Линклар

Шошилинч хабар
27 октябр 2021, Тошкент вақти: 02:25

Ўзбекистон хабарлари

Ўзбекистон президенти АҚШ делегациясини қабул қилди

Президент Шавкат Мирзиёев 4 октябрь куни АҚШ Давлат котибининг биринчи ўринбосари Уэнди Шерман бошчилигидаги делегацияни қабул қилди.

Президент матбуот хизматининг билдиришича, учрашувда Ўзбекистон-АҚШ стратегик шериклигини янада ривожлантиришнинг долзарб масалалари кўриб чиқилди.

Америка томони Ўзбекистоннинг суверенитети, мустақиллиги ва ҳудудий яхлитлигини, шунингдек, амалга оширилаётган ислоҳотлар дастурини қатъий қўллаб-қувватлаши алоҳида таъкидланди.

Билдирилишича, Вашингтон шаҳрида жорий йил охиригача Ўзбекистон - АҚШ ўртасидаги стратегик шериклик масаласига бағишланган илк йиғилишни ўтказиш ҳам режалаштирилди.

“Шунингдек, Афғонистонда вужудга келаётган вазият юзасидан батафсил фикр алмашилди. Ўзбекистоннинг афғон халқига кўмаклашиш ҳамда қўшни мамлакатда узоқ муддатли тинчлик ўрнатилиши ва унинг иқтисодий тикланишига хизмат қиладиган лойиҳаларни илгари суриш борасидаги саъй-ҳаракатлари юксак баҳоланди”,-дейилади хабарда.

Кун янгиликлари

Ўзбекистон мустақилликка эришганидан 30 йил ўтиб президент рамзий белгилари жорий этилди

Иллюстратив сурат.

Ўзбекистон президенти бундан буён рамзий тўш белгиси ва штандартига эга бўлади. Бу борадаги қонунни президент Шавкат Мирзиёев 25 октябрь куни имзолади.

“Ўзбекистон Республикаси Президенти фаолиятининг кафолатлари тўғрисида”ги қонунга киритилган ўзгартишга мувофиқ президент инагурацияси пайтида унга махсус тўш белги ва штандарт- президент байроғи топширилади.

Ўзбекистон мустақиллика эришганидан 30 йил ўтиб президент рамзларини жорий этмоқда. Мамлакат президент рамзларига эга бўлмаган жаҳондаги бармоқ билан санарли давлатлардан бири эди.

Штандарт президент иштирок этадиган барча муҳим тадбирларда, инаугурация пайтида ҳамда президент қароргоҳларининг бинолари ва хизмат хоналарида кўтарилади. Президент тўш белгиси эса халқнинг ишончини тамсил қилади.

Қонунга асосан, президент белгиси ва штандарти тавсифи, улардан расмий фойдаланиш тартиби Президент томонидан белгиланади. Ҳозирча президент тўш белги ва штандарт тавсифини жамоатчиликка эълон қилган эмас.

Коронавирусга чалинганлар сони 184 минг нафардан ошди

Ўзбекистонда коронавирус инфекцияси қайд этилганлар сони, 2021 йил 25 октябрь ҳолатига кўра, 184 минг 233 нафарга етган.

Соғлиқни сақлаш вазирлигининг маълум қилишича, кеча мамлакат бўйлаб 305 киши коронавирусга чалинган.

Душанба куни Сирдарё вилоятидан ташқари барча ҳудудларда 305 киши тузалиб, соғайганларнинг умумий сони 179 минг 845 нафарга етган.

ССВ ўтган кеча-кундузда коронавирусга чалинган беморлардан яна 3 нафари вафот этиб, коронавирус қурбонлари сони 1 минг 309 нафарга етганини қўшимча қилган.

Вазирлик қайдича, 25 октябрь куни Ўзбекистонда қўлланилган вакцина дозаси 25 миллион 297 минг 345 тага етган. Айни кунгача 1-босқич эмланганлар 13 272 675 нафарни, 2-босқичда эмланганлар 8 074 908 нафарни, 3-босқич эмланганлар 3 949 762 нафарни ташкил қилган. Ўзбекистонда аҳолини коронавирусга қарши эмлаш жараёни шу йилнинг 1 апрелидан бошланган.

Давлат хизматлари агентлиги ФҲДЁ архив маълумотларида хатоликлар борлигини тан олди

Ижтимоий тармоқларда Ягона интерактив давлат хизматлари порталида ФҲДЁ архив маълумотларида пайдо бўлган ноаниқликлар юзасидан эътирозлар кучайди. “Потребитель.уз” Телеграм-канали маълумотига кўра, кўплаб фойдаланувчилар архив маълумотлари бўйича фарзандлари сони кўпайиб ёки камайиб қолгани, вафот этиб кетган ота-оналари ёки турмуш ўртоқлари тирилиб қолганига гувоҳ бўлганлар. Хусусан, бир аёлнинг икки эри борлиги, Александр исмли эркакнинг эса эрга тегиб, ҳатто ундан икки қиз орттиргани қайд этилган.

Бу эътирозлар ортидан Давлат хизматлари агентлиги масалага ойдинлик киритишга уринган.

Агентлик қайдича, ягона электрон архив базасида 60 миллионга яқин ФҲДЁ архив маълумотлари рақамли кўринишда акс этган, ҳозирда мутахассислар томонидан ушбу тизим такомиллаштирилиб, ЖШШИР (жисмоний шахснинг шахсий идентификация рақами) мавжуд маълумотларга бириктириш ишлари амалга оширилмоқда.

