Харьков вилоятида Россия ҳарбий карвони тасвирлари очиқланди
Maxar Technologies ширкати 10 апрель куни Украинанинг Харьков вилояти бўйлаб ҳаракатланаётган Россия ҳарбий техникасининг 12 чақиримли карвони акс этган сунъий йўлдош тасвирларини эълон қилди.
Тасвирларда ҳарбий машиналар Харьковдан шарқ томонда жойлашган Большой Бурлук қишлоғи орқали жанубга йўналганини кўриш мумкин.
Ҳарбий техника катта эҳтимол билан Изюм шаҳрига йўл олган: Ғарб разведкасига кўра, Россия бу ерда Украина Қуролли кучларининг Донбасс гуруҳини қуршовга олиш мақсадида куч тўпламоқда. Яна бир ҳужум жануб томондан амалга оширилиши кутиляпти.
Австрия канцлери Путин билан учрашиш учун Москвага боради
Австрия канцлери Карл Нехаммер 11 апрель куни Москвага бориб, Россия президенти Владимир Путин билан учрашади. У Россиянинг Украинага ҳужуми бошланган 24 февралдан буён Москвага келаётган европалик лидерларнинг биринчисидир. Канцлер ташрифини Кремль матбуот котиби Дмитрий Песков тасдиқлаган.
Нехаммер журналистларга Путин билан Россиянинг Украина билан мулоқоти имкониятлари ҳамда Украинада содир этилган ҳарбий жиноятлар ҳақида сўзлашмоқчи эканини билдирган.
Шанба куни Нехаммер Киевда Украина президенти Владимир Зеленский билан музокаралар ўтказган. У мазкур ташриф чоғида Россия хуружини қоралаб, Украинага сиёсий ва гуманитар дастак ваъда қилган.
Австрия НАТОга кирмаган нейтрал мамлакат бўлиб ҳисобланади, у Украинага қурол-аслаҳа етказиб бераётгани йўқ.
Маълумотларга кўра, канцлер Нехаммернинг Москвага ташрифи Европа Иттифоқи лидерлари билан келишилган ҳолда амалга оширилмоқда.
Москвада пикетга чиққан “Мемориал” раҳбари қўлга олинди
Москванинг Қизил майдонида яқинда Россия расмийлари қарори билан тугатилган “Мемориал” инсон ҳуқуқлари маркази раҳбари Олег Орлов тутиб кетилди.
У майдонга “Ҳақиқатни билишни истамаслигимиз ва индамай турганимиз бизни содир этилаётган жиноятлар шеригига айлантириб қўяди” деб ёзилган плакат билан чиққан эди. Ҳуқуқбон полициячилар томонидан “Китай-город” ички ишлар бўлимига олиб кетилган.
“Мемориал” вакиллари қайдича, бу ҳуқуқбоннинг сўнгги пайтларда тўртинчи бор қўлга олинишидир. Уни ҳуқуқий жиҳатдан ҳимоя қилиш ишига адвокат Михаил Бирюков кўмаклашмоқда.
“Мемориал” ҳуқуқбонлик маркази ўтган йил охирида Москва суди қарори билан ёпилган.
Youtube "Дума" каналини блоклади
Youtube видеохостинги Давлат думаси фаолиятини ёритувчи "Дума" телеканали аккаунтини блоклади.
“Сизнинг аккаунтингиз экспорт чекловлари ва санкцияларни қўллаш бўйича бизнинг қоидаларимизга мувофиқ бутунлай ўчириб қўйилди”, — дейилади Youtube баёнотида.
Google матбуот хизматининг "Интерфакс"га изоҳича, Давлат думаси каналининг блокланиши санкциялар ва савдо қоидалари тўғрисидаги қонун ҳужжатларига риоя қилиш билан боғлиқ.
Украинада уруш бошланганидан кейин Қўшма Штатлар ўзларини "ЛХР" ва "ДХР" деб атовчи айирмачиларнинг мустақиллигини тан олишни ёқлаб овоз берган Давлат Думасининг 328 депутатига алоҳида санкциялар киритди.
"Дума ТВ" канали ўзини парламент телевидениеси деб билади. Унда депутатларнинг шарҳлари, Давлат Думаси мажлислари ва муаллифлик дастурлари бериб борилади.
Каналнинг 145 000 обуначиси борлиги айтилади.
Россия Ташқи ишлар вазирлиги расмий вакили Мария Захарова ўзининг Телеграм-каналида Youtube қарорини изоҳлар экан, видеохостингни Россияда блоклашга чақирди.
"Афтидан, Youtube ўзи устидан ҳукмни ўқиган", - деди Захарова.
Роскомнадзор Давлат Думаси каналига киришни тиклашни талаб қилди,