Луганск вилоятида аҳоли ёппасига эвакуация қилинмоқда
Украина ҳукуматига кўра, Россия армияси ҳужумни кучайтиришга тайёрланяпти.
Ўтган куни Донецк ва Луганск вилоятлари раҳбарлари, шунингдек вақтинча ишғол этилган ҳудудларни реинтеграция қилиш масалалари бўйича вазир Ирина Верешчук украинларни мамлакат ичкарисига кўчишга чақиришган эди.
Луганск вилояти ҳарбий маъмурияти бошлиғи Сергей Гайдай аҳолидан кўчишни пайсалга солмасликни илтимос қилди. “Кеча темир йўлни ўққа тутиб, зарар етказишган эди. Изларни таъмирлатдик, эрта-индин яна шунақа ҳолат бўлса, таъмирлаш имкони бўладими, йўқми – номаълум”, деди у.
Днепр шаҳри мэри Борис Филатов ҳам аёллар, болалар, кексалар, шунингдек саноат корхоналари ва муҳим инфратузилма объектларида ишламайдиганларга дарҳол эвакуацияга жўнашни тавсия этди.
АҚШ Сенати Украина учун ленд-лиз дастури тўғрисидаги қонунни маъқуллади
Бу Украинага ҳарбий техника етказиб беришни тезлаштиради.
6 апрель оқшомида АҚШ Сенати Иккинчи жаҳон уруши йилларида қўлланган дастурни тиклашга доир қонун лойиҳасини қабул қилди. Мазкур ҳужжат президент Жо Байденга Украинага қурол-аслаҳа ва бошқа ҳарбий юкларни самарали етказиб бериш имконини беради.
“Украина демократияси мудофааси учун ленд-лиз ҳақидаги қонун” Украинага муҳим ҳарбий асбоб-анжом ва бошқа юкларни етказиб беришни бюрократик тартиб-таомиллар қисқариши ҳисобига тезлаштиради.
У қурол-аслаҳаларни қабул қилувчи мамлакатга қийматини кейинчалик тўлаб бериш шарти билан совға қилишдир.
Иккинчи жаҳон уруши даврида жорий этилган ленд-лиз дастури урушда бурилиш ясашга ёрдам берган, деб ҳисобланади. АҚШ ленд-лиз туфайли иттифоқчиларининг захираларини қисқа фурсат ичида тўлдиришга муваффақ бўлган.
Хорватия Россия дипломатларини бадарға қилмоқда
Хорватия ЕИ ва НАТОга аъзо бошқа мамлакатларга қўшилиб, Россия дипломатларини бадарға қиладиган бўлди. Бу ҳақда ташқи ишлар вазири Гордан Грлич-Радман маълум қилди.
“Бу бизнинг бирдамлигимиз нишонаси, шунингдек юз бераётган воқеаларга, Украинанинг Буча ва бошқа шаҳарларидаги мудҳиш манзараларга жавобимиздир”, деди Грлич-Радман.
Аввалроқ ЕИга аъзо 13 мамлакат Россия дипломатик ваколатхоналари ходимлари бадарға қилинишини эълон қилган эди. Европа Россиянинг жами 300 га яқин дипломатини ҳайдамоқда.
Украина Қуролли Кучлари Бош штаби: Россия Днестрбўйидан ҳужумга тайёрланмоқда
Украин ҳарбийлари маълумотига кўра, Россия қўшинлари Украина жанубидаги тактик аҳволини яхшилаш учун тан олинмаган Днестрбўйи республикаси ҳудудидан фойдаланиши мумкин.
Бош штаб фикрича, “Тирасполь аэропортида учоқларни қабул қилишга тайёргарлик ишлари” шундан далолат бермоқда. Аммо Россия ҳарбийлари мазкур аэродромга қандай учиб бориши тушунарсиз: Днестрбўйи ҳамма тарафдан ўз ҳаво ҳудудини Россия учоқлари учун ёпган мамлакатлар билан қуршалган.