўқувчиларининг мактабдаги енгил таъмирлаш ишларига жалб қилинганлиги акс этган расмлар турли муҳокамаларга сабаб бўлмоқда.

Самарқанд вилояти Халқ таълими бошқармаси ва Жомбой туман Халқ таълими бўлими раҳбар-ходимлари томонидан мазкур ҳолат бўйича ўрганиш ишлари олиб борилди. Ўрганиш давомида ҳақиқатан ҳам Жомбой тумани 28-умумтаълим мактабида ёлланма ишчи ходимлар томонидан енгил таъмирлаш ишлари олиб борилмоқда. Суратдаги ўқувчилар, яъни 6 нафар 7-9 синф ўғил болалари мактабда олиб борилаётган таъмирлаш ишларига ёрдам бериш учун ота-оналарининг розилиги билан келганлиги маълум бўлди.
Ўрганиш давомида ўқувчиларнинг ота-оналари ҳам фарзандини ўз розилиги билан мактабдаги таъмирлаш ишларига ёрдам бериш ва таътил даврида ҳунар ўрганиш учун юборганини тасдиқлашди.

Суратдаги 5 нафар қиз ўқувчилар эса мактабнинг 11-а ва 11-в синф ўқувчилари бўлиб, улар билан суҳбатлашилганда, қизлар якуний давлат имтиҳонларининг баҳоларини билиш мақсадида келганлиги аниқланди.

Шунингдек, мазкур мактаб раҳбарияти ҳамда ўқитувчилари, синф раҳбарлари билан суҳбатлашиш жараёнида улар ўқувчиларни мажбурий меҳнатга жалб қилиш қонунга зид эканлигидан хабардорлигини билдиришди ва ўқувчиларни мактабдаги таъмирлаш ишларига чақирмаганликларини маълум қилишди.

Айни пайтга қадар олиб борилган ўрганишлар хулосасига кўра, Жомбой тумани 28-умумтаълим мактаби ўқувчилари ўзи ва ота-оналарининг ихтиёрига зид равишда таъмирлаш ишларига жалб қилинмаган.

Бугунги кунда ушбу ҳолат юзасидан ўрганиш ишлари давом этмоқда”.

Ҳар бир тухумга 50 сўмдан, парранда гўшти килосига минг сўмдан субсидия ажратилади

Иллюстратив сурат.

2021 йил 1 июндан ҚҚС тўловчиси бўлган паррандачилик хўжаликларига реализация қилинган тухумнинг ҳар бир донаси учун 50 сўмдан ва парранда гўштининг ҳар бир килоси учун 1 000 сўмдан субсидия ажратилади.

Адлия вазирлигининг билдиришича, бу борадаги “Паррандачиликни ривожлантириш ва тармоқ озуқа базасини мустаҳкамлашга қаратилган қўшимча чора-тадбирлар тўғрисида”ги президент қарори 14 июнда қабул қилинди.

Қарорда таъкидланишича, 2021 йил 1 июлдан 2024 йил 1 июлга қадар асосий фаолият тури паррандачилик бўлган тадбиркорлар учун фойда солиғи, мол-мулк солиғи, ер солиғи ва сув ресурсларидан фойдаланганлик учун солиқ ставкаси 50 фоиз миқдорида қўлланилади.

Бундан ташқари паррандачилик лойиҳаларини молиялаштириш учун 85 миллион доллар миқдоридаги маблағ “Микрокредитбанк” АТБга йўналтирилади.

2022 йил 1 июлга қадар тухум, парранда гўшти ва маҳсулотларини экспорт қилувчи ҳамда соя донини импорт қилувчи тадбиркорлар (уларнинг ваколатли вакиллари)га автомобиль, темир йўл ва ҳаво транспортида ташиш харажатларини 50 фоизигача миқдорда компенсация қилишга субсидиялар тақдим этилади

Ўзбекистонда президентлик сайловини ўтказиш учун 300 миллиард сўм ажратилади

Иллюстратив сурат.

Жорий йилнинг октябрь ойида бўлиб ўтадиган Ўзбекистон президенти сайловига тайёргарлик кўриш ва уни ўтказиш билан боғлиқ харажатларга 300 миллиард сўм ажратилади. Бу ҳақда Марказий сайлов комиссияси - МСКнинг 16 июнда ўтган йиғилишида маълум қилинди.

Жумладан, 14 та округ сайлов комиссиясининг ҳар бирига 56 миллион 991 минг сўмдан, шунингдек, қарийб 10 800 та участка сайлов комиссиясининг ҳар бирига 11 миллион 813 минг сўмдан маблағ ажратиш режалаштирилган.