“Ушбу жараён ҳали тўлиқ якунига етказилмаганлиги ҳамда синов жараёнида эканлиги сабабли, тизимда ноаниқликлар учрамоқда. Мутахассислар эса, ўз навбатида, уларни бартараф этиш учун тинимсиз ҳаракатда”, дейилган хабарномада тизимда хатолик аниқланган тақдирда фуқароларга агентликка мурожаат қилиш тавсия этилган.

2023 йилдан суғурта полисларини қоғоз бланкаларда расмийлаштириш амалиётидан воз кечилади

Ўзбекистонда 2023 йилнинг 1 январидан бошлаб мажбурий суғуртанинг барча турлари бўйича суғурта полисларини қоғоз бланкаларда расмийлаштириш амалиёти бекор қилинади. Бу ҳақда президентнинг ўтган ҳафта сўнгида имзоланган “Суғурта бозорини рақамлаштириш ва ҳаёт суғуртаси соҳасини ривожлантириш бўйича қўшимча чора-тадбирлар тўғрисида”ги қарорида айтилган.

Мазкур қарор миллий суғурта бозорининг жадал ривожланишини таъминлаш, истеъмолчиларнинг суғурта бозорига бўлган ишончини ошириш, шунингдек, 2017-2021-йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид давлат дастурида белгиланган вазифаларни бажариш мақсадида қабул қилингани қайд этилган.

Ҳужжатга мувофиқ, 2022 йил 1 июлидан бошлаб суғуртанинг барча турларини (классларини) электрон шаклда амалга оширишга рухсат берилади. Барча суғурта турлари бўйича суғурта полислари Молия вазирлиги ҳузуридаги Суғурта бозорини ривожлантириш агентлиги Суғурта тўловларини кафолатлаш жамғармаси билан биргаликда юритадиган ягона автоматлаштирилган ахборот тизимида рўйхатга олинади.

Қарор билан 2022 йил 1 январидан 2025 йил 1 январига қадар ҳаёт суғуртаси соҳасида фаолият юритаётган суғурта ташкилотларининг мазкур фаолияти қисми учун ҳисобланадиган фойда солиғи бўйича белгиланган солиқ ставкаси 50 фоизга камайтирилиши кўзда тутилган.

Шунингдек, 2022 йил 1 январидан 2024 йил 1 январига қадар иш берувчи томонидан ўз ходимлари учун бахтсиз ҳодисалардан эҳтиёт шарт суғурта қилиш ва тиббий суғурта турлари бўйича тузилган суғурта шартномалари асосида Ўзбекистон Республикасида суғурта фаолиятини амалга оширишга лицензияси бўлган юридик шахсларга йўналтириладиган маблағлар жисмоний шахсларнинг жами даромади сифатида қаралмайди.

Президент қарорига кўра, жисмоний шахсларнинг узоқ муддатли ҳаёт суғуртаси шартномаси бўйича йўналтирилган маблағлари ҳамда уларга тўланган суғурта тўлови (суғурта товони) Ўзбекистон Републикаси Солиқ кодексига асосан солиққа тортилмаслиги белгиланган.

Тадбиркорликни ривожлантириш агентлиги ННТга $2 млн миқдорида имтиёзли қарз ажратмоқчи

Иқтисодий тараққиёт ва қамбағалликни қисқартириш вазирлиги ҳузуридаги Тадбиркорликни ривожлантириш агентлиги Ўзбекистондаги нодавлат нотижорат ташкилотларига қарз маблағлари ажратиш бўйича очиқ танлов эълон қилди.

Агентлик матбуот хизмати маълумотига кўра, танлов Вазирлар Маҳкамасининг 2021 йил 22 июндаги “Ёшлар ва хотин-қизларни касб-ҳунар ва тадбиркорликка ўқитиш дастурларини самарали амалга ошириш ҳамда уларнинг тадбиркорлик фаолияти учун микрокредитлар ажратиш чора-тадбирлари тўғрисида”ги қарори асосида эълон қилинган.

Қайд этилишича, 2 миллион АҚШ доллари миқдоридаги имтиёзли қарз маблағлари 5 йил муддатга ҳудудлар кесимида тақсимланган ҳолда, ҳар бир ҳудуд (Қорақалпоғистон Республикаси, вилоятлар ва Тошкент шаҳри) учун алоҳида очиқ танлов ўтказилиши белгиланган.

“Танловда республикада фаолият юритувчи ёшлар ва хотин-қизларни ўқитишга ихтисослашган Нодавлат нотижорат ташкилотлар ўз лойиҳалари билан иштирок этишлари мумкин. Бунда ёшлар ва хотин-қизларни бизнес ва тадбиркорлик кўникмаларига ўқитишни ташкил этиш, ушбу ўқув курсларини муваффақиятли тамомлаган тингловчиларга тадбиркорлик фаолиятларини йўлга қўйиш мақсадидаги лойиҳаларини молиялаштирлишини назарда тутган бўлиши лозим”, дейилган агентлик хабарномасида.

Нодавлат нотижорат ташкилотларидан танлов ҳужжатлар тўплами жорий йилнинг 20 ноябрига қабул қилиниши айтилган.

