Би-би-си: Украинада Россиянинг камида 217 нафар зобити ҳалок бўлди
Россия расмий манбаларида 5 апрель ҳолатига Украинада ўлган камида 1085 нафар ҳарбий хизматчининг исмлари қайд этилган. Би-Би-Си рус хизмати уларни санаб, 217 нафари – кичик лейтенантдан генералгача бўлган зобитлар эканини, яъни зобитлар умумий миқдорда 20 фоиздан ортиқлигини аниқлади.
Россиянинг инсон талафотларига доир маълумотлари тўлиқ эмас. Россия Мудофаа вазирлиги йўқотишлар ҳақида охирги марта 25 март куни маълумот бериб, қурбонлар 1351 кишига етганини билдирганди. Бироқ Украина Қуролли кучлари ҳалок бўлган россиялик ҳарбийлар сони 18 300 нафарга етганини айтмоқда.
Уруш шароитида Озодлик бу рақамларни мустақил манбалар орқали тасдиқлатиш имконига эга эмас. Украинада ҳалок бўлган Россия армияси ҳарбийлари рўйхатида ҳозирда 10 полковник, 20 подполковник, 31 майор ва 155 нафар кичик унвонли зобит бор.
Шунингдек, Киев Россиянинг етти нафар генералини ҳам йўқ қилганини таъкидламоқда, Москва эса улардан фақат генерал-майор Андрей Суховецкий ўлимини расман тасдиқлаган.
Россия ҳарбийлари Днепропетровскда нефтебазани йўқ қилди
Россия армияси 6 апрелга ўтар кечаси Днепропетровск вилоятининг Новомосковск туманидаги нефтебазани,шунингдек, Синелников туманидаги заводлардан бирини бомбардимон қилди.
Ҳар икки объектда ёнғин юзага келган. Маҳаллий ҳокимиятнинг билдиришича, ҳалок бўлганлар ва яраланганлар йўқ. Ёнғин бир неча соат ичида ўчирилган.
Нефтебазадан ташқари рус ракеталари мазут резервуарларига ҳам отилган. Бу ерда ҳам ёнғинни ўчириш ишлари олиб борилмоқда.
Бухарестда Россия элчихонаси дарвозасига автомашина урилди. Ҳайдовчи ҳалок бўлди
Россиянинг Бухарестдаги элчихонаси дарвозасига 6 апрель куни эрталаб енгил автомашина урилди ва ёниб кетди. Маҳаллий полициянинг билдиришича, ҳайдовчи воқеа жойида ҳалок бўлган. Терговчилар воқеа тафсилотларини ўрганмоқда.
Digi24 телеканалининг ўз манбаларига таяниб хабар беришича, ҳайдовчи бу ишни атайлабдан қилган. Ҳайдовчи Россия Украинага бостириб киргани ортидан Бухарестда ўтган норозилик намойишлари пайтида элчихона атрофига қўйилган тўсиқни катта тезликда бузиб ўтган ва дарвозага урилган.
Элчихона қоровули ҳайдовчидан зудликда бу ерни тарк этишни талаб қилган. Аммо ҳайдовчи қоровулга қараб бир нима деб қичқирган ва ўзига ўт қўйиб юборган.
G4media порталининг ёзишича, ҳайдовчининг исми Богдан Драгич бўлган. У аввалроқ ижтимоий тармоқларда: "Мен ҳам украинман! Бутун инсониятга таҳдид қилаётган мазкур даҳшатли уруш якунига етгунига қадар, барчамиз ўзимизни украиналик деб ҳис қилсак яхши бўлар эди”, деган постни қолдирган.
АҚШ Украинага қўшимча 100 миллион долларлик ҳарбий ёрдам тақдим этади
Қўшма Штатлар Украинага қўшимча 100 миллион долларлик ҳарбий ёрдам – танкка қарши Javelin тизимларини тақдим этади. Бу ҳақда АҚШ давлат котиби Энтони Блинкен маълум қилди.
Россия Украина ҳудудига бостириб кирган 24 февралдан буён АҚШ Киевга 1,7 миллиард долларлик ҳарбий ёрдам кўрсатган.