Европа Иттифоқи ҳарбий жиноятларда айбланаётган Россияга қарши янги санкциялар жорий этмоқчи
Европа Иттифоқи Украина пойтахти яқинидаги Буча шаҳрида Россия армияси тинч аҳолини қатлиом қилгани тўғрисидаги хабарлар ортидан Москвага нисбатан янги санкциялар пакетини тайёрламоқда.
Франция президенти Эммануэль Макрон ЕИга Россиядан нефть ва газ сотиб олишни тўлиқ тўхтатишни таклиф этмоқда.
Россияга қарши янги санкциялар ЕИ расмийлари томонидан 6 апрель куни муҳокама қилинади. Польша Бош вазири Матеуш Моравецкий ЕИга аъзо давлатлар лидерларининг шошилинч саммитини ўтказиш ташаббусини кўтарди.
Польша Бош вазирига кўра, Россияга нисбатан янги санкциялар жорий этилишига асосан Германия қарши чиқмоқда. Айни пайтда Германия канцлери Олаф Шольц Бучадаги оммавий қатлиом ортидан Москвага нисбатан санкциялар кучайтирилишига қарши эмаслигини айтди.
3 апрель куни Россия армияси тарк этган Буча шаҳрида тинч аҳолидан камида 400 киши ўлдирилгани аниқланган эди. Бироқ Москва қатлиомга алоқадор эмаслигини, бу Киев томонидан уюштирилган провокация эканини иддао қилмоқда.
Европа Иттифоқи Бучадаги қатлиом учун маъсулиятни Россия зиммасига юклади
Европа Иттифоқи Украинанинг Буча ва бошқа шаҳарларидаги оммавий қатлиомларни кескин қоралади ва бу жиноятлар учун масъулият Россия ҳукумати зиммасида эканини таъкидлади.
“Тинч фуқаролар орасида кўплаб одамларнинг ҳалок бўлгани ва яралангани, шунингдек, фуқаровий инфраструктуранинг вайрон этилиши Россия Украина ва унинг халқига нисбатан шафқатсиз уруш олиб бораётганини кўрсатиб турибди. Украинанинг Буча ва бошқа шаҳарларидаги оммавий қатлиомлар Европа заминида содир этилган ваҳшийликлар рўйхатига киритилади”,- дейилади ЕИ баёнотида.
ЕИ мазкур қотилликлар учун Россия ҳукумати масъул эканини, чунки қатлиомлар Россия ҳарбийлари мазкур шаҳарларни эгаллаб турган пайтда содир этилганини таъкидлади.
“Ҳарбий ва бошқа жиноятларни содир этганлар, давлат амалдорлари ва қўмондонлар жавобгарликка тортилади”,-дейилади баёнотда.
Аввалроқ Украина томони Буча шаҳрида камида 400 киши рус ҳарбийлари томонидан ўлдирилгани тўғрисида баёнот берди.
Учинчи апрель куни журналистлар ва Украина расмийлари Киев яқинидаги Буча шаҳри кўчаларида ҳалок бўлган ўнлаб одамнинг жасади топилгани ҳақида хабар қилишган. Мақтулларнинг кўпи фуқаро кийимида бўлган, улардан айримларининг қўллари боғланган эди. Жасадлар шаҳарни икки ҳафта мобайнида оккупация қилган россиялик ҳарбийлар Бучадан чиқиб кетганидан кейин топилган.
Аввалроқ Россия Мудофаа вазирлиги жасадлар тўғрисидаги хабарлар ва фотосуратларни “провокация” деб атаган. Маҳаллий турғунлар ва Украина расмийлари тинч аҳоли вакиллари ўлимида россиялик ҳарбийларни айблашяпти ҳамда бу ерда халқаро текширув ўтказиб, айбдорларнинг жазоланишини талаб қилишмоқда.
Россия Бучадаги воқеалар юзасидан БМТ Хавфсизлик кенгаши мажлиси чақирилишини сўради
Россия Украинанинг Буча шаҳрида содир бўлган воқеалар юзасидан 4 апрель куни БМТ Хавфсизлик кенгашининг ошиғич мажлиси ўтказилишини сўради. Бу ҳақда Россия Федерациясининг БМТдаги доимий вакили муовини Дмитрий Полянский маълум қилди. Россиялик мулозим Бучада содир бўлган воқеаларни “украиналик радикалларнинг мудҳиш провокацияси” деб атаган.
Учинчи апрель куни журналистлар ва Украина расмийлари Киев яқинидаги Буча шаҳри кўчаларида ҳалок бўлган ўнлаб одамнинг жасади топилгани ҳақида хабар қилишган. Мақтулларнинг кўпи фуқаро кийимида бўлган, улардан айримларининг қўллари боғланган эди. Жасадлар шаҳарни икки ҳафта мобайнида оккупация қилган россиялик ҳарбийлар Бучадан чиқиб кетганидан кейин топилган.
Аввалроқ Россия Мудофаа вазирлиги жасадлар тўғрисидаги хабарлар ва фотосуратларни “провокация” деб атаган. Маҳаллий турғунлар ва Украина расмийлари тинч аҳоли вакиллари ўлимида россиялик ҳарбийларни айблашяпти ҳамда бу ерда халқаро текширув ўтказиб, айбдорларнинг жазоланишини талаб қилишмоқда.
Германия мудофаа вазири ЕИни Россия гази импортидан воз кечиш имкониятини муҳокама қилишга чақирди
Германия мудофаа вазири Кристина Ламбрехт Киев яқинидаги Буча шаҳрида содир этилгани айтилаётган жиноятлар “жазосиз қолиши мумкин эмас”лигини билдирди ҳамда Европа Иттифоқидаги ҳамкорларни тезкор ва мувофиқлаштирилган жавоб чораларини кўришга чақирди.
Муҳтамал чоралардан бири сифатида Ламбрехт Россия газини импорт қилишдан воз кечиш чорасини айтган. Қизиқ жиҳати шуки, Ламбрехт ҳам канцлер Олаф Шольц каби Москвага дўстона позицияда бўлиб келган ҳамда Германиянинг Россия билан иқтисодий ҳамкорлигини дастаклаган Социал-демократик партиясини тамсил этади.
Аввалроқ Германия ташқи ишлар вазири Анналена Бербок (у Яшиллар партиясини тамсил этади) Европа Иттифоқининг Москвага қарши санкциялари кучайтирилиши, Германия ва унинг иттифоқчилари томонидан эса Украинага турли соҳаларда, шу жумладан ҳарбий соҳада дастак оширилишини очиқлаган.