Мирзиёев қардош давлатлар раҳбарларининг табригини қабул қилди

МСК расмий маълумотига мувофиқ, Ш. Мирзиёев президент сайловида 80,1 фоиз овоз олган

Ўзбекистон президенти лавозимига қайта сайланган Шавкат Мирзиёев 25 октябрь куни Туркия президенти Ражаб Тоййиб Эрдўғон, Қозоғистоннинг биринчи президенти Нурсултон Назарбоев, Қозоғистоннинг амалдаги президенти Қасим-Жомарт Тоқаев, Туркманистон президенти Гурбангули Бердимуҳамедов, Тожикистон президенти Эмомали Раҳмон ва Қирғизистон президенти Садир Жапаровлар билан телефон орқали мулоқот қилиб, уларнинг табригини қабул қилган.

Президент матбуот хизмати тарқатган маълумотдан келиб чиқилса, қардош давлатлар раҳбарлари билан мулоқотда асосан ўзаро ҳамкорликни янада мустаҳкамлаш масалаларига тўхталинган.

Маълумотларга кўра, душанба куни Тошкентга сим қоққан қардош ўлкалар президентларидан Қасим-Жомарт Тоқаев Мирзиёевни ҳали МСК маълумотлари расман эълон қилинмасидан туриб ғолиблик билан табриклашга улгурган.

Аввалроқ Озодлик Россия президенти Владимир Путин ва Беларусь президенти Александр Лукашенко ҳали овоз беришнинг расмий натижалари эълон қилинмай туриб, Мирзиёевни телефон орқали сайловдаги ғалаба билан табриклагани ҳақида хабар қилган эди.

Марказий сайлов комиссияси маълумотига кўра, 24 октябрь куни Ўзбекистонда ўтказилган президент сайловида Шавкат Мирзиёев 80,1 фоиз овоз билан “ишончли ғалаба қозонган”. Иккинчи ўрин Халқ демократик партиясидан номзод Мақсуда Ворисовага (6,6 фоиз), учинчи ўрин эса “Миллий тикланиш” демократик партиясидан номзод Алишер Қодировга (5,5 фоиз) насиб қилган.

Якшанба куни ўтган сайловда кузатувчилик қилган ЕХҲТ Демократик институтлар ва инсон ҳуқуқлари бўйича бюроси миссияси сайловолди жараёнида номзодлар амалдаги президентга эътироз билдиришдан ёки уни танқид қилишдан тийилишганини, Мирзиёев эса бу даврда ўз лавозимидан кенг фойдаланганини билдирган.

Импорт қилинган ва ишлаб чиқарувчилар томонидан сотиладиган газ акциздан озод қилинди

Адлия вазирлигининг билдиришича, президент 25 октябрь куни “Аҳоли ва иқтисодиёт тармоқларини табиий ва суюлтирилган газ билан барқарор таъминлаш чора-тадбирлари тўғрисидаги қарорни қабул қилди.

Қарорга асосан, 2021 йил 1 октябрдан юридик шахслар томонидан Ўзбекистонга импорт қилинган табиий газни реализация қилишда акциз солиғининг ноль фоизлик ставкаси белгиланди.

2022 йил 1 январдан ишлаб чиқарувчи корхоналар томонидан сотиладиган суюлтирилган газга акциз солиғи солинмайди.

Тадбиркорларга табиий ва суюлтирилган газни Ўзбекистонга импорт қилишда ҚҚСни 120 кунгача муддатга фоизлар ҳисобланмаган ва унинг тўланишини таъминлаш талаб этилмаган ҳолда, бўлиб-бўлиб тўлаш ҳуқуқи берилади.

Шавкат Мирзиёев сайловда 80,1 фоиз овоз олгани эълон қилинди

Марказий сайлов комиссияси раиси Зайниддин Низомхўжаев 25 октябрь куни Тошкент вақти билан соат 16:00 да амалдаги президент Шавкат Мирзиёев 24 октябрда ўтган президентлик сайловида ғалаба қозонганини эълон қилди.

Низомхўжаевнинг билдиришича, сайловда 16 миллион 216 мингдан кўпроқ, яъни 80,4 фоиз сайловчи қатнашган.

Либерал демократик партия номзоди Шавкат Мирзиёевга сайловчиларнинг 80,1 фоизи овоз берган.

Қолган 20 фоизга яқин сайловчининг 6,6 фоизи Халқ демократик партияси номзоди Мақсуда Ворисовага, 5,5 фоизи “Миллий тикланиш” партияси номзоди Алишер Қодировга, 4,1 фоизи Экология партияси номзоди Нарзулла Обломурадовга, 3,4 фоизи “Адолат” партияси номзоди Баҳром Абдуҳалимовга овоз берган.

Путин ва Лукашенко сайлов натижалари расман эълон қилинмай туриб, Мирзиёевни табриклади

Россия президенти Владимир Путин 25 октябрь куни Ўзбекистон президенти Шавкат Мирзиёев билан телефон орқали мулоқот қилди ва уни сайловда ишончли тарзда ғалабага эришгани билан табриклади. Бу ҳақда Кремль матбуот хизмати 25 октябрь куни Москва вақти билан соат 12 да хабар берди.

Суҳбат давомида икки давлат раҳбарлари Ўзбекистон-Россия стратегик иттифоқчилигини ва ҳамкорлигини ривожлантириш ниятларида собит эканликларини билдиришди.

