Линклар

Шошилинч хабар
25 ноябр 2020, Тошкент вақти: 07:36

Ўзбекистон хабарлари

Янги йилдан офатлар оқибатида ҳужжатини йўқотганлар жазога тортилмайди. Ҳужжатлар давлат ҳисобидан тикланади

Сирдарё вилоятида Сардоба тўғони ёрилгани оқибатида минглаб уйларни сув босган ва минглаб кишилар ҳужжатларини йўқотган эди.

Адлия вазирлигининг 23 октябрда билдиришича, “Фавқулодда вазиятлардан жабр кўрган фуқароларни ижтимоий ҳимоя қилишнинг қўшимча чоралари тўғрисида”ги Президент қарори қабул қилинди.

Қарорга мувофиқ, 2021 йил 1 январдан Ўзбекистон ва хорижий давлатда табиий ва техноген хусусиятли фавқулодда вазиятлар, шу жумладан маиший тусдаги офатлар юз берганлиги оқибатида жисмоний шахсларнинг йўқотилган ёки яроқсиз ҳолга келган ҳужжатларини тиклашда улар давлат божи ва йиғимлардан озод қилинади.

Офатлар юз берганлигини тасдиқлаш зарурати туғилганда, ҳужжатни тиклаш ваколати бўлган давлат органининг сўровига асосан Фавқулодда вазиятлар вазирлиги томонидан маълумотнома берилади.


Хориждаги офат туфайли ҳужжатини йўқотганларга эса хорижий давлат ваколатли идоралари томонидан берилган ва легаллаштирилган ёки апостиль қўйилган ёхуд халқаро шартномаларга мувофиқ расмийлаштирилган маълумотнома асосида ҳужжатлари қайта тикланади.


Ўзбекистон ҳудудида офатлар юз берганлиги оқибатида ҳужжатларни тиклаганлик учун ундирилмаган тўловлар, мазкур ҳолатлар юзасидан айбдор шахслар (ташкилотлар) мавжуд бўлса, кейинчалик улардан регресс тартибида ундирилади.


Офатлар юз берганлиги оқибатида жисмоний шахсларнинг ҳужжатлари йўқотилса ёки яроқсиз ҳолга келса, уларга нисбатан жазо чоралари қўлланилмайди.

Кун янгиликлари

Мирзиёев ўтказган видеоселекторда учта туман ҳокимини ишдан олиш масаласи қўйилди

Ўзбекистон президенти Шавкат Мирзиёев

Ўзбекистон президенти Шавкат Мирзиёев раислигида 24 ноябрь куни бўлиб ўтган видеоселектор йиғилишида Бухоро, Жондор ва Сирдарё туман ҳокимларини лавозимидан озод этиш масаласи қўйилган.

Президент матбуот хизмати маълумотига кўра, бунга ҳокимларнинг иш ўринлари ташкил этиш, тадбиркорлар муаммоларини ҳал қилиш ва уларни қўллаб-қувватлаш борасида ўзибўларчиликка йўл қўйгани сабаб бўлган.

Йиғилишда Ёзёвон, Учтепа, Шофиркон ва Бекобод туманларида фаол тадбиркорларни кўпайтириш бўйича ишлар ҳам танқид қилинган. Иқтисодий тараққиёт ва камбағалликни қисқартириш вазирлигига бундай жойларда тадбиркорларга ҳар томонлама кўмак бериш бўйича “бизнес-патронаж” тизимини йўлга қўйиш топширилган.

Пандемия даврида вақтинча ишламай турган 96 мингта корхона ўз фаолиятини тиклагани айтилиб, қолган бизнес субъектларига ҳам бу борада кўмаклашиш муҳимлиги таъкидланган.

Ҳудудларда тадбиркорларни ер масаласи кўп қийнаётгани, бу борада кўплаб мурожаатлар бўлаётгани кўрсатиб ўтилган.

Йиғилишда, шунингдек, жойларда инфратузилмани яхшилаш масаласига эътибор қаратилган. Ривожланишдан орқада қолаётган 22 та туман учун инвестиция дастури доирасида 264 миллиард сўм, бошқа ҳудудлар учун қўшимча 736 миллиард сўм йўналтирилиши қайд этилган.

Тадбиркорликни ривожлантириш бўйича ҳокимларнинг ҳисоботини маҳаллий кенгашларда муҳокама қилиб, фаолиятига баҳо бериш, шунингдек, 2021 йил учун аниқ режаларни белгилаш муҳимлиги урғуланган.

Ўзбекистондаги лабораторияларда Хитой вакцинаси сифати текширилмоқда

Ўзбекистонда Хитой вакцинаси клиник тадқиқотларининг биринчи ва иккинчи босқич ҳужжатлари экспертизаси ҳамда унинг сифат назорати текширувлари ўтказилмоқда. Бу ҳақда Фармацевтика тармоғини ривожлантириш агентлиги маълум қилди.

Аввал хабар қилганимиздек, октябрь ойида Инновацион ривожланиш вазирлиги коронавирусга қарши рекомбинант вакцинанинг клиник синовларини Ўзбекистонда ташкил этиш масаласи бўйича Хитой Фанлар Академияси Микробиология институти ва “Anhui Zhifei Longcom Biopharmacyeutical” компанияси вакиллари билан музокаралар ўтказган эди.

Қайд этилишича, Инновацион ривожланиш вазирлигининг Илғор технологиялар маркази томонидан сифат назорати текширувларини ўтказиш учун тақдим қилинган вакцина, плацебо намуналари ва тегишли стандартлар ҳамда реагентлар 19 ноябр куни Фармацевтика тармоғини ривожлантириш агентлиги ҳузуридаги Давлат маркази томонидан қабул қилинган.

Айни пайтда эса Давлат марказининг Фармакология қўмитаси томонидан мазкур вакцина клиник тадқиқотларининг биринчи ва иккинчи босқич ҳужжатлари экспертизаси, шунингдек, “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКнинг Вакцина, зардоб препаратлари ва микробиологик таҳлил лабораторияси, Дори воситалари сифатини назорат қилиш ва стандартлаштириш лабораторияси ҳамда Фармако-токсикологик лабораторияда вакцинанинг сифат назорати текширувлари ўтказилмоқда.

Хитойда ишлаб чиқарилган вакцина синови "оғир оқибатлар" келтириб чиқаргани сабаб тўхтатил Бразилияда тўхтатилган.

Ўтган ҳафта Озодлик Ўзбекистонда Хитойнинг коронавирусга қарши вакцинаси синовининг учинчи босқичини ўтказишга тайёргарлик кўрилаётгани, вакцина 5 минг кўнгиллида синаб кўрилиши ҳақида хабар қилган.

