“Единая Россия” Мариуполда ўз штабини очди
Россиянинг иқтидордаги “Ягона Россия” (“Единая Россия” партияси уч ҳафтадан буён қамалда қолаётган Украинанинг Мариупол шаҳрида ўз штабини очди. Бу ҳақда партия сайтида хабар қилинган. Шунингдек, Мариупол шаҳар кенгаши ҳам бу ҳақда Телеграм каналида хабар берди.
Шаҳарнинг шимоли-ғарбида ташкил қилинган ушбу штабни “Ягона Россия” вакиллари “гуманитар ёрдам маркази” деб номламоқда.
Украина расмийлари эса русларнинг бу штаби шаҳар аҳлига партия тарғиботини олиб бораётганини айтмоқда.
Урушларни ўрганувчи АҚШдаги ISW институти маълумотига кўра, 25 март куни рус қўшинлари Мариупол марказига кириб борган.
Хабарларга кўра, Мариуполдаги украин расмийлари шаҳарни тарк этган.
Луганскдаги бугунги вазият
Луганск вилоятида вазият жиддийлигича қолмоқда, отишмалар тўхтамади.
Сўнгги бир суткада 30та бино, жумладан, 23 та аҳоли турар-жойи вайрон қилинган.
Луганск вилояти ҳарбий департаменти раҳбари Сергей Гайдайнинг “Настояшчее время” телеканалига айтишича, рус ҳарбийлари Рубежное шаҳрини ишғол қилиш учун жон-жаҳди билан курашмоқда.
Украинада еттинчи рус генерали ўлдирилди
Россиянинг Украинага урушининг 30 кунида жами еттита россиялик генерал ҳалок бўлди.
Еттинчи генералнинг ўлими ҳақида Олий Рада депутати Алексей Гончаренко “Апостроф” нашрига хабар қилган.
Гончаренкога кўра, Россий қўшинларининг Жанбуий округ 49-армия командири, генерал-лейтенант Яков Резанцев ҳалок бўлган.
Ҳозирча бу хабарни на Украина ва на Россия томони тасдиқлагани йўқ.
Россия Афғонистондаги кўп йиллик уруши давомида фақат 5 та генералидан айрилган холос.
АҚШ ва ЕИ Россия газига қарамликдан қутқарувчи келишувни имзолади
Қўшма Штатлар жорий йилда Россия газидан воз кечаётган Европа Иттифоқига 15 миллиард куб метр суюлтирилган газ етказиб бериш ҳаракатида. Бу ҳақда бугун Трансатлантик иттифоқчилар расман хабар қилишди.
АҚШ президенти Жо Байден ва Еврокомиссия раҳбари Урсула фон дер Ляен жума куни Россиянинг Украинага бостириб кириши ортидан Европанинг Россия газига қарамлигини камайтириш учун ишчи гуруҳ тузилганини эълон қилди.
Комиссия, шунингдек, Европа Иттифоқи мамлакатлари билан камида 2030 йилгача қўшимча 50 миллиард куб метр қўшимча суюқ ёқилғ етказиш имкониятини таъминлаш учун ишлайди, дейилади Оқ уй хабарида. Бу АҚШнинг ўтган йилги Европа Иттифоқига 22 миллиард кубометрлик экспортига қўшимча бўладими ёки йўқ бу номаълум.
Сўнгги ойларда Европадаги газ нархи дунёда энг юқори кўрсаткичга етди. Блок етказиб берувчи давлатлар билан музокаралардан сўнг газ таъминотини кўпайтиришга киришди. Натижада январь ойида 120 дан ортиқ кемаларда 10 миллиард куб метр суюлтирилган газ етказиб берилди.