Округ ва участка сайлов комиссиялари учун ажратилаётган ушбу маблағларнинг 80 фоиздан кўпроғи мазкур комиссиялар аъзоларининг иш ҳақи, компенсация ҳамда ягона ижтимоий тўловлар учун сарфланади.

Бундан ташқари сайлов жараёнидаги умумпартиявий тадбирлар ва сиёсий партия томонидан кўрсатилган номзодларнинг сайловолди ташвиқоти учун 15 миллиард 486 миллион сўм ажратилади. Таъкидланишича, бу маблағ бўлинганида ҳар бир номзодга 3 миллиард 97 миллион сўмдан тўғри келмоқда.

“Avto 60 oy”га алданганларга маблағларини қайтариш бошланди

Суд 29 март куни “Avto 60 oy” МЧЖ раҳбари Жамшид Баҳодировни 8 йил қамоқ жазосига ҳукм қилган эди.

“Avto 60 oy”га алданганларга маблағларини қайтариш учун ҳар бир вилоятда ишчи гуруҳи ташкил этилди. Бу ҳақда Мажбурий ижро бюроси маълум қилди.

“Avto 60 oy”дан жабрланганларга маблағларини қайтариш билан Ўзбекистон Бош прокуратураси ҳузуридаги Мажбурий ижро бюроси ходимларидан иборат таркибда ташкил этилган гуруҳлар шуғулланади.

“Ҳозирда ишчи гуруҳларга 2144 нафар фуқаро мурожаат қилиб, ўзларига тегишли ҳисоб рақамлар хақидаги маълумотларни тақдим қилишган”,-дейилади хабарда.

Мажбурий ижро бюроси “Avto 60 oy”дан пулларини қайтариб ололмаган фуқароларни шахсини тасдиқловчи ҳужжатлар (фуқаролик паспорти) ҳамда пластик карточкалари билан Мажбурий ижро бюросининг ҳудудий бошқармаларига душанба-жума кунлари соат 09-00 дан 18-00 га қадар мурожаат қилишга чақирди.

Вилоятларда ташкил қилинган ишчи гуруҳларининг рўйхати, манзили ва телефон рақамлари билан мана бу ерда танишиш мумкин.

Жиноят ишлари бўйича Чилонзор туман суди 29 март куни “Avto 60 oy” МЧЖ раҳбари Жамшид Баҳодировни 8 йил қамоқ жазосига ҳукм қилган эди. 25 ёшли Жамшид Баҳодиров билан биргаликда МЧЖга алоқадор яна 4 киши судланди.

19 мингга яқин мижоздан 57 миллиард сўмдан ортиқ пул йиғиб¸ фақат 100 нафар мижозгагина машина бергани ортидан жиноят иши фигуранти бўлган “Avto 60 oy” МЧЖси раҳбари Жамшид Баҳодировга нисбатан суд жараёни вилоятларда ўтказилган эди. Ўшанда иш юзасидан гувоҳларнинг кўплиги сабабли мана шундай қарорга келингани хабар қилинган.

Коронавирус қурбонларининг умумий сони 710 нафардан ошди

Ўзбекистонда коронавирус чалингани ортидан вафот этганлар сони 711 нафарга етди. Бу ҳақда Соғлиқни сақлаш вазирлиги маълумот тарқатди.

Жорий йилнинг 15 июнь ҳолатига кўра, Ўзбекистонда коронавирус инфекцияси қайд этилганлар сони, 104 минг 463 нафарга етган. Вазирлик қайдича, кеча мамлакатнинг истисносиз барча ҳудудларида 350 нафар киши коронавирусга чалинган.

Айни пайтда ўтган кеча-кундузда Қорақалпоғистон Республикаси, Бухоро, Жиззах, Қашқадарё, Навоий, Наманган, Самарқанд, Сурхондарё, Фарғона, Хоразм, Тошкент вилоятлари ҳамда Тошкент шаҳрида 342 нафар бемор тузалиб, соғайганлар сони 100 минг 328 нафарга етган.

Касалхоналарда муолажаси давом этаётган беморлар сони эса шу кунда 3 минг 424 нафарни ташкил этмоқда.

Ўзбекистонлик футболчилар Жаҳон чемпионатига чиқиш имкониятини қўлдан бой беришди

Ўзбекистон терма жамоаси бош мураббийи Вадим Абрамов Саудия Арабистони термаси билан ўйиндан сўнг футбол мухлисларидан узр сўради

Ўзбекистоннинг футбол бўйича миллий терма жамоаси 15 июнь куни 2022 йилги Жаҳон чемпионати саралаш босқичининг иккинчи даврасида Саудия Арабистони терма жамоасига қарши майдонга тушди.