Аввалроқ инновацион ривожланиш вазири Иброҳим Абдураҳмонов “Халқ сўзи” нашрига берган суҳбатида Ўзбекистонда Хитой, Россия, Европа ва АҚШ вакциналарини синовдан ўтказиш режаланганини билдирган эди.

Давстатқўм хорижга сотилган олтин миқдорини икки ойдан бери ўзгаришсиз қолдирмоқда

Жорий йилнинг январь-октябрь ойлари мобайнида Ўзбекистон хорижга 5 миллиард 804 миллион 400 минг долларлик олтин экспорт қилган. Бу маълумот Давлат статистика қўмитаси матбуот хизмати томонидан ёйинланган “Ўзбекистон Республикаси ташқи савдо айланмаси”га оид галдаги ҳисоботида акс этган.

Маълумотларга кўра, ўтган йилнинг шу даврида мамлакат 4 миллиард 43 миллион 500 минг долларлик олтин экспорт қилган. Бундан бу йил Ўзбекистон ўтган йилгига қараганда 1 миллиард 760 миллион 900 минг долларга кўпроқ олтин сотгани маълум бўлади.

Эътиборли жиҳати шуки, Давстатқўм хорижга сотилган олтин миқдорини август ойидан бери ўзгаришсиз қолдирмоқда. Аммо янги ҳисоботда қўмита томонидан бунга изоҳ берилган эмас.

Айни пайтда, ҳисоботдан маълум бўлишича, жорий йилнинг ўтган 10 ой ичида Ўзбекистоннинг ташқи савдо айланмаси (ТСА) жами 30 миллиард 59 миллион 400 минг долларга тенг бўлган. Бу ўтган йилнинг шу даврига нисбатан қарийб 4 миллиард 250 миллион долларга камдир.

ТСА бўйича Ўзбекистоннинг асосий ҳамкорлари ичида Хитой 1-ўринни, Россия 2-ўринни, Қозоғистон эса 3-ўринни эгаллаган.

Тошкентда йўловчи ташийдиган автобус ёниб кетди

Тошкентда ёниб кетган автобуслардан бири (иллюстратив сурат)

Тошкент кичик ҳалқа йўлида 24 ноябрь тонгида 116-сонли йўналишли ёниб кетган.

Фавқулодда вазиятлар вазирлиги маълумотига кўра, ҳодиса маҳаллий вақт билан соат 06:13 да содир бўлган. Ёнғин автобус ҳайдовчиси илк йўловчиларни олиб кетиш мақсадида автотураргоҳдан терминал станциясига қараб чиқиб кетаётган пайтда бошланган.

Воқеа жойига 4 дақиқадан сўнг етиб борган Тошкент шаҳар Фавқулодда вазиятлар бошқармаси ёнғин-қутқарув гуруҳлари ёнғинни соат 06:39 га бориб тўлиқ бартараф этишга муваффақ бўлишган.

Ҳодиса чоғида автобус салонида бирорта ҳам йўловчи бўлмагани учун ҳеч ким жабрланган эмас, ҳайдовчи ҳам аланга авж олишидан олдин автобусни тарк этишга улгурган. Автобус ёниб кетишига двигатель бўлинмасидаги қисқа туташув сабаб бўлгани тахмин қилиняпти.

ФВВ ёниб кетган автобус русумига аниқлик киритмаган. Ўтган йили Тошкентда автобус ёниб кетиши ҳолатлари кўпайиши ортидан ҳукумат Мercedes Benz русумидаги 2008 йилгача ишлаб чиқарилган автобусларни маршрут йўналишларидан олиб ташлаш ҳақида кўрсатма берганди.

Самарқандда хотинига памперс едирган йигитга 8,5 йил қамоқ жазоси сўралди

Иллюстратив сурат.

Жиноят ишлари бўйича Самарқанд шаҳар судида прокурор хотинини памперс ейишга мажбурлаган Ш.К. га 8,5 йил қамоқ жазоси сўраган.

“Дарё” нашри хабарига кўра, судья Зарифа Аҳмедова раислигида 23 ноябрь куни бўлиб ўтган суд мажлисида томонларга музокара учун сўз берилган.

Маҳкамада давлат айбловчиси вазифасини бажараётган Самарқанд шаҳар прокурори ўринбосари Умид Ҳакимов судланувчи Ш.К. томонидан қилинган жиноятлар оғир эканини эътиборга олиб, суддан унга 8,5 йил озодликдан маҳрум қилиш жазоси белгилашни сўраган.

Судланувчи музокара сўзида, барчадан, шу жумладан турмуш ўртоғидан ҳам кечирим сўрашини билдириб, жазони ўтагандан сўнг ҳам турмуш ўртоғи билан бирга яшаш нияти борлигини маълум қилган.

Жабрланувчи Мустаҳкам Ваҳобова эса турмуш ўртоғи Ш.К. билан бирга яшашга рози эмаслиги, мазкур воқеа эри ва бошқаларга сабоқ бўлиши лозимлигини қайд этган.

Самарқандлик 25 ёшли М. Ваҳобованинг эри томонидан аёвсиз калтакланганига оид видео шу йил ёзида ижтимоий тармоқларда қизғин муҳокамаларга сабаб бўлганди. Маҳаллий блогер ва журналистлар билан суҳбатда аёл эри уни анча йиллардан бери таҳқирлаб келгани ҳамда унга мажбурлаб 3 кунлик “памперс” едирганини айтиб берганди.

Мазкур иш юзасидан маҳкама 1 декабрда давом этиши кутилмоқда.

Ишга жойлаш эвазига 30 минг доллар талаб қилган бандликка кўмаклашиш маркази директори ушланди

Раҳбар келишилган пулнинг 10 минг долларини олаётганда қўлга тушган.

Бектемир туман аҳоли бандлигига кўмаклашиш маркази директори М.А., Бош прокуратура ҳузуридаги Иқтисодий жиноятларга қарши кураш департаменти томонидан ўтказилган тезкор тадбир доирасида қўлга олинди. Бу ҳақда Бош прокуратура 24 ноябрь куни хабар берди.

Расман билдирилишича, аҳоли бандлигига кўмаклашиш маркази директори М.А., юқори лавозимдаги танишлари орқали Ш.А.,нинг турмуш ўртоғини Тошкент шаҳридаги туғруқхоналардан бирининг раҳбарлигига тайинланишига кўмаклашишни ваъда қилган.

М.А., бунинг учун Ш.А.,дан 30 000 доллар пора талаб қилган. У келишилган пулнинг 10 минг долларини олаётганда қўлга тушган.

