Италия Киевдаги элчихонаси фаолиятини тиклайди
Италия ташқи ишлар вазири Луижи Ди Маё шанба куни Киевдаги Италия элчихонаси фаолияти Пасха байрамидан кейин тикланишини маълум қилди.
“Шаҳардан охирги бўлиб чиқдик ва биринчилардан бўлиб қайтамиз”, деди Ди Маё.
Италия элчиси Ғарб дунёси урушни тўхтатиш учун Россия президенти Владимир Путинга дипломатик босимни кучайтириши кераклигини қўшимча қилди.
Туркия уруш бошланганидан кейин Украина пойтахтига дипломатик миссиясини қайтарган биринчи давлат бўлди.
11 мартдан бошлаб элчихона ходимлари Черновцида эди, бироқ 6 апрель куни Туркия ҳукумати уларни Киевга қайтишини эълон қилди.
БМТ: Қарийб 4 ярим миллион киши Украинани тарк этган
Уруш бошланганидан бери 4,4 миллиондан ортиқ киши Украинани тарк этган.
Бу ҳақда БМТ қочқинлар бўйича идораси 9 апрель куни маълум қилди.
Ташкилотга кўра, қочқинларнинг аксарияти - 2, 5 миллиондан ортиқ киши Польшага ўтган.
Руминияга 671 минг, Венгрияга 413 минг, Молдовага 406 минг, Россияга 373 минг, Словакияга 307 минг, Чехияга 300 минг ва Беларусга 19 минг киши қочган.
Россиянинг Украинага қарши уруши бошланганидан бери, БМТ Инсон ҳуқуқлари бўйича Олий комиссари бошқармаси маълумотларига кўра, Украинада 1626 киши ҳалок бўлган, 2267 киши яраланган.
2022 йил бошида Украина аҳолиси 41 миллион кишини ташкил этган.
Байден Россия ва Беларусга қарши қўшимча санкцияларни қўлловчи икки қонунни имзолади
АҚШ президенти Жо Байден Украинага босқин муносабати билан Россия ва Беларусга қарши қўшимча санкциялар қўллашни кўзда тутувчи иккита қонун лойиҳасини имзолади.
Шулардан бири "Россия нефтининг импортини тўхтатиш тўғрисидаги қонун", Россиядан АҚШна энергия маҳсулотларини олиб киришни тақиқлайди,
Байден имзолаган яна бир қонун "Россия ва Беларус билан нормал савдо алоқаларини тўхтатиш тўғрисидаги қонун"дир.
Россия ва Беларусга қарши санкцияларни янада кучайтиришга қаратилган бу икки
қонун лойиҳалари бир кун аввал АҚШ Конгресси томонидан маъқулланган эди.
BBC: Суриядаги урушда қатнашган генерал Украинадаги рус қўшинларига қўмондонлик қилади
Россия Украинадаги қўшинлари қўмондонлигини қайта ташкил этмоқда.
Украинадаги рус қўшинларига энди Суриядаги операцияларида катта тажриба орттиргани айтилаётган, Жанубий ҳарбий округ қўмондони генерал Александр Дворников бошчилик қилади.
Бу ҳақда BBC Ҳарбий ҳаво кучлари манбаларига таяниб хабар берди.
Россия қўшини Украинага бостириб кирганида улар ўртасида мувофиқлаштириш ёмонлиги кузатилган. Энди уни яхшилашга Дворников масъул бўлиши айтилмоқда.
Александр Дворников 2000 йилдан 2003 йилгача Россия Федерациясининг Шимолий Кавказ ҳарбий округида штаб бошлиғи, кейинчалик моторли милтиқ дивизияси қўмондони сифатида хизмат қилган.
2015 йил сентабридан 2016 йил июнигача у Россия қуролли кучларининг Суриядаги гуруҳига қўмондонлик қилган. 2016 йилда Дворников Россия Федерацияси Қаҳрамони унвонини олган.