Молдовада “Георгий тасмаси”ни намойиш қилган шахслар катта миқдорда жаримага тортилади
Молдовада “Георгий тасмаси” ҳамда Россиянинг Украинага ҳужумини маъқуллаш учун фойдаланилаётган Z ва V ҳарфли рамзларни тайёрлаш, сотиш, сақлаш ва намойиш қилиш тақиқланди.
Россия агрессиясига хайрихоҳлик ўлароқ кўрилган байроқлар, ҳарфлар, тасмалар ва бошқа атрибутика намойиши учун бундан буён Молдовада жисмоний шахслар 9 минг лей (тақрибан 450 евро) миқдорида, юридик шахслар эса 18 минг лейгача (тақрибан 900 евро) миқдорида жаримага тортилиши мумкин.
Латвияда жорий йилнинг 9 майи мотам куни деб эълон қилинади
Латвия парламенти 2022 йилнинг 9 майини Украинада жабрланган ва ҳалок бўлганларни хотирлаш куни деб эълон қилишни кўзда тутган қонун лойиҳасини қабул қилди.
Бу куни мамлакатда оммавий кўнгилочар тадбирлар ва байрам тадбирларини ўтказиш ман қилинади, 8 ва 9 май кунлари эса мушак отиш тақиқланади.
Қонун 2022 йил 11 майидан ўз кучини йўқотади.
ЕИда Россиядан кўмир импортига эмбарго жорий этиш қарори маъқулланди
Европа Иттифоқи мамлакатлари Россияга қарши санкциялар бешинчи пакети доирасида Россиядан кўмир импорт қилишга эмбарго жорий этишга оид қарор юзасидан келишувга эришишди.
Санкция рўйхатига тадбиркорлар, журналистлар ва ҳарбийлар киритилади.
Чеклов чоралари билан Россияга қурол-аслаҳа етказиб беришни ман қилиш кўзда тутилган.
Санкцияларга мувофиқ, Россия кемалари ҳамда Россия ширкатлари операторлик қилган кемаларнинг Европа Иттифоқи мамлакатлари портларига кириши, шунингдек Россия ва Беларусга қарашли юк ташиш автоширкатларининг ЕИда ишлаши тақиқланади.
Донбасс яна урушнинг асосий фронтига айланмоқда
Россия Украинанинг Донецк ва Луганск вилоятларида ҳужум амалиётига ҳозирлик кўрмоқда, дея маълум қилди Украина ҚК Бош штаби.
Россия ҳарбийлари Слобожанск, Донецк, Южнобужск ва Таврия йўналишларида фаол ҳаракатларни давом эттиришмоқда. Попасная, Рубежное ва Новобахмутовка шаҳарлари ҳам зарбалар остида қоляпти. Харьковни ўққа тутиш давом этмоқда.
Пентагон Россия армияси Украинанинг Киев ҳамда Чернигов вилоятларидан қўшинларини тўлиқ олиб чиқиб кетганини маълум қилди.