“Мазкур ҳолат юзасидан М.А.,га нисбатан Жиноят кодексининг 168-моддаси 3-қисми ва 28, 211-моддаси билан жиноят иши қўзғатилиб, тергов ҳаракатлари ўтказилмоқда”,-дейилади хабарда.

Савдо марказида содир этилган қотилликни видеога олиб тарқатганлар қамалди

Самарқанд шаҳри Мирзо Улуғбек кўчасида жойлашган савдо марказида 20 ноябрь куни юз берган қотилликни видеога олиб, ижтимоий тармоқларда тарқатган уч нафар шахс қўлга олинди.

Самарқанд вилояти ИИБ ахборот хизматининг 23 ноябрда билдиришича, қўлга олинганларга нисбатан тегишли тартибда маъмурий баённомалар расмийлаштирилиб, профилактик тушунтириш ишлари олиб борилди. Самарқанд шаҳар маъмурий ишлар бўйича суди томонидан учала йигитга нисбатан маъмурий қамоқ жазоси тайинланди.

Расмий билдирувда уч йигит қанча муддатга қамалгани аниқ айтилган эмас.

Маъмурий жавобгарлик тўғрисидаги кодексда 189-1 ва Жиноят кодексида 130-1-моддалар мавжуд бўлиб, зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш учун жавобгарлик белгиланган.

Жорий йилнинг 20 ноябрь куни тахминан 18:00 да 42 ёшли эркак Мирзо Улуғбек кўчасида жойлашган савдо марказида хотини ва унинг жазмани экани тахмин қилинаётган шахсни пичоқлаб қўйган эди. Жабрланганлар кўп қон йўқотиши натижасида воқеа жойида вафот этган.

Бош прокуратура жиноятни содир этган шахс қўлга олинганини ва унга нисбатан Жиноят кодексининг 97-моддаси 2 қисми «а» и «ж» бандлари (икки ёки ундан ортиқ шахсни ўта шафқатсизлик билан қасддан ўлдириш) бўйича жиноят иши қўзғатилгани тўғрисида хабар берган.

Ўзбекистон ҳар бир фуқарога бир дозадан коронавирусга қарши вакцина сотиб олмоқчи

Канада ҳар бир фуқаросига деярли 10 дозадан вакцина сотиб олмоқчи.

Ўзбекистон ҳар бир фуқароси учун Covid-19га қарши бир дозадан вакцинага буюртма берди. Бу ҳақда The Economist нашри маълум қилди.

Нашр CОVID-19 вакцинасини сотиб олишга буюртма берган давлатлар рўйхатини эълон қилган. Ўзбекистон мазкур рўйхатда Хиндистон, Бразилия, Лотин Америкаси давлатлари ва Индонезия билан бир қаторда жойлашган. Бу давлатларнинг барчаси ҳар бир фуқароси учун бир дозадан вакцинага буюртма берган.

Рўйхат бошидан жой олган Канада ҳар бир фуқаросига деярли 10 дозадан, Австралия ва Британия ўртача 6 дозадан, АҚШ ва Европа давлатлари 3 дозадан, Япония ва Непал 2 дозадан вакцинага буюртма берган.

Ўзбекистон Жаҳон соғлиқни сақлаш ташкилотининг коронавирусга қарши вакциналаш халқаро механизмига қўшилган.

Айни пайтда Ўзбекистон Хитойда ишлаб чиқарилган коронавирусга қарши вакцина синовининг учинчи босқичида иштирок этиб, уни беш минг кўнгиллида синаб кўришга тайёргарлик кўрмоқда.

Аввалроқ 2021 йилнинг июнига қадар Ўзбекистонда аҳолининг 60 фоизини коронавирусдан эмлашни режалаштирилаётани маълум қилинган эди.

Фавқулодда вазиятлар вазирлиги ходимлари уйма-уй юриб печкаларни ўнглашмоқда

Ўтган қиш мавсумида 73 киши ис газидан вафот этгани билдирилган эди.

Фавқулодда вазиятлар вазирлиги ходимлари ис газидан заҳарланишнинг олдини олиш мақсадида уйма-уй юриб, тушунтириш ишларини олиб бормоқда. Бу ҳақда Ахборот ва оммавий коммуникациялар агентлигида 23 ноябрь куни ўтган брифингда вазирлик матбуот котиби Мурод Содиқов маълум қилди.

Расмийнинг таъкидлашича, шу кунларда ис газидан заҳарланишнинг олдини олиш мақсадида республика бўйлаб 812 та ишчи гуруҳ ташкил этилган.

“Улар уйма-уй юриб, иситиш тизимида қандай камчилик аниқланса керакли идораларга маълум қилишмоқда. Шунингдек, иситиш печларида камчилик аниқланса, мутахассислар ёрдамида бартараф этилмоқда”,-деб билдирди Мурод Содиқов.

Ўзбекистонда қиш мавсумида ҳар йили юзлаб одамларнинг ис газидан заҳарланиши катта муаммо бўлиб қолмоқда.

Бош прокуратура 20 ноябрда бир кун ичида 9 киши ис газидан заҳарлангани ҳақида маълум қилган эди.

Наманган вилояти Чортоқ шаҳар, Мустақиллик кўчасида яшаган 25 яшар ногирон йигит Ҳикматилла Юсупов 18 ноябрь куни ис газидан вафот этди.

30 октябрда ис газидан Навоий вилояти Навбаҳор туманида икки нафар вояга етмаган ака-ука, 22 октябрь куни Хоразм вилоятининг Янгиариқ тумани Остона қишлоғида бир оиланинг тўрт аъзоси, 28 октябр куни Фарғона вилояти Қўқон шаҳрида бир оиланинг уч аъзоси ис газидан заҳарланиб вафот этган.

Фавқулодда вазиятлар вазирлиги 2019/2020 йил куз-қиш мавсумида 55 ҳолатда ис газидан заҳарланиш қайд этилгани, уларда 75 киши жабрлангани ва 73 киши вафот этганини билдирган эди.

Расман: Қибрайдаги портлаш газ қувури сифатсиз монтаж қилингани оқибатида юз берди

Газ портлаган уйлардан бири.

Тошкент вилояти Қибрай туманида икки кишининг ўлимига сабабчи бўлган портлаш газ қувурининг монтаж ишлари ўта сифатсиз амалга оширилганлиги оқибатида юз берди. Бош прокуратуранинг хабар беришича, мазкур ҳодиса юзасидан жиноят иши қўзғатилди.

