Линклар

Шошилинч хабар
25 сентябр 2021, Тошкент вақти: 05:28

Ўзбекистон хабарлари

Тошкент бош инфекционисти Гулжаҳон Йўлдошева билан яна 4 киши судланди

Иллюстратив сурат.

Тошкент вилояти юқумли касалликлар шифохонаси собиқ бош шифокори Гулжаҳон Йўлдошева ва у билан бирга судланган яна тўрт кишига ҳукм ўқилди. Суд тўрт ой давом этди.

Маҳаллий нашрларнинг хабар беришича, суд ҳукми билан Гулжаҳон Йўлдошева 4 йил, шифохона реаниматологи Жаҳонгир Зиёдуллаев 3,5 йил, инфекционист шифокор Шейхназар Рўзметов 3 йил озодликдан чекланди.Шифохона ходимларидан яна икик нафари 2 йилллик аҳлоқ тузатиш ишларига ҳукм қилинди.

Гулжаҳон Йўлдошева Жиноят кодексининг 167-моддаси 2-қисми “а, б, в, г” бандлари (растрата йўли билан талон-торож қилиш), 207-моддаси 3-қисми “а” банди (мансабга совуққонлик билан қараш), 209-моддаси 2-қисми “а” банди (мансаб сохтакорлиги)да назарда тутилган жиноятларни содир этган деб топилди.

Тошкент вилояти юқумли касалликлар шифохонаси бош шифокори Гулжаҳон Йўлдошева 2020 йилнинг 9 сентябрь куни қамоққа олинган эди. Ўшанда бош шифокор бюджетдан ажратилган 250,8 миллион сўмни талон-торож қилинганликда ва коронавирусга чалинган оғир аҳволдаги беморни соғайгани ҳақида сохта маълумот бериб, унинг ўлимига сабаб бўлганликда айбланганди.

Гулжаҳон Йўлдошева 2020 йилнинг август ойида маҳаллий матбуотга шифохона учун ускуналар ҳамда тиббий ходимлар учун мукофот пуллари берилмаётгани ҳақида билдирган эди. Мазкур баёнотидан кўп ўтмай у қамоққа олинган.

Кун янгиликлари

Ички ишлар ходимлари Россияда ишлаб чиқарилган электрошокерлар билан таъминланади

Ўзбекистондаги деярли барча ички ишлар органлари ходимлари жанговар электрошок ускуналари билан таъминланди. Мазкур жанговар жиҳозлар оммавий тартибсизлик ва осойишталикни сақлашга қаратилган тадбирларда қўлланади.

Бу ҳақда Ўзбекистон Республикаси Ички ишлар вазирлиги матбуот хизмати хабар бермоқда.

Вазирликка кўра, пост-патрул бўлинмаларини электрошок, электр дубинка ва электр тўппончалар билан таъминлаш Ўзбекистон Республикасининг “Ички ишлар органлари ҳақида”ги Қонуни талабларидан келиб чиққан.

“Ходимларнинг электрошок ускуналаридан фойдаланиш тартиби Вазирлик томонидан белгиланган йўриқномага мувофиқ амалга оширилади. Ходимлар бу борада махсус тайёргарликдан ўтганларидан сўнг бериладиган сертификатларга эга бўлиши лозим” дейилади вазирлик хабарида.

Россия Федерациясининг «Март групп» ширкати томонидан ишлаб чиқарилган мазкур жанговар аслаҳалар гумондорни ҳибсга олиш, ходимга нисбатан тажовузлар ҳамда оммавий бузғунчиликларни батратаф этиш чоралари сифатида ҳам қўлланилиши мумкин.

Ўзбекистон ички ишлар идоралари қийноқ ва бошқа ноинсоний муомала билан боғлиқ кўплаб ҳодисалар учун масъул кўрилади. Ўтган ҳафта Озодлик суриштируви ортидан Самарқанд вилояти Каттақўрғон туман солиқ инспекцияси ходимининг ўлимида гумон қилинган туман ИИБ сининг тўрт ходими устидан жиноят иши қайта судга юборилганди.

Мирзиёев собиқ бош прокурор билан ўртасида кечган зиддият ҳақида гапирди

Собиқ бош прокурор Рашитжон Қодиров 2018 йилда хизмат ва ҳокимият ваколатларини суистеъмол қилиш ҳамда катта миқдорда пора олишда айбланиб, 10 йил қамоқ жазосига маҳкум этилган.

24 октябрдаги сайловларда иккинчи муддатга сайланиши кутилаётган амалдаги президент Шавкат Мирзиёев самарқандлик сайловчилар билан учрашув чоғида ўзининг яқин ўтмишда собиқ Бош прокурор Рашитжон Қодиров билан низолашганига шаъма қилди.

Бу ҳақда Times.uz интернет нашри хабар қилмоқда.

Нашрга кўра, Мирзиёев Самарқанд вилоятида ҳокимлик қилган даврида туман прокуратураларидан бирининг муҳташам биносини болалар уйига тортиб олиб бергани ортидан ўша пайтдаги Бош прокурор билан зиддиятга борган. Аммо номзод иддаосида прокуратура раҳбарининг номини тилга олмаган.

“Самарқанддаги меҳрибонлик уйларини мендан яхши биладиган одам йўқ. Биринчи марта келганимда у жойларга кириб бўлмасди. Бир туман прокуратураси чиройли бинода ўтирган эди. Қаровсиз меҳрибонлик уйини ўша бинога кўчиртирдим.

Ўшанда биринчи марта республиканинг собиқ прокурори билан “борди-келди” гап бўлди, "сан-ман"га бордик. “Мен шу вилоятда ҳокимман, ўзим учун қилмадим, болалар учун, халқ учун қилдим” деган сўзларини келтиради нашр.

