Краматорск вокзалига ҳужумда қурбон бўлганлар сони 52 кишига етди.

Краматорск вокзалидаги қонли ҳужум қурбонлари сони 50дан ошди. Украинадаги уруш хроникаси

март 23, 2022

Украинадаги урушнинг 45-куни.

Краматорск вокзалига ҳужумда қурбон бўлганлар сони 52 кишига етди.
Европа Иттифоқи Россия ҳарбий корхоналари ва банкларига нисбатан санкцияларни кенгайтирди.
Россия Адлия вазирлиги реппер Фэйсни хорижий агент деб эълон қилди
Россия ҳукумати Amnesty International, Human Rights Watch ва бошқа 13 халқаро ноҳукумат ташкилотларининг Россиядаги ваколатхоналарини ёпди.
Россия Украинанинг Донецк ва Луганск вилоятларига йирик ҳужум амалиётини бошлашга ҳозирланмоқда, дея маълум қилди Украина Қуролли кучлари Бош штаби. Украина расмийлари шарқий ҳудудлардаги аҳолини мамлакат шарқига кўчишга чақирмоқда.
Amnesty International Россия қўшинлари Киев вилоятида тинч аҳолини ўлдиргани ва зўрлаганини кўрган гувоҳларнинг ифодаларини эълон қилди. Германиянинг Der Spiegel журнали Бучада бўлган россиялик ҳарбийларнинг хуфёна ёзиб олинган телефон сўзлашувларини очиқлади: ёзувларга кўра, ушбу жиноятлар Украина аҳолисини қўрқитиш мақсадида содир этилган ва бу олдиндан ўйланган тизим бўлган. Meduza нашри эса Россия расмийларининг иддаоларини рад этувчи видеосуриштирувини ёйинлади.
Путиннинг матбуот котиби Дмитрий Песков Sky News’га берган интервьюсида Россия Украина ҳудудидаги ҳарбий ҳаракатларда шахсий таркибда катта талафотлар кўрганини тан олди. Кремль вакили аскарий йўқотишларнинг аниқ сонини очиқламади.
РФ ташқи ишлар вазири Сергей Лавров Украинани Истанбулдаги келишувлардан оғишаётганликда айблади. Зеленский маъмурияти раҳбари Михаил Подоляк бу баёнотни “босим қилишга уриниш” деб атади.
Евроиттифоқ Россияга қарши санкцияларнинг бешинчи туркумини келишди. Унда, жумладан, Россия кўмири импортини буткул тақиқлаш назарда тутилган.
АҚШ Сенати Украина учун ленд-лиз дастурини бир овоздан маъқуллади – дастур сўнгги бор Иккинчи жаҳон уруши даврида қўлланган.
БМТ Бош ассамблеяси Россияни Инсон ҳуқуқлари кенгаши аъзолигидан чиқарди.
Молдовада Георгий тасмаси ва Россияга оид бошқа милитаристик рамзлар тақиқланмоқда.
Чет эл дипломатлари Киев шаҳрига қайта бошлади.

Черниговни боқиб турган кўприк вайрон бўлди

"Суспiльне" нашри мухбири, черниговлик Александр Котенкога кўра, шаҳарга гуманитар ёрдам кираётган кўприк рус ҳарбийлари авиаҳужумида портлатилган:

"Бугун тунда рус босқинчилари кўприкни ҳаводан урди. Бу кўприк орқали аҳоли шаҳардан чиқаётганди ва шаҳарга гуманитар ёрдам кираётганди. Энди қандай қилиб шаҳарга ёрдам олиб кирилади - номаълум. Шаҳарда "яшил коридорлар" йўқ эди: одамлар тақдирга таваккал қилиб шу кўприкдан чиқаётганди. Шаҳардан чиқаётганларни ўққа тутишгани тасдиқланган ҳолатлар бор".

Киевда яна бир савдо маркази вайрон бўлди

Киевнинг Святошенский ва Шевченковский туманларида савдо маркази ҳамда хусусий секторга тегишли бинолар ўққа тутилди.

Шаҳар маъмурияти вакили Николай Поворозникка кўра, камида 4 киши жабрланган. Бир неча хусусий уй ва кўпқаватли бинода ёнғин содир бўлган.

Польшадан ўнлаб россиялик дипломат чиқариб юборилиши мумкин

Польша разведкаси шпионликда гумон қилинган 45 россиялик дипломат рўйхатини тузганини маълум қилди.

Польша хавфсизлик хизмати матбуот котиби Станислав Жарынга кўра, бу дипломатларни мамлакатдан чиқариб юбориш тавсия қилинади.

Бу давлатдаги рус элчиси Польша ИИВга чақирилган. Агар содир бўлса, бу икки давлат тарихида илк бор йирик гуруҳдаги дипломатнинг қувилиши бўлади.

Британия Мудофаа вазирлиги Украинадаги жанг ҳаракатларига оид навбатдаги ҳисоботни эълон қилди

Вазирликка кўра, мамлакат шимолида вазият статик, Россия ҳарбий кучлари эҳтимолий йирик ҳужумлар олдидан қайта гуруҳланмоқда.

Рус ҳарбийлари украин қўшинларини мамлакат шарқида қуршовга олишни режалаётган бўлиши мумкин, бунинг учун шимолда Харьков ва жанубда Муриуполдан ҳаракатланмоқда.

Рус кучлари, шунингдек, Николаевни қуршаб олишга уринмоқдалар, улар ғарбда Одесса томон ҳаракаталанишни мақсад қилган бўлиши мумкин.

Давомини ўқинг