“Тошкент вилояти прокуратураси ўтказган терговга қадар текширишда газ чақнаши юз берган уй ёнида ўрнатилган юқори босимли газ тақсимлаш мосламаси (ГТМ)га уланган ва еростидан ўтказилган полиэтилен газ қувурининг монтаж ишлари ўта сифатсиз амалга оширилганлиги аниқланган”,-дейилади расмий хабарда.

Бош прокуратуранинг маълум қилишича, бунинг оқибатида уйга яқин оралиқдаги ер остидаги полиэтилен газ қувурининг уланиш қисмида ёриқ юзага келиб, ундан табиий газ сизиб чиқиб, хонадон ертўласида тўпланган ва ўз навбатида газ чақнаши содир бўлган.

Мазкур ҳолат юзасидан 2020 йил 23 ноябрь куни Тошкент вилояти прокуратураси томонидан ЖКнинг 258-моддаси (Тоғ-кон, қурилиш ёки портлатиш ишлари хавфсизлиги қоидаларини бузиш) билан жиноят иши қўзғатилди.

Озодлик радиоси 22 ноябрь куни Тошкент вилояти Қибрай туманидаги Гулистон-3 кўчаси, 15-уйда соат 19:16 ларда газ портлагани оқибатида икки киши-ота ва ўғил ҳалок бўлгани ҳақида хабар берганди.

Афғонистонлик талабаларни Ўзбекистонда ўқитиш бўйича меморандум имзоланди

Афғонистонлик толибалар

Афғонистон ҳукумати делегациясининг Тошкентга ташрифи доирасида 20 ноябрь куни икки давлат Олий таълим вазирликлари ўртасида афғон талабаларини Ўзбекистонга таълим олиш учун юбориш тўғрисида ўзаро англашув меморандумини имзолаш маросими бўлиб ўтган. Бу ҳақда Инвестициялар ва ташқи савдо вазирлиги маълумот тарқатди.

Қайд этилишича, имзоланган ҳужжатда ҳар икки мамлакат олий ўқув юртлари ўртасидаги ҳамкорлик, жумладан ўқув материаллари билан алмашиш, таълим тадбирларида икки давлат мутахассисларининг ўзаро иштирокини таъминлаш, илмий-тадқиқот ишларида ҳамкорлик қилиш ҳамда илмий журналларда мақолаларни биргаликда тайёрлаш шартлари ва тартиби белгиланган.

Айни пайтда Сурхондарё вилоятининг Термиз туманида афғонистонликларни ўқитиш маркази фаолият юритмоқда. 2018-2019 ўқув йили давомида марказда 96 нафар талаба “Ўзбек тили ва адабиёти” йўналиши бўйича таҳсил олиб, барчаси Алишер Навоий номидаги Тошкент давлат ўзбек тили ва адабиёти университети бакалаври даражасига эга бўлишган.

Бугунги кунда марказда 172 нафар афғонистонлик талаба таҳсил олмоқда. Улардан 119 нафари “Ўзбек тили ва адабиёти” йўналиши бўйича, 35 нафари “Ерусти транспорт тизимлари ва уларнинг эксплуатацияси” йўналиши бўйича, 18 нафар эса “Акушерлик, гинекология ва ҳамширалик иши” йўналиши бўйича ўқияпти.

Инвестициялар ва ташқи савдо вазирлиги маълумотига кўра, шу йил декабрида Европа Иттифоқи молиявий кўмаги асосида Афғонистондан яна 10 нафар талабанинг қишлоқ хўжалиги йўналишида таҳсил олиш учун Ўзбекистонга келиши режаланган.

Кейинги йил баҳоридан рақамли маркировкасиз алкоголь ва тамаки маҳсулотлари Ўзбекистонга киритилмайди

2021 йил 1 мартидан рақамли маркировка қилинмаган алкоголь ва тамаки маҳсулотларини Ўзбекистон ҳудудига олиб кириш тақиқланади. Бу ҳақда Вазирлар маҳкамасининг шу йил 20 ноябридаги 737-сонли қарорида қайд этилган.

Ҳужжатга мувофиқ, рақамли маркировка қилиниши лозим бўлган маҳсулотларни маркировкалаш тартиби жорий этилган санадан бошлаб 12 ой ўтгандан кейин Ўзбекистон ҳудудида маркировкасиз сотиш тақиқланади.

Қарор билан 2020 йил 1 декабригача “Asl belgisi” маҳсулотларни рақамли маркировкалаш ва кузатиб бориш миллий ахборот тизими жорий қилинади.

Қайд этилишича, идентификация воситалари ёрдамида рақамли маркировка қилиниши лозим бўлган маҳсулотлар айланмаси тўғрисидаги маълумотларни йиғиш ва қайта ишлашни автоматлаштириш “Asl belgisi” МАТнинг асосий вазифаларидан ҳисобланади.

АҚШ долларининг расмий курси беш ҳафтадан бери ошиб бормоқда

Ўзбекистон Марказий банки жорий йил 24 ноябридан валюталарнинг сўмга нисбатан янги қийматини белгилади.

МБ маълумотига кўра, сешанбадан АҚШ долларининг расмий курси ўтган ҳафтага нисбатан 23 сўм 93 тийинга кўтарилиб, 10 минг 414 сўм 86 тийинни ташкил этади (ўтган ҳафта доллар курси 12 сўм 5 тийинга юқорилаб, 10 минг 390 сўм 93 тийин бўлган эди). Бу АҚШ доллари расмий курсининг Ўзбекистонда кетма-кетига бешинчи марта ошишидир.

Қайд этиш лозимки, долларнинг расмий курси илк бор 10 минг 400 сўмдан қимматламоқда.

Евронинг расмий курси эса олдинги курсга нисбатан 50 сўм 18 тийинга ошиб, 12 минг 344 сўм 73 тийинга тенг бўлади (ўтган ҳафта евро курси 27 сўм 26 тийинга пасайиб, 12 минг 294 сўм 55 тийин бўлган).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

Тошкентда шаҳарлараро автобус қатнови қайта тикланади

“Тошкент” автовокзалидан шаҳарлараро автобус қатнови 24 ноябрдан қайта тикланади. Бу ҳақда автовокзал матбуот хизмати ўз телеграм-канали орқали маълумот тарқатди.

Маълум қилинишича, сешанба куни “Тошкент” автовокзалидан 17 шаҳарга автобуслар йўл олади. Чипталар нархи 24 минг сўмдан 120 минг сўмгача белгиланган.

Пойтахт Тошкент билан Ўзбекистоннинг бошқа ҳудудлари ўртасида автобус қатнови ноқулай об-ҳаво шароити туфайли 19 ноябрдан тўхтатиб қўйилганди. Аввалроқ “Ўзгидромет” бир неча кун оралиғида айрим жойларда музламалар кузатилиши, ҳатто кўчки тушиши мумкинлигидан огоҳлантирган.