Учрашув 3:0 ҳисобида ўзбекистонлик футболчилар мағлубияти билан якунланди. Шу тариқа Ўзбекистон терма жамоаси кейинги йилда бўлиб ўтадиган Жаҳон чемпионати саралаш босқичининг учинчи даврасига чиқиш ҳамда Қатарда ўтказилажак ЖЧда иштирок этиш имкониятини қўлдан бой беришди.

Ўйиндан сўнг Ўзбекистон терма жамоаси бош мураббийи Вадим Абрамов футбол мухлисларининг ишончини оқлай олмагани учун улардан узр сўради.

Иштихонда туман ҳокимлиги ходими “My5” камерасининг хотира картасини чайнаб ташлагани иддао қилинди

Иштихон тумани ҳокимлиги ахборот хизмати ходимининг “My5” телеканали камераси хотира картасини чайнаб ташлагани айтилмоқда (Kun.uz фотоси)

Самарқанд вилоятининг Иштихон туманида ҳокимлик ахборот хизмати ходими, маҳаллий матбуотда чиққан хабарларга кўра, “My 5” телеканалига тегишли камеранинг хотира картасини чайнаб, йўқ қилган.

Қайд этилишича, 14 июнь куни “My5” телеканали вакиллари Иштихон деҳқон бозорида юз берган ёнғин ҳақида материал тайёрлаш учун воқеа жойига борган.

Тележурналистлар у ерда Иштихон тумани ҳокимлиги вакили Илҳом Бобоев қаршилигига учраган. Суратга олиш жараёнида ахборот хизмати ходимининг камера картасини суғуриб олаётгани ҳам тушиб қолган.

“My5” мухбири Kun.uz нашрига ижодий гуруҳ ёнғин содир бўлган ҳудудга борган пайтда маҳсулотлари ёниб кул бўлган тадбиркорлар билан суҳбатлашаётган туман ҳокимини учратгани ва ҳолат бўйича қисқача изоҳ ҳам олганини маълум қилган.

“Бироқ ҳокимлик ахборот хизмати айнан ёнғин жойидан тасвирлар олишимизга қаршилик кўрсатиб, муаммо ҳал бўлганини айта бошлади. Биз ҳеч қандай муаммони эмас, бўлган воқеани ёритмоқчимиз, дейишимизга қарамасдан қаршилик кўрсатишда давом этди. Кейин эса тўсатдан камерамиздан хотира картасини олиб қўйди. Шерикларим унинг картани оғзига солиб чайнаб юборганини айтмоқда. Ахборот хизмати ходими картани чайнаб йўқ қилдими, ютиб юбордими, нима қилди - аниқ билмайман. Аммо унда жуда муҳим ишларимиз бор эди. Тезда вазиятга ИИБ ходимлари аралашиб, Илҳом Бобоевнинг бизга қаршилигини тўхтатди, аммо барибир хотира картасиз қолдик", дея иқтибос келтирган нашр “My5” мухбири сўзларидан.

Самарқанд вилояти ҳокимлиги мазкур ҳолат ўрганилаётганини билдирган.

“Иштихон туманида ҳокимлик матбуот хизмати ва журналист билан боғлиқ ҳолат вилоят ҳокимлиги ахборот хизмати ҳамда АОКА ҳудудий бошқармаси томонидан иккала томон иштирокида тўлиқ ўрганиб чиқилиши белгиланди”, дейилган ҳокимлик хабарномасида.

Ўзбекистон ва Россия бош вазирлари кейинги ҳафтада Москвада учрашишади

Ўзбекистон бош вазири Абдулла Арипов

Ўзбекистон бош вазири Абдулла Арипов россиялик ҳамкасби Михаил Мишустин билан 22 июнь куни Москвада учрашади. Бу ҳақда Россиянинг Ўзбекистондаги элчиси Олег Мальгинов маълум қилган.

Дипломатга кўра, кейинги сешанба куни Россия пойтахтида ҳукумат раҳбарлари даражасида икки томонлама ҳамкорлик бўйича қўшма комиссиянинг иккинчи мажлиси бўлиб ўтади.

О. Мальгинов мажлисдаги кўриб чиқиладиган асосий мавзуларидан бири икки мамлакат президентларининг бўлажак музокараларига ҳар томонлама тайёргарлик кўриш масаласи бўлишини ҳам қўшимча қилган.

Шавкат Мирзиёевнинг Россияга расмий сафари 2020 йилга режаланганди. Бироқ коронавирус пандемияси туфайли сафар муддати ўзгарган. Кейинроқ Ўзбекистон президентининг матбуот котиби Шерзод Асадов Ш. Мирзиёевнинг Россияга сафари 2021 йилда бўлиб ўтишини маълум қилган.