Шавкат Мирзиёев 2001 йил сентябридан 2003 йил декабрига қадар Самарқанд вилояти ҳокими лавозимида ишлаган. Ҳозирда қамоқда бўлган Рашитжон Қодиров эса 2000 йил февралидан 2015 йилга қадар Бош прокурор лавозимида ишлаган. Қодиров 2018 йил февралида хизмат ва ҳокимият ваколатларини суистеъмол қилиш ҳамда катта миқдорда пора олишда гумонланиб қўлга олинган. У 10 йил қамоқ жазоси ва энг кам иш ҳақининг 500 баравари миқдорда жаримага маҳкум этилган.

Мирзиёев Самарқандда Каримов қабрини зиёрат қилди ва янги нефть кони топилганини айтди

Ўзбекистон Президенти матбуот хизмати

24 сентябрь куни Самарқандга етиб борган Шавкат Мирзиёев сайловолди тадбирларини биринчи президент Ислом Каримов қабрини зиёрат қилишдан бошлаган. Бу ҳақда Президент матбуот хизмати хабар бермоқда.

"Биринчи Президентимиз қабрига гул қўйилиб, Қуръон тиловат қилинди", дейилади расмий хабарда.

Маҳаллий нашрларнинг Мирзиёевдан иқтибос келтиришича, сайловчилар билан учрашув чоғида амалдаги давлат раҳбари Самарқанд шаҳрини кенгайтириш, туризмни ривожлантириш, янги кўп қаватли уйлар ва йўллар қуриш режалари ҳақида гапирган.

Мирзиёев шунингдек, Регистондаги Шердор ва Тиллакори мадрасаларини қурдирган ўрта асрлардаги Самарқанд ҳокими Баҳодир Ялангтўш ҳамда Ўзбекистоннинг собиқ коммунист раҳбари Шароф Рашидов номларини абадийлаштиришни таклиф қилган.

ЎзЛиДеПдан президентликка номзод бўлган Мирзиёев "Самарқандга яқин жойда нефть топилгани"ни ҳам айтган, аммо тафсилотларни очиқламаган.

"Яна кўплаб ер ости хазиналаримиз бор. Аммо уларнинг ҳаммаси ҳақида ҳозир айтмоқчи эмасман. Чунки бу лойиҳалар бўйича пухта режа ишлаб чиқишимиз керак. Лекин афсуски бизда етакчи геологлар йўқ, геология соҳасини ўлдирганмиз» — деб айтган Шавкат Мирзиёев.

24 октябрдаги сайловларда иккинчи муддатга сайланиши кутилаётган 64 яшар Шавкат Мирзиёев бундан аввал Қорақалпоғистон Республикаси ва Хоразм вилоятига сафар қилган эди.

МСК қарорига мувофиқ, Ўзбекистонда шу йил 20 сентябридан президентликка номзодларнинг сайловолди ташвиқоти бошланган.

Коронавирусга қарши тўлиқ эмланганлар сони 4 миллион нафардан ошди

Ўзбекистонда коронавирусга қарши тўлиқ эмланган фуқаролар сони, жорий йилнинг 23 сентябрь ҳолатига кўра, 4 миллион 7 минг 732 нафарга етган. Бу ҳақда Соғлиқни сақлаш вазирлиги матбуот хизмати маълумот тарқатди.

Вазирлик коронавирусга қарши эмлаш тадбирлари бошланган апрель ойидан шу кунгача мамлакатда 19 миллион 197 минг 82 доза вакцинадан фойдаланилганини билдирган.

ССВ қайдича, кеча мамлакат бўйлаб 560 киши коронавирусга чалинган, шу тариқа хасталик юқтириб олганларнинг умумий сони 171 минг 80 нафарга етган.

Пайшанба куни Қашқадарё, Сирдарё ва Хоразм вилоятларидан ташқари ҳудудларда 668 киши тузалиб, соғайганларнинг умумий сони 165 минг 282 нафарга етган.

ССВ ўтган кеча-кундузда коронавирусга чалинган беморлардан яна 5 нафари вафот этиб, коронавирус қурбонлари сони 1 минг 212 нафарга етганини қўшимча қилган.

Вазирликнинг маълум қилишича, 23 сентябрь куни 134 нафар кишида пневмония аниқланган, 5 июлдан бери эса 26 минг 711 киши пневмонияга чалинган. Булардан 24 минг 402 нафари соғайиб чиққан, 221 нафари эса вафот этган.

Андижонда ободонлаштириш ишчиларини мажбуран ишлатган ҳоким муовини жаримага тортилди

Иллюстратив сурат

Aндижон вилоятининг Бўстон туманида ободонлаштириш ишчиларини ўз уйида мажбуран ишлатган туман ҳокими муовини жазога тортилди. Бу ҳақда Меҳнат вазирлигининг матбуот хизмати маълумот тарқатди.

Вазирлик қайдича, Aндижон вилояти Бандлик бош бошқармаси Давлат меҳнат инспекцияси ижтимоий тармоқларда бу борада тарқаган хабар юзасидан текширув ўтказган.

Ўрганиш чоғида Бўстон тумани ҳокими ўринбосари томонидан Ободонлаштириш бошқармаси ишчилари соя донини қуритиш ва тозалаш ишларига жалб этилгани аниқланган.

Бунинг ортидан мулозимга Маъмурий жавобгарлик тўғрисидаги кодекснинг 51-моддаси 1-қисмига асосан базавий ҳисоблаш миқдорининг 50 баробари (13,5 миллион сўм – таҳр.) миқдорида маъмурий жарима қўлланилган.

Аввалроқ Озодлик уйида ободонлаштириш корхонаси ишчиларини ишлатган Қўрғонтепа (Андижон вилояти) тумани прокурори лавозимидан озод килингани ҳақида хабар қилган.