Шикоятлар ортидан “Ўзгидромет” ходимлари ойлиги икки баравар ошириладиган бўлди

Газ ва электр таъминотида узилишлар кузатилаётган шу кунларда об-ҳаво шароитига оид ҳар қанақа маълумот ўзбекистонликлар учун муҳим бўлиб турибди.

Кейинги йил бошидан Ўзбекистон Гидрометеорология хизмати маркази ходимларининг ойлик маоши икки баравар оширилади. Бу ҳақда мамлакат президентининг томонидан куни кеча имзоланган “Ўзбекистон Республикаси гидрометеорология хизмати фаолиятини янада такомиллаштириш чора-тадбирлари тўғрисида”ги қарорда айтилган.

Ҳужжатга мувофиқ, Ўзгидромет ҳузуридаги “Метеоинфосистем” ахборот-техник бошқармаси негизида “Гидрометеорологияда ахборот технологияларини ривожлантириш маркази” давлат муассасаси (Метеоинфоком) ташкил этилади.

Қарорда қайд этилишича, 2021 йил 1 январидан Ўзгидромет ва Метеоинфоком ходимларининг лавозим маошларини ҳисоблашда Ягона тариф сеткаси бўйича меҳнатга ҳақ тўлашнинг тасдиқланган разрядлари учун белгиланган тариф коэффициенти икки баравар оширилган ҳолда қўлланилади.

Ўзгидромет ва Метеоинфоком ходимларига соҳада узоқ муддат хизмат қилгани учун қуйидаги миқдорда ойлик устама ҳақ тўланади [белгиланган устамаларни ҳисобга олган ҳолда лавозим маошига нисбатан коэффициентларда]:

2 йилдан 5 йилгача — 0,2; 5 йилдан 10 йилгача — 0,3; 10 йилдан 15 йилгача — 0,4; 15 йилдан 20 йилгача — 0,5; 20 йилдан 25 йилгача — 0,6; 25 йилдан ортиқ — 0,7.

Ўзгидромет мутасаддилари маош камлиги туфайли малакали ходимлар ишдан бўшаб кетаётганидан шикоят қилгани ҳақида Озодлик жорий ой бошида хабар қилганди.

Хизмат мутасаддилари маълумотига кўра, бугунги кунда Ўзгидромет ходимларининг ўртача иш ҳақи 1,3 млн сўм, ҳудудий бошқармаларда 1,2 млн сўм, туман ва шаҳарлардаги кузатув бўлинмаларда 800 минг сўмни ташкил этади. Бу эса республикадаги ўртача кўрсаткичдан деярли икки баравар кам.

Мазкур шикоят ортидан президент Шавкат Мирзиёев гидрометеорология хизмати фаолиятини такомиллаштириш бўйича устувор вазифалар юзасидан йиғилиш ўтказган. Мазкур йиғилишда соҳа ходимларининг ойлик маошини ошириш ва узоқ муддатли хизмат учун устама тўлаш тизимини жорий этиш бўйича кўрсатмалар берилган эди.

Жаҳон банки дастури доирасида Орол денгизи минтақасидаги ерни қайта тиклаш лойиҳаси эълон қилинди

Орол денгизининг бугунги ҳолати.

Жаҳон банки раҳбарлигида амалга оширилаётган Марказий Осиё сув-энергетика дастури доирасида Орол денгизи минтақасидаги ерни қайта тиклаш бўйича илғор технологиялар халқаро танлови эълон қилинди.

Расман билдирилишича, мазкур лойиҳа Жаҳон банки, Европа Иттифоқи, Швейцария ва Британия ҳукуматлари томонидан молиялаштирилади ҳамда Қозоғистон-Германия университети, Глобал ландшафт форуми ва Plug and Play томонидан амалга оширилади.

Танловда иштирок этиш учун олимлардан ва мутахассислардан аризалар қабул қилиш жараёни бошланди.

Жаҳон банкининг бу борадаги расмий билдирувида “Орол денгизи 30 йил давомида сув ресурсларидан турли экинлар, жумладан, пахта ва гуруч етиштириш учун фойдаланилгани натижасида деярли йўқ бўлиб кетгани” айтилади.

Орол денгизи қуриши оқибатида Ўзбекистонда ва Қозоғистонда чўлланиш ва ерларнинг таназзули кучайиб бормоқда.

“Марказий Осиё сув-энергетика дастури доирасида эълон қилинган танлов Орол денгизи минтақасидаги маҳаллий экотизимларга салбий таъсирни юмшатиш учун фойдаланиладиган илғор инновацион ечимларни жалб қилишга ёрдам беради. Шунингдек, танловда минтақа ерларини барқарор иқтисодий ривожлантириш учун зарур бўлган ечимларга эътибор қаратилади”,-дейилади хабарда.

Андижон вилоят ҳокимининиг аудиоси монтаж экани иддао қилинди. Уни тарқатганлар қидирилмоқда

Андижон вилояти ҳокими Шуҳрат Абдураҳмонов.

Андижон вилоят ҳокими Шуҳрат Абдураҳмоновнинг ижтимоий тармоқларда тарқатилган ҳақоратли сўзлар ишлатилган аудиоси монтаж эканини вилоят ҳокимлиги матбуот хизмати расмий баёнотда маълум қилди.

Баёнотда таъкидланишича, мазкур аудиоёзувлар 2 йил муқаддам ёзиб олинган ва ижтимоий тармоқларда тарқалган. Матбуот хизматининг иддао қилишича: “Бир гуруҳ ижтимоий тармоқ фойдаланувчилари томонидан аудиоёзувлар ижтимоий тармоқлардан кўчириб олиниб, ғаразли мақсадда ҳайп” қилинмоқда.

“Соҳа мутахассисларини жалб қилган ҳолда тарқалган аудиоёзувларни ўрганиш ишлари олиб борилди. Ўрганиш давомида шу маълум бўлдики, аудиоёзувлар “алоҳида мутахассислар” ёрдамида турли хил аудиоёзувлардан кесиб олиб, монтаж қилинганлиги маълум бўлди”,- дейилади расмий баёнотда (Расмий баёнотдан иқтибос ҳеч қандай таҳрирсиз, стилистик, орфографик тузатишларсиз кўчирилди-муҳаррир).

