Разведка: Россия ҳар турли қўшинларни жангга ташлади, бу бошқарув умумийлиги йўқолишига олиб келади
Буюк Британия Мудофаа вазирлиги сўнгги ҳисоботида Мариуполь шаҳрини штурм қилишга мунтазам қўшинларга мансуб бўлмаган кўплаб қўшимча бўлинмалар, жумладан Чеченистондан келган тузилмалар жалб этилганига эътибор қаратди.
Вазирлик хулосасига кўра, чеченистонлик “бир неча минг аскар” асосан Мариуполь ҳудудида ва Луганскда жамланган.
“Афтидан, бу кучлар кўнгиллилардан ва одатда Чеченистон раҳбари Рамзан Қодиров ҳокимиятини тутиб туриш учун масъул бўлган миллий гвардия тузилмаларидан ташкил топган. Қодиров ушбу контингентни шахсан назорат қилади, амакиаччаси Адам Делимханов эса, катта эҳимол билан, Мариуполда чечен дала қўмондони ўлароқ ҳаракат қилди”, дейилади ҳисоботда.
Айтилишича, “таркибан хилма-хил ҳарбий хизматчиларнинг жанг майдонига йўлланиши Россиянинг Украинадаги кампаниясини таъминлашда жиддий муаммоларга йўлиққанидан далолат беради ва бошқарув умумийлигини йўққа чиқариб, Россиянинг ҳарбий ҳаракатларига зарар етказишда давом этади”.
Канада Путин, Лавров ва яна минглаб россияликнинг ўз ҳудудига киришини тақиқлади
Канада Украинадаги уруш оқибатида санкциялар рўйхатига киритилган Россия, Беларус ва Украина фуқароларига нисбатан чеклов чораларини кучайтирди. Жумладан, Россия президенти Владимир Путин, Россия ташқи ишлар вазири Сергей Лавров, Россия мудофаа вазири Сергей Шойгу ва уларнинг оила аъзоларига Канадага кириш тақиқланди. Бу ҳақда Канада жамоат хавфсизлиги вазири Марко Мендичино маълум қилди.
Расман билдирилишича, санкциялар рўйхатига киритилган шахслардан кимдир айни пайтда Канадада экани аниқланса, у мамлакатдан бадарға қилинади.
Канада Украинадаги урушга алоқадор экани айтиладиган минглаб жисмоний шахсларни қора рўйхатга киритган. Уларнинг асосий қисми Россия фуқароларидир.
Аввалроқ Австралия ва Янги Зеландия ҳам Пуьин ва бошқа рус расмийларига мамлакатга киришни тақиқлаган эди.
Оддесса вилоятига Қора денгиздан туриб ракетадан яна бир зарба берилди
Оддесса вилоятига Қора денгиздан туриб ракетадан яна бир зарба берилди, деб битлдирди Украина Қуролли Кучларининг “Жануб” қўшини қўмондонлиги.
“Душман тонгга яқин минтақадаги аҳоли пунктларига зарба бериб, инфраструктурани вайрон этиш ва тинч аҳолига руҳий босим кўрсатишда давом этмоқда”,-дейилади расмий билдирувда.
Маълум қилинишича, ракета зарбаси оқибатида жиддий зарар кўрилмаган ва жабрланганлар ҳам бўлмаган. Воқеа жойида тергов гуруҳи дастлабки текширув ишларини олиб бормоқда.
Уруш шароитида таомонларнинг бу каби баёнотларини мустақил текшириш имконияти мавжуд эмас.
Россия ФХХ Кемеровода “украина нацистлари тарафдори” бўлган “диверсант” қўлга олинганини билдирди
Россия Федерал хавфсизлик хизмати - ФХХ Кемеровода гўёки “украина нацистлари тарафдори” бўлган “диверсант” қўлга олинганини иддао қилди. Расман билдирилишича, Россия фуқароси бўлган “диверсант” иккита электр узатиш линиясининг ишдан чиқарилишига алоқадор бўлган.
Хабарда айтилишича, линияларнинг ишдан чиқарилиши оқибатида Кемеровода электр таъминотида вақтинчалик узилишлар юзага келган.
ФХХ қўлга олинган шахснинг уйидан симёғочларнинг мустаҳкамлигини таъминловчи болтлар, канистрага қуйилган бензин, иккита пневматик тўппонча ва иккита жанговар ҳанжар топганини иддао қилди. ФХХга кўра, қўлга олинган шахс кундалик тутган ва унга тайёрланаётган диверсиялар тўғрисидаги маълумотларни ёзиб борган.
“Интерфакс”нинг хабар беришича,қўлга олинган шахс ўз айбини тан олган ва ҳарбий комиссариатга ўт қўйишни режалаштирганини ҳам айтиб берган
Мазкур шахсга нисбатан “Мулкни атайлабдан йўқ қилиш ёки зарар етказиш” ва “Диверсия” моддалари асосида жиноят иши очилган.