ЕИ бош дипломати: Россия ҳозирча тинчлик музокараларидан манфаатдор эмас
Россия ҳарбий мақсадларига эришишни истайди, тинчлик музокараларини эмас. Бу ҳақда Европа Иттифоқи ташқи сиёсат маҳкамаси раҳбари Жозеп Боррель Испаниянинг TVE телеканалига берган интервьюсида маълум қилган.
Мулозимга кўра, Россия Украинанинг Молдова билан чегарагача бўлган соҳилбўйи ерларини ишғол қилиб, Украинани денгиздан ажратиб қўймоқчи.
“У [Россия] ўз позициясини кучли қилиб олганидан кейингина музокараларга жиддий киришишни истайди”, дея иқтибос келтирган Боррель сўзларидан Reuters агентлиги.
ЕИ бош дипломати тахминича, барчаси яқин 15 кун ичида ҳал бўлади.
“Тарихга нима киради, дейсизми? Украиналикларнинг қаршилик кўрсатишга қодирлиги киради тарихга”, деган Жозеп Боррель.
“Эхо Москви”нинг собиқ бош муҳаррири эшиги олдига кесилган чўчқа калласи ташлаб кетилди
“Эхо Москви” радиоси собиқ бош муҳаррири Алексей Венедиктов ўз эшиги олдига кесилган чўчқа калласи ташлаб кетилганини маълум қилди.
Венедиктовга кўра, эшикнинг ўзига Judensau ёзуви ёзилган Украина герби ёпиштириб кетилган. Judensau атамаси “яҳудий чўчқаси” деган маънони англатади.
Антисемитизм билан йўғрилган бу каби меъморий унсур XIII асрда Германияда пайдо бўлиб, кейинчалик бошқа мамлакатларга тарқалган. Бугунги кунда бу атамадан асосан неонацистлар фойдаланади.
Япония яна 25 нафар россияликнинг мол-мулкини музлатмоқчи
Япония Россиянинг 81 та ташкилотига экспортни тақиқлаб, россиялик яна 25 нафар шахснинг активларини музлатиб қўяди.
Бош вазир Фумио Кисидага кўра, Япония Россияни савдо-сотиқ ишларида имтиёзли мамлакат мақомидан маҳрум этиш ҳамда ички биржаларга санкция рўйхатига тушган ташкилотлар билан криптовалютада савдо қилишни тақиқлаш чораларини кўради. Айни пайтда Украинага кўрсатилаётган гуманитар ёрдам ҳажми оширилади.
Аввалроқ Токио россиялик 15 нафар жисмоний шахс ва 9 та ташкилотга қарши санкция киритган эди.
АҚШ ва ЕИ Россиянинг криптовалюта воситасида санкцияларни айланиб ўтишига монелик қилмоқчи
Қўшма Штатлар ва Европа Иттифоқи Россиянинг криптовалюта ёрдамида санкцияларни айланиб ўтишига қарши ҳамкорликда чора кўради. Бу ҳақда АҚШ президенти ва Европа комиссияси раисининг қўшма баёнотида айтилган.
Ҳужжатга кўра, АҚШ ва ЕИ, шунингдек, Европанинг энергетика хавфсизлиги, келажакдаги озиқ-овқат инқирозини батараф қилиш устида ишлаб, Украинага гуманитар ёрдам тақдим этиш бўйича ҳамкорлик қилади.
Жо Байден ва Урсула фон дер Ляйен қўшма баёнотда журналистлар, ҳуқуқбонлар ва коррупцияга қарши суриштирув олиб бораётган тадқиқотчиларга молиявий дастак бериш, Украинанинг демократик интилишларини мустаҳкамлаш ҳамда ҳарбий жиноятларни ҳужжатлаштириш масалаларига ҳам алоҳида эътибор қаратганлар.