Андижон вилоят ҳокимлиги матбуот хизматининг иддао қилишича, бундан мақсад “Андижон вилояти ҳокимига нисбатан ахборий ҳужумлар уюштириш”, вилоятда бўлаётган ўзгаришларга нисбатан “холисона фикр билдираётган журналистлар ҳамда фуқароларнинг муносабатларини бошқа тарафга йўналтириш, вилоят ҳокими ҳамда тадбиркорлар ўртасида сунъий тўсиқларни юзага келтириш”дан иборатдир.

“Ушбу аудиоёзувларни кенг оммага тарқатиш ортида шахсга доир маълумотларни қонунга хилоф равишда йиғиш, тизимлаштириш, сақлаш, ўзгартириш, тўлдириш, улардан фойдаланиш, уларни бериш, тарқатиш, узатиш, эгасизлантириш ва йўқ қилиш учун кўзда тутилган жазо чоралари кучайтирилганлигини инобатга олган ҳолда мазкур ҳолатлар юзасидан ҳуқуқни муҳофаза қилувчи ташкилотлар томонидан дастлабки суриштирув ишлари амалга оширилмоқда”,-дейилади расмий баёнотда.

International Job Organization хусусий бандлик агентлиги директори иши судга оширилди

International Job Organization офиси. ИИВ Тергов департаменти фотосурати.

International Job Organization хусусий бандлик агентлиги раҳбари устидан суд бошланди. Бу ҳақда жиноят ишлари бўйича Шайхонтоҳур туман судига таянган ҳолда Kun.uz хабар берди.

Мазкур иш доирасида 2620 нафар фуқаро жабрланувчи деб топилган. Уларга етказилган зарар 18,5 миллиард сўмга яқин. Дастлабки тергов даврида бу зарарнинг 591 миллион сўмигина қопланган.

5 август куни ИИВ ҳузуридаги Тергов департаменти International Job Organization агентлиги раҳбари –1993 йилда Қирғизистонда туғилган, айни пайтда эса фуқаролиги бўлмаган Шерзод Абдураҳмонов қамоққа олингани ҳақида билдирганди.

“Агентлик раҳбари одамларни Кореяга ва Европага ишга жўнатишни ваъда қилган. Агентликнинг барча вилоятларда ўз бўлимлари бўлган. Фуқароларнинг ҳар биридан 45 миллион сўмдан олган агентлик раҳбари ўз ваъдасини бажармаган”,-деб билдирган Тергов департаменти.

2019-2020 йиллар давомида Озодлик радиоси қатор хусусий бандлик агентликлари ўзбекистонликларни алдагани тўғрисидаги мақолаларни эълон қилган. Бунинг ортидан уларнинг айримлари фаолияти тўхтатилган, айримларига нисбатан эса жиноят ишлари очилган.

Ўқувчиларни совуқда юпун кийимда байроқ хилпиратишга олиб чиққанлар ишдан олинди

Бу воқеа Андижондаги 43-мактабда юз бергани билдирилмоқда. Блогер Нозим Сафарининг телеграм каналидан олинган сурат.

Андижон шаҳрида совуқда ўқувчиларни юпун кийимда байроқ хилпиратишга олиб чиққан 43-умумтаълим мактабининг директори ва директор ўринбосари ишдан олинди. Бу ҳақда Андижон вилояти халқ таълими бошқармаси 23 ноябрь куни маълум қилди.

Хабарда айтилишича мазкур ҳолат юзасидан ташкил этилган ишчи гуруҳи мазкур ҳолат 19 ноябрь куни “Янги Ўзбекистон - Янгича дунёқараш” шиори остида ўтказилган тадбир пайтида кузатилганини аниқлаган.

Ишчи гуруҳ болалар суратга олиш вақтида 2-3 дақиқагина ташқарида бўлишганини, сўнг устозлари томонидан танаффус вақти тугамасдан синф хоналарига кирганларини билдирган.

Расмий баёнотда айтилишича, она-оналар мактаб ва ўқитувчиларга бу масалада ҳеч қандай эътирозлари йўқлигини айтишган.

Шунга қарамай 43-умумтаълим мактабининг директори ва директор ўринбосари ишдан олинган.

22 ноябрь куни ижтимоий тармоқларда Aндижон шаҳридаги 43-мактаб ўқувчилари юпун кийинган ҳолда байроқ кўтариб маҳаллий амалдорларни кутиб олаётгани акс этган фотосурат тарқалган эди. Фотосуратда иссиқ кийимдаги бир эркак ва бир аёлни кўриш мумкин.

"Кўча жуда совуқ. Энди тасаввур қилинг шу изғиринда курткасиз, ёш болага қанчалик совуқ. Шу тарғиботингизни иссиқроқ кунларга қолдирсангиз бўларди. Одамни қадри бўлмаса ҳам болаларни қадрлайлик", — деб ёзди блогер Нозим Сафари.

“Газета.uz”нинг ёзишича, Ўзбекистон Халқ таълими вазирлиги матбуот хизмати вазир Шерзод Шерматов илгари барча мактаб директорлари ва ҳудудий халқ таълими бўлимлари раҳбарларини бундай ҳолатларга йўл қўймаслик тўғрисида қатъий огоҳлантирганини билдирган.

Аммо вазирлик огоҳлантирилганига қарамай, бундай ҳолатга йўл қўйган расмийларга нисбатан қандай чора кўрилиши ҳақида билдирмади.

Электр таъминотидаги узилишлар ортидан фермерлар ўн минглаб доллар зарар кўрмоқда

Энергетика вазирлиги электр қувватига талабнинг ошгани таъминотдаги узилишларнинг асосий сабаби эканини билдирган.

Қашқадарё вилоятининг Яккабоғ туманида электр таъминотида уч кун узилиш бўлгани ортидан тадбиркорнинг 6000 товуғи ўлди. Самарқанд вилояти Каттақўрғон туманида эса фермер бир кунда 35 минг доллар зарар кўрди. Бу ҳақда ижтимоий тармоқларда блогерлар маълум қилди.

Яккабоғлик блогер Камил Фахрутдиновниниг билдиришича, туманда 18 ноябрдан 20 ноябргача чироқ бўлмаган. Бунинг оқибатида тадбиркор Абдунаби Ғиёсовнинг 5200та товуғи ўлиб қолган.

Тадбиркор “Дарё” нашрига 22 ноябрга келиб, ўлган товуқлари сони 6 мингтага етганини айтди.

Блогер Ҳусан Комилжонов тадбиркор вазирликка мурожаат қилганидан сўнг унга электр токи берилганини ва туманда электр энергияга киритилган чеклов камайганини билдирган.

«Troll.uz» Telegram-каналининг хабар беришича, Самарқанд вилояти Каттақўрғон туманида чироқ ўчиши ортидан иссиқхоналардан биридаги сабзавотлар нобуд бўлди. Фермер кўрган зарарнинг тахминий миқдори 35 минг долларни ташкил қилмоқда.