МСК қатор халқаро ташкилот ва давлатлардан бўлган кузатувчиларни рўйхатдан ўтказди

Марказий сайлов комиссиясининг 23 сентябрь куни бўлиб ўтган галдаги мажлисида президент сайловида халқаро ташкилотлардан қатнашадиган кузатувчиларни аккредитация қилишга оид масала кўриб чиқилди. Бу ҳақда маълумот тарқатган МСК матбуот хизмати шу кунга қадар 6 нафар хорижий мамлакатдан ва ЕХҲТ ДИИҲБдан 40 нафар халқаро кузатувчи рўйхатдан ўтказилганига эътибор қаратган.

Қайд этилишича, пайшанба кунги мажлисда президент сайловида халқаро ташкилотлардан қатнашадиган кузатувчиларни аккредитация қилиш тўғрисидаги МСК қарорига мувофиқ Мустақил давлатлар ҳамдўстлиги (7), Мустақил давлатлар ҳамдўстлиги Парламентлараро Ассамблеяси (25), Иқтисодий ҳамкорлик ташкилоти (1), шунингдек Озарбайжон Республикаси (2), Беларусь Республикаси (2), Қозоғистон Республикаси (3), Латвия (1), Миср (5), Россия Федерацияси (5), Сингапур (3), Туркия (5), Украина (1), Чехия Республикаси (1), Япония (2) ва Қувайт (3) давлатларидан 66 нафар хорижий кузатувчи рўйхатдан ўтказилган.

Мажлисда МСК аъзолари оммавий ахборот воситалари вакилларини аккредитациядан ўтказиш масаласи ҳам кўриб чиққанлар. Уларга сўнгги пайтда Марказий сайлов комиссиясига яна 53 та ОАВ томонидан мурожаат келиб тушгани билдирилган.

Мажлисда Оммавий ахборот воситалари вакилларини аккредитациядан ўтказиш тўғрисидаги қарор лойиҳаси бир овоздан маъқулланган ва 53 та маҳаллий оммавий ахборот воситасининг жами 167 нафар вакили аккредитациядан ўтказилган.

“Эндиликда аккредитациядан ўтказилган маҳаллий ва хорижий оммавий ахборот воситалари вакиллари жами 1129 (шундан 48 нафари хорижий) нафарни ташкил этмоқда”, дейилган МСК хабарномасида.

Ўзбекистонда президент сайлови 24 октябрь куни бўлиб ўтиши кутилмоқда.

МБ: Ўзбекистоннинг ялпи ташқи қарзи 36 миллиард долларга етиб қолди

Тошкентдаги Марказий банк биноси

Ўзбекистоннинг ташқи қарзи биринчи ярим йилликда йил бошига нисбатан 2 миллиард доллардан кўпроққа (6 фоиз) ошиб, жорий йилнинг 1 июль ҳолатига 35 миллиард 894 миллион 900 минг доллар етган. 2021 йил бошида ташқи қарз миқдори 33 миллиард 845 миллион 500 минг долларни ташкил этганди. Бу ҳақда Марказий банкнинг “Ўзбекистон Республикаси тўлов баланси, халқаро инвестицион позицияси ва ташқи қарзи” ҳисоботида айтилган.

МБ қайдича, қарийб 36 миллиард долларлик ташқи қарзнинг 21 миллиард 985 миллион 900 минг долларини давлат қарзи (61 фоиз), 13 миллиард 909 миллион долларини эса хусусий қарз (39 фоиз) ташкил этмоқда.

Регулятор давлат ташқи қарзи ўсишини “ҳудудлар ва иқтисодиёт тармоқларини ривожлантириш бўйича давлат дастурларини молиялаштириш учун янги қарзларнинг жалб қилиниши билан” изоҳлаган бўлса, “хусусий секторда асосан тижорат банклари ва иқтисодиётнинг бошқа секторлари томонидан янги қарздорликларнинг жалб қилиниши ва асосий қарзларнинг қисман сўндирилиши ҳисобига ўсиш кузатилган”и боғлаган.

Биринчи ярим йиллигида давлат ташқи қарзи 3 фоизга ёки 627 миллион 900 минг долларга ошган, бунга жаҳон бозорида Ўзбекистон халқаро облигациялари нархларининг тушиши, шунингдек, янги қарздорликларнинг жалб қилиниши ва асосий қарз тўловлари амалга оширилиши ҳамда курслар ўзгариши сабаб ўлароқ келтирилган.

Хусусий ташқи қарз эса жорий йилнинг январь-июнь ойларида 11 фоизга ёки 1 миллиард 400 миллион долларга ошган ва бу ўсиш асосан банклар ва бошқа сектор ҳиссасига тўғри келган.

Марказий банкнинг ташқи қарзга оид рақамлари Молия вазирлигининг яқинда ёйинлаган ҳисоботидаги рақамларга мос келмайди. Жорий ой бошида вазирлик ўз ҳисоботида Ўзбекистоннинг давлат қарзи биринчи ярим йилликда 858 миллион 600 минг долларга ёки 3,7 фоизга ошгани ҳамда 1 июль ҳолатига 24 миллиард 200 миллион долларни ташкил этгани ҳақида билдирган эди.

Пойтахт Тошкентни иссиқлик билан таъминлаш Франция ширкатига топширилди

Иллюстратив сурат.

Ўзбекистон пойтахти Тошкентни 30 йил давомида иссиқлик билан таъминлаш мажбуриятини Франциянинг “Veolia Central & Eastern Europe” ширкати ўз зиммасига олди. Мазкур мажбурият Вазирлар Маҳкамасининг “Тошкент шаҳри иссиқлик таъминоти тизимини давлат-хусусий шериклик асосида ривожлантириш тўғрисида”ги қарори билан тасдиқланди.

Расман билдирилишича, Тошкент шаҳар ҳокимлиги ва Осиё тараққиёт банки билан пойтахтни иссиқлик таъминоти билан таъминлашни давлат-хусусий шериклик шартлари асосида модернизация қилиш ва бошқарувга бериш лойиҳасини амалга оширади.

