Байден Путин дохил ҳарбий жиноятчиларни судлашга чақирди
АҚШ президенти Жо Байден Россия президенти Владимир Путин дохил ҳарбий жиноятчиларни судга тортишга чақирди.
Байден Украинага босқин пайтида содир этилган ҳарбий жиноятлар далилларини йиғиш лозимлигини айтди.
“Ўтган ой мени Путинни ҳарбий жиноятчи деганим учун танқид қилишганди. Бучада нималар содир бўлганини кўрдингиз. Бу унинг ҳарбий жиноятчи эканини тасдиқлайди”, деган Байден.
Германия ва Франциядан 70 чоғли россиялик дипломат ҳайдалади
Германия Ташқи ишлар вазирлиги россиялик 40 нафар дипломатни “исталмаган шахс” ўлароқ эълон қилган. Der Spiegel нашри хабарига кўра, улар Германияни беш кун ичида тарк этишлари шарт.
Германия ташқи ишлар вазири Анналена Бербок “Бучада тасвирга олинган фотосуратлар Россия раҳбарияти ва унинг пропагандасига эргашаётганларнинг мисли кўрилмаган шафқатсизлигидан далолат” эканини билдирган.
Расмий Париж ҳам, Le Monde нашрининг ёзишича, “мамлакат хавфсизлиги манфаатларига зид фаолият билан шуғулланган” россиялик дипломатларнинг бир гуруҳини Франциядан чиқариб юборишга қарор қилган. BFMTV хабарига мувофиқ, бу ерда гап “дипломатик мақомга эга бўлган” 30 чоғли россиялик устида кетмоқда.
Москва бу борада Берлинга ҳам, Парижга ҳам тегишли жавоб берилажагини билдирган.
БМТ бошқармаси: Украина – дунёда энг кўп мина кўмилган мамлакатлардан бири
Украина дунёдаги энг кўп мина кўмилган мамлакатлардан бирига айланган. Бу ҳақда БМТнинг гуманитар масалаларни мувофиқлаштириш бўйича бошқармаси маълум қилди.
“Янги миналар турар-жой уйлари, касалхоналар яқинига ва йўл четларига кўмилмоқда. Фуқаровий шахслар тузоқда қолиб, жанговар ҳаракатлар кетаётган жойлардан қочиш имкониятидан маҳрум бўлиши мумкин. Йўллар четига ҳамда аҳоли яшайдиган мавзеларга кўмилган миналар гуманитар ташкилотларнинг муҳтож одамларга ёрдам етказиб бериш имкониятини чеклаб қўймоқда”, дейилган бошқарманинг Твиттердаги саҳифасида.
Зеленский Бучага келди
Украина президенти Владимир Зеленский ҳарбийлар билан бирга Буча шаҳрига келди. У шаҳар аҳолисининг жасадлари топилган жойларни бориб кўрди, тирик қолган шаҳарликлар билаг суҳбатлашди.
Зеленский учрашув чоғида Россия Украинада ҳарбий жиноятларни содир этганини таъкидлади ва Бучада содир бўлган воқеаларни геноцид деб атади.
Россия қўшини Киев яқинидаги Буча қишлоғини тарк этганидан сўнг бу ерда тинч аҳолидан 410 кишининг жасади топилди. Улардан айримларининг қўллари боғланган ва қийноқларга солиб ўлдирилган.
Россия Бучадаги қатлиомга алоқадор эмаслигини ва бу Украинанинг провокацияси эканини иддао қилмоқда.