"Азовсталь" тепасида ҳилпираб турган Украина байроғи музейга топширилди
Украина Мудофаа вазирлиги бош разведка бошқармаси бошлиғи Кирилл Буданов "Азовсталь" тепасида ҳилпираб турган, Россия ишғоли пайти ўқ ёмғиридан илма-тешик бўлган Украина байроғини музейга топширди.
Киевдаги Иккинчи жаҳон урушидаги Украина тарихи миллий музейида “Украина – хочга михланиш” деб номланган экспозиция очилди.
Байроқни топшириш маросимида Мариуполни ҳимоя қилган ҳарбийлар, шунингдек, асирга олинган ҳарбий хизматчиларнинг рафиқалари иштирок этди.
Невзоров: Мен жабрланганлар томонидаман
Украина президенти Зеленский, россиялик таниқли журналист, собиқ телебошловчи ва Давлат думаси собиқ депутати, президент Путининг собиқ ишончли вакили - Александр Невзоров ва рафиқаси Лидияга Украина фуқаролигини тақдим қилди.
Бу ҳақда Украина Ички ишлар вазири маслаҳатчиси Антон Геращенко маълум қилди.
Невзоров Россия ҳукумати ва президенти Путиннинг ашаддий танқидчиси, Украинадаги урушни энг бошидан бери қоралаётган, ўта кескин чиқишлар қилиб келаётган журналистдир.
Бунинг учун у Россияда жиноий жавобгарликда гумон қилиниб, қидирувга берилган. Шу йилнинг апрелида эса хорижий агентлар рўйхатига тиркалган эди.
Ўзининг телеграм каналида Невзоров Украина фуқаролиги берилганига шундай изоҳ берди:
“Ўққа тутилаётган одамнинг ёнида туриш - осон эмас, тўғри. Табиийки, отаётганлар сафига туриш осонроқ. Бунда томонларни ҳаркимнинг ўзи танлайди. Лекин шуни тушуниш керакки, бу ерда учинчи вариант йўқ. Мен эса жабрланганлар томонидаман. Ва мен, Украинанинг қийналган, умидсизликка тушган ҳамда қонга беланган халқидан, ўз сафидан жой бергани учун, жуда миннатдорман”.
“Москва” крейсеридаги аскар отаси: оғзимни юмишмоқчи!
Россияда эса урушда қурбон берилган рус аскарларининг оиласи, ўлган аскарлар ҳақида маълумот тополмаётгани, аксинча босим остида қолаётганини айтмоқда.
Қора денгизда чўкиб кетган “Москва” крейсерида бедарак йўқолган муддатли хизматдаги аскар Егор Шкребецнинг отаси - Дмитрий Шкребец, уйига “жиддий идорадан одамлар” келгани ва гўёки, “экспертиза қилиш учун” ноутбукни олиб кетганини маълум қилди.
Айтишича, исмини очиқламаган кучишлатар ходимлар унга бу ноутбук, айрим шахслар Шкребец номидан “баъзи ташкилотларга портлатиш билан таҳдид қилишгани” сабабли олинганини айтишган.
Бедарак йўқолган аскарнинг отаси ҳеч кимга электрон почтадан хабар йўлламагани, аммо кучишлатар идоралар уни “террорчилик ҳужуми ҳақида қасддан ёлғон хабар бериш”да айблаб, устидан 207-модда бўйича жиноят иши очиши мумкинлигидан хавотирда эканини урғуламоқда.
“Шу йўл билан оғзимни юмишмоқчи! Ҳеч нима дейишмаяпти. “Москва” крейсерига алоқадор нима сўрасанг – чурқ этишмайди. Интернетдан крейсерга доир бирон янгилик қидириб кўринг – ҳеч вақо тополмайсиз. На крейсер ҳақида, на ундаги одамлар ҳақида. Ақлим лол! Эркин жамият ва эркин мамлакатда шунақа бўлиши мумкинми? Нега биз буларни муҳокама қилмаймиз? Нималар бўляпти ўзи? Қандай қилиб флагмандан айрилдик? Шу қадар аҳмоқлик ва калтабинлик бўладими? Нега бунақа, сира тушуна олмайман”, дейди Дмитрий Шкребец.
Украинанинг 2 мингдан ортиқ профессионал спортчиси урушга кирди
Украина спорт вазири Вадим Гутцайтга кўра, Россия босқини бошланган кундан бери Украинанинг икки мингдан ортиқ профессионал спортчиси урушга кирган, улардан 59 нафари ҳалок бўлган.
Вадим Гутцайтнинг “Настояшчее время” телеканалига айтишича, жанглар натижасида ўнлаб спорт объектлари вайрон бўлган, айримлари мутлақо тиклаб бўлмас ҳолга келган.
Энди Украина миллий терма жамоалари машғулотларни чет элда ўтказишга мажбур бўлмоқда.
“Икки мингдан зиёд спортчимиз мамлакатни мудофаа қилишмоқда, биз улар билан фахрланамиз. Украин аскарлари борлиги учун спортчилар халқаро мусобақаларда қатнашиш, дунёга бизнинг ғолиб мамлакат эканимизни кўрсатиш имконига эга бўлмоқдалар”, деди Вадим Гутцайт.