Осиё тараққиёт банки Тошкентни иссиқлик билан таъминлашни “Veolia Central & Eastern Europe” ширкатига топширишни тавсия қилган.

Лойиҳа концепцияси Вазирлар Маҳкамаси томонидан тасдиқланган ва Франция ширкати Ўзбекистон қонунчилигига мувофиқ юридик шахс сифатида рўйхатдан ўтказилган.

Осиё тараққиёт банки дастлабки 3 йил давомида лойиҳани амалга ошириш ҳамда мониторинг олиб бориш бўйича маслаҳатчи сифатида Тошкент шаҳар ҳокимлигига кўмаклашади.

Тенгдошларини пичоқлаган ўқувчига нисбатан безорилик моддаси асосида жиноят иши қўзғатилди

Иллюстратив сурат.

Андижон вилояти Ички ишлар бошқармаси 22 сентябрь куни уч нафар тенгдошини пичоқлаган мактаб ўқувчисига нисбатан Жиноят кодексининг 277-моддаси (безорилик) 3-қисми “г” банди билан жиноят иши қўзғатилиб, тергов ҳаракатлари олиб борилаётгани тўғрисида хабар берди.

Бошқарманинг билдиришича, 22 сентябрь куни соат 13:20 да М., исмли йигит шаҳардаги 2-сонли мактаб олдида 3 нафар таниши билан кўришган, шундан сўнг гаплашиб олиш мақсадида кафе ёнига борган.

У ерда ўзаро келишмовчилик сабабли йигитлар ўртасида жанжал юзага келган. Жанжал вақтида М., ёнидаги йиғма пичоқ билан уч нафар тенгдошига тан жароҳати етказган.
Андижон вилояти Ички ишлар бошқармаси бу борада ижтимоий тармоқларда тарқалган хабарлардан сўнггина жамоатчиликка маълумот берди.

Москвадан Ўзбекистонга авиарейслар сони оширилмоқда

Иллюстратив сурат.

Жорий йил 5 октябрдан бошлаб Москвадан Ўзбекистон шаҳарларига доимий авиақатновлар сони икки тарафлама асосда кўпайтирилади. Бу ҳақда Ташқи меҳнат миграцияси агентлиги 23 сентябрь куни маълум қилди.

Билдирилишича, ҳар ҳафта Москва — Тошкент йўналиши бўйича 4 тагача, Бухоро ва Самарқандга 2 тадан, Урганч, наманган, Фарғона, Андижон ва Термизга 1 тадан рейс амалга оширилади.

“Шунингдек, яқинда меҳнат мигрантлари учун Ўзбекистондан Россияга поездлар ташкиллаштириш режалаштирилмоқда”,-дейилади билдирувда.

Тошкент метросининг “Олмазор — Сергели” йўналиши вақтинча ёпилади

Тошкентдаги метро бекати.

Тошкент метросининг “Олмазор — Сергели” йўналишидаги қатнов 25 сентябрь соат 21:00 дан 26 сентябрь соат 07:00 гача вақтинча тўхтатилади. Бу ҳақда “Ўзбекистон темир йўллари” ширкати 23 сентябрь куни маълум қилди.

Расман билдирилишича, мазкур йўналиш профилактик ишлари олиб борилиши муносабати билан вақтинча ёпилган.

“Ўзбекистон темир йўллари” “Олмазор — Сергели” метро йўналишида автобуслар ҳаракати йўлга қўйилиши ҳақида маълум қилди. Метрополитен йўловчилари ушбу йўналишдаги автобуслардан йўл кира ҳаққисиз фойдаланиши мумкин.

Бундан аввалроқ маҳаллий нашрлар Тошкент метросида сўнгги етти ой ичида фавқулодда ҳолатлар тез-тез юз бераётгани тўғрисида ўнлаб хабарларни жамоатчиликка билдирган эди.

Қашқадарёда номусини ҳимоя қилишга уринган ҳомиладор аёл 15 йилга қамалиши мумкин

Иллюстратив сурат

Қашқадарё вилоятининг Чироқчи туманида ҳомиладор аёл ўзини зўрлашга ҳаракат қилган қўшнисини пичоқлаб қўйган.

Вилоят прокуратураси маълумотига кўра, жорий йилнинг 25 июнь куни Чироқчи тумани “Лангар” маҳалла фуқаролар йиғини “Тўлақул” қишлоғида яшаган марҳум Ж.А. қўшниси – ҳомиладор Н.Ж.га нисбатан куч ишлатиб, уни жинсий алоқа қилишга ундаган. Юзага келган ҳолатда ўз номусини ҳимоя қилган аёл ёнида бўлган ошхона пичоғи билан Ж.А.га бир марта зарба берган, етказилган тан жароҳати натижасида тажовузчи вафот этган.

Ҳолат юзасидан мамлакат Жиноят кодексининг 97-моддаси 1-қисми билан жиноят иши қўзғатилиб, Чироқчи туман прокуратураси томонидан тергов ҳаракатлари олиб борилган ва шу йил 7 сентябрида иш туман судига оширилган. Мазкур модда бўйича аёл 10 йилдан 15 йилгача қамалиши мумкин.

Nemolchi.uz лойиҳаси раҳбари Ирина Матвиенко қашқадарёлик ҳомиладор аёлга қўйилган айбловни ҳақсиз, деб ҳисоблашини билдирган.