“Россия президенти, шунингдек, Шавкат Мирзиёевга табрик телеграммаси йўллади”, -дейилади хабарда.

Беларусь президенти Александр Лукашенко ҳам 25 октябрь куни ҳали овоз беришнинг расмий натижалари эълон қилинмай туриб Мирзиёевни телефон орқали ғалаба билан табриклади.

Аввалроқ Euronews телеканали 24 октябрда ўтган президентлик сайловида Шавкат Мирзиёев 90 фоиз овоз олгани тўғрисида хабар берган, бироқ Марказий сайлов комиссияси бу хабарга раддия берган эди.

Марказий сайлов комиссияси сайловнинг дастлабки натижалари 25 октябрь куни Тошкент вақти билан соат 16 да эълон қилинишини билдирган.

Путин Ўзбекистон Марказий сайлов комиссияси овоз бериш натижаларини расман эълон қилишидан бир неча соат олдин Мирзиёевни табриклади.

Ўзбекистон президенти матбуот хизмати ҳозирча бу борада сукут сақламоқда.

Тошкентда бир неча ойдан бери илк маротаба коронавирусга чалинганлар сони юз кишидан оз бўлди

Ўзбекистонда 24 октябрь куни 360 нафарга яқин кишида коронавирус инфекцияси аниқланиб, 9 та ҳудудда 265 нафар фуқаро касалликдан тўлиқ соғайди, деб хабар берди Соғлиқни сақлаш вазирлиги.

Расман билдирилишича, бу билан коронавирус инфекцияси қайд этилганлар сони 183 928 кишига етган. 24 октябрь куни яна 2 бемор вафот этган ҳамда касалликдан ўлганлар сони расман камида 1306 нафарга етди.

Бир неча ойдан бери биринчи марта Тошкент шаҳрида бир кун ичида коронавирусга чалинганлар сони юз кишидан озроқ бўлди.

24 октябрь ҳолатига кўра, коронавирус юқиши ҳолатлари бўйича биринчи учликни Тошкент вилояти (107 киши), Тошкент шаҳри (96 киши) ва Самарқанд вилояти (35 киши) эгаллади.

Касалликдан соғайганлар жами 179 487 нафарга етди ва соғайиш кўрсаткичи 98 фоизни ташкил этмоқда.

Марказий сайлов комиссияси Euronews хабарига раддия берди

Президент Шавкат Мирзиёев оила аъзолари билан сайлов участкасида.

Марказий сайлов комиссияси 24 октябрда ўтган президентлик сайловида Шавкат Мирзиёев 90 фоиз овоз олгани тўғрисида Euronews телеканали тарқатган хабарга раддия берди.

Мазкур хабар ижтимоий тармоқлар фойдаланувчилари томонидан кўчирилиб, тарқатила бошланган эди.

"Ижтимоий тармоқларда Ўзбекистон Республикаси Президенти сайловининг дастлабки натижалари эълон қилинганлиги ҳақида хабар тарқатилмоқда. Бу хабар ҳақиқатга мутлақо тўғри келмайди. Президент сайловининг дастлабки натижалари бугун Тошкент вақти билан соат 16.00 да Марказий сайлов комиссияси раиси Зайниддин Низомхўжаев томонидан эълон қилинишини яна бир карра эслатиб ўтамиз”, - дейилади расмий баёнотда.

Аввалроқ Марказий сайлов комиссияси раиси Зайниддин Низомхўжаев сайловда сайловчиларнинг 16 миллион 36 минг 914 нафарни ёки 80,8 фоизи овоз бергани тўғрисида билдирган эди.

Сайлов кодексининг 96-моддасига асосан сайловда сайловчиларнинг камида 33 фоизи овоз берган бўлса, сайлов бўлиб ўтган деб ҳисобланади.

Толиблар ваъдасига ишонган Тошкент Афғонистонга электр етказиб беришни “бир соатга ҳам” тўхтатмади

Ўзбекистон Афғонистонга электр энергияси етказиб беришни “бир соатга ҳам тўхтатган эмас”, Кобул “ўз эҳтиёжига кўра электр энергиясини Ўзбекистондан тўла ҳажмда олмоқда”. Бу ҳақда Ўзбекистон бош вазирининг ўринбосари, инвестициялар ва ташқи савдо вазири Сардор Умурзоқов 23 октябрь куни россиялик журналистларга маълум қилган.

ТАСС агентлиги хабарига кўра, ўзбек мулозими Афғонистонда “Толибон” томонидан шакллантирилган муваққат ҳукумат вакиллари электр энергияси бўйича Ўзбекистон олдидаги қарзни тўлалигича узиш мажбуриятини ўз зиммаларига олишганини айтган.

“Биз муҳокама ўтказдик, унда муваққат ҳукуматнинг энергетика йўналиши бўйича жавобгар бўлган вакиллари, “Афғонистон электр тармоқлари” (АЭТ) ширкати вакиллари бор эди. Вазият имкон бериши билан АЭТдаги ҳамкасблар мавжуд қарзни бутунлигича зудлик билан узишлари ҳақида келишувга эришилди, бугунги кунда эса Афғонистонда банк тизимининг фаолият юритиши ва муваққат ҳукуматнинг тан олиши билан боғлиқ муаммолар бор. Шунга қарамай, биз электр энергиясини етказиб беришда давом этяпмиз”, деган С. Умурзоқов.