Ўзбекистон ва Россия бош вазирлари бошчилигидаги қўшма комиссиянинг илк мажлиси 2019 йилнинг май ойида Урганчда ўтказилган. Ўшанда Россия ҳукуматини Дмитрий Медведев бошчилигидаги делегация тамсил этганди. Иккинчи мажлис 2020 йили бўлиб ўтиши керак эди, бироқ пандемия важидан тадбир муддати бир неча бор ўзгарган.

Ўзбекистонда БААнинг давлат бошқарувидаги тажрибасини жорий этиш бўйича “йўл харитаси” қабул қилинади

Ўзбекистон президенти Ш. Мирзиёев 15 июнь куни БААнинг ҳукумат делегациясини қабул қилди (president.uz фотоси)

Ўзбекистон президенти Шавкат Мирзиёев 15 июнь куни Бирлашган Араб Амирликлари Ҳукумат ишлари бўйича вазири Муҳаммад бин Абдуллоҳ ал-Гаргавий бошчилигидаги делегацияни қабул қилди.

Президент матбуот хизмати маълумотига кўра, қабул чоғида кўп қиррали Ўзбекистон-БАА муносабатларини янада кенгайтириш ва амалий ҳамкорликни ривожлантириш масалалари муҳокама қилинган.

Учрашувда муқобил энергетикани ривожлантириш ва энергетика объектларини модернизация қилиш, замонавий агросаноат кластерларини ташкил этиш, тадбиркорликка оид ташаббусларни қўллаб-қувватлаш учун инвестиция компанияси фаолиятини йўлга қўйиш бўйича лойиҳалар ҳамда қатор муҳим ижтимоий дастурлар изчил амалга оширилаётгани алоҳида қайд этилган.

Учрашув якунида БААнинг давлат бошқаруви соҳасидаги, узоқ муддатли янгиланишлар дастурини шакллантириш ва инновацион тараққиёт йўлига ўтиш борасидаги илғор тажрибасини кенг жорий қилишга қаратилган қўшма “йўл харитаси”ни қабул қилиш юзасидан келишувга эришилган.

Жиззахда Суриядаги террорчиларга қўшилмоқчи бўлганлар қўлга олингани иддао қилинди

Иллюстратив сурат.

Жиззах вилоятининг Ғаллаорол туманида Сурия Араб Республикасида террорчилик ҳаракатларини амалга ошираётган “Тавҳид ва жиҳод катибаси” таркибига қўшилишни режалаштираётган гуруҳ қўлга олингани ҳақида вилоят Ички ишлар бошқармаси 15 июнда маълум қилди.

Расман билдирилишича, гуруҳ 12 июнь куни ўтказилган тезкор тадбир давомида “ашёвий далиллар билан қўлга олинди”. Аммо хабарда гуруҳ неча кишидан иборат экани, ашёвий далиллар нималардан иборат экани ҳеч нарса айтилмаган.

“Мазкур фуқаролар хорижда бўлиши давомида Интернет тармоғи орқали террорчилик тузилмалари ёлловчиларининг таъсирига тушиб, яшаш манзилларига қайтиб келгандан сўнг ушбу террорчилик ташкилотининг бузғунчи ғояларини аҳоли орасида фаол тарғиб қилиб келганлиги аниқланган”,-дейилади хабарда.

Ўтган йили Тошкентда камида 21 киши “Тавҳид ва жиҳод катибаси”га, Тошкент вилоятида 25 киши “Жиҳодчилар” гуруҳига, Сурхондарё вилояти Бойсун туманида ҳам бир неча киши “Жиҳодчилар” гуруҳига алоқадорликда гумонланиб қўлга олингани хабар қилинганди.

Фарғона шаҳрида тўрт эгизак туғилди

Иллюстратив сурат.

Фарғона шаҳрининг “Хўжамағиз” маҳалласида яшовчи Ғанижон Одилов ва Мунаввархон Одилова оиласида тўрт эгизак— уч ўғил ва бир қиз туғилди.

“Дарё” нашрининг ўз мухбирига таяниб хабар беришича, чақалоқларга Тўлқинбой, Абдукарим, Абдуҳаким ва Зилола деб исм қўйилган. Одиловлар оиласининг бундан ташқари 2016 ва 2018 йилда туғилган яна икки қиз фарзанди бор.

"Шифокорларнинг таъкидлашича, чақалоқлар соғлом, улар зудлик билан жонлантириш бўлимига ўтказилган ва керакли муолажалар қилинган”,-дейилади хабарда.