“Терговчиларимиз, судларимиз, прокурорларимиз Жиноят кодексида бор бўлган 98-модда (Кучли руҳий ҳаяжонланиш ҳолатида қасддан одам ўлдириш) ёки 100-моддага (Зарурий мудофаа чегарасидан четга чиқиб, қасддан одам ўлдириш) нимага эътибор бермаётганларини билмайман. Нима учун ғайриҳуқуқий хатти-ҳаракатдан жабрланган пайтда қотилликка қўл урган ёки кишига оғир тан жароҳати етказган кишилар қурбонини қўлида пичоқ билан пойлаб турган шахсларга тенглаштирилмоқда? Ваҳоланки, менимча, бунақа ишлар ҳатто қасддан одам ўлдириш ёки қасддан тан жароҳати етказиш сифатида ҳам кўриб чиқилмаслиги лозим”, деб ёзган Ирина Матвиенко.

Фаолга кўра, ҳомиладор аёл бу қадамга давлат аёлларни зўравонликдан яхши ҳимоя қила олмаётгани туфайли борган. Ўзбекистонда аёллар ҳуқуқлари учун курашиб келаётган И. Матвиенко қашқадарёлик аёлни судни озод қилишга чақирган.

Коронавирусга чалинганларнинг умумий сони 170 минг нафардан ошди

Ўзбекистонда коронавирус инфекцияси қайд этилганлар сони, 2021 йил 22 сентябрь ҳолатига кўра, 170 минг 520 нафарга етган.

Соғлиқни сақлаш вазирлиги қайдича, кеча Қорақалпоғистондан ташқари мамлакат ҳудудлари бўйлаб 531 киши коронавирусга чалинган.

Чоршанба куни Андижон, Сирдарё ва Хоразм вилоятларидан ташқари ҳудудларда 629 киши тузалиб, соғайганларнинг умумий сони 164 минг 614 нафарга етган.

ССВ ўтган кеча-кундузда коронавирусга чалинган беморлардан яна 4 нафари вафот этиб, коронавирус қурбонлари сони 1 минг 207 нафарга етганини қўшимча қилган.

Вазирлик маълумотига кўра, 22 сентябрь куни 118 нафар кишида пневмония аниқланган, 5 июлдан бери эса 26 минг 577 киши пневмонияга чалинган. Булардан 23 минг 975 нафари соғайиб чиққан, 220 нафари эса вафот этган.

Турколог олим Андрей Кубатин яқинларининг товон пулига оид аризаси қисман қондирилди

Андрей Кубатин

Фуқаролик ишлари бўйича Тошкент шаҳар суди апелляция инстанцияси биринчи инстанция суди қарорини бекор қилиб, марҳум турколог олим Андрей Кубатин оиласининг маънавий зарарни қоплаш тўғрисидаги даъвосини қисман қаноатлантирган. Бу ҳақда Газета.uz нашри А. Кубатиннинг синглиси Клара Сахарова сўзларига таянган ҳолда хабар қилди.

Қайд этилишича, оила аъзолари суддан ўз фойдаларига 3,5 миллиард сўмлик маънавий зарарни ундириш тўғрисида қарор қабул қилишни сўрашган.

Суд коллегияси даъвони қисман қондириб, биринчи инстанция суди қарорини бекор қилиб, компенсация миқдорини 30 миллион сўмдан 150 миллион сўмга ошириш ҳақида қарор чиқарган. Тошкент шаҳар ҳокимлиги Молия бош бошқармаси мазкур суммани Андрей Кубатиннинг хотини ва ўғлига тўлаши керак.

Марҳум олимнинг синглиси ва онаси маънавий зарар бўйича компенсация олиш учун фуқаролик ишлари бўйича судга мурожаат қилишни режалаштиряпти.

Турколог Андрей Кубатин 2020 йилнинг 29 октябрь куни коронавирус оқибатларидан 36 ёшида вафот этган эди.

Тошкент давлат шарқшунослик институтининг катта ўқитувчиси бўлиб ишлаган Андрей Кубатин 2017 йил декабрида давлатга хиёнатда айбланиб, 11 йилга озодликдан маҳрум этилган.

Кубатин устидан маҳкама ёпиқ ўтган, яқинлари ва маслакдошлари ёш турколог олимга қарши жиноят иши собиқ МХХ томонидан уйдирилганини айтишган.

Халқаро ташкилотлар ва илмий жамоатчиликнинг чақириқлари ортидан Кубатин 2019 йил сентябрида Тошкентдаги маҳкама залидан озод этилган ва бутунлай оқланган.

Кубатин халқаро илмий доираларда яхши танилган турколог, археолог ва этнограф олим эди.

А. Комилов АҚШ ва Марказий Осиё ташқи ишлар вазирлари учрашувида иштирок этди

Ўзбекистон ташқи ишлар вазири Абдулазиз Комилов

Ўзбекистон ташқи ишлар вазири Абдулазиз Комилов шу йилнинг 22 сентябрь куни БМТ Бош Ассамблеясининг 76-сессияси доирасида видеоконференция орқали ташкил этилган Марказий Осиё ва АҚШ ташқи сиёсий идоралари раҳбарларининг “C5+1” шаклидаги учрашувида иштирок этган.

ТИВ матбуот хизмати маълумотига кўра, учрашувда А. Комиловдан ташқари АҚШ, Қозоғистон, Қирғизистон, Тожикистон ва Туркманистон бош дипломатлари қатнашганлар.

Тадбир чоғида вазирлар иқтисодиёт, минтақавий хавфсизлик, террорчилик ва экстремизмга қарши кураш, COVID-19 пандемиясининг ижтимоий-иқтисодий оқибатларини бартараф этиш соҳаларидаги ҳамкорликни ривожлантириш масалалари юзасидан фикр алмашганлар.

Шунингдек, улар Афғонистондаги вазият кўриб чиқишиб, гуманитар инқирознинг олдини олиш учун афғон халқига ёрдам кўрсатиш, бу мамлакатнинг минтақавий иқтисодий жараёнларга интеграциялашувини таъминлайдиган инфратузилма лойиҳаларини амалга ошириш зарурлигини таъкидлаганлар.