Мулозим расмий Тошкентнинг бу қарорини “қийин пайтда қардош афғон халқига ёрдам бериш” истаги билан изоҳлаган.

Аввалроқ Озодлик Афғонистоннинг DABS энергетика ширкати қўшни давлатлардан сотиб олинган электр қуввати бўйича қарздорликни ёпиш учун БМТнинг Афғонистонга кўмак кўрсатиш миссияси – UNAMAдан 90 миллион доллар молиявий кўмак сўрагани ҳақида хабар қилган.

Қайд этилишича, Афғонистон электр энергияси учун Эрондан 25 миллион доллар, Тожикистондан 11,2 миллион доллар ва Ўзбекистондан 9,9 миллион доллар, Туркманистондан 5,1 миллион доллар қарз бўлиб қолган.

Вазирлик талабаларнинг уч ҳафталик таътилга чиқиши ҳақида тарқалган хабарларни рад этди

Олий ва ўрта махсус таълим вазирлиги Ўзбекистонда талабаларнинг 25 октябрдан эътиборан уч ҳафтага таътилган чиқиши хусусида ижтимоий тармоқларда тарқалган хабарларни рад этди.

Вазирлик ахборот хизмати ушбу хабар ҳеч қандай асосга эга эмаслиги урғулаб, “ижтимоий тармоқ фойдаланувчиларини fake (ёлғон, асоссиз) хабарларга ишонмаслик”ка чақирган.

Айни пайтда Олий ва ўрта махсус таълим вазирлиги ижтимоий тармоқ фойдаланувчиларини ёлғон хабар тарқатиш мамлакат Жиноят кодексининг 244-6 моддасига (“Ёлғон ахборот тарқатиш”) биноан жавобгарликка сабаб бўлишидан огоҳлантирган.

Ўзбекистон ва ИҲТ мулозимлари ўзаро ҳамкорлик истиқболларини муҳокама қилишди

Инвестициялар ва ташқи савдо вазири Сардор Умурзоқов ИҲТнинг бош котиби Хусрав Нозирий билан, Тошкент, 2021 йил 24 октябри

Инвестициялар ва ташқи савдо вазири Сардор Умурзоқов 24 октябрь куни президент сайловининг халқаро кузатувчиси сифатида Ўзбекистонда бўлиб турган Иқтисодий ҳамкорлик ташкилоти (ИҲТ) бош котиби Хусрав Нозирий билан учрашди. Бу ҳақда Инвестициялар ва ташқи савдо вазирлиги матбуот хизмати маълумот тарқатди.

Қайд этилишича, учрашувда мулозимлар Ўзбекистон ва ИҲТ ўртасидаги ҳамкорликнинг бугунги ҳолати ва уни чуқурлаштириш истиқболларини муҳокама қилганлар.

“Хусусан, ИҲТ ҳудудида савдо-иқтисодий алоқаларни мустаҳкамлаш, минтақа ичида саноат кооперациясини кенгайтириш, ўзаро сайёҳлик оқимларини кўпайтириш ва маданий-гуманитар лойиҳаларни амалга ошириш масалалари кўриб чиқилди”, дейилган вазирлик хабарномасида.

Иқтисодий ҳамкорлик ташкилоти иқтисодий, маданий, фан ва техникавий ҳамкорликни кўзда тутган ташкилот бўлиб, унинг қароргоҳи Эрон пойтахти Теҳронда жойлашган.

Даставвал Минтақавий ҳамкорликни ривожлантириш ташкилоти ўлароқ 1964 йилда Эрон, Покистон ва Туркия муассислигида қурилган мазкур бирлашма ўтган асрнинг 70-йилларида ички минтақавий савдо сусайиб кетгани ортидан ўз фаолиятини тўхтатган, 1985 йилдан эса Иқтисодий ҳамкорлик ташкилоти номи билан фаолиятини қайта бошлаган. Ўзбекистон 1992 йилда қўшилган мазкур ташкилотга бугунги кунда номлари юқорида зикр этилган мамлакатлардан ташқари Афғонистон, Озарбайжон, Тожикистон, Туркманистон, Қирғизистон ва Қозоғистон каби давлатлар аъзо. Ташкилот БМТ ва Ислом конференцияси ташкилотида кузатувчи мақомига эга.

Мирзиёев президент сайлови куни ИИВнинг бир гуруҳ ходимига орден ва медаль улашди

Шавкат Мирзиёев 25 октябрь — Ички ишлар органлари ходимлари куни муносабати билан бир гуруҳ ходимга мукофот берди. Унинг ИИВ ходимларини мукофотлашга оид фармонини президент матбуот хизмати 24 октябрь, яъни президент сайлови куни ёйинлади.

Фармон матнидан келиб чиқилса, мазкур ходимлар “ички ишлар органларидаги кўп йиллик самарали меҳнати, Ўзбекистонда жамоат хавфсизлиги, халқ осойишталигини таъминлаш, тинчлик ва барқарорликни мустаҳкамлашга қўшган муносиб ҳиссаси, жиноятчиликка қарши курашиш, ҳуқуқбузарликлар профилактикаси самарадорлигини ошириш, фуқароларнинг ҳуқуқ ва эркинликлари, қонуний манфаатларини ҳимоя қилиш йўлидаги ибратли фаолияти, шарафли бурчини бажаришда мардлик ва жасорат намунасини кўрсатгани, ёш авлодни она Ватанга муҳаббат ва садоқат руҳида тарбиялаш борасидаги алоҳида хизматлари учун, шунингдек, Ўзбекистон Республикаси Ички ишлар вазирлигининг ўттиз йиллиги муносабати билан” мукофотланган.