Бундан ташқари, Тошкент вилояти Тошкент туманидаги туғруқхонада ҳам электр таъминотида узилишлар бўлгани ижтимоий тармоқ фойдаланувчилари томонидан танқид қилинган.

Энергетика вазирлиги ҳавонинг совиб кетиши натижасида электр қувватига талабнинг ошганини ва айни мана шу ҳолат энергияси таъминотидаги узилишларнинг асосий сабаби эканини билдирган.

Аҳолидан "истеъмол саватчаси"ни шакллантириш бўйича сўровда қатнашиш сўралди

Сабзавотлар растаси, Тошкентдаги бозорлардан бири.

Ўзбекистон истеъмолчилар ҳуқуқларини ҳимоя қилиш жамиятлари федерацияси "истеъмол саватчаси" кўламини аниқлаш учун сўров эълон қилди.

Сўровда иштирокчилардан нон, гўшт, сабзавот, мева ва бошқа маҳсулотларни бир кун, уч кун ёки бир ҳафта ичида қанчадан истеъмол қилиши сўралган.

Бундан ташқари, бошқа зарур истеъмол моллари бўйича эҳтиёжни аниқлаш учун саволлар берилган.

19 ноябрь куни эълон қилинган сўровдан йиғилган маълумотлар миллий «истеъмол саватчаси» лойиҳасини ишлаб чиқишда инобатга олиниши айтилган.

Иқтисодиёт ва саноат вазирлиги Ўзбекистонда "истеъмол саватчаси" ҳажмини аниқлаш бўйича методология ишлаб чиқилганини 2019 йилнинг декабрида маълум қилган эди.

Ўшанда саватчага тахминан 50 турдаги озиқ-овқат маҳсулоти киритилиши айтилган, хизмат турлари келтирилмаган эди. Қиёс учун АҚШда 300, Буюк Британияда 350, Германияда эса 470 турдаги маҳсулот ва хизмат киритилган.

"Истеъмол саватчаси" - муайян вақт давомида (ой, йил) бир инсон ёки оила истеъмол қиладиган зарурий маҳсулотлар, товарлар ва хизматлар жамланмасининг энг кам миқдорини белгилайди.

Вазирлик: бандлик агентлигига четга жўнатган мижозларидан хизмат ҳақи олиш тақиқланди

Хусусий бандлик агентлигидан ҳаққини талаб қилаётган ўзбекистонликлар, 17 сентябрь, 2020

Бандлик ва меҳнат муносабатлари вазирлиги, хусусий бандлик агентликларига хорижга ишга жўнатаётган мижозларидан хизмат ҳақи олишни тақиқлади.

Ташқи миграция масалаларига бағишланган Сенат махсус қўмитаси йиғилишида вазирнинг биринчи ўринбосари Эркин Муҳиддинов эндиликда хусусий бандлик агентликлари ишлайдиган янги тартиб ҳақида маълумот берди.

Йиғилишда вазир ўринбосари "Хусусий бандлик агентликлари тўғрисида"ги қонунга ўзгартиш ва қўшимчалар киритилганини маълум қилди.

Ўзгаришларга биноан, хусусий бандлик агентликлари томонидан хорижга ишга жўнатаётган шахслардан бевосита хизмат ҳақи ундирилмайди, аксинча, агентликларга бу ҳақни хориждаги иш берувчи тўлаб бериши лозим бўлади.

"Масалан, хусусий бандлик агентликлари фуқаролардан хорижда ишга жойлаштиргани учун пул олиш тақиқланди. Улар фақат консултация хизматини кўрсатгани учун базавий ҳисоблаш миқдорининг бир бараварида (тахминан 223 минг сўм – таҳр.) ҳақ олиши мумкин", деб изоҳ берди мулозим Kun.uz нашрига.

Расмийга кўра, хорижга ишга жойлаш бўйича тегишли лицензияни қўлга киритиш учун агентликлар 185 минг АҚШ доллари миқдорида захира пулини кўрсатиши лозим. Муқаддам бу сумма 50 минг АҚШ долларини ташкил қилган.

Бундан ташқари, ҳар бир ўзбекистонлик билан агентлик тузган шартнома вазирликнинг ахборот тизимида ҳисобга қўйилиши айтилмоқда.

Бандлик ва меҳнат муносабатлари вазирлиги сўнгги 18 ой ичида лицензияси бекор қилинган хусусий бандлик агентликлари сони 50 тага етгани тўғрисида хабар берган.

Ўзбекистонда хусусий бандлик агентликлари фаолиятига 2018 йил 15 октябрда рухсат берилган эди.

Ўшандан бери ўзбекистонликларни хорижда ишга жойлаштириш ваъдасини бериб, улардан йиғилган миллиард сўмлаб маблағларни ўзлаштириб юборгани ортидан қатор агентликларга нисбатан жиноят ишлари очилган, уларнинг раҳбарлари турли муддатларга қамалган.

Электр таъминоти бўйича Ўзбекистон-Афғонистон келишуви тафсилотлари маълум бўлди

Ўзбекистон Афғонистонга 10 йил давомида электр энергияси етказиб бериш бўйича эришилган битим доирасида Сурхон-Пол-Хомри электр узатиш линиясини қуриш ишлари бошланган.

Бу ҳақда афғон расмийлари Тренд нашрига маълум қилган.

Афғон расмийларига кўра, дастлабки икки йил давомида Ўзбекистондан Афғонистонга 4, 25 миллиард кВт / соат электр энергиясини етказиб бериш ва кейинги 8 йил давомида 6 миллиард кВт / соат электр энергиясини етказиб бериш режалаштирилган.

Сурхон-Пол-Хомри электр узатиш линияси 260 километрни ташкил этади, унинг 45 километри Ўзбекистон ҳудудидан, 215 километри Афғонистон ҳудудидан ўтади.

Электр тармоқларини қуриш тўғрисидаги битим 2017 йил декабр ойида Афғонистон Президенти Ашраф Ғанининг Ўзбекистонга ташрифи чоғида имзоланган эди.

Лойиҳанинг умумий қиймати 150 миллион долларни ташкил этади, шундан 118 миллион доллари Афғонистон томонидан, 32 миллион доллари эса Ўзбекистон томонидан йўналтирилади.

Ўзбекистондаги инқироз

Афғонистон билан электр энергияси етказиб бериш бўйича эришилган битим тафсилотлари Ўзбекистонда ҳаво ҳарорати кескин пасайиб кетган ва мамлакат бўйлаб электр таъминотида узилишлар кўпайган пайтда окшор қилинмоқда.