Ўзбекистонда бундан аввал уч ва тўрт эгизларга Шавкат Мирзиёев ҳокимиятга келгач Шавкат, Миромон, Мирзиё деб исм қўйиш урфга айланган эди.

Шу пайтгача бир неча шундай оилага автомашина совға қилинган. Бу ҳолат маҳаллий матбуотда танқид қилинди ҳам.

Масалан, “Даракчи”нинг 2019 йил 16 май сонида эълон қилинган мақола муаллифи бу ҳолатни “ошкора тамагирлик” деб атаган.

Ўзбекистон электр энергиясини сотишни хусусий ширкатларга топширмоқчи

Иллюстратив сурат.

Энергетика вазирлиги 2021-2025 йилларга мўлжалланган уч босқичдан иборат улгуржи рақобатбардош электр энергияси бозорига ўтиш кетма-кетлигини ишлаб чиқди.

Расман билдирилишича, биринчи босқичда электр энергияси корхоналарини эркинлаштириш ва электр энергиясини сотиш истагида бўлган хусусий корхоналар томонидан лицензия олиш кўзда тутилган.

Энергетика вазирлиги бундай йўл билан маҳсулот сифатини яхшилаш ва нархларнинг пасайишига эришилишини иддао қилмоқда.

Иккинчи босқичида электр энергиясини тақсимлаш тизимининг оператори яратилади ва истеъмолчиларга электр энергиясини сотиш функциялари таъминотчиларга босқичма-босқич ўтказилади.

“Таъкидлаш жоизки, ушбу босқичда истеъмолчилар электр энергиясини онлайн савдо платформаси ёки исталган таъминотчи орқали сотиб олишлари мумкин бўлади. Таъминотчилар ўртасида рақобат муҳити шаклланиши орқали электр энергиясининг таъминоти сифати ошишига эришилади”,-дейилади хабарда.

Учинчи босқичда “Кун ичи (соатбай) савдолар” йўлга қўйилади. Онлайн савдо платформасидаги эркин шартномалар ҳажмларига кўра, электр энергиясини режа асосида соатбай ишлаб чиқариш ва истеъмол қилишнинг ортиқча ёки етишмаётган ҳажмларини сотиш ва сотиб олиш операциялари амалга оширилади.

“Энергетика соҳасидаги давлат муносабатларининг кескин камайиши билан бозор муносабатларига ўтиш электр энергетикасини бошқариш тизимини такомиллаштиришга хизмат қилади.

Натижада мамлакатнинг энергетика хавфсизлиги, республика энергетика таъминотининг ишончлилиги ва барқарорлиги таъминланади. Асосийси, аҳолининг турмуш сифатини яхшилаш”,-дейилади Энергетика вазирлиги расмий билдирувида.

Президент Ўзбекистон фуқаролигини олишни енгиллаштириш тўғрисидаги қонунни имзолади

Эндиликда Ўзбекистонда туғилган, аммо фуқаролиги бўлмаганларга фуқаролик олиш учун мамлакатда узлуксиз 5 йил яшаш талаб этилмайди. Адлия вазирлигининг билдиришича, президент 14 июнь куни мазкур меъёр қайд этилган “Ўзбекистон Республикасининг фуқаролиги тўғрисида”ги қонунни имзолади.

Қонунга асосан, 2005 йил 1 январга қадар Ўзбекистонда доимий яшаш жойи бўйича рўйхатга олинган ҳамда муқаддам чет давлат фуқаролигида бўлмаган шахс хоҳиш билдирган тақдирда, Ўзбекистон фуқароси деб тан олинади.

Шунингдек, ота-онасидан бири (ёлғиз отаси ёки онаси) Ўзбекистон фуқароси деб тан олинган, чет давлат фуқаролигини қабул қилмаган ва Ўзбекистонда яшаб келаётган бола хоҳиш билдирган тақдирда, Ўзбекистон фуқароси деб тан олинади.

Қонунга кўра, эндиликда Ўзбекистон фуқароси деб тан олиш учун фактларни тасдиқловчи ҳужжатлар мавжуд бўлмаган тақдирда, ариза берувчи ушбу фактларни суд тартибида аниқлаши мумкин.

Бундан ташқари, Ўзбекистон ҳудудида туғилган ва яшаб келаётган фуқаролиги бўлмаган шахслар Ўзбекистон фуқаролигини олиш мақсадида илтимоснома билан мурожаат қилган кунга қадар 5 йил давомида (фуқаролиги бўлмаган шахсга яшаш гувоҳномаси олинган кундан эътиборан) узлуксиз яшаш шарти бекор қилиниши белгиланди.