ИИВ ходимлари, жумладан, II даражали “Шон-шараф” ордени, “Мардлик” ордени, “Дўстлик” ордени, “Жасорат”, “Содиқ хизматлари учун”, “Шуҳрат” медаллари билан тақдирланишган.

Шу куни Ш. Мирзиёевнинг Ички ишлар органлари ходимлари ва фахрийларига табриги ҳам эълон қилинди.

МСК раиси давомат 80 фоиздан ошганини билдирди ва “сайлов бўлиб ўтган”ини яна таъкидлади

МСК раиси Зайниддин Низомхўжаев

Ўзбекистонда президент сайлови куни овоз бериш жараёнида иштирок этганлар сони 16 миллион 36 минг 914 нафарни ёки 80,8 фоизни ташкил этган. Бу ҳақда Марказий сайлов комиссияси раиси Марказий сайлов комиссияси раиси Зайниддин Низомхўжаев мамлакатдаги барча сайлов участкаларида овоз бериш якунланганидан кейин ўтказилган матбуот анжумани чоғида маълум қилди.

Сайлов кодексининг 96-моддасида, агар сайловда сайловчиларнинг камида 33 фоизи иштирок этган бўлса, у ҳақиқий деб ҳисобланиши белгиланганини қайд этган МСК раиси президент сайлови бўлиб ўтган ва ҳақиқий деб ҳисобланишини урғулаган.

Аслида сайлов кеча соат 11.00 ҳолатига кўраёқ “бўлиб ўтган”ини аввалроқ МСК раисининг ўринбосари Баҳром Қўчқоров эълон қилган эди.

Кейинроқ у МСК томонидан сайлов куни ўтказилган мониторинг натижалари баъзи сайлов участкаларида “оилавий” овоз бериш ҳолатлари қайд этилганини кўрсатаётганини эътироф этган.

“Таъкидлаш жоизки, кўрилган кенг тарғибот ва ташвиқот ишларига қарамасдан ушбу салбий амалиётдан ҳали-ҳануз тўлақонли воз кеча олмаганимизни кўрсатмоқда”, деган Б. Қўчқоров.

МСК раиси овоз бериш участкалари ёпилганидан сўнг ўтказилган брифинг чоғида ўтказилган президент сайловини “халқимизнинг улкан тарихий ютуғи” деб атаб, унинг дастлабки натижалари 25 октябрь куни соат 16:00 да эълон қилинишини билдирди.

Маълумотларга кўра, президент сайловини кузатган халқаро ташкилотлар вакиллари ҳам овоз бериш кунига оид дастлабки хулосаларини душанба куни соат 10.00 дан бошлаб МСКда бўлиб ўтадиган матбуот анжуманларида тақдим эта бошлайдилар.

Президент учун овоз бериш жараёни якунланди

Шавкат Мирзиёев оиласи билан сайлов участкасига келган пайтда олинган сурат.

Ўзбекистонда президент сайловида овоз бериш жараёни 20:00 да якунланди.Марказий сайлов комиссияси ҳозирча дастлабки натижаларни эълон қилгани йўқ. Дастлабки расмий маълумотлар 25 октябрь куни эълон қилиниши кутилмоқда.

Айни пайтда вақт тафовути туфайли хориж давлатлари, жумладан, Европа ва АҚШда ташкил этилган сайлов участкаларида овоз бериш давом этмоқда.

Марказий сайлов комиссияси соат 17:00 ҳолатига кўра, сайловчилардан 14 миллион 258 минг 780 нафари ёки 71.8 фоизи овоз берганини маълум қилган.

Марказий сайлов комиссияси раиси ўринбосари Бахром Қўчқоров овоз бериш жараёни бошланганидан уч соат ўтгач, яъни соат 11:00 да Ўзбекистон президентлигига сайлов бўлиб ўтгани тўғрисида баёнот берди.

Унга кўра, соат 11:00 гача рўйхатга олинган 19 миллион 859 минг 127 сайловчидан 6 миллион 669 минг 552 нафари ёки 33, 6 фоизи овоз берган.

Сайлов кодексининг 96 -моддасига мувофиқ, агар сайловчилар рўйхатига киритилган фуқароларнинг 33 фоизи овоз беришда иштирок этган бўлса сайлов ўтган ҳисобланади.

Қамоқхоналардаги маҳбуслар ва маҳкумлар президентлик сайловида овоз берди

Ўзбекистондаги тергов изоляторларида ва қамоқхоналарда сақланаётган маҳбуслар ҳамда маҳкумлар 24 октябрда ўтган президентлик сайловларида овоз бериш ҳуқуқидан илк маротаба фойдаланди. Бу ҳақда Ички ишлар вазири Пўлат Бобожонов Марказий сайлов комиссиясида ўтган брифингда маълум қилди.

Унга кўра, тергов изоляторлари ва қамохонларда сақланаётганларнинг 8677 нафари овоз бериш ҳуқуқига эга бўлган. Улар Жиноят кодексига асосан 3 йилгача ва эҳтиётсизлик оқибатида жиноят содир этгани учун 5 ва ундан кўпроқ йилга қамалган шахслардир.

