Россия ТИВ АҚШнинг Москвадаги элчихонасига РФдан чиқариб юборилажак америкалик дипломатлар рўйхатини топширди
Россия Ташқи ишлар вазирлиги АҚШнинг Москвадаги элчихонаси катта дипломатига “исталмаган шахс” дея эълон қилинган ва Россияни тарк этиши лозим бўлган америкалик дипломатлар рўйхатини топширган. Бу ҳақда Россия ТИВ ахборот департаменти маълумот тарқатди.
ТИВ бу қадамни Россиянинг БМТдаги доимий вакиллиги ходимларининг АҚШдан бадарға қилинишига жавоб ўлароқ қабул қилганини билдирган.
“Америка томонига АҚШнинг Россияга қарши ҳар қандай душманона хатти-ҳаракатига қатъий ва адекват жавоб берилиши кескин тарзда билдирилган”, дейилган ТИВ хабарномасида.
Россия қўшинлари Украина ҳудудига бостириб кирганидан кейин АҚШ БМТдаги Россия миссиясининг 12 нафар ходимига 7 мартгача Қўшма Штатларни тарк этишни буюрган. Ўшанда Россиянинг БМТдаги доимий вакили Василий Небензя бу қадам билан “АҚШ БМТ қароргоҳига мезбонлик қилаётган мамлакат мажбуриятларини қўпол равишда бузаётган”ини қайд этган, Россия ТИВ эса бу қадамга лойиқ жавоб берилишини ваъда қилган.
Россияда Google News янгиликлар хизматини фаолияти чекланди
Роскомнадзор “Украинада олиб борилаётган махсус амалиётга доир фейклар” важидан Россия ҳудудида Google News (Google Янгиликлар) интернет хизматига киришни чеклаб қўйди.
“Россия Бош прокуратураси талабига биноан мамлакат ҳудудида News.Google интернет хизматига кириш чекланди”, дейилган “Роскомнадзор” хабарномасида.
Идора “Американинг ушбу янгиликлар хизмати Украина ҳудудида олиб борилаётган махсус ҳарбий амалиёт ҳақида ишончсиз маълумот берувчи кўплаб мақола ва материаллар тарқалишига йўл очган”ини иддао қилмоқда.
АҚШ Россияни Украина ҳудудида ҳарбий жиноятлар содир этганликда айблади
Қўшма Штатлар Украинага бостириб кирган Россия қўшинлари ҳарбий жиноятларни содир этгани ҳақида илк бор баёнот берди.
АҚШ давлат котиби Энтони Блинкен номидан 23 март куни ёйинланган баёнотда Россия қўшинларининг “мўлжалсиз зарбалари ва тинч аҳолига қаратилган ҳужумлари, шунингдек бошқа жиноятларига доир ишончга лойиқ кўплаб хабарлар мавжуд”лиги айтилган.
Баёнотга кўра, Россия қўшинлари турар-жой бинолари ва касалхоналарни, мактаблар, савдо марказлари ва тез ёрдам машиналарини яксон қилган, бунинг натижасида минглаб тинч аҳоли нобуд бўлган ва яраланган.
Франциянинг Renault ширкати Москвадаги заводи ишини тўхтатиб қўйди
Франциянинг Renault автомобилсозлик ширкати Москвадаги заводи фаолиятини вақтинча тўхтатди.
Renault Group сайтида маълум қилинишича, директорлар кенгаши “Россияга нисбатан жорий этилган халқаро санкцияларга риоя қилиш заруратидан келиб чиққан ҳолда” шундай қарор қабул қилган.
Москвадаги Renault заводи 28 февраль куни ишлаб чиқаришни тўхтатиб, 21 мартда қайтадан фаолиятини бошлаган эди.
23 март куни Украина президенти Владимир Зеленский Франция парламентига мурожаат қилиб, француз ширкатлари, жумладан, Renault’ни Россия бозорини тарк этишга чақирган.
Москвадаги Renault заводи 2005 йилда очилган бўлиб, унда Renault Kaptur, Renault Arkana ҳамда Dacia Duster каби моделлар ишлаб чиқарилади.