Ушбу қонун расмий эълон қилинган кундан эътиборан кучга кирди.

Ўзбекистонда коронавирусга чалинганлар сони 104 мингдан ошди

Янги касалланиш ҳолатларининг 149 нафари Тошкент шаҳрида.

Ўзбекистонда 14 июнь куни коронавирусга чалинган беморлардан яна бири вафот этди. Соғлиқни сақлаш вазирлигининг билдиришича, бу билан коронавирусдан ўлганлар сони расман 709 кишига етди.

Ўтган бир сутка мобайнида Ўзбекистонда яна 300 кишида коронавирус аниқланди. Янги касалланиш ҳолатларининг 149 нафари Тошкент шаҳрида, 50 нафари Сурхондарё вилоятида, 24 нафари Қашқадарё вилоятида аниқланган.

Бир неча ойдан бери коронавирусга янги чалинганлар кунлик сони бўйича Тошкент шаҳридан кейин бораётган Тошкент вилояти ва Самарқанд вилоятида янги ҳолатлар кескин камайганини кузатиш мумкин. Соғлиқни сақлаш вазирлигининг билдиришича, 14 июнь куни Тошкент вилоятида 7 кишида, Самарқанд вилоятида 5 кишида коронавирус анқиланди.

Шу кунгача коронавирусга чалинганлар сони жами 104113 кишини ташкил қилди.

Касалликдан соғайганлар жами 99986 нафарга етди ва соғайиш кўрсаткичи 96 фоизни ташкил этмоқда. ️Айни пайтда тиббиёт муассасаларида 3418 нафар бемор даволанмоқда.

Қизиқчи Ортиқ Султонов Самарқанд шаҳар маданият бўлимига раҳбар этиб тайинланди

Ортиқ Султонов

Ўзбекистонда таниқли бўлган қизиқчилардан бири, “Ҳандалак” гуруҳи аъзоси Ортиқ Султонов Самарқанд шаҳар маданият бўлимига бошлиқ вазифасини бажарувчи этиб тайинланган. Бу ҳақда Маданият вазирлиги матбуот хизмати маълумот тарқатди.

Қайд этилишича, санъатшунослик фанлари номзоди бўлган О. Султонов дастлабки меҳнат фаолиятини Самарқанд мусиқали драма театри актёри сифатида бошлаган.

Кейинчалик у Самарқанд вилоят телерадиокомпанияси, Ўзбекистон миллий телерадиокомпанияси “Ёшлар” телеканали, “Ўзбекистон” телеканалларида режиссёр бўлиб ишлаган.

Тайинловга қадар қизиқчи “Кулги” хусусий театри бадиий раҳбари бўлган.

Ортиқ Султонов аввалроқ Озодлик билан суҳбатда Украина президенти этиб сайланган ўз ҳамкасби Володимир Зеленский ҳақида ҳавас билан сўзлаган, бироқ ўзининг давлат мулозими бўлиш орзуси йўқлигини, келажакда докторлик диссертацияси билан шуғулланиш ниятида эканини билдирганди.

“Аёллар дафтари”га кирганларга “гўзаллик салони”га айлантирилган контейнерлар берилмоқда

Бухорода турар жойга мослаштирилган контейнерлар (иллюстратив сурат)

Ўзбекистонда контейнерлардан мобил гўзаллик салонлари ишлаб чиқариш йўлга қўйилди.

Podrobno.uz нашри хабарига кўра, куни кеча ана шундай контейнерлардан 50 таси чекка қишлоқларга юборилган.

Қайд этилишича, зарур ускуна ва мебель билан жиҳозланган салонларнинг ҳар бирида “Аёллар дафтари”га киритилган ва махсус касбий таълим олган етти нафаргача аёл ишлаши мумкин.

Лойиҳа Ўзбекистон касаба уюшмалари федерацияси томонидан амалга оширилмоқда.

Аввалроқ Озодлик Бухоро вилояти ҳокимлигининг “Темир дафтар”га киритилган ночор оилалар учун 1000 дона бизнес учун контейнерлар ясаб, имтиёзли кредит асосида тарқатилишини билдиргани ҳақида хабар қилган.

Ургутдаги газ қуйиш шохобчасида рўй берган портлашда икки одам нобуд бўлди

Ургутдаги газ қуйиш шохобчасида портлаган юк автомобили (Самарқанд вилояти ИИБ фотоси)

Самарқанд вилоятининг Ургут тумани “Кенагас” МФЙ ҳудудида жойлашган маиший газ баллонларини пропан гази билан тўлдириш шохобчасида 14 июнь куни соат 17:40 ларда “ЗИЛ-130” русумли юк автомобилидан суюлтирилган газни тўкиш вақтида пропан сиғимининг ёрилиши содир бўлган. Бу ҳақда Фавқулодда вазиятлар вазирлиги маълумот тарқатди.