Учрашувда Марказий Осиё минтақасидаги мамлакатлар барқарорлиги ва хавфсизлигига таҳдид ва хавф-хатарларга қарши курашиш борасидаги халқаро ҳамжамиятнинг саъй-ҳаракатларини бирлаштириш зарурлиги алоҳида қайд этилган.

Марказий Осиёдаги беш мамлакат ҳамда АҚШнинг самарали ҳамкорлиги йўлида тузилган "C5+1" гуруҳи учрашувлари 2015 йилдан бери ўтказиб келинади. Гуруҳнинг илк учрашуви Ўзбекистоннинг Самарқанд шаҳрида ўтказилган эди.

ИИВ Тошкент вилоятида экстремистик фаолият билан шуғулланган 27 киши ушланганини иддао қилди

Тошкент вилоятининг Нурафшон шаҳри, Оҳангарон ва Чиноз туманларида яширин равишда экстремистик фаолият билан шуғулланиб келгани айтилаётган 27 нафар шахс қўлга олинди.

Мазкур шахслар “Хавфсиз ҳудуд” тезкор-профилактик тадбири доирасида ушланганини қайд этган ИИВ матбуот хизмати амалиёт Тошкент вилоят ИИББ, прокуратура ва ДХХ ходимлари ҳамкорлигида олиб борилганини маълум қилган.

“Ҳозирда ушбу шахсларнинг хатти-ҳаракатларига қонуний баҳо бериш бўйича суриштирув ишлари олиб борилмоқда”, дейилган вазирлик хабарномасида.

Айни пайтда тартиб посбонлари пойтахт вилоятида қўлга олинган шахсларнинг қайси диний-экстремистик ташкилотга мансублиги ва мамлакат қонунчилигининг қайси талабига зид ҳаракат қилганларини очиқлаган эмас.

Аввалроқ ИИВ Тошкент шаҳрида 15 сентябрь куни “Ҳизбут-Таҳрир” диний экстремистик ташкилотига аъзо бўлган 10 киши ушлангани, 10 сентябрь куни эса Тошкент шаҳри ва вилоятида 29 нафар аёл қўлга олингани ҳақида маълумот тарқатганди.

Ўзбекистон "Қизил китоб"га киритилган жайрондан 15 тасини Қирғизистонга сотади

Бухоро жайрони.

Ўзбекистон Қирғизистон билан жайрон сотиш тўғрисидаги шартномани имзолади. Бу ҳақда 22 сентябрь куни Қирғизистон Миллий фанлар академияси Биология институти расмийси Аскар Давлетбаков маълум қилди.

Унинг айтишича, Ўзбекистон 15 бош жайронни Қирғизистонга октябрь ойининг ўрталарида етказиб беради.

Ҳайвонлар грант ҳисобидан сотиб олинмоқда. Улар бир муддат махсус жойда сақланади ва кейинроқ Қирғизистонда аввалари жайронлар яшаган ҳудудларга қўйиб юборилади.

Расмийнинг айтишича, Қирғизистонда жайронларни Совет Иттифоқи давридаёқ қириб юбориш жараёни бошланган эди.

Ўзбекистонда жайрон “Қизил китоб”га киритилган ноёб ҳайвон ҳисобланади ва уни овлаганлар катта миқдорда жаримага тортилади. Масалан, ўтган йилнинг апрелида Навоий вилояти ҳудудида икки бош жайронни ўлдирган икки овчи деярли 69 миллион сўм жаримага тортилган эди.

Қирғизистонда ҳам жайрон “Қизил китоб”га киритилган ва уларни овлаш тақиқланган.

Қирғизистон ҳукумати 2019 йилда Қозоғистонга 50 бош жайрон сотиш илтимоси билан мурожаат қилган эди. Икки давлат бу борадаги протоколни имзолаган. Аммо шу кунгача Қозоғистон Қирғизистонга жайрон сотгани тўғрисида маълумот йўқ.

Мўйноқдаги ҳар бир оилага 5 миллион сўмдан пул тарқатилмоқда

Иллюстратив сурат.

Қорақалпоғистоннинг Муйноқ туманида ҳар бир оилага 5 миллион сўмдан бир марталик ёрдам пули тарқатилаётгани тўғрисида туман ҳокимлиги маълум қилди.

Расман билдирилишича, бир марталик ёрдам “Орол денгизи фожиаси оқибатларидан ҳаммадан кўп жабр кўрган Мўйноқ тумани халқи ҳар томонлама қўллаб-қувватлаш” мақсадида президент ташаббуси билан берилмоқда.

Ўзбекистоннинг амалдаги президенти ҳамда жорий йил 24 октябрида ўтказилажак президент сайловига номзод Шавкат Мирзиёев 21 сентябрь куни ўз сайловолди учрашувларини Қорақалпоғистондан бошлаш учун Нукусга борган эди.

Президент 22 сентябрда Қорақалпоғистон сафарини якунлаб, Хоразм вилоятига йўл олди.

Тошкент метросида яна бир “техник носозлик” юз берди

Тошкент метросида бу каби воқеалар сўнгги етти ой ичида тез-тез юз бермоқда.

Тошкент метрополитенининг “Халқлар дўстлиги” бекатида 22 сентябрь куни яна бир техник носозлик юзага келди.

Тошкент метрополитени матбуот хизматининг хабар беришича, соат 08:37 да 13-йўналишдаги ҳаракат таркибининг 2-вагонидаги 4-эшиклари техник носозлик туфайли ёпилмай қолган. Бунинг ортидан йўловчилар поезддан туширилган ва ортдан келаётган 5-йўналишдаги ҳаракат таркибига ўтқизилган.