Сайловда овоз берганларнинг 6819 нафари тергов ҳибсхоналарида сақланаётган маҳбуслардир.

Маҳбуслар ва маҳкумлар овоз бериши учун тергов ҳибсхоналарида 12 та, жазони ижро этиш колонияларида 4 та ва манзил-колонияларида 2 та, жами 18 та сайлов участкаси ташкил этилди.

Маҳбуслар ва маҳкумларнинг овоз бериш ҳуқуқи қайта тикланиши тўғрисида президент Шавкат Мирзиёев 2018 йилнинг 7 декабрида - Ўзбекистон Конституцияси қабул қилинган куннинг 26 йиллигига бағишланган анжумандаги чиқишида билдирган эди.

МСК Тошкент вақти билан соат 11 да президентлик сайлови бўлиб ўтгани тўғрисида баёнот берди

Марказий сайлов комиссияси раиси ўринбосари Бахром Қўчқоров Тошкент вақти билан соат 11:00 ҳолатига кўра, Ўзбекистон президентлигига сайлов бўлиб ўтгани тўғрисида баёнот берди.

“Ўзбекистон Республикаси Сайлов кодексининг 96 -моддасига мувофиқ, агар сайловчилар рўйхатига киритилган фуқароларнинг 33 фоизи овоз беришда иштирок этган бўлса сайлов ўтган ҳисобланади. Ўзбекистон Республикаси Президенти сайловини ўтказувчи Участка ва округ сайлов комиссияларидан олинган маълумотларга эътибор қаратсак соат 11- 00 га қадар сайловчиларнинг 6 миллион 669 минг 552 нафари ёки 33, 6 фоизи овоз берди. Демак жорий сайловлар ўтган деб ҳисобланади ва бу билан барча сайлов жараёни иштирокчиларини табриклаймиз”,-деди Бахром Қўчқоров Марказий сайлов комиссиясида ўтказилган брифинг чоғида.

Аввалроқ Марказий сайлов комиссияси раиси Зайниддин Низомхўжаев президентлик сайловининг овоз бериш жараёнида қонунбузарлик ҳолатлари қайд этилмаганини ва сайлов “демократик тамойилларга асосланган ҳолда” ўтаётганини иддао қилди.

Марказий сайлов комиссияси 24 октябрь соат 9:00 гача рўйхатга олинган 19 миллион 859 минг 127 сайловчидан 2 миллион 439 минг 291 нафари, ёки 12,3 фоизи овоз берганини билдирган эди.

Президентлик сайловида соат 9:00 гача сайловчиларнинг 12,3 фоизи овоз берди

Ўзбекистон Марказий сайлов комиссиясининг билдиришича, соат 9:00 гача сайловчиларнинг 12,3 фоизи овоз бериб бўлди.

Марказий сайлов комиссияси билдирувида таъкидланишича, рўйхатга олинган 19 миллион 859 минг 127 сайловчидан 2 миллион 439 минг 291 нафари, ёки 12,3 фоизи овоз берган.

Соат 9 гача сайловчиларнинг фаоллиги Фарғона вилоятида (16,9 фоиз) ва Андижон вилоятида (16,1 фоиз) кузатилди.

Энг оз кўрсаткич Тошкент шаҳрида (7,2 фоиз), Навоий вилоятида (8,1 фоиз) ва Тошкент вилоятида (8,6 фоиз).

МСК раиси сайлов “демократик тамойиллар асосида ўтаётгани”ни иддао қилди

Марказий сайлов комиссияси раиси Зайниддин Низомхўжаев. МСК фотоси.

Ўзбекистон Марказий сайлов комиссияси раиси Зайниддин Низомхўжаев президентлик сайловининг овоз бериш жараёнида шу соатгача қонунбузарлик ҳолатлари қайд этилмаганини ва сайлов “демократик тамойилларга асосланган ҳолда” ўтаётганини иддао қилди.

Маҳаллий матбуотнинг билдиришича, овоз бериш жараёнининг биринчи соатларидаги ҳолат юзасидан журналистларга ахборот берган Зайниддин Низомхўжаев сайловни 971 халқаро кузатувчи, партиялардан 53 700, фуқароларнинг ўзини ўзи бошқариш органларидан 10 700 кузатувчи кузатиб бораётганини, жараённи маҳаллий ва хорижий ОАВларнинг 1670 вакили ёритаётганини айтган.

24 октябрь куни эрталаб соат 8:00да мамлакатдаги 10 761 та сайлов участкасида сайлов бошланди. Бундан ташқари дунёнинг 37 та мамлакатида 54 та сайлов участкаси ташкил этилди.

“Токио ва Сеулда Тошкент вақти билан эрталаб соат 04:00 да бошланган овоз бериш жараёни 25 октябрь куни Тошкент вақти билан соат 06:00 да Нью-Йоркда якунланади”, — деди расмий.

Унга кўра, сайловчиларнинг умумий сони 19 миллион 859 минг 127 кишини ташкил этмоқда.

Тошкент – Москва “Агроэкспресс”и ноябрдан қатнай бошлайди. Лойиҳага Қозоғистон ҳам қўшилди

Тошкентдан Москвага “Агроэкспресс” поезди ноябрь ойининг ўрталаридан қатнай бошлайди. Мазкур лойиҳага Қозоғистон ҳам қўшилди. Бу ҳақда 23 октябрь куни Тошкентда ўтган матбуот анжуманида Бош вазир ўринбосари – инвестициялар ва ташқи савдо вазири Сардор Умрзоқов маълум қилди.