Қайд этилишича, портлаш оқибатида юк автомобиль ҳайдовчиси ва “Bek Diamond Gaz” МЧЖ газ тўлдириш шохобчаси ишчиси воқеа жойда вафот этган.

“Ҳозирда ҳодиса сабаби ҳамда келтирилган моддий зарар миқдори аниқланмоқда”, дейилган ФВВ хабарномасида ҳолат юзасидан дастлабки терговолди суриштирув ишлари олиб борилаётгани қўшимча қилинган.

Самарқанд вилояти ИИБ эса портлаш сабабларини аниқлаш юзасидан текширув ишлари олиб борилаётганини билдирган.

Бир ҳафтадан буён кўтарилиб бораётган АҚШ долларининг расмий курси яна 10600 сўмдан ошди

Ўзбекистон Марказий банки 2021 йил 15 июнидан хорижий валюталарнинг сўмга нисбатан янги қийматини белгилади.

МБ маълумотига кўра, сешанбадан АҚШ долларининг расмий курси аввалги курсга нисбатан 11 сўм 96 тийинга кўтарилиб, 10 минг 609 сўмни ташкил этади. Доллар курси 9 июндан бери кетма-кет кўтарилиб келаётганди. Ўзбекистонда долларнинг расмий курси май ойида ҳам 10 минг 600 сўмдан ошган.

Айни пайтда 15 майдан евронинг расмий курси олдинги курсга нисбатан 27 сўм 90 тийинга пасайиб, 12 минг 851 сўм 74 тийинга тенг бўлади (14 июнь ҳолатига кўра, евро курси 1 сўм 73 тийинга арзонлаб, 12 минг 879 сўм 64 тийинга тенг бўлган эди).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

Қўшработда қабристонга ўт кетди, ҳокимлик аланга қарийб 2 соатда ўчирилганини билдирди

Ижтимоий тармоқларда Самарқанд вилоятининг Қўшработ туманидаги қабристонлардан бирида ёнғин содир бўлганига оид видео тарқалди. Бунга изоҳ берган туман ҳокимлиги ҳодиса 12 июнь куни рўй берганини билдирди.

Қайд этилишича, “Бозоржўй” маҳалласи ҳудудида жойлашган “Кўктўнли ота” қабристонида ёнғин чиққанига оид маълумот туман Фавқулодда вазиятлар бўлимига шанба куни соат 11:05 да келиб тушган.

Ёнғинни ўчириш учун бўлим томонидан икки экипаж жалб қилинган ва соат 12:54 да ёнғин тўлиқ бартараф этилган.

Ҳодиса чоғида бир қанча қабрга шикаст етгани айтилмоқда.

Ёз жазирамасида қабристон ҳудудида юз берган ёнғин сабаблари ҳозирча маълум эмас.

Ҳокимлик маълумотига кўра, айни пайтда ёнғин ҳодисаси юзасидан терговга қадар суриштирув ишлари олиб борилмоқда.

Ўзбекистон – Тожикистон: Автобус ва темир йўл қатнови тикланади. Ҳамкорликда ГЭС қурилади

Президент Шавкат Мирзиёев расмий ташриф билан 10-11 июнь кунлари Тожикистонда бўлган эди.

Ўзбекистон президенти Шавкат Мирзиёевнинг Тожикистонга ташрифи доирасида икки мамлакат ўртасида транспорт соҳасидаги ҳамкорлик тўғрисидаги шартномалар имзоланди. Маҳаллий матбуотнинг ёзишича, бу ҳақда президент матбуот котиби Шерзод Асадов 14 июнда ўтган матбуот анжуманида билдирди.

Асадовга кўра, икки мамлакат транспорт вазирлари Ўзбекистон ҳудуди орқали юклар транзити тўғрисида битимни имзолаган. Бундан ташқари темир йўл, автомобиль ва ҳаво транспортида юк ва йўловчи ташишни кўпайтиришга ҳам келишилган.

Мазкур шартнома доирасида автобус ва темир йўл орқали йўловчи ташишни қайта тиклаш режалаштирилмоқда.

Бундан ташқари ташриф давомида Тожикистоннинг Зарафшон дарёсида ҳамкорликда иккита ГЭС қуриш лойиҳасини амалга ошириш мақсадида қўшма ширкат ташкил этиш тўғрисидаги шартнома ҳам имзоланди.

Президент Шавкат Мирзиёев расмий ташриф билан 10-11 июнь кунлари Тожикистонда бўлган эди.