Тошкент метросида бу каби воқеалар сўнгги етти ой ичида тез-тез юз бермоқда. Бундан олдин “Ғафур Ғулом” бекатидан “Чорсу” бекатига ҳаракатланаётган 41-йўналишдаги поезд 20 сентябрь куни соат 09:10да тўхтаб қолди. Расман билдирилишича, поезднинг тўхтаб қолишига ҳаво тақсимлаш тизимида техник носозлик юзага келгани сабаб бўлган.

28 август соат 14:35 атрофида "Ойбек" бекатидан "Тошкент" бекатига ҳаракатланаётган поёзд тўхтаб қолгани ҳам хабар қилинган эди. Июнь, май, апрель ойларида ҳам шунга ўхшаш ҳолатлар юз берган.

18 март куни эса Тошкент метрополитенида тўхтаб қолган поездга унинг ортидан келаётган поезд келиб урилган. Йўловчилар эвакуация қилинган. Ҳодисада жабрланган ва ҳалок бўлганлар йўқлиги билдирилган.

Андижондаги автоаварияда 3 киши ҳалок бўлди

Иллюстратив сурат.

Андижон шаҳрида 21 сентябрь куни содир этилган автоаварияда 3 киши ҳалок бўлгани ва 1 киши тан жароҳати олгани тўғрисида ижтимоий тармоқларда тарқалган хабарни Бош прокуратура 22 сентябрь куни тасдиқлади.

Аввалроқ ижтимоий тармоқларда Андижон шаҳрининг Боғишамол даҳасида бўлган аварияда Tracker ичида бўлган 3 талаба ҳалок бўлгани тўғрисидаги видеолар тарқалган эди.

Бош прокуратуранинг билдиришича, мазкур ҳолат юзасидан 22 сентябрь куни Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.

Ҳозирда Андижон туман ИИБ ТБ томонидан тергов ҳаракатлари олиб борилмоқда. Ҳолат юзасидан Андижон вилоят прокуратураси томонидан назорат ўрнатилган.

Бортида юз берган нохуш ҳодиса туфайли British airways учоғи Тошкент аэропортига қўндирилди

British Airways авиаширкати учоғи (иллюстратив сурат)

British airways авиаширкатининг Исломободдан Лондонга парвоз қилаётган Boeing 777-200ER учоғи экипажи йўловчилардан бири ўзини ёмон ҳис қилгани ортидан Тошкент халқаро аэропортига ошиғич қўнишга мажбур бўлган. Бу ҳақда “Новости Ташкентского Неба” Телеграм-канали маълумот тарқатди.

Қайд этилишича, 260-рейс йўловчиси бўлган 83 ёшли аёл парвоз чоғида ўзини ёмон ҳис қилган. Шундан сўнг учоқ экипажи Ўзбекистон пойтахтидаги аэропортга қўниш қарорини олган. Бироқ учоқ Ислом Каримов номидаги аэропортга етиб келганидан кейин аёл жон таслим қилган.

Ҳодисадан сўнг йўловчилар учоқдан туширилиб, аэропорт биносига олинганлар. Воқеа юзасидан Тошкент аэропорти масъуллари ҳали изоҳ берганича йўқ.

ССВ: COVID-19 қурбонлари сони 1200 нафардан ошди

Ўзбекистонда 21 сентябрь куни коронавирусга чалинган беморлардан 6 нафари вафот этган, шу тариқа пандемия қурбонлари сони 1 минг 203 нафарга етган.

Соғлиқни сақлаш вазирлиги маълумотига кўра, кеча мамлакат бўйлаб 522 киши коронавирусга чалинган, вирус юқтириб олганларнинг умумий сони эса 169 минг 989 нафарни ташкил қилган.

Айни пайтда якшанба куни Сирдарё ва Хоразм вилоятларидан ташқари барча ҳудудларда 687 киши тузалиб, соғайганларнинг умумий сони 163 минг 985 нафарга етган.

ССВ қайдича, ўтган кеча-кундузда яна 103 нафар кишида пневмония аниқланган, 5 июлдан бери эса 26 минг 459 киши пневмонияга чалинган. Булардан 23 минг 553 нафари соғайиб чиққан, 219 нафари эса вафот этган.

Давстатқўм: Биринчи ярим йилликда Ўзбекистонга қарийб 700 минг хорижлик келган

Жорий йилнинг дастлабки 6 ойида Ўзбекистонга хориждан 691,7 минг нафар чет эллик сафар қилган. Бу ҳақда Давлат статистика қўмитаси маълумот тарқатди.

Давстатқўм қайдича, Ўзбекистонга келган хорижликлардан 577,8 минг нафари қариндошларни йўқлаш учун, 65,7 минг нафари дам олиш мақсадида, 27,4 минг нафари хизмат юзасидан, 11,8 минг нафари даволаниш учун, 5,7 минг нафари тижорат қасди билан, 3,3 минг ўқиш мақсадида ташриф буюрган.

Аввалроқ қўмита биринчи ярим йилликда Ўзбекистонга 147,2 минг киши кўчиб келгани, 156,8 минг киши эса кўчиб кетгани ҳақида маълумот тарқатган эди.

Бош вазир муовини мулозимларни 22 сентябрь куни ишга автомобилда келмасликка чақирди

Бош вазир ўринбосари Азиз Абдуҳакимов ўтган йили Тошкентда уюштирган велопойгадан лавҳа (архив сурати)

Бош вазир ўринбосари, Туризм ва спорт вазири Азиз Абдуҳакимов давлат идоралари ва маҳаллий органлари раҳбарлари, таниқли маданият ва спорт вакилларини шахсий намуна кўрсатиб, 22 сентябрь - “Халқаро автомобилсиз кун” тадбирлари доирасида ишга автомобиль ўрнига велосипедда ёки пиёда келишга чақирди.