Вазирнинг айтишича, биринчи поезд Москвага Ўзбекистондан сарҳил мева ва сабзавотларни элтиб беради.

Умрзоқов мазкур лойиҳага Қозоғистон ҳам қўшилганини, қишлоқ хўжалик маҳсулотлари дастлаб Қозоғистонга ва Қозоғистондан Россияга етказиб берилишини таъкидлади.

Унга кўра, бундай тизим маҳсулотларнинг Россияга тез ва самарали етказилишини таъминлайди.

Айни пайтда “Агроэкспресс” Москвадан Тошкентга буғдой, ун ва гўшт маҳсулотларини олиб келади.

Сентябрнинг охирларида Россия Иқтисодий тараққиёт вазирлиги “Агроэкспресс” лойиҳаси ноябрь ойида синов қатновини амалга ошириши ва декабрь ойидан эса тўлиқ ишга туширилиши тўғрисида маълум қилганди.

Коронавирус юқтириш ҳолатлари бўйича Тошкент шаҳри олдинда бормоқда

Ўзбекистонда коронавирус инфекцияси қайд этилганлар сони 183 569 кишига етди.

Ўзбекистонда 23 октябрь куни яна 380 киши коронавирусга чалинди. Соғлиқни сақлаш вазирлигининг билдиришича, Сурхондарё вилоятидан ташқари барча ҳудудларда коронавирусга чалиниш ҳолатлари қайд этилди.

Янги касалланиш ҳолатлари бўйича биринчи учликда Тошкент шаҳри (108 бемор), Тошкент вилояти (104 бемор) ва Самарқанд вилояти (36 бемор) бормоқда.

23 октябрь ҳолатига кўра, Ўзбекистонда коронавирус инфекцияси қайд этилганлар сони 183 569 кишига етди.

Сўнгги бир сутка ичида 2 бемор вафот этди ва расман коронавирусдан ўлганлар сони камида 1304 кишини ташкил қилмоқда. Беморлардан 179 222 нафари соғайди.

Президент сайловида овоз бериш жараёни бошланди

Ўзбекистонда 24 октябрь куни соат 8:00 дан президент сайловлари бошланди. Барча сайлов участкаларида овоз бериш жараёни 20:00гача давом этади.

Сайловда беш номзод: Экология партиясидан Нарзулла Обломурадов, “Адолат” партиясидан Баҳром Абдуҳалимов, Либерал-демокрталар партиясидан Шавкат Мирзиёев, Халқ демократик партиясидан Мақсуда Ворисова ва “Миллий тикланиш” партиясидан Алишер Қодиров иштирок этмоқда.

Номзодларнинг барчаси жорий ҳукумат сиёсатини маъқуловчилардир.

Ўзбекистондаги президентлик сайловини кузатаётган Европада хавфсизлик ва ҳамкорлик ташкилоти (ЕХҲТ) Демократик институтлар ва инсон ҳуқуқлари бўйича бюросининг кузатувчилар миссияси оралиқ ҳисоботида номзодлар ўртасида рақобат йўқ, юзма-юз мунозара кураши кўзга ташланмайди, деб билдирган.

Аввалроқ Марказий сайлов комиссияси 14–20 октябрь кунлари 421 618 нафар сайловчи муддатидан олдин овоз бергани ҳақда маълум қилди.

Ўзбекистонда картошка бир ҳафтада 43 фоизга қимматлади

Мева ва сабзавот бозоридаги аҳволни кузатиб борадиган East Fruit нашри ўтган бир ҳафта ичида Ўзбекистонда картошканинг ўртача улгуржи нархи 43 фоизга ошгани ҳақда хабар қилди.

2021 йил 14 октябрдан 21 октябргача бўлган даврда Ўзбекистонда картошканинг ўртача улгуржи нархи 3500 дан 5000 сўмга кўтарилган.

Ҳозирги нархлар даражаси эса 2020 йилнинг худди шу санаси билан таққослаганда 39% ва 2019 йилнинг шу даврига нисбатан 2, 2 баравар юқоридир.

Ўзбекистон Олий Мажлисининг Қонунчилик палатаси депутатлари 19 октябрь куни озиқ -овқат нархининг кўтарилишини жиловлаш учун ҳукумат бир қатор озиқ -овқат маҳсулотлари, жумладан, картошка импорти ва сотилишига ҚҚСни бекор қилишни маъқуллаган эди.

Қуйи палата депутатлари томонидан қабул қилинган ҳужжатга мувофиқ, жорий йилнинг 10 октябридан 31 декабригача гўшт (мол гўшти, қўй гўшти, товуқ гўшти), тирик ҳайвонлар (қорамол ва парранда) ва уларни сўйишдан олинган маҳсулотлар, картошка ҳамда музлатилган балиқни Ўзбекистон ҳудудига олиб кириш, шунингдек уларни реализация қилиш бўйича айланмалари ҚҚСдан озод қилинади.

Ўзбекистонда паловдан ташқари деярли барча таомлар картошка солиб пиширилади. Шу сабабдан унинг нархи кўтарилиши кўп оилаларни танг аҳволга солиб қўйиши тайин.

Давомини ўқинг

XS
SM
MD
LG