Ўзбекистонликлар бу йил ҳам Ҳажга бора олмайди

Дин ишлари бўйича қўмитанинг 14 июнда билдиришича, Саудия Арабистони ҳукумати коронавирус пандемияси оқибатида жаҳонда кузатилаётган мураккаб эпидемиологик вазият ортидан жорий йилги Ҳаж зиёратига ҳам хориж фуқаролари киритилмаслиги тўғрисида қарор қабул қилган.

“Саудия ҳукуматининг ушбу қарори Жаҳон соғлиқни сақлаш ташкилоти, Саудия уламолари Кенгаши, Ислом ҳамкорлик ташкилоти, ислом мамлакатларидаги кўплаб фатво ҳайъатлари ва бошқа илмий марказлар томонидан маъқулланган”,-дейилади расмий билдирувда.

Шу муносабат билан Ҳаж сафарига боришни режалаштирган ўзбекистонликларнинг навбатлари кейинги мавсум учун сақланиб қолинади.

13 июнь куни Озодлик Саудия Арабистони жорий йилда коронавирусга қарши эмланган 60 минг фуқаросига Ҳаж амалини бажаришга рухсат бериши ва Саудия фуқароси бўлмаган шахслар Ҳажга киритилмаслиги тўғрисида қарор қабул қилгани ҳақида хабар берганди.

Ярим-яланғоч раққосаларга пул қистирган Сирдарё туман ҳокими ўринбосари ишдан кетди

Иллюстратив сурат.

Сирдарё тумани ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Нурали Мирзаев 2021 йил 14 июнь куни ўз аризасига биноан ишдан бўшади.

Бу ҳақда “Sirdaryo Xabarlari” нашри Сирдарё вилояти ҳокимлиги ахборот хизматига таянган ҳолда хабар тарқатди.

Бундан ташқари Сирдарё тумани ободонлаштириш бошқармаси бошлиғи Нозим Муротов ҳам 14 июнь куни ишдан бўшаш тўғрисида ариза ёзган.

Аввалроқ ижтимоий тармоқларда Сирдарё тумани ҳокимлиги масъуллари ва давлат ташкилотлари раҳбарларининг ресторанда ярим-яланғоч раққосаларга пул қистираётгани акс этган видеолавҳа тарқалган эди.

Сирдарё вилоят ҳокимлиги ахборот хизмати бу видеога муносабат билдирар экан, воқеа ўтган йилнинг октябрь ойида “Евро Азия” ресторанида рўй берганини маълум қилган.

Ярим-яланғоч раққосаларга пул қистирганлар орасида ҳоким ўринбосари ва ободонлаштириш бошқармаси бошлиғидан ташқари яна туман Экология ва атроф-муҳитни муҳофаза қилиш соҳасидаги назорат бўйича Сирдарё тумани инспекцияси бош мутахассис-давлат инспектори, “Сувоқова” давлат унитар корхонаси раҳбари ҳамда Сирдарё тумани йўллардан фойдаланиш унитар корхонаси раҳбарлари бўлган.

Ҳокимлик муносабатида расмийларга тегишли жазо чоралари кўрилгани билдирилган, аммо айнан қандай чоралар кўрилгани аниқ айтилмаган эди.

Иштихон деҳқон бозорида ёнғин юз берди

Ўзбекистондаги ёнғинлардан бири.

Самарқанд вилояти Иштихон тумани деҳқон бозорида 14 июнга ўтар кечаси ёнғин юз бергани ҳақида Фавқулодда вазиятлар вазирлиги маълум қилди.

Расман билдирилишича, деҳқон бозорининг озиқ-овқат ва қандолат маҳсулотлари сотиладиган очиқ савдо растаси ёнган.

Ҳодисани бартараф қилиш учун воқеа жойига 6 та ёнғин-қутқарув экипажи жалб этилган. Ёнғин соат 00:32да ўраб олиниб, 01:35да тўлиқ ўчирилган. Ўт ўчирувчилар савдо расталарининг 450 квадрат метрини ёнғиндан сақлаб қолган.

“Ёнғин оқибатида жабрланган ва ҳалок бўлганлар йўқ. Ҳозирда ёнғин сабаблари ҳамда келтирилган моддий зарар миқдори аниқланмоқда”, дейилади хабарда.

Ўзбекистонда бозорларда тез-тез ёнғин юз беради. Масалан, май ойида Хоразм вилояти Гурлан туманидаги деҳқон бозорида, йил бошида эса Фарғона вилоятининг Ўзбекистон тумани марказида жойлашган бозорда ёнғин чиққанди.

Давомини ўқинг

XS
SM
MD
LG