“Автомобилсиз кун акцияси доирасида #carfreeday_uzbekistan, #shaxsiynamunakursat, #avtomobilsizbirkun хештегларидан фойдаланиб, яна-да кенг аҳолини қамраб олишни таклиф этаман. Зеро бу каби тадбирларни ўтказиш мамлакатимизда йўл харакати хафсизлигини яна-да такомиллаштириш, шаҳар аҳолиси ўртасида экологик маданият ҳамда соғлом турмуш тарзини тарғиб қилишни мақсад қилган. Жаҳон соғлиқни сақлаш ташкилоти ҳам ўз тавсияларида жисмоний фаолликни ошириш инфекцион, юрак-қон томир, саратон ва қандли диабет касалликлар профилактикасида муҳим ўрин тутишини таъкидлайди. Шундай экан, фикримча, айни дамда дунёда пандемия билан боғлиқ вазиятда бундай акциянинг ўтказилиши айни муддаодир”, деган А. Абдуҳакимов ўз мурожаатида.

Чоршанба куни Ўзбекистон ҳудудларида, маҳаллаларда яшовчи уюшмаган ёшлар ўртасида ҳам велосипед, скейт ва самокатларда учиш мусобақалари ташкил этилиши айтилган.

Азиз Абдуҳакимов ўтган йили ҳам давлат амалдорларини велосипедда юришга тарғиб қилгани ҳақида аввалроқ хабар қилинган. Ўшанда Ўзбекистондаги бюджет ташкилотлари ходимлари расмий Тошкент талаби билан ҳокимлар томонидан велопойгага чиқишга мажбурланаётгани хусусида Озодликка кўплаб шикоятлар келиб тушган.

БМТ сессиясидаги нутқида Ш. Мирзиёев Афғонистон дохил қатор масалалардан баҳс этди

Ўзбекистон президенти Шавкат Мирзиёев БМТ Бош Ассамблеянинг 76-сессиясида қилган видеомурожаатидан лавҳа (president.uz фотоси)

Бирлашган Миллатлар Ташкилотининг Нью-Йоркдаги бош қароргоҳида ўтказилаётган Бош Ассамблеянинг 76-сессияси доирасида Ўзбекистон президенти Шавкат Мирзиёев 21 сентябрь куни видеомурожаат билан чиқиш қилди. Бу ҳақда маълумот тарқатган президент матбуот хизматига кўра, Ш. Мирзиёев ўз нутқида қатор масалаларга эътибор қаратган.

Хусусан, Ўзбекистон президенти ўз мамлакати Марказий ва Жанубий Осиёнинг ўзаро боғлиқлигини мустаҳкамлаш тўғрисидаги БМТ Бош Ассамблеясининг махсус резолюциясини қабул қилиш ташаббусини илгари сурганини урғулаган. Шу муносабат билан у Афғонистон Марказий Осиёнинг узвий қисми экани яна бир бор таъкидлаган.

“Бу давлатда тинчлик ва осойишталик ўрнатилишидан нафақат биз, қўшни мамлакатлар, балки бутун дунё манфаатдордир. Ҳозирги қийин даврда Афғонистонни яккалаб, уни муаммолар гирдобига ташлаб қўйиш мумкин эмас. Афғон масаласида Бирлашган Миллатлар Ташкилотининг таъсири ва овози ҳар қачонгидан ҳам кучлироқ янграши лозим”, деган Ш. Мирзиёев.

Ўзбекистон президенти нутқи давомида дунёда хавф-хатар ва зиддиятлар, трансмиллий таҳдидлар тобора ортиб бораётганига эътибор қаратган. У шу йил ноябрь ойида Тошкентда БМТнинг Глобал аксилтеррор стратегияси Марказий Осиё учун режасининг ўн йиллик натижалари ва истиқболларига бағишланган Халқаро конференция ўтказилиши халқаро ҳамкорликни янада мустаҳкамлашга хизмат қилиши таъкидлаган.

Ш. Мирзиёев видеомурожаатида БМТнинг “ҳеч кимни эътиборсиз қолдирмаслик” деган тамойил асосида вакциналардан тенг ва адолатли фойдаланиш имкониятини яратишга доир саъй-ҳаракатларини дастаклаган.

У сўнгги йилларда Ўзбекистонда амалга оширилаётган кенг кўламли ва жадал демократик ислоҳотлар бугунги кунда ортга қайтмас тус олганини, сўз ва оммавий ахборот воситалари, дин ва виждон эркинлиги, гендер тенглик, миллатлараро тотувликни таъминлаш борасида қатъий қадамлар ташланаётганини таъкидлаган.

Ўз нутқида Ўзбекистон томонидан иқлим ўзгаришларига қарши кураш, атроф-муҳит ва био хилма-хилликни муҳофаза қилиш, тикланадиган энергия манбаларига ўтиш масалаларида кўрилаётган чора-тадбирларга алоҳида тўхталган Ш. Мирзиёев яна бир бор Оролбўйи минтақасидаги вазиятнинг оғирлигига эътибор қаратиб, БМТ шафелигида глобал экологик сиёсатнинг устувор йўналишларини батафсил муҳокама қилиш мақсадида 2023 йили Ўзбекистонда Атроф-муҳит бўйича БМТнинг юқори даражадаги Олтинчи Ассамблеясини ўтказиш таклиф этган.

“Ассамблея иштирокчилари Орол денгизининг қуриши натижасида юзага келган, экологик офат маркази бўлган, Оролбўйи минтақасидаги оғир вазият билан бевосита танишиш ва зарур хулосалар чиқариш имкониятига эга бўладилар. Бундан ташқари, атроф-муҳит бўйича Ассамблеяда Бирлашган Миллатлар Ташкилотининг янги экологик сиёсати асосларини ташкил этишга қаратилган Бутунжаҳон экология Хартиясини ишлаб чиқиш ташаббусини илгари сурмоқчимиз”, деган Ш. Мирзиёев БМТ Бош Ассамблеясининг 76-сессиясидаги видеомурожаатида.

Давомини ўқинг

XS
SM
MD
LG