20 ноябрь куни Ўзбекистон Энергетика вазирлиги таъминотдаги узилишларга совуқ об-ҳаво туфайли электр энергияси истеъмолининг кескин ортиши сабаб бўлганини айтган.

Вазирликка кўра, қисқа муддатли узилишлар тизимдаги катта аварияларнинг олдини олишга имкон беради.

Вазирлик, шунингдек, "электр энергиясига бўлган эҳтиёжнинг кескин ортиши кузатилган пайтда ҳатто ривожланган мамлакатларда ҳам истеъмол ва ишлаб чиқариш ўртасидаги энергия балансини таъминлаш жуда қийин вазифа бўлиб қолаётганлиги"ни айтган.

Ўзбекистон расмийлари ўтган йилларда ҳам шу каби изоҳларни беришган, аммо ҳукумат доиралари ва парламентда энергетика инқирозининг асл сабаблари ҳамда уларни ҳал қилиш юзасидан муҳокамалар йўқ.

Аҳолини газ ва электр билан таъминлаш масаласи Олий Мажлис палаталарининг 20 ноябрь куни ўтган қўшма мажлисида ҳам муҳокама қилинган, аммо Сенат бу масалада Энергетика вазирлиги ва бошқа масъул идораларга сўров йўллаш ҳақидаги қарор билан чекланган.

Ўзбекистон ташқи ишлар вазири Комилов Вашингтонда музокаралар ўтказди

АҚШ Давлат котиби Майк Помпео шу йил феврал ойида Тошкентга борганида ўзбекистонлик ҳамкасби Комилов билан учрашган эди.

Ўзбекистон Ташқи ишлар вазири Абдулазиз Комилов бошчилигидаги делегация 20 ноябр куни Вашингтонда АҚШ-Ўзбекистон сиёсий маслаҳатлашувларининг навбатдаги раундида қатнашган.

АҚШ делегациясига Жанубий ва Марказий Осиё масалалари бўйича Давлат котиби ёрдамчисининг биринчи ўринбосари Дин Томпсон бошчилик қилган.

Мулоқот якуни бўйича эълон қилинган қўшма баёнотда айтилишича, томонлар АҚШ ва Ўзбекистон ўртасида стратегик шерикликни ривожлантириш зарурлигини қайд этганлар.

Қўшма Штатлар ўз навбатида Ўзбекистонда инсон ҳуқуқлари, қонун устуворлигини таъминлаш, мажбурий меҳнатга қарши кураш, матбуот эркинлиги, таълим ва бошқа соҳалардаги ислоҳотларни қўллаб-қувватлашга тайёр эканлигини билдирган.

"Америка Қўшма Штатлари Ўзбекистоннинг инсон ҳуқуқларини ҳимоясини яхшилаш, мажбурий меҳнатга қарши курашиш, диний эркинликларни кенгайтириш бўйича ислоҳотларни амалга оширишдаги ҳаракатларини қўллаб-қувватлайди, Ўзбекистоннинг 2021−2023 йилларда БМТнинг Инсон ҳуқуқлари бўйича кенгашига сайланишини мамнуният билан қабул қилади", дейилган Вашингтондаги учрашув бўйича эълон қилинган қўшма баёнотда.

2019 йилда АҚШнинг Ўзбекистонга ёрдам дастури деярли 100 миллион долларга ўсди, бу 2016 йилга нисбатан 10 баравар кўпдир.

Қўшма Штатлар ёшларнинг етакчилик қобилиятини кучайтириш, инглиз тили ўқитишни рағбатлантиришга қаратилган лойиҳаларни қўллаб-қувватлашга тайёрлиги, АҚШнинг "Тинчлик корпуси" кўнгиллиларининг Ўзбекистонга кириши учун йўл очилиши зарурлигини ҳам билдирган.

Қўшма баёнотда, шунингдек, Америка Қўшма Штатлари сиёсий, иқтисодий, таълим, соғлиқни сақлаш, хавфсизлик, маданий ва бошқа соҳаларда алоқаларни қўллаб-қувватлаши, Ўзбекистоннинг мустақиллиги, суверенитети ва ҳудудий яхлитлигини дастаклаши ҳам таъкидланган.

Вашингтондаги мулоқот чоғида томонлар халқаро терроризм, экстремизм, одам савдоси ва трансмиллий жиноятчилик жиддий таҳдид эканини таъкидлаб, минтақавий хавфсизликни таъминлаш учун яқин ҳамкорлик муҳимлигини қайд этишган.

Қўшма Штатлар бу йил трансмиллий уюшган жиноятчиликка қарши курашиш, қонун устуворлиги ва коррупцияга қарши ташаббусларни дастаклаш учун 9 миллион доллардан ортиқ молиявий ёрдам кўрсатмоқчи эканлигини маълум қилган.

Фарғонада "электр узилишига йўл қўйган" мансабдорларга иш қўзғатилди

Фарғона вилоят прокуратураси 3 соатдан 28 соатгача электр узилишлари кузатилаётган ҳудудларда электр тармоқлари мансабдорларига нисбатан маъмурий иш қўзғатганини маълум қилди.

Прокуратура билдирувига кўра, сўнгги уч кун давомида Қува туманида 3 соатдан 28 соатгача, Қўштепада кунига 3−7 соатгача, Фурқатда 9 соатгача, Марғилон шаҳар, Бешариқ, Тошлоқ, Ўзбекистон, Олтиариқ ва Ёзёвонда 4 соатгача, Бағдод 3 соатгача, Риштон, Бувайда ва Данғарада 5 соатгача, Учкўприкда 2 соатгача узилишлар кузатилган.

"Ушбу ҳолатлар юзасидан вилоят, туман ва шаҳар электр тармоқлари корхоналари мансабдор шахсларига нисбатан Маъмурий жавобгарлик тўғрисидаги Кодексининг 198-моддаси 1-қисмида (ҳокимият вакилининг қонуний талабларини бажармаслик) ифодаланган ҳуқуқбузарлик аломатлари билан маъмурий жавобгарлик тўғрисида иш қўзғатилди", - дейилади Фарғона прокуратураси билдирувида.

Ўзбекистоннинг айрим ҳудудларида ҳаво ҳарорати пасайиши билан электр таъминотида узилишлар ҳар йили рўй беради.

Энергетика вазирлиги Ўзбекистонда электр энергияси таъминотидаги узилишларнинг асосий сабаби ҳавонинг совиб кетиши натижасида электр энергияси истеъмолининг кескин ортиши эканлигини маълум қилган.

Давомини ўқинг

XS
SM
MD
LG